1. Kima kyahi ki tuximbakatesa kyalongo Jihova kwa Mbalahamu?

 MIVU yavulu ku dima, Jihova wa tumikisa anju phala kutangela Mbalahamu kwila weji bwika o mbanza ya Sodoma ni Ngomola. O njimbu yiyi yabhonzele kyavulu phala Mbalahamu ku itendela, sumbala wexile ni kixikanu kya kolo kwa Nzambi. Kyenyiki mwene webhula: “O kwila wanda bwikisa mwene o athu ayuka kumoxi ni athu ayibha? . . . Mufundixi wa ngongo yoso kafundisa ni kuyuka?” (Dim. 18:​23-33) Ni mwanyu woso Jihova wakwatekesa kamba dyê dya kazola kudilonga disá dya katunda: Kwila Jihova nuka wanda bwika o athu ayuka. Kate lelu o disá didi dyene mutubhekela mbote ni kutukolokotesa.

2. Ihi ituxikinisa kwila Jihova ufundisa ni kuyuka kwoso ni henda?

² Mukonda dyahi tutena kuxikina ni kidi kyoso kwila Jihova ufundisa ni kuyuka ni henda? Mukonda twejiya kwila ‘Jihova utala o mixima’ ya athu. (1 Sam. 16:7) Mu kidi, mwene wejiya “o mixima yoso ya an’athu.” (1 Jis. 8:39; 1 Mal. 28:9) Kiki kidi kya katunda. Jihova wabeta-kota mu unjimu etu ndenge, kyenyiki, sayi ithangana kitwanda tendela kyambote o ukexilu we wa kufundisa mba wa kubatula o maka. Yalungu ni Jihova Nzambi, poxolo Phawulu wambe kiki: “O kufundisa kwê, o athu katena ku kutongolola!”—Lom. 11:33.

3-4. Ibhwidisu yebhi nange i tutena kukala-nayu, ni ihi itwanda mona mu milongi yiyi? (Nzwá 5:​28, 29)

³ Maji ne kiki, sayi ithangana nange tutena hanji kukala ni ibhwidisu kala yexile-nayu Mbalahamu. Kate mwene nange tutena kudibhwidisa: ‘O kwila o yo a abwikile kwa Jihova, kala o athu a mbanza ya Sodoma ni Ngomola, anda vutuka ku mwenyu? O kwila amoxi mudya anda kala mu kibuka kya yo anda vutuka ku mwenyu, mu “difukunukinu dya athu . . . akambe o kuyuka”?’—Ika. 24:15.

⁴ Phala kutambwijila, tubhitulule bhofele o ima itwatendela yalungu ni difukunukinu. Tu izuwa ku dima, twatambula milongi  ya jimbulula kyambote o maka alungu ni ‘difukunukinu dya mwenyu’ ni ‘difukunukinu dya kufundisa.’ a (Tanga Nzwá 5:​28, 29.) Kiki kyabhangesa kutonginina dingi ni kulungulula o ukexilu wetu wa kutendela o maka enya. Mu milongi yiyi ni ya kayela, twanda zwela yalungu ni ima i twatonginina dingi ni itwalungulula. Yalungu ni ukexilu wayuka wa kufundisa wa Jihova, kya dyanga twanda mona se ihi i twakambe o kwijiya, mu kusuluka twanda mona se ihi i twejiya kya.

IHI I TWAKAMBE O KWIJIYA

 ⁵ M’ukulu, o madivulu metu exile mu zwelela se ihi yanda bhita ni athu a afundisa kwa Jihova kala athu akambe o kuyuka. Etu twexile muzwela kwila o yo a abwika kwa Jihova, kala o athu a mbanza ya Sodoma ni Ngomola, kanda ku afukununa. Maji kyoso ki twadilongo dingi ni kusamba yalungu ni maka enya, twamono kwila etu kitutena kuzwela ni kidi kyoso kwila, kikwanda kala difukunukinu phala o athu enyo. Mukonda dyahi?

6. Bhana phangu yalungu ni athu akambe o kuyuka a afundisa kwa Jihova m’ukulu. Yalungu ni athu ya, ihi i twakambe kwijiya?

