1. Kyebhi kyexile o mwenyu wé ande dya kumateka kudilonga o Bibidya?

 KYEBHI kyexile o mwnenyu wê ande dya kumateka kudilonga o Bibidya ni Jimbangi ja Jihova? Avulu mudyetu kitwa wabhela kuxinganeka yalungu ni maka yâ. O ukexilu wetu wakumona o ima ni idifwa yetu nange a ifwinisa ku ukexilu wamundu yú—mu ima izwela o mundu yalungu ni kyawabha ni kyayibha. Se kyene, etu ‘kitwexile ni kidyelelu, kitwejidile Nzambi.’ (Efe. 2:12) Maji kyoso ki twamateka kudilonga o Bibidya, o ukexilu wamwenyu wetu walunguluka!

2. Ihi iwatonginina kyoso kiwamateka kudilonga o Bibidya?

² Kyoso kiwamateka kudilonga o Bibidya, eye wamono kwila wala ni Tata kudyulu wakuzolo kyavulu. Eye watendela kwila se wamesenene kusangulukisa Jihova ni kubhanga mbandu yamwiji wé wa abhezi, eye wabhingile kulungulula ima mu ukexilu wakwambata o mwenyu wê, o ukexilu wakumona o ima ni wakuxinganeka. Eye watokalele kudilonga kubhanga o ima izwela Jihova kwila yawabha ni kulenga o ima izwela mwene kwila yayibha.—Efe. 5:3-5.

3. Kala kilondekesa Kolose 3:9, 10, Jihova wamesena kwila tubhanga ihi, ni ihi itwandadilonga mumilongi yiyi?

³ Jihova o Mubhangi ni Tata yetu yadyulu, wala ni ujitu wakusola kyebhi o athu abhanga mbandu kumwiji wê, kyatokala kwendesa o mwenyu wâ. Mwene wamesena kwila ande dya kutubatizala, ‘tuzula o ukexilu wokulu ni ifwa yê yoso.’ * (Tanga Kolose 3:9, 10.) O milongi yiyi yandakwatekesa yó amesena kwabatizala kutanbwijila ibhwidisu itatu: (1) Ihi ilombolola “o ukexilu wenu wokulu”? (2) Mukonda dyahi Jihova ututendelesa  ku uzula? (3) Kyebhi ki tutena kubhanga kiki? Phala yó mudyetu a abatizala kyá, o milongi yiyi yandatukwatekesa phala o idifwa ya ukexilu wokulu ki ivutuke dingi.

4. Ihi ibhanga o muthu amumutumina kwala “o ukexilu wokulu”?

⁴ O muthu amutumina kwala “o ukexilu wokulu” uxinganeka ni kubhanga o ima mu ukexilu wa xitu. Mwene utena kukala mukwa lwimbi, uthathamana ni lusolo, ukamba kisakidilu, ukala mukwa kudizangeleka. Mwene utena kuwabhela kutala ima ya ufusa ni jifilme jilondekesa undumbu mba usweya. Sé phata mwene wala we ni idifwa yambote, mukiki nange udivwa kyayibha yalungu ni ima yayibha yene muzwela mba kubhanga. Maji mwene kala ni hanji yasoko phala kulungulula o ixinganeku ni ibhangelu yê.—Nga. 5:19-21; 2 Tim. 3:2-5.

5. O kwila tutena kuzula o maukexilu metu moso a ukulu? Jimbulula (Ikalakalu 3:19)

⁵ Etu twakwa ituxi, kyenyiki, séku muthu mudyetu utena kukatula o ixinganeku ni jihanji joso jayibha kumuxima ni mu kilunji. Sayi ithangana, twandabhanga mba kuzwela kima kyandatubhangesa kudyela. (Jel. 17:9; Tiya. 3:2) Maji kyoso ki tuzula o ukexilu wokulu, o ibanzelu ni ibhangelu yaxitu, ki itufunyisa dingi. Yene ki ibhange dingi mbandu ya ukexilu wetu.—Iza. 55:7; tanga Ikalakalu 3:19.

6. Mukonda dyahi Jihova utuswinisa kulenga o ixinganeku ni idifwa yayibha yalungu ni ukexilu wokulu?

⁶ Jihova utuswinisa kulenga o ixinganeku ni idifwa yayibha mukonda watuzolo kyavulu, wamesena kuma tusanguluka kumwenyu. (Iza. 48:17, 18) Mwene wejiya kwila, oso akayela o jihanji jayibha, adibhekela ibhidi, abhekela we ibhidi kwa yó a akondoloka. Jihova uluwala kyoso kyamona kwila, twamudibhekela ibhidi etu mwene, twamubhekela we ibhidi kwa akwetu.

