A ngivwala mu muvu wa 1955, ku kitatu kya ana a mala a jitata jetu, eme ngi ndenge. Nga kudila ku lwiji ya ixi ya Finlândia, ku mbandu a ixana mbanza ya Vantaa.

Tumivu ande dya kungivwala, mam’etu amubatizala kala Mbangi ya Jihova. Maji tat’etu kakiwabhela, mwene kexile mu kwehela mam’etu kudilonga o Bibidya n’etu tu ana, mba kutwambata mu yonge. Mu kiki, mwene wexile mutulonga o milongi ya dyanga ya Bibidya kyoso tat’etu kexile kubhata.

Tunde mu undenge wami, kingexile muxikina kubhukumukina Jihova. Mu kifika, sayi kizuwa, kyoso ki ngexile ni sambwadi dya mivu, o mulongexi wami wa xikola, wangikwatela njinda mukonda dya kudituna o kudya kwofungise ni manyinga (ku Finlândia o kudya kuku akwixana verilättyjä). Ni lukwaku lumoxi, mwene wangibweta ku matama phala kujikula o dikanu dyami, anga ni lukwaku lwamukwa, mwene wakwata o ngalafu yexile ni kudya, yu wexile mu ixinjika mu kanu dyami. Ngatena kukatula o ngalafu bhu lukwaku lwe.

Kyoso ki ngexile ni 12 kya mivu, tat’etu wafu. Mu kusuluka, ngatenene kya kuya mu yonge. O jiphange mu kilunga exile mu ngisuwa kyavulu, kiki kyangibhangesa kukula mu nzumbi. Ngamateka kutanga o Bibidya izuwa yoso ni kudilonga o madivulu m’etu a kilunga ni kuswina kwoso. Mukonda dya kiki, atena kungibatizala mu kizuwa kya 8 kya mbeji ya Kakwinyi ka 1969, mu kitala kya 14.

Kyoso ki ngazubha o xikola, ngamateka kusidivila  kala muboki wa thembu yoso. Mu kubhita tusemana, ngayi muboka mu mbanza ya Pielavasi, kididi kyala bhukaxi ka ixi ya Finlândia, kwabhindamene dingi aboki.

Kazola kami Sirkka, twadijiya mu mbanza ya Pielavasi. Ngamuwabhela kyavulu mukonda mwene wexile muthu wa lenduka, yu wazolele we kyavulu Jihova. Mwene kexile musota fuma mba jimbote. Etu twamesenene kubhanga yoso itwatenene mu sidivisu ya Jihova, anga twexile polondo phala kuxikina kabasa kikalakalu kyatubhanene. Twa kazala mu kizuwa kya 23 kya Katanu ka 1974. Muveji dya kukatula tu izuwa phala kunyoha, twayi musidivila mu mbanza ya Karttula, kwabhindamene dingi aboki a Utuminu.

Tunde ku dimatekenu dya ukaza wetu, Jihova wene mulondekesa kwila, wanda langa o ibhindamu yetu, se tuta o Utuminu we ku pholo ku mwenyu wetu. (Mat. 6:33) Mu kifika, ku Karttula, etu kitwexile ni dikalu. Ku dimatekenu, twexile mu kwendela ku bixi. Maji mu kixibhu, kwexile mubhanga mbambi yavulu. Phala kuboka mu jimbambe jamakota, twabhindamene dikalu. Maji etu kitwexile ni kitadi phala kusumba dikalu.

Sé kututangela, kota dyami dya diyala wayi mutukunda. Ni henda yoso watubhana o dikalu dye. Mwene wafutile kya yoso. Etu twabhingile kya ngo kusumba o Combustível. Mu kiki, twexile kya ni dikalu di twabhindamene.

Jihova walondekesa kwila wexile mulanga o ibhindamu yetu. O kikalakalu kyetu kyexile ngo o kuta o Utuminu we ku pholo.

Mu muvu wa 1978, kyoso ki twexile mubhanga o Xikola ya Aboki a Thembu Yoso, phange Raimo Kuokkanen, a mulongexi wa xikola, watuswinisa kusoneka petisá phala o Xikola ya Ngiliyade. Kyenyiki, twamateka kudilonga o dimi dya kingileji phala tukale polondo. Maji, ku muvu 1980, ande mwene dya kusoneka o petisá, atwixana phala kusidivila ku filiyale ya Finlândia. Mu kithangana kyenyokyo, o akwa Betele katokalele kusoneka petisá phala o Xikola ya Ngiliyade. Maji etu twamesenene kusidivila mu kididi kyoso-kyoso kyandalele Jihova, kana bhu kididi ki twamesenene etu. Mu kiki, twaxikina o kixanu. Ne kiki, twasuluka mu kudilonga o Kingileji, phala ngo kukala polondo se kumoneka kithangana kya kubhanga o Xikola ya Ngiliyade.