⁶ Mu Bibidya mwala ikanenu yavulu izwela yalungu ni athu akambe kuyuka, a afundisa wa Jihova. Mu kifika, Jihova wabwika athu oso ku Dilúvyu, kwa subhuka ngo Nowé ni mwiji we. Mwene wa kwatekesa akwa Izalayele kubwika o sambwadi dya ifuxi ya athu atungile mu Ixi Yakanene. Mwene wa bhangesa we anju kubwika 185.000 a masoladi akwa Asidya mu usuku umoxi. (Dim. 7:23; Mate. 7:​1-3; Iza. 37:​36, 37) Mu misoso yoso yiyi, o kwila o Bibidya itutangela ni kidi kyoso kwila Jihova wasolo kubwika o athu ya kate ku hadya ni hadya, ni kwila ene kala dingi ni kidyelelu kya difukunukinu? Kana, yene ki izwela kiki. Mukonda dyahi twamba kwila kana?

7. Ihi itwakambe o kwijiya yalungu ni athu a abwika ku Diluvyu mba yo a abwika mu ixi ya Kanana? (Tala ofoto ya .)

⁷ Etu kitwejiya kyebhi Jihova kyafundisile muthu ni muthu; kitwejiya we se o yo a ajibhile a abhanene kithangana kya kudilonga yalungu ni Jihova ni kudyela o ituxi ya. Yalungu ni kithangana kya Dilúvyu, o Bibidya izwela kwila Nowé wexile “muboki wa maka mayuka.” (2 Ph. 2:5) Maji yene ki izwela kwila mu kithangana kyexile mutunga o alaka yoyo yonene, mwene wexile we mubokela o athu oso atungile mu ixi. Kyene we kimoxi ni akwa Kanana, etu kitwejiya se o athu oso ayibha atungile mu ixi yenyoyo, a abhanene kithangana kya kudilonga yalungu ni Jihova ni kulungulula o wendelu wa.

8. Ihi i twakambe o kwijiya yalungu ni athu a mbanza ya Sodoma ni Ngomola?

⁸ Ihi itwamba yalungu ni athu akwa Sodoma ni Ngomola? O selevende ya Jihova, Lote, watungile mwaxaxi ka akwa Sodoma. Maji o kwila etu twejiya se Lote wa abokela enyoso? Kana. Mu kidi, ene exile mwene athu ayibha, maji o kwila ene ejidile kutungula o ima yawabha ni ima yayibha? Nange kejidile. Mu kifika banza ngo ku kibuka kya mayala a mbanza yenyoyo a mesenene kuzeka ni mayala endele mukunda Lote. O Bibidya izwela kwila ene adibhongolola “tunde kuminzangala kate kwa adyakime.” (Dim. 19:4; 2 Ph. 2:7) O kwila twejiya ni kidi kyoso kuma o Nzambi ya henda Jihova wa abalakala o kufwa enyoso, sé kidyelelu dingi kya difukunukinu? Kidi kwila, Jihova watangela Mbalahamu kwila mu mbanza yenyoyo kimwexile ne ngo dikwinyi dya athu ayuka. (Dim. 18:32) Mu kiki, ene exile athu akambele kuyuka, ni kwila Jihova walungil’ye mu ku abwika mukonda dya ibhangelu ya. Maji-phe, o kwila tutena kuzwela ni  kidi kyoso kwila, seku muthu mwaxaxi ka athu enyo, anda mu fukununa ku “difukunukinu dya athu . . . akambe o kuyuka”? Kana, kitutena kuzwela kiki ni kidi kyoso!

