1. Kima kyahi kyakatunda kyatokala kusola o athu oso?

 O ATHU lelu, atokala kusola kima kyatunda. Anda kwatekesa Jihova Nzambi kala Mutumini wa dyulu ni ixi, inga andasola kukwatekesa o nguma Yê, Satanaji o Dyabhu? Mu maka yá, séku muthu watokala kukala bhukaxi, oso atokala kusola mbandu. O kima kyasola, kyene kyandabhangesa o muthu kutambula o mwenyu wakalelaku mba kana. (Mat. 25:31-33, 46) Mu kithangana kya “hadi yadikota,” athu oso andatambula kidimbu. Amoxi andatambula kidimbu kya kubhuluka, amukwa andatambula kidimbu kya kwa abwika.—Dij. 7:14; 14:9-11; Ize. 9:4, 6.

2. (a) Jihebelewu 10:35-39 dituswininsa kubhanga ihi? (b) Kyebhi o divulu dya Dijingunwinu ditena kutukwatekesa?

² Tanga Jihebelewu 10:35-39. Se wasolo kukwatekesa o unguvulu wa Jihova, eye wasolo kyambote. Kindala kiki wamukwatekesa we akwenu kusola kyambote. Utena kwa akwatekesa bhukaxi ka milongi itusanga mu divulu dya Dijingunwinu. O divulu didi dilondekesa yandabhita ni athu abhukumukina Jihova, dilondekesa we o mabesá andatambula oso akwatekesa o unguvulu wê ni ufiyele woso. Twatokala kudilonga kyambote o maka yá. Kubhanga kiki kwanda bandekesa o hanji yetu yakusidivila jinga Jihova. Kumbandu yengi, o ima itwadilongo mu divulu didi, itena kutukwatekesa kusola kyambote, ni kudikwatenena mu kima kitwasolo.

3. Ihi itwandadilonga mu milongi yiyi?

 ³ Mu milongi yiyi twandadilonga o ibhwidisu yiyi: Mabesá ebhi andatambula oso akwatekesa o unguvulu wa Nzambi? Maji ihi yandabhita ni yó asola kukwatekesa o kyama kyakusuka kyotumbule mu divulu dya Dijingunwinu?

4. Kibuka kyahi kyamono poxolo Nzwá kumoxi ni Jezú kudyulu?

⁴ Mu kisumwa, poxolo Nzwá wamono ibuka iyadi yakwatekesa o unguvulu wa Jihova, ya atambula o dibesá dya kukala ni mwenyu wakalelaku. O kibuka kya dyanga kyatenesa 144.000. (Dij. 7:4) Ene a akatula mu ixi phala kubhanga mbandu ya unguvulu mba Utuminu kudyulu. Kumoxi ni Jezú, ene andatumina o ixi yoso. (Dij. 5:9, 10; 14: 3, 4) Mu kisumwa, Nzwá wa amono emana kumoxi ni Jezú ku Mulundu wa Ziyone, kudyulu.—Dij. 14:1.

5. Kwakambe ngó ihi yandabhita ni yó asubhuka, atokala ku 144.000?

⁵ Mu hama ni jihama ja mivu, Jihova wene musola athu phala kubhanga mbandu ya 144.000 a Jikidistá a a undu. (Luk. 12:32; Lom. 8:17) Maji Nzwá amutangela kwila, mu izuwa yasukidilaku, mungongo mweji subhuka ngó athu ofele atokala ku kibuki kiki. Jihova wandabhana ngó o “kidimbu” kyasukina kwa “yó asubhuka,” ande dya kumateka o hadi yadikota. (Dij. 7:2, 3; 12:17) Kyenyiki, kyoso kyandakwila o hadi yadikota yamateka, o Jikidistá a a undu andasubhuka mu ixi, anda kwa ambata kudyulu phala kudibunda ni Jikidistá jamukwa atokala we ku 144.000 afu ni ufiyele. Kwenyóko andatumina kumoxi ni Jezú mu Utuminu wa Nzambi.—Mat. 24:31; Dij. 5:9, 10.

6-7. (a) Mukusuluka kibuka kyebhi kyamono Nzwá ni ihi itutena kudilonga ni ene? (b) Mukonda dyahi o yó asubhuka ni “mundu wavulu” atokala kusota kwijiya yala mu kibutulu 7 kya Dijingunwinu?