 Tumivu ku pholo, o Kibuka Kya Utuminu kyambe kwila o akwa Betele eji tena kya kutumikisa petisá phala o Xikola ya Ngiliyade. Ni lusolo-lwoso twasoneka o jipetisá, maji kikilombolola kwila kitwasangulukile mu kukala ku Betele. Kiki, kikyene! Maji twamesenene ngo kudibhakula phala kusidivila kwoso kwexile dingi ibhindamu, se atuxikina. Mu kidi, atuxikina phala o Xikola ya Ngiliyade, anga twadilongo mu turma ya 79, ku mbeji ya Katutu ka muvu wa 1985. A tutumikisa ku ixi ya Colômbia.

Ku Colômbia, kya dyanga a tutumikisa phala kukalakala mu xikitodyu ya filiyale. Eme ngasoto kubhanga yoso i ngatenene mu kikalakalu kyami, maji mu kubhita muvu ku filiyale, ngadivu kwila ngabhingile kulungulula kima. Ku mwenyu wami woso, yiyi yexile o veji yami ya dyanga ni yasukina i ngabhingi phala kungibhana kikalakalu kyengi. Mu kusuluka, a tutumikisa kala akunji a jixi jengi mu mbanza ya Neiva, mu kibatu kya Huila.

Tunde ukulu, eme ngawabhela kyavulu o kikalakalu kya kuboka. Kyoso ki ngexile dikudi, muboki wa thembu yoso ku Finlândia, sayi ithangana ngexile muboka tunde mu kamenemene kate mu usuku. Kyoso ki twakazala, muhatu wami Sirkka n’eme, twexile we muboka kizuwa kyamuvimba. Sayi ithangana, kyoso ki twexile muboka mu ididi yexile dikanga dya dibhata dyetu, twexile muzekela mu dikalu dyetu. Kiki kyexile musosolola o kithangana kya kwenda o njila, anga kyexile we mutukwatekesa kumateka kuboka selu mu kizuwa kya kayela.

Kala akunji a jixi jengi, lwamukwa dingi, twasangulukile kyavulu mu ukunji wetu, kala ki twexile mudivwa ku dimatekenu. O kilunga kyetu kyakulu, ku mbandu yamukwa o jiphange ku Colômbia exile akwa kuxila, akwa henda, ni kwila exile mutubhana valolo yavulu.

Sayi jimbanza ja zukamene ni mbambe yetu ku Neiva, kikwexile Jimbangi ja Jihova. Eme ngathandanganyele kyavulu mu kubanza se kyebhi o njimbu yambote yeji bhixila mu ididi yenyoyo. Maji mukonda dya ibuka ya akwa kubhânga, mu ididi yoyo, mwexile ilwezu yavulu phala yo katokalele mu jimbanza jenyojo. Mu kiki, ngasambe phala muthu umoxi mu jimbanza jenyojo a kituke Mbangi ya Jihova. Ngabanzele kwila, o muthu yu watokalele kutunga mu mbanza ya Neiva phala kudilonga o kidi kya Bibidya. Maji, ngasambe we kwila kyoso mwene kyeji mubatizala ni kukula mu nzumbi, weji vutuka mu mbanza mwamuvwalela phala kubokela o athu atungu-mu. Mu kidi Jihova wexile ni ndunge yambote yabetele-kota phala kubatula o maka ya, o ndunge yami ndenge.

Kikubhitile kithangana kyavulu, ngamateka kudilonga o Bibidya ni munzangala wa diyala amwixana Fernando González. Mwene watungile mu mbanza Algeciras, kwenyoko kikwexile Mbangi ya Jihova. Fernando wexile mukwenda 50 a jikilómetulu phala kuya mu kalakala mu mbanza ya Neiva. Mwene wexile mudisokejeka kyambote ande dya kudilonga anga kikulaleka kyavulu, wamateka kuya mu yonge yoso. Tunde mu semana ya dyanga yamateka kudilonga, Fernando wexile mu kwongeka akwa mu mbanza ye, phala ku atangela o ima yexile mudilonga mu Bibidya.