9. Ihi i twakambe o kwijiya yalungu ni Solomá?

⁹ Mu Bibidya mwala we misoso ya athu ambote akituka athu ayibha. Phangu imoxi ya Sobha Solomá. Mwene wejidile kyambote se Jihova nanyi ni kyebhi kyatokala kumubheza, anga Jihova wamubesowalele kyavulu. Maji ku pholo dya kwenda, Solomá wamateka kubheza jinzambi jamakutu. Kiki kyabhekela njinda yavulu kwa Jihova, anga mukonda dya ituxi ya Solomá, o kifuxi kya Izalayele kyatale hadi mu hama ya mivu ndenge. Kidi kwila, o Bibidya yamba kuma kyoso Solomá kyafu, ‘wa nyoha mu mavu kumoxi ni jitata jê,’ kala o diyala dya fiyele Sobha Davidi. (1 Jis. 11:​5-9, 43; 2 Jis. 23:13) Maji o kwila o izwelu yiyi ilondekesa kuma Solomá anda mufukununa? Kana, o Bibidya kiyatutangela-kyu. Amoxi nange a banza kwila Solomá anda mu fukununa, mukonda o Bibidya yamba kwila “woso wafu a muloloka o ituxi yê.” (Lom. 6:7) Kiki kidi, maji ki kilombolola kwila oso afu anda kwafukununa. Mukonda se kyeji bhita mu ukexilu yu, kyeji londekesa kwila kabasa muthu wafu, watambula kya o ujitu wa kuvutuka ku mwenyu. Maji o difukunukinu ujitu wa Nzambi yetu ya Henda. Mwene ubhana o ujitu yu, ku athu andala Mwene kwila amusidivila kate ku hadya ni hadya. (Jobe 14:​13, 14; Nzw. 6:44) O kwila Solomá wanda tambula o ujitu yu? Jihova wejiya o kitambwijilu, etu kana. Maji twejiya kwila, Jihova wanda bhanga o kima kyatokala.

IHI I TWEJIYA KYA

 ¹⁰ Tanga Izekiyele 33:11. Yalungu ni kufundisa o athu, Jihova watutangela kyebhi kyadivwa. Bhukaxi ka nzumbi ikola ya Nzambi, poxolo Phetele walembalala o maka a soneka polofeta Izekiyele, kyoso kyambe kwila “Jihova . . . kamesena kwila kukala muthu ufwa.” (2 Ph. 3:9) O izwelu yiyi ituximbakatesa. Twejiya kwila Jihova ubwika ngo o muthu kate ku hadya ni hadya, se kwabhingi mwene kukibhanga. Mwene wezala ni henda, anga ulondekesa o henda ku muthu, se kibhana.

11. Ananyi kanda kwafukununa, ni kyebhi ki twakijiya?

¹¹ Ihi i twejiya yalungu ni athu kanda kwafukununa? O Bibidya itumbula ngo jiphangu jofele. b Jezú walondekesa kwila Juda dya Kadyota kanda mufukununa. (Mál. 14:21; tala we Nzwá 17:12 ni nota de estudo mu Bibidya ya phutu.) Juda wejidile kwila wexile mulungulukila Jihova ni Mon’e Jezú. Maji ne kiki, mwene wakibhange. (Tala Máluku 3:29 ni nota de estudo mu Bibidya ya phutu.) Kyene we kimoxi, Jezú wambe kwila sayi atwameni a jingeleja amulungulukile, eji fwa sé kidyelelu kya difukunukinu. (Mat. 23:33; tala Nzwá 19:11 ni nota de estudo “o homem,” mu Bibidya ya phutu.) Ku mbandu yamukwa, poxolo Phawulu wadimuna kwila o yo a lungulukila o kidi, ya akambe kudyela, kanda kwafukununa.—Jih. 6:​4-8; 10:29.

12. Ihi i twejiya yalungu ni henda ya Jihova? Bhana phangu.

¹² Ku mbandu yamukwa, ihi i twejiya yalungu ni henda ya Jihova? Kyebhi mwene kyene mulondekesa kuma “kamesena kwila kukala muthu ufwa”? Mu kifika, xinganeka ngo mu henda yalondekesa ku athu atele ituxi ya makota. Sobha Davidi watele ituxi yamakota, kala phanda ni ujibhanganga. Maji, Davidi wadyela, kyenyiki Jihova mu henda ye wamuloloka. (2 Sam. 12:​1-13) Ku mwenyu we, Sobha Manasa wabhange ima yavulu yayibha kinene. Maji ne mwene ni ituxi yiyi yamakota, Jihova  walondekesa henda, yu waloloka Manasa mukonda wadyela o ituxi yatele. (2 Mal. 33:​9-16) O jiphangu jiji jitulembalesa kwila, Jihova ulondekesa henda ku athu, kyoso kyamona kwila kyafwama mwene o kwalondekesa-nayu. Mwene wanda kwafukununa mukonda ene amono kwila atele ituxi ya yayibha kinene, ya adyela.