7. Kala kyosoneke mu Loma 12:1, 2, ihi itwabhingi kusola?

⁷ Sayi makamba mba jindandu jetu, kudimatekenu atena kutusebhulula mukumona kuma twamulungulula o ukexilu wetu. (1 Phe. 4:3, 4) Ene atena kuzwela kuma tutena kubhanga yoso itwamesena ni kwila kitwatokala kwehela akwetu kututangela itwatokala o kubhanga. Maji o yó adituna kukayela o  itumu ya Jihova kala ni ufolo wakidi. Maji, amukwehela o mundu yú wayibha wa Satanaji kwa afunyisa. (Tanga Loma 12:1, 2.) Etwenyoso twabhingi kusola se twandakala jinga ni ukexilu wetu wokulu, wamufunyisa ku mundu yú wa Satanaji wezala o ituxi, inga twandakwehela Jihova kutulungulula ni tukituka athu abeta dingi kota lelu.—Iza. 64:8.

8. Ihi yandatukwatekesa kulenga o ixinganeku ni ibhangelu yayibha?

⁸ Jihova wejiya kuma kwandabhinga kithangana ni nguzu phala etu kulenga o ixinganeku ni idifwa yayibha. (Jisá. 103:13, 14) Maji, bhukaxi ka Mak’â Mê, ka nzumbi ikôla, ni ka kilunga kyê, Jihova utubhana yoso itwabhindamena phala kulungulula o ukexilu wetu. Sé phata mwene wakukwatekesa kyá. Kindala tumone ima i utena o kubhanga phala kuzula o ukexilu wokulu ni atene kukubatizala.

9. O Mak’â Nzambi atena kukukwatekesa kyebhi?

⁹ Tonginina o ukexilu wé bhukaxi ka Bibidya. O Mak’â Nzambi edi kala lumwenu, atena kukukwatekesa kutonginina o ixinganeku yé, o izwelu yé ni ibhangelu yé. (Tiya. 1:22-25) O muthu wamukulonga o Bibidya ni jiphange jamukwa akulu munzumbi, atena kukubhana itendelesu. Mu kifika, ene atena kukulondekesa jivelusu ja Bibidya jandakukwatekesa kutonginina bhebhi bhuwamuditunda kyambote ni bhebhi bhuwatokala kudilanga. Ene atena kukukwatekesa kusanga milongi ya Bibidya yandakuswinisa kutolola o idifwa yayibha. Mu ithangana yoso Jihova wandakukwatekesa. Mwéne o muthu wabetakota utena kukukwatekesa, mukonda wejiya kyambote o muxima wé. (Jisa. 14:10; 15:11) Kyenyikiphe kala ni kifwa kyakusamba kwa mwene ni kudilonga o Maka mê izuwa yoso.

10. Ihi iwadilongo mumusoso wa Elie?

¹⁰ Xikina ni kidi kyoso kwila o itumu ya Jihova yene yabetakota. Yoso itubhinga Jihova, phala o mbote yetu. O yó akayela o itumu yé a axila, akala ni disukilu dyambote kumwenyu ni kusanguluka kwakidi. (Jisá. 19:7-11) Maji o yó abhukumukina o itumu ya Jihova, atala hadi mukonda dya kukayela o ibhangelu yaxitu. Tala yazwela diyala amwixana Elie yalungu ni kubhukumukina o itumu ya Nzambi. Mwene amusase ku jitata azolele Jihova. Maji mukitala kya kikumbi, Elie wamateka kudilunga ni athu ayibha. Ku mwenyu wê wamateka kubhanga ima yayibha kala kunwa jidroga, kubhanga undumbu ni kunyana. Elie watonginina kwila o njinda ni undanda wé wexile mudibandekesa. Mwene waxikina ni kidi kyoso: “Kifwa, eme ngabhange yoso yafidisa Nzambi ku Jikidistá.” Maji, Elie kajimbile o ima yadilongo mu undenge wé. Kudisukilu mwene wamateka dingi kudilonga o Bibidya. Mwene wabhange nguzu yavulu phala kweha o ifwa yé yayibha, yá amubatizala ku muvu wa 2000. O kubelesela o itumu ya Jihova kwamubhekela mbote yahi? Elie wambe: “Kindala ngala ni kutululuka kwamuxima ni kitongolwelu kyazele.” * Kala kitwamono mumusoso yú, o yó adituna kukayela o itumu ya Jihova adibhekela ibhidi. Né kiki, Jihova wala polondo phala kwa akwatekesa kulungulula o ukexilu wá.

