1-2. Jimbulula se mukonda dyahi sayi jivelusu ja Bibidya jikala dingi ni valolo kyoso ima ki ilunguluka kumwenyu wetu.

 MU KIZUWA kya ukaza, o ngayala ni dibhanga, ela mátwi tekenge mu kwivwa o diskulusu dijimbulula maka alungu ni ukaza, bhukaxi ka Bibidya. Ene ejiya kyá o jivelusu ja tanga mu diskulusu didi. Maji tunde mu kizuwa kyenyokyo, o milongi yiyi ikala dingi ni valolo phala ene. Mukonda dyahi? Mukonda tunde mu kizuwa kyenyokyo, anda ikumbidila jinga kala dikaza.

² Kiki kibhita we kyoso o dikaza mukilunga kya vwala twana. Mumivu kudima, ene nange evu kya madiskulusu avulu alungu ni kusasa o twana. Maji kindala kuma ala kyá ni mona, o itendelesu yiyi yandakala dingi ni valolo phala ene. Kiki kikalakalu kyadikota! Sé phata, kyoso o ima ki ilunguluka ku mwenyu wetu, tutala mu ukexilu wengi o jivelusu ja Bibidya, né mwene jojo jitwejiya kyambote. Kiki kima kimoxi kibhangesa o jiselevende ja Jihova kutanga o Bibidya, kala kya tendelesele ku jisobha ja Izalayele m’ukulu, ku ixinganeka mu “izuwa yoso” ya mwenyu wâ.—Mate. 17:19.

3. Ihi itwandadilonga mu milongi yiyi?

³ Jitata, enu mwala ni ujitu wadikota, o kulonga o twana twenu yalungu ni Jihova. Enu kimwamesena ngó kwa atudila milongi yalungu ni Nzambi yetu, maji mwamesena kwila, azola Nzambi ni muxima woso. Ihi imutena kubhanga phala  kukwatekesa o twana twenu kuzola Jihova? Mu milongi yiyi twandadilonga itumu iwana ya Bibidya itena kumikwatekesa, enu mu jitata. (2 Ti. 3:16) Twandadilonga we kyebhi o jitata mu kilunga kya katula mbote mu kukumbidila o itendelesu ya Bibidya.

4. Kitumu kyebhi kitena kukwatekesa o jitata kubhangesa o twana twâ kuzola Jihova ni muxima woso? (Tiyaku 1:5)

⁴ Kitumu kya 1: Sota o itendelesu ya Jihova. Bhinga kwa Jihova o unjimu uwabhindamena phala kukwatekesa o twana twê kumuzola. (Tanga Tiyaku 1:5.) Jihova mwéne wandakubhana o itendelesu yabetakota. Ima iyadi itubhangesa kuzwela kiki. Kya dyanga, Jihova mwene o tata wala dingi ni uhete. (Jisá. 36:9) Kya kayadi, o itendelesu ya unjimu ibhana Mwene, mu ithangana yoso ibhekela mbote.—Iza. 48:17.

5. (a) Ihi yene mubhana o kilunga kya Jihova phala kukwatekesa o jitata? (b) Kala kyalondekesa o vidyu, ihi iwadilongo mu ukexilu wa kusasa o twana wa dikaza Amorim?

⁵ Bhukaxi ka Maka ni kilunga kyê, Jihova wene mubhana kudya kwavulu kutena kumikwatekesa kubhangesa o twana twenu kuzola Jihova. (Mat. 24:45) Mukifika, utena kusanga itendelesu yatokala mumbandu “Kikwatekesu Phal’o Mwiji.” Mu mivu yavulu yamoneka mu Despertai!, kindala yala kyá mu sayte yetu. Jividyu javulu ja ibhwidisu ni itambwijilu ni jidrama jala mu sayte jw.org, jikwatekesa o jitata kukumbidila o itumu ya Jihova mu kusasa o twana twâ. *—Jisa. 2:4-6.

