1. Ibhidi yahi yenemudibhananayu ojiselevende ja Jihova?

OKWILA eye wamudibhana ni kibhidi? Nange sayi phange mukilunga wakuluwalesa kyavulu. (Tiya. 3:2) Mbaphe sayi koleka kuxikola mba kusalu, wenemukusebhulula mukonda dya kukala Mbangi ya Jihova. (1 Phe. 4:3, 4) Mbaphe sayi ndandu yé wamubhanga yoso phala kukufidisa kuya muyônge ni kuboka. (Mat. 10:35, 36) Mbaphe sayi kibhidi kyakubhonzo kyavulu kyamukubhangesa kate mwene kuxinganeka kweha kusidivila Jihova. Maji utena kudyelela ni muxima woso kwila, kabasa kibhidi kiwamudibhana nakyu, Jihova wandakubhana o unjimu phala kutolola o ibhidi ni nguzu phala kukolokota.

2. Kala kilondekesa Loma 15:4, kutanga o Bibidya kutena kutukwatekesa kyebhi?

² Jihova wabhange yoso phala mu Bibidya asonekemu misoso yajiselevende jê jadibhana ni ibhidi. Mukonda dyahi? Phala etu tutene kukatulaku madisa. Kiki kyene kyabhangesa Jihova kubhana onzumbi ikôla kwa poxolo Phawulu phala kusoneka o izwelu itusanga mumukanda kwa akwa Loma 15:4 (Tanga.) Kutanga omisoso yiyi mu Bibidya, kwandakutuximbakatesa ni kutubhana kidyelelu. Maji phala kukatula mwene mbote mumisoso yiyi, kitwatokala kutanga ngó o Bibidya kwabhu. Maji twatokala kwehela o Mak’â Nzambi kutula mwene kumixima yetu ni kulungulula o ukexilu wetu wakuxinganeka. Se twabhindamena itendelesu phala kudibhana ni maka utwejiya kyambote, utwamudibhananawu kindala kiki, ihi itutena kubhanga? Tutena kubhanga ima iwana: (1) Samba, (2) Banza, (3) Xinganeka, (4) Kumbidila. Mumbandu yiyi twandadilonga kyebhi kitutena kubhanga o ima iwana yiyi. * Twandakayela we ojindunge jiwana  jiji mukudilonga yabhiti ni sobha Davidi ni poxolo Phawulu.

3. Ande dyakumateka kutanga o Bibidya, ihi iwatokala kubhanga ni mukonda dyahi?

³ (1) Samba. Ande dyakumateka kutanga o Bibidya bhinga o kikwatekesu kya Jihova phala kukatula ombote mu ima iwandatanga. Mukifika, se wamusota itendelesu phala kubatula maka uwamudibhananawu, samba kwa Jihova. Mubhinge phala akukwatekese kusanga kitumu mu Bibidya, kyandakukwatekesa kwijiya okima kiwatokala kubhanga.—Fil. 4:6, 7; Tiya. 1:5.

4. Ihi yandakukwatekesa kutendela kyambote omusoso uwamutanga mu Bibidya?

⁴ (2) Banza. Jihova watubhana o uhete wakatunda wakubanza. Phala kutendela kyambote omusoso uwamutanga mu Bibidya, sota kubanza mu ima yamubhita, ni kudita mukididi kyamukwa musoso. Sota we kumona o ima yamono ni kwivwa o ima yevu.

5. Okuxinganeka ihi? Kyebhi ki utena kubhanga kiki?

⁵ (3) Xinganeka. Kuxinganeka, kifwa okubanza mwene kyambote mu ima iwamutanga, ni kusota kutonginina kyebhi yene yalungu neye. Okuxinganeka kwandakukwatekesa kusokesa omilongi iwamumona, ni kutendela omaka mu ukexilu wazongo. Okutanga se kuxinganeka kwadifu ngo ni kulamba se kutamu jayu, mongwa, sebhola ni tumaji. Maji okuxinganeka, kyedi kala okubunda o ima yoso yiyi phala kutowalesa okudya. Phala kukukwatekesa kuxinganeka eye wabhingi kudibhwidisa kiki: ‘Omuthu amutumbula mumusoso wabhange ihi itena kungikwatekesa kubatula omakamami? Kyebhi Jihova kyamukwatekesa? Ihi ingadilongo mumusoso yú yandangikwatekesa kukolokota mu ibhidi?’