11. Ima yebhi yazembe Jihova?

¹¹ Zemba o ima yazembe Jihova. (Jisá. 97:10) O Bibidya ilondekesa kuma, Jihova wazembe “o mesu ma tala ni izala, o dimi di tanga makutu, o maku ma zunza manyinga ma muthu wakambe kikuma.” (Jisa. 6:16, 17) Mwene wazembe we ‘akwa usweya ni  athu anganala akwa.’ (Jisá. 5:6) O kuzemba o ixinganeku ni ibhangelu yiyi, kwene kwabhangesa Jihova kubwika o athu oso ayibha mu izuwa ya Nowé mukonda azalesele o ixi ni usweya. (Dim. 6:13) Tala phangu yamukwa. Bhukaxi ka Polofeta Malakiya, Jihova wambe kwila wazembe o athu asota ndunge yakudixisa mba yakubatula o ukaza, sumbala o kaza dyá kala ni kikuma. Nzambi udituna o ubhezelu wâ, hádya andabhakula jikonda ni Jihova mukonda dya wendelu wâ.—Mal. 2:13-16; Jihe. 13:4.

12. ‘Kuzemba o ima yayibha’ kulombolola ihi?

¹² Jihova wamesena kwila ‘tuzemba o ima yayibha.’ (Loma 12:9) O kizwelu ‘kuzemba’ kilombola ku ibhila kima ni muxima woso, kukamba kuzola kima. Xinganeka kyebhi kiwejidivwa se akutumina kudya kudya kwabolo. O kukixinganeka ngó mwene, kutena kya kukubhangesa kudivwa kyayibha. Kyene we kimoxi, twatokala kuzemba katé mwene ngó o kixinganeku kyakubhanga kima kyazembe Jihova.

13. Mukonda dyahi twatokala kulanga o ixinganeku yetu?

¹³ Langa o ixinganeku yé. O ixinganeku yetu ifwinyisa o ibhangelu yetu. Kiki kyene kyabhangesa Jezú kutulonga kwila, twatokala kudituna o ixinganeku itena kutubhangesa kuta ituxi yamakota. (Mat. 5:21, 22, 28, 29) Sé phata etu twamesena kusangulukisa o muxima wa Tata yetu yadyulu. Kyenyikiphe, kima kyambote kudituna ni lusolo o ixinganeku yayibha kyoso ki iza mukilunji!

14. O izwelu yetu ilondekesa ihi yalungu n’etu? Ibhwidisu yebhi itwatokala kutambwijila?

¹⁴ Langa o dimi dyé. Jezú wambe: “Yoso izwela o dikanu, itunda ku muxima.” (Mat. 15:18) Kyene mwene, yoso ituzwela ilondekesa yatukala kumuxima. Kyenyikiphe, dibhwidise: ‘O kwila ngidituna kutanga makutu né mwene se o kuzwela o kidi kwandangibhekela maka? Se eme ngakazala kya, o kwila ngene mudilanga phala kingite dingi dyesu kumuthu wengi? O kwila ngazembe o uzwelelu wa ufusa? Se kumoneka muthu ungiluwalesa, o kwila ngitambwijila ni kutululuka kwoso?’ Kuxinganeka kyambote mu ibhwidisu yiyi kwandakukwatekesa. O izwelu yetu tutena ku isokesa ni jidinya ku izwatu. Se ubhanga yoso phala kweha o uzwelelu wayibha, kala o kulokalala, o jindaka ni makutu, kikyandakubhonza kuzula o ukexilu wokulu.

15. Ihi ilombolola kuphapha “ku taka” o ukexilu wetu wokulu?

 ¹⁵ Kala polondo phala kubhanga kyoso kyabhingi o kubhanga. Poxolo Phawulu wate kifika kyanguzu, phala kulondekesa kwila, o kulungulula o ukexilu wetu ki maka akutonoka, kana. Mwene wasoneka kwila, “o ukexilu wetu wokulu” twatokala ku uphapha “ku taka.” (Loma 6:6) Mu izwelu yengi, twamesena kukayela o phangu ya Kidistu. Twabhingi kujibha o ibanzelu ni ibhangelu yazembe Jihova. Twabhingi kubhanga o ima yiyi phala kukala ni kitongolwelu kyazele, ni tutambula we o mwenyu wakalelaku. (Nzwá 17:3; 1 Phe. 3:21) Lembalala kwila, Jihova kandalungulula o ijila yê, phala ni ilunge ni jivondadi jetu. Maji étu twabhingi kulungulula o ukexilu wetu kala kyamesena mwene.—Iza. 1:16-18; 55:9.

