1. Mukonda dyahi etwenyoso twabhindamena dingi unjimu? (Jisabhu 4:7)

 SÉ PHATA eye wabhingile kyá unjimu mu musambu, mukonda wa ubhindamena kyavulu. (Tiy. 1:5) Sobha Solomá wasoneka: “Kima kyala kota ku mwenyu wa muthu o unjimu.” (Tanga Jisabhu 4:7.) Mukidi, Solomá kexile muzwela o unjimu wa athu, maji wexile muzwela o unjimu utunda kwa Jihova Nzambi. (Jisa. 2:6) Maji o kwila o unjimu utunda kwa Nzambi utena mwene kutukwatekesa mu maka utudibhananawu mu kizuwa ni kizuwa? Xé utena, kala kitwandamona mu milongi yiyi.

2. Kyebhi kitutena kukala ni unjimu wakidi?

² Ukexilu umoxi wakukala ni unjimu wakidi, o kudilonga ni kukumbidila o itendelesu ya mayala ayadi a axila kyavulu mukonda dya unjimu wakexile nawu. Kya dyanga, twandadilonga o phangu ya Solomá. O Bibidya yamba kwila, “Nzambi anga ubhana Solomá kwijiya ni kutongoloka kwavulu.” (1 Jis. 4:29) Kayadi, twandadilonga o phangu ya Jezú, o muthu wabetakota mu unjimu wexile mu ngongo. (Mat. 12:42) Yalungu ni Jezú, o Bibidya yakanene: “O nzumbi ya Jihova ya kà mu tula ku thandu dyê yene o nzumbi ya unjimu ni kutetuluka.”—Iza. 11:2.

3. Ihi itwandadilonga mu milongi yiyi?

³ Bhukaxi ka unjimu wa abhana Nzambi, Solomá ni Jezú, atubhana itendelesu yambote. Mu milongi yiyi, twandadilonga itendelesu itatu: O kutala o kitadi, o salu yetu ni etu mwene mu ukexilu watokala.

4. Mu ukexilu webhi Solomá kadifwile ni Jezú?

⁴ Solomá wexile mvwama, wexile we ni ima yavulu kubhata. (1 Jis. 10:7, 14, 15) Maji Jezú kexile ni dibhata, kexile we ni ima yavulu. (Mat. 8:20) Né kiki, kiyadi kyâ exile mutala o jimbote mu ukexilu watokala mukonda exile ni unjimu utunda kwa Jihova Nzambi.

5. Kyebhi Solomá kyexile mutala o kitadi?

⁵ Solomá waxikina kwila, o kitadi “ki vungina kala kilembeketa.” (Ndo. 7:12) Se tukala ni kitadi tutena kusumba o ima itwabhindamena ni ima itwamesena. Maji Solomá watonginina kwila, né mwene se tukala tujimvwama, kwala ima yabeta dingi kota o kitadi ndenge. Mu kifika, mwene wasoneka: “Kota kukala ni dijina dya wabha . . . , kwindi o kusola nzungule ya jimbongo.” (Jisa. 22:1) Solomá wamono we kwila, oso azolo o kitadi kasanguluka ni ima yalanayu. (Ndo. 5:10, 12) Mwene watudimuna we phala kitudyelele o kitadi, mukonda yoso isumba o kitadi itena kujimuka mu kithangana ni mbandu.—Jisa. 23:4, 5.

6. Kyebhi Jezú kyexile mutala o jimbote mu ukexilu watokala? (Matesu 6:31-33)

⁶ Jezú wexile mutala o jimbote mu ukexilu watokala. Mwene wa wabhelele kudya ni kunwa kyambote. (Luk. 19:2, 6, 7) Sayi kizuwa, mu madiwanu mê adyanga, mwene wabhange vinyu yakatunda. (Nzw. 2:10, 11) O mu kizuwa kyafu, mwene watele kizwatu kyatele kalu yavulu. (Nzw. 19:23, 24) Maji kehela o jimbote kukala o kima kyabetakota ku mwenyu wê. Mwene watendelesa o akayedi’ê: “Sé-ku muthu utena kusidivila ngana jiyadi . . . Enu wenu ki mu tena kusidivila Nzambi ni Jimbongo.” (Mat. 6:24) Jezú watulongo kwila, se tudyanga kusota o Utuminu, Jihova wandatubhana yoso itwabhindamena.—Tanga Matesu 6:31-33.