⁶ Kyazubha kumona o kibuka kya athu andaya kudyulu, Nzwá wamono o “mundu wavulu.” Maji o kibuka kiki kikyadifu ni kibuka kya 144.000, mukonda kitutena kwa akwata konda. (Dij. 7:9, 10) Ihi itudilonga ni ene? Nzwá amutangela: “Yá ene o athu atundu ku hadi yadikota, ene asukula o izwatu yâ yalebha ni ku izelesa mu manyinga ma Kambudi.” (Dij. 7:14) Kyoso kyandabhuluka mu hadi yadikota, o “mundu wavulu” wandatunga mu ixi, andatambula mabesá avulu.—Jisá. 37:9-11, 27-29; Jisa. 2:21, 22; Dij. 7:16, 17.

⁷ Kikale se atusolo phala kuya kudyulu mba kutunga mu ixi, twatokala kudivwa kwila, twandatambula mwene o mabesá otumbule mu kibatulu 7 kya divulu dya Dijingunwinu. Kyokyo kyandakala kithangana kya kusanguluka kwavulu phala o ibuka iyadi ya jiselevende ja Nzambi! Twandakemba mukonda twasolo kukwatekesa o unguvulu wa Jihova. Ihi dingi itutangela o divulu dya Dijingunwinu yalungu ni hadi yadikota?—Mat. 24:21.

8. Kyebhi kyanda mateka o hadi yadikota? Kyebhi kyanda divwa o athu?

⁸ Kala kitwadilongo mu milongi yatundumu, kwakambe ngó o jinguvulu ja ngongo jandabalukila Babilonya ya Dikota, o kisangela kya jingeleja joso ja makutu. (Dij. 17:16, 17) O kizulukutu kiki kyandakala o dimatekenu dya hadi ya dikota. O kwila o kizulukutu kiki kyandabhangesa athu avulu kumateka kusidivila Jihova? Kana ngana. Mu veji dya kiki, Dijingunwinu kibatulu 6 dilondekesa kwila mu kithangana kyenyókyo, o athu kamusidivila Jihova andasota kilangidilu ku jinguvulu ni ku isangela ya jingenji ja mundu yú, a asokesa  ni milundu. Kuma ene kasolo kukwatekesa o Utuminu wa Nzambi, Jihova wanda kwamona kala jinguma jê.—Luk. 11:23; Dij. 6:15-17.

9. Mu kithangana kya hadi ya dikota, kyebhi o mundu wa Jihova wandalondekesa kwila wadifu kyengi? Ihi yandabhita ni ene?

⁹ Mu kithangana kyokyo kyabhonzo mu hadi ya dikota, o mundu wafiyele wa Jihova wandadilondekesa kwila kadifu ni yó kasidivila Nzambi. Éne ngó o athu mu ngongo andasidivila Jihova Nzambi ni kudituna kukwatekesa o “kyama kya muxitu.” (Dij. 13:14-17) O kuswina kwâ kwandabhangesa o jinguma ja Jihova kwa akwatela njinda. Mukonda dya njinda yiyi, kibuka kya ifuxi kyandadyongeka phala kuzukutisa o mundu wa Nzambi mu ngongo yoso. Mu Bibidya o kizukutisu kiki akixana, kizukutisu kya Ngongo dya Mangongo.—Ize. 38:14-16.

10. Kala kilondekesa Dijingunwinu 19:19-21, ihi yandabhanga Jihova kyoso o ifuxi kyandazukutisa o mundu wê?

¹⁰ Kyebhi kyandadivwa Jihova mukonda dya kizukutisu kiki? Mwene ututangela: “O njinda yami ya kà ngibanda mu mazulu.” (Ize. 38:18, 21-23) Dijingunwinu kibatulu 19 kitutangela yandabhita kupholo. Jihova wandatumikisa Mon’ê phala kuzokela o mundu Wê ni kubwikisa o jinguma jâ. Jezú wandalwa o ita yiyi ni kikwatekesu kya “ifuxi ya masoladi a dyulu”, kifwa o ji anju jafiyele kumoxi ni 144.000. (Dij. 17:14; 19:11-15) Ihi yandabhita kudisukilu dya ita yiyi? O isangela ni athu oso ala jinguma ja Jihova andakwabwika!—Tanga Dijingunwinu 19:19-21.