16. Mukonda dyahi twatokala kusuluka ni kubhânga jinga ni itondalu yetu?

¹⁶ Kolokota ni kutolola o itondalu yé. Né mwene kyoso kyandakubatizala, eye wandabhinga kubhânga hanji ni jihanji jayibha. Tala yazwela phange Maurício wala kya ni uhete. Kyoso kyexile munzangala, mwene wexile ni hanji ya kukala ni mayala ni akwa. Mukubhita kithangana, wadisange ni Jimbangi ja Jihova, he umateka kudilonga o Bibidya. Walungulula o mwenyu wê, ya amubatizala mu muvu wa 2002. Sumbala wamusidivila kya Jihova mu mivu yavulu, phange Maurício wambe: “Sayi ithangana, ngene mubhânga hanji ni ixinganeku yabolo.” Maji kabhwila kana. Mwene wambe: “Ngaswina mu kwijiya kwila, ngitena kusangulukisa Jihova, se kingikayela o jihanji jami.” *

17. Ihi yakuswinisa dingi mumusoso wa phange Nabiha?

¹⁷ Bhinga kikwatekesu kwa Jihova mumusambu, dyelela mu nzumbi yê ikôla, kana munguzu yé. (Nga. 5:22; Fil. 4:6) Kumuxima wetu, twatokala kusola kubhanga yoso phala kuzula jinga o ukexilu wokulu. Tala yabhiti ni phange yamuhatu, amwixana Nabiha. Tat’ê waxisa o dibhata kyoso mwene kyexile ni mivu isamanu. Mwene wambe: “Kiki kyangibhekela ndolo yavulu kumuxima.” Kyayi ni kukula, Nabiha wakituka mukwa undanda, wexile ni njinda yavulu. Mwene wamateka kusumbisa jidroga, wabhiti mivu mukaleya. O jiphange exile mulonga o Bibidya mukaleya amateka kumulonga.  Nabiha wamateka kulungulula o ukexilu wê. Mwene wambe: “Sayi ima yayibha ingexile mubhanga, kiyabhonzo ku ixisa. Maji kyangibhonzele kyavulu kweha o kubwakula o makanya.” Nabiha wabhânge mu jimbeji javulu, kudisukilu, watena kweha o makanya. Kyebhi kyatena kubhangana kiki? Mwene wambe: “O kusamba ithangana yoso kwa Jihova, kwene kwangikwatekesa dingi.” Kindala mwene utangela akwa: “Ngadyelela kwila, se eme ngatena kulungulula o ukexilu wami phala kusangulukisa Jihova, muthu wosowoso utene we!” *

18. Kala kilondekesa 1 Kolindu 6:9-11, avulu bhukaxi ka jiselevende ja Jihova abhange ihi?

¹⁸ Muhama ya dyanga, sayi mayala ni ahatu a asolele kwala Jihova phala kuya kudyulu na tumina kumoxi ni Jezú, m’ukulu exile we mubhanga ima yayibha. Mukifika, amoxi exile jindumbu, mala azeka ni mala ni miyi. Maji, ni kikwatekesu kya nzumbi ikôla ya Jihova, ene atena kulungulula o ukexilu wâ. (Tanga 1 Kolindu 6:9-11.) Lelu kyene mubhita we. O Bibidya yakwatekesa mazunda ni mazunda a athu kulungulula o myenyu yâ. * Ene atolola idifwa yayibha yexile mwene kya kumixima yâ. O phangu yâ ilondekesa kwila, eye we utena kulungulula o ukexilu wé mukutolola o ifwa yayibha, phala kuhádya n’a kubatizala.

19. Ihi itwandadilonga mumilongi yakayela?

¹⁹ Oso amesena kwa abatiazla atokala kuzula o ukexilu wokulu, maji atokala kubhanga nguzu phala kuzwata o ukexilu wobhe. O milongi yakayela, yandazwela kyebhi kitutena kubhanga kiki, ni kyebhi akwetu kyatena kutukwatekesa.