6. Kyebhi kya divu o tata mu itendelesu yatambula mwene ni muhatwê ku kilunga kya Jihova?

⁶ Jitata javulu ja sakidila mukonda dya kikwatekesu kya abhana Jihova bhukaxi ka kilunga kyê. Sayi tata amwixana Joe, wambe: “Kusasa twana tutatu mu kilunga kya Jihova, ki kikalakalu kyofele. Eme ni muhat’wami, ithangana yoso twexile musamba kwa Jihova mukubhinga kikwatekesu. Mu ithangana yavulu, twexile mudivwa kwila, o milongi mba vidyu yabhixila mwene mu kithangana kyatokala, yandatukwatekesa  kudibhana ni maka amoneka. Twene mudyelela jinga mu itendelesu ya Jihova.” Phange Joe ni muhat’wê atonginina kwila, o milongi ni jividyu jibhana o kilunga, jamukwatekesa o twana twâ kuzukama dingi kwa Jihova.

7. Mukonda dyahi o jitata jatokala kubhana phangu yambote? (Loma 2:21)

⁷ Kitumu kya 2: Bhana phangu yambote. O twana tutala ni kufikisa yoso ibhanga o jitata jâ. Mukidi, séku tata yakambe o ituxi. (Lom. 3:23) Né kiki, o jitata jadimuka, jibhanga yoso yatena phala kubhana phangu yambote ku twana twâ. (Tanga Loma 2:21.) Yalungu ni twana sayi tata wazwela kiki: “Ene édi kala mbolo, asunga o ima yoso ya akondoloka.” Mwene wambe dingi: “Éne andatutangela se twamukumbidila o ima itwamu alonga.” Kyenyikiphe, se twamesena kwila ene azola Jihova, etu we twatokala kumuzola ni kulondekesa kyambote o henda yiyi.

8-9. Ihi itwadilongo ni izwelu ya phange Andrew ni phange Emma?

⁸ O jitata atena kulonga o twana twâ kuzola Jihova mu maukexilu avulu. Phange Andrew wala ni 17 dya mivu wambe: “Ithangana yoso o jitata jami angilongo kwila o kusamba kwala ni valolo yadikota. Mausuku moso, tat’etu wexile musamba kumoxi n’eme, né mwene se ngasambele kyá ubheka wami. Ene exile mutwambela: ‘Utena kuzwela ni Jihova kithangana kyosokyoso kiwamesena.’ Mukonda dya kiki ngibhana valolo yavulu mukusamba. Kindala kiki kikyangibhonzo kusamba ni kudivwa kwila Jihova Tat’etu, wangizolo kyavulu.” Jitata, kimujimbe kwila o henda yenu kwa Jihova itena kukwatekesa o twana twenu kumuzola we.

⁹ Tala we o phangu ya phange Emma. Kyoso tat’ê kyabwazeka o mwiji, watele makongo avulu, manyâ mwéne watokalele ku afuta. Phange Emma wambe: “Ithangana yavulu mam’etu kexile ni kitadi kyasoko phala kudikila o mwiji wetu, maji wexile muzwela jinga kyebhi Jihova kya langa ni kubhana ku jiselevende jê o ima yabhindamena. Ngamono ku mwenyu wê kwila mwene waxikinine ni kidi kyoso o izwelu yiyi. Mama wexile mukumbidila yoso yexile mutulonga.” Ihi itwadilongo? Twadilongo kwila o jitata atena kulonga o twana bhukaxi ka phangu yâ né mwene mu ithangana yabhonzo.—Nga. 6:9.

10. Mu ithangana yebhi akwa Izalayele ejitena kuzwela ni twana twâ yalungu ni Jihova? (Matendelelu 6:6, 7)

¹⁰ Kitumu kya 3: Zwela ni twana twé mu ithangana yoso. Jihova watendelesa akwa Izalayele phala kulonga o twana twâ yalungu ni mwene, mu ithangana yoso. (Tanga Matendelelu 6:6, 7.) Mu kizuwa kyamuvimba, o jitata jojo exile ni kithangana phala kuzwela ni twana twâ yalungu ni Jihova ni kwa akwatekesa kumuzola ni muxima woso. Mu kifika, o kamunzangala ka diyala mukwa Izalayele wejitena kukala ola javulu mukukwatekesa tat’ê kukuna o jimbutu mba ku jibhongolola. O phangyê yamuhatu wejitena kukala ola javulu ni mama mu kumukwatekesa kutunga izwatu, kubhanga inda ni mu ikalakalu yamukwá kubhata. Mu kukalakala kumoxi, o jitata ni twana ejitena kuzwela ima yavulu yavalolo. Mu kifika, ejitena kuzwela yalungu ni kidifwa kya Jihova kya kubhanga mbote ku jiselevende jê ni kumona kyebhi mwene kyexile mukwatekesa o mwiji wâ.