Mu kubhita mbeji jisamanu mu kudilonga o Bibidya, Fernando amubatizala, mu mbeji ya Katatu ya muvu wa 1990. Mu kusuluka, wakituka muboki wa thembu yoso. Kuma kwexile kya Mbangi ya Jihova amuvwalela mu mbanza ya Algeciras, mu kiki kyeji  bhana kya phala o filiyale kutumikisa aboki a katunda mu kididi kyokyo. Mu mbeji ya Kawana ya 1992, mu mbanza yenyoyo mwexile kya kilunga kimoxi.

O kwila Fernando wadikwatenena mu kuboka ngo mu mbanza ye? Kana! Kyoso kya kazala, mwene ni muhatu we ayi ku San Vicente del Caguán, mbanza yamukwa yakambele Jimbangi ja Jihova. Kwenyoko, ene akwatekesa kubhanga kilunga kimoxi. Mu muvu wa 2002, Fernando amusolo kala kafunga ka ilunga. Mwene ni muhatu we Olga, ala mu kikalakalu kiki kate lelu.

O musoso yu, wangilongo o mbote ya kusamba mu kutumbula mwene o ima itwabhindamena, yalungu ni ikalakalu itutambula mu kilunga. Jihova ubhanga o ima etu kitutena ku ibhanga. O kyabeta-kota, o dibhya dya mwene, kidyetu kana.—Mat. 9:38.

Ku muvu wa 1990 atubhana o kikalakalu kya kukunda o ilunga. Kya dyanga, atutumikisa phala kukunda o ilunga mu mbanza ya, Bogotá. Etu twexile ni woma, mukonda twafikile kwila kitweji ditunda kyambote mu kikalakalu kiki. Muhatu wami n’eme kitwala ni mauhete a katunda. Etu we kitwejidile kutunga mu jimbanza jamakota jezala ni athu. Maji, Jihova wa kumbidila o kikanenu kye ki tusanga mu divulu dya Filipe 2:13, kyamba kiki: “Nzambi mwene u mi swinisa mu ku mibhana o hânji ni kutena kwa kubhanga o vondadi yê.”

Ku pholo dya kwenda, atutumikisa phala kukunda o ilunga mu mbambe ya Medellín, o mbanza i ngatumbula ku dimatekenu. O athu kwenyoko, ejidile kya kudibhana ni usweya mu ikoka, kyenyiki kexile musasumuka dingi. Mu kifika, sayi kizuwa kyoso ki ngexile mulonga o Bibidya, twamateka kwivwa jibuya ja athu exile mudiloza, bhukanga dya inzo mu twexile. Kwakambele ngo bhofele phala kuditakula bhoxi mukonda dya woma, maji o diyala ngexile mumulonga o Bibidya wasuluka mu kutanga o kaxi, mwene kexile ni woma. Kyoso kyazubha o kutanga, mwene wabhingi disesa yu watundu. Mu kubhita tu ithangana, mwene wavutuka ni twana twe tuyadi, anga ni kutululuka kwoso wambe: “Ngilolokyenu, maji ngabhingile kuya kutakana o twana twami.”

Kwexile ithangana yamukwa itwexile mubhita mu ilwezu. Sayi kizuwa, kyoso ki twexile muboka inzo ni inzo, muhatu wami weza ni kulenga kokwami, wexile muteketa ni woma. Mwene wambe kwila sayi diyala wamesenene kumuloza. Kiki kyangibhekela woma. Maji mu kusuluka, tweza mu kwijiya kwila, o diyala dyodyo kamesenene kuloza Sirkka; mu kidi, mwene wamesenene kuloza diyala dyamukwa dyexile mubhita ku mbandu ya muhatu wami.

Ku pholo dya kwenda, twadilongo kudibhana ni usweya mu ikoka. O phangu ya kukolokota kwa jiphange atungile mu mbanza yenyoyo, exile mudibhana ni ibhidi kala o yetu ni yamukwa yabhonzele dingi, yexile mutuswinisa kyavulu. Twamono kwila se Jihova wexile mu akwatekesa, mwene weji tukwatekesa we. Etu twexile mu kayela o itendelesu ya tufunga mu mbanza, kubhanga yoso phala kudilanga, ni kwehela o ima yamukwa bhu maku a Jihova.