6. Mukonda dyahi twatokala kukumbidila yoso itwadilongo?

⁶ (4) Kumbidila. Jezú wambe kuma, woso ukamba kukumbidila yoso yadilongo, wadifu ni diyala dyatungu o inzo yê kumuseke. Okikalakalu kyoso kyabhange ni nguzu, hadi ngó yatale. Mukonda se kunoka mvula anga kwiza kithembu kyanguzu, o inzo yandabwa. (Mat. 7:24-27) Kyene we kimoxi. Onguzu yoso itubhanga phala kusamba, kubanza ni kuxinganeka, yandakala hadi yahatu sekudisukilu tukamba kukumbidila yoso itwadilongo. Kyoso kitwandadibhana ni ima ilola okixikanu kyetu, kala o ibhidi ni izukutisu, okixikanu kyandazoza. Maji se tukumbidila yoso itwamudilonga, twandatena kusola kyambote, twandatululuka, okixikanu kyetu kyandadibandekesa dingi. (Iza. 48:17, 18) Kindala twandamona kyebhi kitutena kukayela ojipondo jiwana jiji mukudilonga kima kyabhiti kumwenyu wa Sobha Davidi.

7. Musoso wananyi utwandadilonga kindala?

⁷ Okwila sayi dikamba mba ndandu yakuluwalesa? Se kyene, kudilonga yabhiti ni Sobha Davidi kyoso mone Abisalone kyamuluwalesa mukumesena kumubhingana ku usobha, kitena kukukwatekesa.—2 Sam. 15:5-14, 31; 18:6-14.

8. Ihi i utena kubhanga phala Jihova n’akukwatekesa?

⁸ (1) Samba. Mukunxinganeka mumusoso, tangela kwa Jihova ni kidi kyoso, kyebhi kiwamudivwa mukonda dya kukuluwalesa. (Jisá. 6:6-9) Mukusuluka bhinga kwa Jihova phala n’a kukwatekesa kusanga velusu yandakukwatekesa kwijiya iwatokala kubhanga.

9. Ihi yabhiti bhukaxi ka Davidi ni Abisalone?

⁹ (2) Banza. Banza mu ima yoso yabhiti ni kyebhi kya divu Davidi mu izulukutu yiyi. Kyadyanga, Abisalone mona sobha Davidi, wabhiti mivu ni kufunya ndunge phala kubhangesa o athu kumuzola. (2 Sam. 15:7) Kyoso kyabhixila okithangana kyatokala, Abisalone watumikisa alondi kujimbanza joso ja Izalayele, phala kubhomba omixima yamundu n’a muxikina kala sobha. Mwene  kate wabhangesa Ahitofele kwiza kumbandu yê, sumbala wexile dikamba dya Sobha Davidi, mwéne wexile kumubhana ojindunge. Abisolone wabhange ongolokela kwila, wakituka sobha, wasoto kukwata Davidi phala kumujibha; sumbala mukithangana kyokyo, nange Sobha Davidi wexile mukata kyavulu. (Jisá. 41:1-9) Maji Davidi watonginina ondunge yexile mufunya Abisalone. Waxisa ombanza ya Jeluzaleme yu walenge. Mukubhita kithangana, omasoladi a Abisalone adikwata ni masoladi a Davidi. Abisalone amutolola yu wafu.

10. Hinu kyebhi Davidi kyeji dibhana ni ibhidi kumwenyu wê?

¹⁰ Mukusuluka, sota kubanza kyebhi kyadivu sobha Davidi ni izulukutu yoso yiyi. Mwene wazolele mone Abisalone, wadyelele kamba dyê Ahitofele. Maji kiyadi kya amulungulukila. Amuluwalesa kyavulu, kate mwene amesenene kumujibha. Mu yoso yiyi, Davidi hinu keji dyelela dingi omakamba me moso, mukubanza kwila, enyoso adibundile ni Abisalone mukumubalukila. Mwene wejitena kuxinganeka kya ngó mumbote yê, weji sota kulenga ubheka we, weji kala ni kulula kwamuxima. Maji kikyene kyabhange Davidi. Mwene watena kutolola o ibhidi yiyi yabhonzo kumwenyu wê. Ihi yamukwatekesa ku itolola?

11. Ihi yabhange Davidi kyoso kyadibhana ni ibhidi yabhonzo?

¹¹ (3) Xinganeka. Ihi i utena kudilonga kumusoso yú wa sobha Davidi? Tambwijila okibhwidisu kiki, “ihi yabhange Davidi phala kubatul’o maka?” Davidi wabatula omaka ni unjimu, kakayela odilwaka dya muxima mba kabhange o ima se kuxinganeka. Mwene kehela owôma kumufidisa kusola kima. Muveji dya kiki, mwene wabhingi kikwatekesu kwa Jihova mumusambu, wabhingi we kikwatekesu kumakambamê. Se kulaleka, mwene wakumbidila yoso yasolele kubhanga. Sumbala amuluwalesa kyavulu omuxima, Davidi wasuluka ni kudyelela o athu, muveji dya ku azemba. Mwene wasuluka ni kudyelela kwa Jihova ni kumakambamê.