7. Mbote yahi yakatula phange mukonda dya kutala o jimbote mu ukexilu watokala?

⁷ Jiphange javulu akatula mbote mukukayela o itendelesu ya Nzambi yalungu ni  kitadi. Tala o phangu ya phange Daniyele, dikudi. Mwene wambe: “Kyoso kingexile mu kitala kya kikumbi, ngasolo ku muxima kuta o ikalakalu mu kilunga kupholo dya ima yoso kumwenyu wami.” Phange Daniyele watenene kubhanga ima yavulu mu kilunga, mukonda dya kusosolola o ukexilu wa mwenyu wê. Mwene wambe dingi: “Ngitena kuzwela ni kidi kyoso kwila, nuka ngandadyela mukonda dya ima ingasolo. Se ngatele o jimbote kupholo dya ima yoso ku mwenyu wami ngeji nganyala kitadi kyavulu, maji kingejitena kukala ni makamba ambote ungala nawu kindala. Se ngalungile o muxima ku kitadi, kingeji kala ni kusanguluka kwa kidi kungalanaku kindala kiki, mukonda dya kuta o Utuminu kupholo dya mwenyu wami. Séku kitadi kitena kusumba o mabesá oso angibhana Jihova.” Sé phata, tukatula mbote yavulu se tulunga o muxima mukubhanga o vondadi ya Jihova, muveji dya kusota o kitadi.

8. Kyebhi kitwejiya kwila Solomá wakexile mutala o kikalakalu mu ukexilu watokala? (Ndongixi 5:18, 19)

⁸ Solomá wexana o kusanguluka kutukalanaku mukonda dya kukalakala ni kuswina kwoso kala “ujitu wa Nzambi.” (Tanga Ndongixi 5:18, 19.) Mwene wasoneka: “O kututumba kwoso mwene ni kukalakala kubhekela, kubhanduluka.” (Jisa. 14:23) Solomá wejidile kwila o izwelu yiyi yakidi mwene. Mwene wexile mukalakadi waswina! Mwene watungile jinzo, wadimine mixi ya mivide, wabhange jinjaludim ni matangi a menya. (1 Jis. 9:19; Ndo. 2:4-6) Kubhanga o ima yoso yiyi, kyexile kikalakalu kya dikota. Sé phata o ikalakalu yiyi yamusangulukisa kyavulu. Maji Solomá wejidile kwila phala kukala ni kisangusangu kya kidi, kwabhingile kubhanga dingi kima kyengi. Mwene wabhangele we ima yavulu mu nzumbi. Mu kifika, mwene wendesa o kikalakalu kyakutunga o tembulu yafwama kyavulu phala o ubhezelu kwa Jihova. Kwabhiti sambwadi dya mivu phala kuzubha o kikalakalu kiki! (1 Jis. 6:38; 9:1) Kyoso Solomá kyazubha kubhanga ima yavulu, wamono kwila o kima kya betakota kitena kubhanga o muthu, o kusidivila Jihova. Mwene wasoneka: “Ku yoso i wene mu kwívwa, zubhilu dyê dyenyidi: Xila Nzambi, waluke o ijila yê.”—Ndo. 12:13.

9. Kyebhi Jezú kyexile mutala o kikalakalu mu ukexilu watokala?

⁹ Jezú wexile mukalakadi waswina. Mu unzangala wê, wexile mukalakala kala musongi wa mabaya. (Mál. 6:3) Sé phata, o jitata jê asakidila kyavulu mu kwa akwatekesa kudikila o ibhindamu ya mwiji wâ wonene. Kuma wexile muthu wayuka, Jezú wexile mubhanga kyambote o salu yê, sé phata, o athu awabhelele kusumba o ima yexile mubhanga! Nange Jezú wawabhelele kyavulu o salu yê. Maji, sumbala wexile mukalakadi wanguzu, Jezú wexile muxisa kithangana phala kubheza JIhova. (Nzw. 7:15) Mu kusuluka, kyoso kyexile kyá mukunji wathembu yoso, Jezú watendelesa jingivwidi jê: “Kanenu kukalakela o kudya kubola, maji mukalakela o kudya kunangenena, kubhana o mwenyu wakalelaku.” (Nzw. 6:27) Mu diskulusu dya bhange ku Mulundu, Jezú wambe: “Lundenu jimbote ku dyulu.”—Mat. 6:20.