11. Kyebhi o kizulukutu kyabetakota kyotumbule mudivulu dya Dijingunwinu?

¹¹ Kyebhi kyandadivwa o athu afiyele andabhuluka, kyoso Nzambi kyandabwika o jinguma jê? Ene andasanguluka kyavulu! Sumbala kudyulu kwandakala kusanguluka kyoso kyandabwika Babilonya Yadikota, sayi kizulukutu kyengi kyandabheka kusanguluka kwabeta dingi kota. (Dij. 19:1-3) Mu kidi, kiki kyene o kizulukutu kyabetakota kyotumbule mudivulu dya Dijingunwinu, o “ukaza wa Kambudi.”—Dij. 19:6-9.

12. Kala kilondekesa Dijingunwinu 21:1, 2, kithangana kuxi kyandabhita o ukaza wa Kambudi?

¹² Kithangana kuxi kyandabhita o ukaza yú? O 144.000 a Jikidistá a a undu, andakala kyá kudyulu ande dya kumateka o ita ya Alumajedone. Maji kyokyo, kikyandakala luwa o kithangana phala o ukaza wa Kambudi. (Tanga Dijingunwinu 21:1, 2.) O ukaza wa Kambudi wandabhita kyoso kyandabhwa o ita ya Alumajedone, kyandabwikisa o jinguma joso ja Nzambi.”—Jisá. 45:3, 4, 13-17.

13. Ihi yandabhita mu ukaza wa Kambudi?

¹³ Ihi yandabhita mu ukaza wa Kambudi? O ukaza muxitu, ubunda o diyala ni muhatu mudijikita dimoxi. Kiki kyene we kyandabhita mu ukaza wa Kambudi. Wene wandabunda Jezú Kidistu, o Sobha, mu dijikita dimoxi ni 144.000 a Jikidistá a a undu, o “dibhanga” dyê. O kizulukutu kiki kyakatunda, kyandamateka unguvulu wa ubhe wandatumina o ixi mu 1.000 yamivu.—Dij. 20:6.

14-15. Dijingunwinu kibatulu 21 disokesa o 144.000 a Jikidistá a a undu ni ihi? (Tala ofoto yakapa.)

¹⁴ Mu kusuluka, Dijingunwinu kibatulu 21 disokesa o 144.000 a Jikidistá a a undu, ni mbanza yafwama kyambote, a ixana “Jeluzaleme ya Ubhe.” (Dij. 21:2, 9) O mbanza yiyi yala kuthandu dya 12 dya matadi akaboko, mwasoneka o majina “a kwinyi ni kiyadi kya jipoxolo ja Kambudi.” Mukonda dyahi  Nzwá wamesenene kyavulu kwijiya o maka yá? Mukonda o dijina dyê dyexile we ku ditadi dimoxi. Sé phata, yú ujitu wadikota!—Dij. 21:10-14; Efe. 2:20.

¹⁵ Mu ngongo kimwala mbanza yadifu ni mbanza yiyi. O kikoka kya mbanza yiyi kyexile kya ulu ya fina, o 12 dya mabhitu a abhangele ni jiphélula, o ilumbu ni kaboko a ifwamesa ni matadi avalolo, a izongele we mu ukexilu wayuka. (Dij. 21:15-21) Né kiki, kwedile kala kwakambele hanji kima! Mu kusuluka, Nzwá ututangela: “Mu mbanza mwenyomo, ki nga mono-mu tembulu, mukonda Jihova Nzambi, o Muteni wa Yoso ni Kambudi éne o tembulu ya mbanza. O mbanza ki ibhindamena o mukengeji wa mwanya mba wa mbeji, mukonda o kubhenya kwa Nzambi ku mwika o mbanza. O kandeya ka mbanza o Kambudi.” (Dij. 21:22, 23) Oso atungu mu mbanza yiyi ejitena kumona o pholo ya Jihova. (Jih. 7:27; Dij. 22:3, 4) Kifwaphe, Jihova ni Jezú, éne o tembulu mu mbanza yoyo.