12. Ihi yabhange Jihova phala kukwatekesa Davidi?

¹² Kyebhi Jihova kya kwatekesa Davidi? Se utokwesa bhofele wandamona kwila, Jihova wabhana onguzu yabhindamene Davidi phala kukolokota. (Jisá. 3:1-8; kabesadyu) Jihova wabesowala o ima yasolele Davidi, wakwatekesa we omakamba abhânge mu ita phala kuzokela Sobha Davidi.

13. Se muthu wakuluwalesa kyebhi ki utena kukayela ophangu ya Davidi? (Matesu 18:15-17)

¹³ (4) Kumbidila. Dibhwidise: ‘Kyebhi kingitena kukayela ophangu ya Davidi?’ Se kumoneka maka, batulawu se kulaleka. Kabasa o ibhidi iwamudibhananayu, sota kukumbidila okitendelesu kya Jezú, kyosoneke mudivulu dya Matesu mukibatulu 18. (Tanga Matesu 18:15-17.) Maji aluka! Kana kusola ni lusolo, sé kuxinganeka, kana we kukayela omuxima wê. Samba kwa Jihova, mubhinge kutululuka kwa muxima, mubhinge unjimu phala kudibhana ni ibhidi. Dyelela jinga kumakambamê, xikina okikwatekesu kyâ. (Jisa. 17:17) Okyabeta dingi kota, kayela o itendelesu ya Jihova itusanga mu Bibidya.—Jisa. 3:5, 6.

14. Mu ithangana yebhi iwatokala kuxinganeka o izwelu itusanga mumukanda wa 2 Timote 1:12-16; 4:6-11, 17-22?

¹⁴ Okwila ojindandu jé jamukuzukutisa? Okwila watungu mu ixi mwafidisa mba abalakala okikalakalu kyetu? Se kyene, o izwelu itusanga mu mukanda wa 2 Timote 1:12-16 ni 4:6-11, 17-22 itena kukukwatesa. * Kyoso kyasoneka ojivelusu jiji, Phawulu wexile mukaleya.

15. Ihi i utena kubhinga kwa Jihova?

 ¹⁵ (1) Samba. Ande dyakutanga omusoso, tangela kwa Jihova ni kidi kyoso omaka uwamudibhananawu, ni kyebhi ki wamudivwa. Mukusuluka, bhinga kwa Jihova phala n’a kukwatekesa kusanga jivelusu mumusoso yú wa Phawulu, jandakukwatekesa kwijiya iwatokala kubhanga.

16. Ibhidi yebhi yadibhananayu Phawulu?

¹⁶ (2) Banza. Banza kwila wamubhita ni ibhidi yabhiti ni Phawulu. Wala mukaleya mumbanza ya Loma, akukutu mumalubhambu. Mwene wexile kya mukaleya muveji jamukwa. Maji muveji yiyi, eji mujibha kya mwene. Sayi makambamê amubwazeka, mwene kexile ni nguzu yasoko, wabhwidile.—2 Tim. 1:15.

17. Hinu kyebhi Phawulu kyeji dibhana ni ibhidi kumwenyu wê?

¹⁷ Phawulu hinu weji lunga omuxima mu ima yaxisa kudima m’ukulu, mukuxinganeka kiki: Tamanu ngabhangele o ima mu ukexilu wengi! Kithangana kiki kingeji kala mukaleya. Phawulu wejitena kukala ni njinda yamayala atokala ku mbandu ya Azya, amubwazeka. Keji dyelela dingi omakamba mê amukwa. Maji kikyene kyabhange Phawulu. Ihi yamukwatekesa kudyelela kumakambamê, ni kukikwatekesu kya Jihova?

18. Ihi yabhange Phawulu kyoso kyadibhana ni ibhidi yabhonzo?

¹⁸ (3) Xinganeka. Tambwijila okibhwidisu kiki: “Ihi yabhange Phawulu phala kubatula omaka?” Sumbala kwexile athu amesenene kumujibha, Phawulu kajimbile okima kyabeta kota: Okubhana ofuma kwa Jihova. Mwene wasuluka ni kudyelela akwa, walondekesa kidyelelu kwa Jihova, mukusamba jinga se kufula. (2 Tim. 1:3) Phawulu kakwata kya ngó kuxinganeka kujiphange jamubhele odikunda. Muveji dya kiki, mwene wasakidila okikwatekesu kyamubhele omakambamê. Kumbandu yengi, Phawulu wasuluka ni kudilonga jinga o Mak’â Nzambi. (2 Tim. 3:16, 17; 4:13) Okyabeta dingi kota, Phawulu wadyelele ni kidi kyoso kwila, Jihova ni Jezú amuzolo. Ene kamubhanene dikunda, eji mufuta musidivisu yoso yafiyele yabhangele.