Kidi kwila sayi ithangana, o ilwezu kiyexile mubhita kala ki twaxinganekene. Sayi kizuwa, eme ngevu kala ahatu ayadi exile muzoka mu inzo itwexile muya phala kubokeIa-mu. Eme  kingamesenene kwivwa yexile muzwela, maji o mukwa dibhata wangibhingi phala kubokona. Kyoso ki twabokona, twamono kwila mbe ki athu exile “muzoka,” maji tunjila tuyadi atwixana kapakayu, exile mu fikisa o ukexilu wa kuzoka wa jivizinyu.

Ku muvu wa 1997, angisolo phala kukala mulongexi wa Xikola ya Akunji a Nzambi. b Eme ngawabhela kyavulu kudilonga mu jixikola ja kilunga kya Jihova, maji nuka ngaxinganekene kutambula o ujitu yu wadikota wa kukala mulongexi.

Mu kusuluka, ngasidivila kala mubhidi wa kafunga ka ilunga. Kyoso o kilunga kyeha kubhanga o kikalakalu kiki, ngavutuka mu kukunda o ilunga. Mu 30 a mivu ndenge, ngene mukala ni ujitu wa kusidivila kala mulongexi wa jixikola ni kafunga ka ilunga. O ikalakalu yiyi yene mungibhekela mabesá avulu. Maji sayi ithangana, o ima yene mubhonza. Mukonda dyahi? Nganda jimbulula.

Eme ngi diyala dya nguzu, ngibhanga o ima ni kuswina. Kiki kyene mungikwatekesa kudibhana kyambote ni ithangana yabhonzo. Maji sayi ithangana, mukonda dya kuswina kwami kwavulu, ngene mu lweza mu kubatula maka mu ilunga. Mu kifika, sayi kithangana eme ngatendelesa o jiphange ni kuswina kwoso, phala kulondekesa dingi henda ni kulendukila akwa. Maji ngizwela o kidi, mu ithangana yenyoyo eme kingexile ni idifwa yiyi.—Lom. 7:​21-23.

Mukonda dya itondalu yami, sayi ithangana ngexile muluwala kyavulu. (Lom. 7:24) Kate mwene sayi kizuwa, ngatangela Jihova mu musambu kwila, kyeji beta-kota se ngeha o kikalakalu kya mukunji wa jixi jengi, ni ngivutuka ku ixi ya Finlândia. Mu usuku wa kizuwa kyenyokyo, ngayi mu kyonge mu kilunga. O ingevu mu kyonge kyokyo, yangidyelelesa kwila, ngatokalele mwene kukolokota mu kikalakalu kyami ni kusuluka mu kudibhana ni itondalu yami. Kate kindala, o ukexilu wa tambwijila Jihova o musambu yo, wene mungiswinisa. Ngisakidila we kyavulu mukonda Jihova mu henda ye, wene mungikwatekesa kutolola o itondalu yami.

Sirkka n’eme, tusakidila kyavulu Jihova mu ujitu watubhana wa kubhita mivu yavulu ya mwenyu wetu, mu sidivisu ya thembu yoso. Ngisakidila we kyavulu Jihova mu kungibhana muhatu mukwa henda ni ufiyele, mu mivu yoso yiyi.

Kwakambe ngo nganda tenesa 70 a mivu, anga nganda kweha o kikalakalu kya kukala mulongexi wa jixikola ja kilunga ni kafunga ka ilunga. Maji eme kingaluwala kana. Mukonda dyahi? Mukonda eme ngaxikina kwila, o kima kibhana dingi kijingu kwa Jihova, o kumusidivila ni kidi kyoso, ni kumuximana ni muxima wezala ni henda ni kisakidilu. (Mik. 6:8; Mál. 12:32-34) Phala kujingisa Jihova, etu kitubhingi kukala ni maujitu a katunda.

Kyoso ki ngixinganeka mu maujitu u ngene mutambula, ngimona kwila kinga atambula mukonda ngabeta-kota akwetu ndenge; kingatambula we o maujitu ya, mukonda dya mauhete u ngala nawu. Kikyene! Muveji dya kiki, Jihova wangibhana o ikalakalu yoso yiyi, mukonda dya henda ye. Mwene wangibhana o maujitu ya sumbala ni itondalu yami. Eme ngejiya kwila ngene mutena ngo kukumbidila o ikalakalu yiyi, ni kikwatekesu kya Jihova. Mu ukexilu yu, o nguzu ya Nzambi yene mudimonekena mu kuzoza kwami.—2 Ko. 12:9.