1-2. Kyebhi o phangu ya poxolo Phawulu itena kukwatekesa o tufunga lelu?

 POXOLO Phawulu wazolele o jiphange jê. Mwene wakalakala kyavulu phala kwa akwatekesa. (Ika. 20:31) O kiki kyene kyabhangesa o jiphange jiji kumuzola kyavulu. Sayi kizuwa, kyoso o tufunga twambanza ya Efezu kyevu kwila kejimumona dingi, “amateka kudila kyavulu”. (Ika. 20:37) O tufunga twetu azolo we kyavulu o jiphange, mukonda dya kiki abhanga yoso phala kwa akwatekesa kyoso kyabhindama. (Fil. 2:16, 17) Majiphe, sayi ithangana o tufunga adibhana we ni ibhidi. Ihi itena kwa akwatekesa kudibhana ni ibhidi yiyi?

² O tufunga twetu o akalakadi a nguzu, atena kudilonga ni phangu ya Phawulu. (1 Kol. 11:1) Ene kala ni kutena kwala naku o jianju. Phawulu kexile muthu wayuka, sayi ithangana wexile mubhanga nguzu phala kubhanga o ima yambote. (Loma 7:18-20) Mwene wadibhanene ni ibhidi yavulu. Maji Phawulu keha kukalakala ni nguzu yoso mukukwatekesa o jiphange mba kukibhanga ni kuluwala. Mukukayela o phangu ya Phawulu, o tufunga atena kutolola o ibhidi yadibhana nayu ni kusanguluka jinga musidivisu ya Jihova.

3. Ihi itwandadilonga mumilongi yiyi, ni ihi yandatukwatekesa kubhanga kiki?

³ Mumilongi yiyi twandadilonga ibhidi iwana yene mudibhana nayu o tufunga: (1) Kukala ni kithangana kyasoko phala kuboka ni kubhanga o ikalakalu yamukwa yatokala o kubhanga, (2) kukala ni kithangana phala kuswinisa o jiphange mu kilunga, (3) kudibhana ni itondalu yâ ni (4) kudibhana ni itondalu ya akwa. Twandamona kyebhi Phawulu kyatolola o ibhidi yiyi ni kyebhi o tufunga kyatena kukayela o phangu yê.

4. Mukonda dyahi kitena kubhonza phala o tufunga kubhana phangu yambote mukikalakalu kyakuboka?

⁴ Mukonda dyahi kitena kukala kibhidi. O tufunga ala ni ikalakalu yavulu katé mwene ni yakukala kupoholo dyakikalakalu kyakuboka. Mukifika, ene endesa o milongi yakyônge kyakaxi ka semana ni Milongi ya Bibidya mu Kilunga. Ene atena we kuwanena o jimbandu ja yônge ku jiphange jamukwa. Ene akalakala kyavulu mukulonga o akwatekexi atufunga ni kukolokotesa o jiphange jamala ni ja ahatu. (1 Phe. 5:2) Sayi tufunga akalakala mukutunga ni kulanga o Ididi ya Ubhezelu ni ididi yamukwa. Kumbandu yamukwa, kala o jiphange joso mukilunga, o kikalakalu kyabeta dingi kota phala o tufunga, o kuboka o njimbu yambote.—Mat. 28:19, 20.

5. Yalungu ni kuboka, phangu yebhi yatuxila Phawulu?

⁵ Phangu ya Phawulu. O kima kyakwatekesa Phawulu kuditunda kyambote mu sidivisu ya kuboka, tukisanga mumukanda kwa akwa Filipe 1:10. Mwenyomo mwene watutendelesa “kwijiya o ima yabetakota.” Poxolo Phawulu wakayela o kitendelesu kyê. Mumivu yavulu, o kuboka kyexile o kikalakalu kyabetele dingi kota kumwenyu wê. Mwene waboko “mwaxaxi ka mundu ni mu inzo ni inzo.” (Ika. 20:20) Mwene kaboko ngó tu ithangana kukizuwa mba kizuwa kimoxi ku semana. Mwene waboko kabasa kididi ni kithangana! Mukifika, kyoso mwene kyakexile mukingila o jiphange jê mu mbanza ya Atena, mwene wamateka kubokela kibuka kya athu exile mwaxila kyavulu; sayi amoxi mudya axikina o njimbu. (Ika. 17:16, 17, 34) Né mwene kyoso kyamukutile “mu malubhambu,” Phawulu wabokela yó akexile kumbandu yê.—Fil. 1:13, 14; Ika. 28:16-24.