10. Kibhidi kyahi kitena kudibhana nakyu o athu mu salu yâ?

¹⁰ O unjimu utunda kwa Nzambi, utukwatekesa kutala o salu yetu mu ukexilu watokala. Etu tu Jikidistá, ene mutuswinisa phala “kukalakala ni kuswina kwoso, mu kubhanga kikalakalu kyambote.” (Efe. 4:28) Mu kumona  o nguzu itubhanga, ni ukexilu wetu wakukalakala kyambote, o jipatalá atena kututangela kwila, abhana valolo mu ukexilu wetu wakukalakala. O kiki kitena kutubhangesa kubandekesa o ji ola ku salu, phala o patala yetu kutala mu ukexilu wambote o Jimbangi ja Jihova. Maji se tubhanga kiki, kitwandakala ni kithangana kyasoko phala o ubhezelu kumwiji mba ima yengi mu sidivisu ya Jihova. Kifwaphe, twabhingi kusola ni unjimu phala tukale ni kithangana kya kubhanga o ima yabetakota.

11. Ihi yambe phange yalungu ni kutala o salu mu ukexilu watokala?

¹¹ Sayi phange yamunzangala amwixana William, wamono o valolo yakutala o salu mu ukexilu watokala. Yalungu ni kithangana kya kalakala ni phange yamukwa wexile kyá mwadyakime, phange William wambe: “[O phange mwenyó] wexile mutala o salu yê mu ukexilu watokala. Mwene wexile mukalakadi wanguzu, kexile ni maka ni athu exile mu kalakala nê. Maji ku disukilu dya kizuwa, mwene wexile mu lunga o muxima ku mwiji ni ubhezelu wê kwa Jihova, o kubhanga kiki kwexile kumusangulukisa kyavulu!” *

12. Kyebhi Solomá kyalondekesa kuma wexile muditala mu ukexilu watokala, maji mu kubhita kithangana ihi yabhiti?

¹² Kyoso Solomá kyexile mubheza Jihova ni ufiyele woso, wexile muditala mu ukexilu watokala. Mu unzangala wê, waxikina ni muxima woso kwila kejidile o ima yoso, yu wabhingi kitendelesu kwa Jihova. (1 Jis. 3:7-9) Ku dimatekenu dya utuminu wê, Solomá wejidile we kyambote o kilwezu kya kudizangeleka. Mwene wasoneka: “O izala yene mutwama, anga kukayela o kusenguluka; o kudizangeleka kwa muxima kwene mu dyangela, anga kukayela kiwa o kibhalu.” (Jisa. 16:18) Tuluwala mu kwijiya kwila, kupholo dya kwenda Solomá kakayela o kitendelesu kyê mwene. Mu kubhita kithangana,  kyoso kyexile mutumina, mwene wakituka mukwa kudizangeleka, yu wamateka kubhukumukina o itumu ya Nzambi. Mu kifika, sayi kijila kyambele kwila o sobha ya Jihebelewu katokalele “ku di vudixila ndumba ya ahatu.” (Mate. 17:17) Solomá wabhukumukina o kitumu kiki, yu wakwata 700 dya ahatu ni 300 ja jisayi, avulu mudyâ exile mubheza jinzambi jamakutu! (1 Jis. 11:1-3) Nange Solomá wafikile kuma kyokyo kikyexile kilwezu phala mwene. Kikale se waxinganeka kiki mba kana, mu kubhita thembu Solomá wadibhana ni maka avulu mukonda dya kubhukumukina Jihova.—1 Jis. 11:9-13.