13. (a) Mukonda dyahi Jihova walondekesa henda ku akwa Ninive? (b) Ithangana ku pholo, ihi ya zwela Jezú yalungu ni akwa Ninive?

¹³ Twejiya we yalungu ni henda yalondekesa Jihova ku akwa Ninive. Nzambi watangela Jona, wixi: “Ngeza mukwijiya o ima yayibha yamubhanga-mu.” Maji kyoso akwa Ninive kyadyela o ituxi ya, Jihova wa aloloka. Mwene walondekesa dingi henda, o Jona ndenge. Jona wexile ni Njinda, anga Jihova wamulembalesa kwila, o akwa Ninive kejidile “kutungula o ima yawabha ni ima yayibha.” (Jona 1:​1, 2; 3:10; 4:​9-11) Ku pholo dya kwenda, Jezú watumbula o phangu ya akwa Ninive, phala kulonga yalungu ni henda ni kuyuka kwa Jihova. Jezú wambe kwila o akwa Ninive adyela, ‘anda balumuka mu kithangana kya kufundisa.’—Mat. 12:41.

14. Ihi yanda lombolola o ‘difukunukinu dya mwenyu’ phala akwa Ninive?

¹⁴ Maji ihi ilombolola o izwelu ya kwila o akwa Ninive ‘anda balumuka mu kithangana kya kufundisa’? Jezú walongo kwila kwanda kala ‘difukunukinu dya kufundisa.’ (Nzw. 5:29) Mwene wexile muzwela yalungu ni kithangana kya Utuminu we wa Midi ya Mivu, kyoso o “athu ayuka ni athu akambe o kuyuka” anda kwafukununa. (Ika. 24:15) Phala yo akambe o kuyuka, o difukunukinu dya, dyanda kala ‘difukunukinu dya kufundisa.’ Kiki kilombolola kwila, kyoso kyanda kwafukununa, Jihova ni Jezú anda kwatonginina phala kumona se ene anda belesela ni kukumbidila o ima yanda kwalonga. Se muthu mukwa Ninive anda mufukununa, udituna kubheza Jihova, Mwene kanda mwehela kwila ukolokota ku mwenyu. (Iza. 65:20) Maji oso a sola kubheza Jihova ni ufiyele woso, anda tambula o mwenyu wakalelaku!—Dan. 12:2.

15. (a) Mukonda dyahi kitwatokala kuzwela kwila, seku muthu amubwika mu mbanza ya Sodoma ni Ngomola, anda mufukununa? (b) Kyebhi ki tutena kutendela o izwelu itusanga mu mukanda wa Juda velusu 7? (Tala o kaxa “Ihi Yamesenene Kuzwela Juda?”)

¹⁵ Mu kuzwela yalungu ni athu a mbanza  ya Sodoma ni Ngomola, Jezú wambe kwila “mu Kizuwa Kya Kufundisa” kyanda bhonza dingi phala o athu akambe kumuxikina mwene ni ilongesu ye, o akwa Sodoma ni Ngomola ndenge. (Mat. 10:​14, 15; 11:​23, 24; Luk. 10:12) Ihi yamesenene kuzwela? O kwila Jezú wazwela kiki phala kulondekesa ngo kuma, o athu mu izuwa ye a betele-kota mu kuyibha, o akwa Sodoma ni Ngomola ndenge? Lembalala kwila kyoso Jezú kyambe kwila o akwa Ninive ‘anda balumuka mu kithangana kya kufundisa,’ mwene kexile muta ngo kifika, wazwela mwene kima kyanda bhita. Kyenyiki, nange o kyazwela Jezú yalungu ni akwa Sodoma ni Ngomola, kyanda bhita mwene. O “Kizuwa Kya Kufundisa” kyatumbula mu misoso iyadi, kyen’ye kimoxi. Kala o akwa Ninive, o athu akwa Sodoma ni Ngomola, abhange ima yayibha. Maji o akwa Ninive exile ni kithangana kya kudyela. Ku mbandu yamukwa, lembalala yazwela Jezú yalungu ni “difukunukinu dya kufundisa.” Kwanda fukunuka we ni yo “abhange ima yayibha.” (Nzw. 5:29) Kyenyiki tutena kumona kwila, nange sayi-ku kidyelelu phala o athu akwa Sodoma ni Ngomola. Nange amoxi mudya anda kwafukununa, anga twanda tena kukala ni kithangana kya kwalonga yalungu ni Jihova ni Jezú Kidistu!