16. Ihi yandabhita ni athu kyoso o Utuminu wa Nzambi ki wandakwendesa o ixi mu Midi ya Mivu?

¹⁶ O Jikidistá a a undu, asanguluka kyavulu mu mbanza yiyi. Maji o yó ala ni kidyelelu kya kutunga mungongo, ala we ni kima kya abhangesa o kusanguluka. Kyoso o Utuminu wa Nzambi ki wandakwendesa o ixi mu Midi ya Mivu, o Jeluzaleme ya Ubhe yandabheka mabesá avulu mu ixi. Nzwá wamono o mabesá yá kukulumuka kala “ngiji ya menya a mwenyu.” O kumbandu jiyadi ja ngiji, kwala “mixi ya mwenyu,” yamubhana mafwe “phala kusaka nawu o akwa ifuxi.” (Dij. 22:1, 2) Athu andakala kumwenyu mu kithangana kyokyo, andatena kukatula mbote ku ima yiyi. Bhofelebhofele, oso abelesela Jihova andakituka athu ayuka. Kikwandakala dingi mauhaxi, ndolo, né masoxi akuluwala.—Dij. 21:3-5.

17. Kala kilondekesa Dijingunwinu 20:11-13, ananyi andakatula mbote ku Utuminu wa Midi Yamivu?

¹⁷ Ananyi andakatula mbote ku mabesá yá akatunda? Kya dyanga, yó andabhuluka mu ita ya Alumajedone ni athu oso andakwavwala ku mundu wa ubhe. Maji Dijingunwinu kibatulu 20 kikanena we kwila, o madifundu andakwafukununa. (Tanga Dijingunwinu 20:11-13.) O “athu ayuka” afu kyá, kumoxi ni “athu akambe o kuyuka”, yó katenene kudilonga yalungu ni Jihova, andakwafukununa we. (Ika. 24:15) O kwila kiki kilombolola kuma  athu oso afu, andakwafukununa mu kithangana kya Utuminu wa Midi Yamivu? Kana. Oso exile ni kithangana kya kusidivila Jihova ande dya kufwa maji kamusidivila, kandakwafukununa dingi. Ene exile ni kithangana maji alondekesa kyá kwila, kafwamene kutambula o mwenyu mu Palayizu mu ixi.—Mat. 25:46; 2 Te. 1:9; Dij. 17:8; 20:15.

18. Kyebhi kyandakala o athu kudisukilu dya 1.000 yamivu?

¹⁸ Kudisukilu dya 1.000 yamivu, athu oso mu ixi andakala kyá athu ayuka. Séku muthu dingi wandakala ni kituxi kyalundula kwa Adá. (Lom. 5:12) O windwa watuxila Adá, o kituxi, kikyandakalaku dingi. Kyenyikiphe, kudisukilu dya 1.000 yamivu, o athu oso mu ixi andavutuka “ku mwenyu”, mukonda andakala kyá athu ayuka.—Dij. 20:5.

19. Mukonda dyahi kwandabhinga polova yasukina?

¹⁹ Twejiya kwila Jezú waditunu o jitendasá joso ja Satanaji phala kukamba kulondekesa ufiyele kwa Jihova. Mwene wakolokota mu ufiyele sumbala ni jipolova. Maji o kwila o athu oso ayuka andakolokota mu ufiyele wâ kyoso Satanaji kyandamubhana kithangana phala kwa polovala? Kala muthu wandatena kutambwijila o kibhwidisu kiki kyoso Satanaji kyandamujituna mu dikungu dyazongo, ku disukilu dya 1.000 yamivu. (Dij. 20:7) Yó andakala fiyele mu polova yasukina andatambula o mwenyu wakalelaku, ni kukala ni ufôlo wakidi. (Lom. 8:21) Oso andakayela Satanaji mu kubhukumukina Jihova, andakwabwikisa katé kuhádya ni hádya, kumoxi ni Dyabhu ni madimonyo mê.—Dij. 20:8-10.

20. Kyebhi ki udivwa mu kudilonga o jipolofesiya jitusanga mu divulu dya Dijingunwinu?

²⁰ Kyebhi ki udivwa mu kudilonga o jipolofesiya jitusanga mu divulu dya Dijingunwinu? Sé phata kikusangulukisa kyavulu! Kikubhangesa kwixana akwenu phala kubheza kumoxi netu o Nzambi yetu. (Dij. 22:17) Kindala kitwadilongo o ima yandabhita kuhádya, twasanguluka kyavulu ku muxima, twamesena kuzwela kala poxolo Nzwá, kyoso kyambe: “Kyene mwene! Zá, Ngana Jezú.”—Dij. 22:20.