11. Mu ithangana yebhi o jitata mu kilunga atena kuzwela ni twana twâ yalungu ni Jihova?

¹¹ Lelu o ima yalunguluka. Mu jixi javulu o  jitata kamutena dingi kubhita kizwa ni twana twâ. Mu kamene o jitata aya mu kalakala, o twana aya mu xikola. Mu kiki o jitata abhingi kusota kithangana kya kuzwela ni twana kyoso kya kala kumoxi. (Efe. 5:15, 16; Fil. 1:10) O jitata atena kuzwela ni twana mu kithangana kya ubhezelu ku mwiji. Phange ya munzangala amwixana Alexandre wambe: “Tat’etu usokejeka o ima yoso ku mwiji, kehela kima kyoso kyoso kufidisa o ubhezelu ku mwiji. Ku disukilu dya ubhezelu, tudizwelesa yalungu ni mbote itwakatula.”

12. Ihi yatokala kulembalala o mutwameni wa mwiji mukithangana kya ubhezelu ku mwiji?

¹² Se umutwameni wa mwiji, ihi i utena kubhanga phala o twana twê atene kukatula mbote ku ubhezelu ku mwiji? Eye utena kudilonga ni ene mu kadivulu Sanguluka Katé Kuhádya ni Hádya! O kudilonga o divulu didi, kukwatekesas kudizwelesa kyambote ni twana twê. Eye wamesena kwila ene akutangela kyebhi kyamudivwa ni ihi ya muxinganeka. Kyenyiki kana kwa abazela mu kithangana kya ubhezelu ku mwiji. Kana kuthathamana se o twana twê azwela kima kikyalungu ni milongi ya Bibidya. Muveji dyakiki watokala kwa aximana mukonda dya kuzwela ya akala ku muxima ni kwa aswinisa kuzwela sé hele. Se wijiya kyebhi kya mudivwa, wandatena kwa akwatekesa dingi kyambote.

13. Kithangana kyebhi dingi kyala nakyu o jitata phala kukwatekesa o twana kuzukama kwa Jihova?

¹³ Jitata, kabasa kithangana mu kizuwa, sotenu kukwatekesa o twana twenu phala atene kuzukama dingi kwa Jihova. Ki kwabhingi kukingila o kithangana kya kudilonga o Bibidya phala kulonga o mona yalungu ni Nzambi yetu ya henda. Phange Liza, wamusasa o twana, wambe: “Tukwatekesa an’etu kumona Jihova kala Mubhangi, bhukaxi ka ima yatukondoloka. Mukifika, kyoso o imbwa yetu ki yexile mukwolelesa o twana, twakexile mu atangela kwila, Jihova Nzambi yasanguluka, wazolo o mwenyu, wamesena kwila tusanguluka we.”

14. Mukonda dyahi kima kyambote o jitata kukwatekesa o twana kusola makamba ambote? (Jisabhu 13:20)

¹⁴ Kitumu kya 4: Kwatekesa mon’é kusola makamba ambote. O Mak’a Nzambi  atutangela kwila, o makamba atena kutufunyisa kikale mu ukexilu wambote kikale mu ukexilu wayibha. (Tanga Jisabhu 13:20.) Jitata, enu mwejiya o makamba a an’enu? O kwila wabhiti nawu kyá kithangana? Ihi i utena kubhanga phala kukwatekesa o twana twé kubhanga ukamba ni yó azolo we Jihova? (1 Ko. 15:33) Utena kwa akwatekesa kusola kyambote o makamba, mu kwixana jiphange ala ni ukamba wambote ni Jihova, phala kudibunda n’enu mu ubhezelu ku mwiji.—Jisá. 119:63.