13. Ihi itutena kudilonga mukuxinganeka mu phangu ya kulenduka kwa Jezú?

¹³ Jezú wasuluka ni kuditala mu ukexilu watokala ni kukala muthu walenduka. Ande dya kwiza mu ixi, Jezú wabhange ima yavulu mu sidivisu yê kwa Jihova. Bhukaxi ka Jezú, “Nzambi wabhange o ima yoso ya mukwa kikale ku dyulu kikale mu ngongo.” (Kol. 1:16) Kyoso kyamubatizala, sé phata Jezú walembalala o ima yabhange kyoso kyexile kumoxi ni Tata yê. (Mat. 3:16; Nzw. 17:5) Maji o kwijiya kuku kikwamubhangesa kudizangeleka. Mwene nuka wadizangelekele mwaxaxi ka akwâ. Mwene wambela o maxibulu mê kwila kejile mu ixi “phala ku mu sidivila, maji phala kusidivila ni kubhana o mwenyu wê kala sata ya kukúla o mundu.” (Mat. 20:28) Mwene waxikina ni muxima woso kwila, katenene kubhanga né ngó kima kimoxi mu vondadi yê mwene. (Nzw. 5:19) Jezú walendukile kyavulu! Mwene watuxila phangu yambote itwatokala kukayela.

14. Ihi itutena kudilonga ni Jezú yalungu ni kuditala mu ukexilu watokala?

¹⁴ Jezú walongo o maxibulu mê kuditala mu ukexilu watokala. Sayi kizuwa, mwene wa axikinisa: ‘O ndemba ya mítwe yenu yokondale.’ (Mat. 10:30) O izwelu yiyi ituswinisa kyavulu, kotelele se twene muditala mu ukexilu wayibha. Yene ilondekesa kwila o Tata yetu yadyulu watusuwu mwene kyavulu, twala ni valolo bhupholo yê. Se Jihova utwehela  kumubheza ni kwila, mwene utumona kuma twafwama kukala ni mwenyu wakalelaku ku mundu wê wa ubhe, kitutokala kubanza kwila mwene kalungwé.

15. (a) O Mulangidi watutendelesa kuditala mu ukexilu webhi watokala? (b) Kala kilondekesa o jifoto mu difwe 24, se tudisuwa ngó etu, mabesá ebhi utwandakamba kutambula?

¹⁵ Mu 15 dya mivu kudima, O Mulangidi watutendelesa kuditala mu ukexilu watokala. Wene wambe: “Etu kitumesena kuxinganeka kyavulu mu mbote yetu ngó katé ki tukituka tu akwa kudizangeleka, kitumesena kuxinganeka we kwila, kitwala ni valolo. Muveji dya kiki, twatokala kuditala mu ukexilu wambote, kifwa, kutendela o ima itutena kubhanga kyambote ni kwijiya bhwasuku o nguzu mba uhete wetu. Sayi phange yamuhatu, wajimbulula kiki o maka yá: ‘Eme kingibetakota mukubhanga o ima yayibha, kingibeta we kota mu kubhanga o ima yambote. Kala o athu oso, ngala ni idifwa yambote, ngala we ni idifwa yayibha.’” * Kyenyikiphe, kuditala mu ukexilu watokala, kutubhekela mbote.

16. Mukonda dyahi Jihova utubhana itendelesu ya unjimu?

¹⁶ Jihova utubhana itendelesu ya unjimu, bhukaxi ka Mak’â mê. Mwene ubhanga kiki mukonda watuzolo, wamesena we kwila tusanguluka kumwenyu. (Iza. 48:17, 18) O kima kyambote kitwatokala kusola kyandatubhekela o kusanguluka kwa kidi, o kusuluka ni kubhanga yoso isangulukisa Jihova. Se tubhanga kiki, kitwandadibhana ni ibhidi yene mudibhananayu o athu asota ngó kitadi, axinganeka ngó mu salu yâ, adixinganeka ngó éne. Kyenyikiphe, tusolyenu kubhanga o ima ni unjimu phala tusangulukise o muxima wa Jihova!—Jisa. 23:15.