16. Ihi i tonginina Jihova phala kwijiya se nanyi watokala kumufukununa? (Jelemiya 17:10)

¹⁶ Tanga Jelemiya 17:10. O velusu yiyi izwela o ima i twejiya yalungu ni ukexilu wa Jihova wa kufundisa: Jihova ithangana yoso ‘utonginina o mixima, utungula o ilunji.’ Yalungu ni difukunukinu ku hadya, mwene wanda “bhana kala muthu kya fwama ku mawendelu mê.” Jihova wanda bwika o muthu se kwabhingi mwene, maji wandalondekesa o henda se kibhana. Mu kiki, tuzwela ngo kwila o muthu kanda kumufukununa, se twa kijiya mwene ni kidi kyoso kwila kyene we kizwela o Bibidya!

O “MUFUNDIXI WA NGONGO YOSO” WANDA “FUNDISA NI KUYUKA”

 ¹⁷ Tunde Adá ni Eva kyadilungu ni Satanaji mazunda a athu ene mufwa. O ‘kalunga nguma’ yadikota! (1 Ko. 15:26) Ihi yanda bhita ni athu oso ya? Ka kibuka kofele ka 144.000 ka akayedi a Jezú, anda ku afukununa phala kutambula mwenyu ki ubhu dingi, ku dyulu. (Dij.  14:1) O ndumba ni ndumba dya athu, mayala ni ahatu azolo Jihova, anda bhanga mbandu ku “difukunukinu dya . . . athu ayuka,” anga anda tambula mwenyu wakalelaku mu ixi, se asuluka mu kukala athu ayuka mu kithangana kya Midi ya Mivu ya Utuminu wa Jezú Kidistu ni ku polova yasukina. (Dan. 12:13; Jih. 12:1) Mu kithangana kyenyokyo, o athu “akambe o kuyuka”—kala yo nuka a sidivila Jihova mba kate mwene exile mubhanga ima yayibha—anda kwabhana kithangana phala kulungulula ukexilu wa, ni kukituka jiselevende jafiyele ja Jihova. (Luk. 23:​42, 43) Maji, sayi athu ayibhile kinene, ya a solele kubhukumukina Jihova; mukonda dya kiki mwene kanda kwafukununa.—Luk. 12:​4, 5.

18-19. (a) Mukonda dyahi tutena kudyelela mu kufundisa kwa Jihova kwalungu ni athu afu kya? (Izaya 55:​8, 9) (b) Ihi itwanda dilonga mu milongi ya kayela?

¹⁸ O kwila tutena kuxikina ni kidi kyoso kuma, mu kufundisa o athu, Jihova ithangana yoso ubhanga o kima kyatokala? Kyene, tutena! Kala kyaxikinine Mbalahamu, Jihova mwene o mufundixi wayuka, wabeta-kota mu unjimu ni henda, mu ngongo yoso. Mwene walongo kyambote Mon’e, yu wamubhana o kikalakalu kya kufundisa o athu oso. (Nzw. 5:22) Jihova ni Jezú, ejiya kyambote o mixima ya athu. (Mat. 9:4) Kyenyiki, ene anda fundisa jinga muthu ni muthu ni “kuyuka”!

¹⁹ Tu sulukyenu jinga mu kudyelela kwa Jihova ni mu ukexilu we wakubhanga o ima. Twejiya kwila etu kitwala ni kutena kwa kufundisa—maji mwene wala naku! (Tanga Izaya 55:​8, 9.) Mu kiki, etu twehela o kufundisa kwoso bhu maku ma Jihova ni ma Mon’e Jezú, o Sobha ukayela o kuyuka ni henda ya Tat’e. (Iza. 11:​3, 4) Abha, o yalungu ni kithangana kya hadi yadikota? Kyebhi Jihova ni Jezú kyanda fundisa o athu mu kithangana kyenyokyo? Ihi i twakambe o kwijiya? Ni ihi i twejiya? O milongi ya kayela yanda tambwijila o ibhwidisu yiyi.