19. Kyebhi Jihova kyakwatekesa Phawulu?

¹⁹ Jihova wadimwine kya Phawulu kwila, eji muzukutisa mukonda dya kukala Kidistá. (Ika. 21:11-13) Kyebhi Jihova kyakwatekesa Phawulu? Mwene watambwijila omisambu ya Phawulu, wabhana we kutena kwa Phawulu mukithangana kyenyokyo. (2 Tim. 4:17) Phawulu amudyelelesa we kwila, wejitambula ofutu yamutokala mukikalakalu kyabhange ni nguzu yoso. Jihova wakwatekesa we Phawulu mukubhangesa omakambamê kumubhana kama kosokoso kabhindamene.

20. Mukuxinganeka mu izwelu ya Loma 8:38, 39, kyebhi ki utena kukayela okixikanu kya Phawulu?

²⁰ (4) Kumbidila. Dibhwidise: ‘Kyebhi kingitena kukayela ophangu ya Phawulu?’ Kala Phawulu, kitwatokala kujimba kwila, atena kutuzukutisa mukonda dya kixikanu kyetu. (Mál. 10:29, 30) Phala kusuluka ni kusidivila Jihova ni ufiyele woso, sumbala ni ibhidi, twabhingi kusamba jinga ni kudilonga o Mak’â Nzambi izuwa yoso. Kitutokala we kujimba kwila, okima kyabetakota kitutena kubhanga, okubhana okijingu kwa Jihova. Tutena kudyelela kwila, kyadyanga, Jihova nuka wandatubhana dikunda. Kayadi, seku kima kibhanga omuthu, kitena kubatula ohenda ya Jihova kokwetu.—Tanga Loma 8:38, 39; Jihe. 13:5, 6.

21. Ihi yakwatekesa ojiphange Aya ni Hector kutolola o ibhidi yadibhananayu?

²¹ Kabasa omaka utudibhananawu, tutena kusanga misoso ya Bibidya itubhana onguzu. Mukifika, phange Aya, muboki wathembu  yoso ku ixi ya Japão, wambe kwila, omusoso wa Jona, wamukwatekesa kutolola owôma wakuboka mu ididi mubhita athu avulu. Phange Hector, watungu ku ixi ya Indonesia ojitata jê kamubheza Jihova. Mwene wambe kwila, ophangu ya Lute yamukwatekesa kusota kwijiya dingi kyambote Jihova ni kumusidivila.

22. Kyebhi ki utena kukatula mbote mukwivwa jividyu jamisoso ya athu atumbula mu Bibidya ni kutanga ojimbandu “Kayela o Kixikanu Kyá”?

²² Kwebhi ku utena kusanga misoso ya athu a atumbula mu Bibidya itena kukolesa dingi okixikanu kyé? Tutena kusanga omisoso yiyi, mukwivwa ojidrama ja kitangelu kya Bibidya, kutala jividyu, ni kutanga omilongi “Kayela o Kixikanu Kyá.” * Yene itukwatekesa kutendela dingi kyambote omisoso ya Bibidya. Phala kubhanga ni kusoneka ojimbandu jiji, kwabhingi kutokwesa kyavulu. Kyenyikiphe, ande dya kudilongadyu ubheka, watokala kubhinga okikwatekesu kya Jihova, phala utene kusanga jipondo ji utena kukumbidila kumwenyu wé. Sota kudita mukidid kya athu a atumbula mumisoso. Xinganeka we o ima yabhange ojiselevende jiji ja fiyele, ni kyebhi Jihova kya akwatekesa kutolola o ibhidi yâ. Mukusuluka, kumbidila yoso iwadilongo. Sakidila Jihova mukikwatekesu kyamukubhana. Londekesa okisakidilu kiki mukukwatekesa ni kuswinisa we akwenu.

23. Kala kya kikanena mudivulu dya Izaya 41:10, 13, ihi yandabhanga Jihova kokwetu?

²³ Omwenyu wabhonzo kyavulu, mukonda Satanaji mwene wamukwendesa omundu yú. Sayi ithangana kitwejiya itwandabhanga. (2 Tim. 3:1) Maji kitwabhingi kukala ni hele mba wôma. Jihova wejiya o ibhidi itwamudibhananayu. Se tudibhala, mwene wanda kutukwata ni lukwaku lwê lwa kadilu lwa kuyuka. (Tanga Izaya 41:10, 13.) Twadyelela ni kidi kyoso kwila, Jihova wandatukwatekesa. O Bibidya itubhana onguzu itwabhindamena phala kudibhana ni ibhidi yosoyoso imoneka.