15. Ihi itena kubhanga o jitata phala kukwatekesa o twana kukala ni makamba ambote?

¹⁵ Tala o musoso wa tata amwixana Toni. Mwene wajimbulula yexile mubhanga kumoxi ni muhat’wê phala kukwatekesa o twana kukala ni makamba ambote: “Mumivu yavulu, eme ni muhat’wami twexile mukwixana kubhata dyetu jiphange ja mala ni ja ahatu, a itala ki idifu. Twexile mudya ni kubhanga kumoxi o ubhezelu ku mwiji. Yú ukexilu wambote wa kwijiya oso azolo Jihova, amusidivila ni kisangusangu. Twexile ni ujitu wakuzalela tufunga twa ilunga, akunji a jixi jengi ni jiphange jamukwa. O twana twetu twa katula mbote mu misoso yâ, mu kufulujuka kwâ ni ikalakalu yanguzu yabhanga mu sidivisu ya Jihova. Kiki kyakwatekesa an’etu kuzukama dingi kwa Jihova.” Kyenyikiphe enu mu jitata, sotenu kukwatekesa an’enu kukala ni makamba ambote.

16. Abha se mona wamba kuma kamesena dingi kusidivila Jihova?

¹⁶ Ihi itwamba, se sumbala ni nguzu imubhanga, kukala mona wamba kwila kamesena dingi kusidivila Jihova? Kanenu kubanza kwila kimwamusase mu ukexilu wambote. Jihova wabhana ku athu oso, katé we ni ku twana twenu, o ujitu wakusola se anda musidivila mba kana. Se mon’é wabhana dikunda kwa Jihova, kala ni kidyelelu kya kwila, hádya utena kuvutuka. Lembalala o kifika kya mona wajimbidile. (Luk. 15:11-19, 22-24) O munzangala yó, wabhange ima yavulu yayibha, maji kudisukilu, wavutuka. Amoxi atena  kwamba: “Kiki kifika ngó! O kwila monami utena mwene kuvutuka kwa Jihova?” Kyene mwene, utena kuvutuka! Kiki kyene kyabhiti ni munzangala amwixana Elie.

17. Kyebhi o musoso wa phange Elie ukuswinisa?

¹⁷ Yalungu ni jitata jê, phange Elie wambe: “Ene abhange yoso phala kungikwatekesa kuzola Jihova ni Mak’a mê o Bibidya. Maji kyoso ki ngatenesa 15 dya mivu, ngamateka kwa abhukumukina.” Mukaswekele phange Elie wamateka kubhanga ima yayibha. O jitata jê jasoto kumukwatekesa maji mwene ka abhana mátwi. Kyaxisa o dibhata dya jitata, mwene wadite mu wendelu wabolo. Né kiki, sayi ithangana wexile muzwela yalungu ni Bibidya ni kamba dyê. Phange Elie wambe: “O kuzwela ni kamba dyami yalungu ni Jihova, kwangibhangesa kuxinganeka we dingi kwa Jihova. Bhofelebhofele, o mbutu ya kidi kya Bibidya ya kunine o jitata jami ku muxima wami, yamateka kukula dingi.” Mu kubhita kithangana, phange Elie wavutuka mu kilunga. * Sé phata o jitata jê jasangulukile kyavulu mu kumulonga kuzola Jihova mu undenge!—2 Ti. 3:14, 15.

18. Kyebhi ki udivwa mukuxinganeka o kikalakalu kya jitata kya kulonga o twana kuzola Jihova?

¹⁸ Enu jitata, mwala ni ujitu wakatunda, o kusasa o twana twanda mibhingana mu kilunga kya Jihova, kuhádya. (Jisá. 78:4-6) Twamiximana ni muxima woso, o nguzu imwene mubhanga phala kukwatekesa an’enu! Se musuluka ni kukwatekesa an’enu kuzola Jihova ni kumubelesela, mutena kudyelela kwila, Tat’enu yadyulu wandasanguluka kyavulu.—Efe. 6:4.