6. Phawulu walongo akwa kubhanga ihi?

⁶ Phawulu wabhange yoso yatenene phala kukatula mbote mukithangana kyê. Muveji javulu, mwene wexana akwa phala kukalakala kumoxi mu ukunji. Mukifika, munjila yê ya dyanga kala mukunji wa jixi jengi, wambata Nzwá dya Máluku; munjila ya kayadi yabhange wayi ni Timote. (Ika. 12:25; 16:1-4) Sé phata Phawulu wabhange yoso phala kulonga o mayala yá, kyebhi kyatokala kusokejeka kilunga, kubhanga o kikalakalu kya ku inga o kilunga ni kukala alongexi ambote.—1 Kol. 4:17.

7. Kyebhi o tufunga kyatena kukayela o kitendelesu kya Phawulu kitusanga mumukanda kwa akwa Efezu 6:14, 15?

⁷ Dyebhi o disá. O tufunga atena kukayela o phangu ya Phawulu kimukuboka ngó nzo ni inzo maji mukukala polondo phala kubhana umbangi, kabasa kithangana kabasa kididi. (Tanga Efezu 6:14, 15.) Mukifika, ene atena  kubhana umbangi kyoso kyaya musumba kima mba kyoso kyakala kusalu. Kyoso kyamukwatekesa kutunga kididi kya ubhezelu, ene atena kubokela yó atungu bhumbandu yakididi kyamutunga mba yó ene musumbisa o ima phala ene. Kala Phawulu, o tufunga atena kungastala o kithangana kyâ mu ukunji mukulolnga akwa, katé ni akwatekexi atufunga.

8. Sayi ithangana o tufunga abhingi kubhanga ihi?

⁸ O tufunga atokala kudilanga phala o ikalakalu mu ilunga mba ya abhana o kafunga ka ilunga, ki ya afidise kukala ni kithangana kyakuboka. Phala atene kubhanga o ikalakalu yoso yatokala kubhanga, sayi bhabha o tufunga andabhinga kudituna ikalakalu yamukwa. Kyoso kya samba ni kuxinganeka kyambote, o tufunga atena kutonginina kwila, se axikina dingi ikalakalu yengi, kandatena kubhanga o ima yabetakota. O ima yiyi yabetakota, o kubhanga o ubhezelu kumwiji semana joso, kuboka kumoxi ni kilunga ni kulonga o twana twâ, kyebhi kyatokala o kuboka. Amoxi kya abhonza kudituna maujitu amukwa, maji ene atena kudyelela kwila, Jihova wandakitendela se adituna ikalakalu yamukwa, mukonda amesena kubhanga kyambote o ikalakalu yâ.

9. Kibhidi kyahi kidibhana nakyu o tufunga mukonda dya kukala ni ikalakalu yavulu?

⁹ Mukonda dyahi kitena kukala kibhidi. O mundu wa Jihova wene mudibhana ni ibhidi yavulu. Mu izuwa yiyi yasukidilaku, etwenyoso twabhindamena kiswinisu, kikwatekesu ni kiximbakatesu. Sayi bhabha, amoxi abhingi kikwatekesu phala kuxisa wendelu wayibha. (1 Tes. 5:14) Mukidi, o tufunga katena kuzubha o ibhidi yoso yamudibhana nayu o mundu wa Jihova. Né kiki, Jihova wamesena kwila, o tufunga abhanga yoso yatena phala kuswinisa ni kulanga o jimbudi jê. Sumbala ala ni ikalakalu yavulu, kyebhi o tufunga kyatena kukwatekesa o jiphange abhindama?

10. Kala kilondekesa 1 Tesalonika 2:7, ihi yabhange Phawulu phala kulanga o mundu wa Jihova?

¹⁰ Phangu ya Phawulu. Phawulu wexile musota maukexilu akuximana ni kuswinisa o jiphange jê. O tufunga atokala kukayela o phangu yambote ya Phawulu, mukutalatala o jiphange ni henda yoso. (Tanga 1 Tesalonika 2:7.) Phawulu watangela kujiphange jê kwila wa azolele kyavulu, ni kwila, Jihova wa azolele we kyavulu. (2 Kol. 2:4; Efe. 2:4, 5) Phawulu wexile mumona o jiphange mu kilunga kala makamba mê, wexile mubhita nawu kithangana. Mwene walondekesa kwila wa adyelela mukwa atangela o woma wexile nawu ni itondalu yê mukonda dya kukamba o kuyuka. (2 Kol. 7:5; 1 Tim. 1:15) Maji Phawulu, k’exile mudikwatenena mu ibhidi yê, kana. Muveji dya kiki, mwene wamesenene kukwatekesa o jiphange jê.

11. Mukonda dyahi Phawulu wabhana itendelesu kujiphange jê?

¹¹ Sayi ithangana, Phawulu wabhingile kutendelesa  o jiphange jê ja mala ni ja ahatu. Maji mwene k’exile mukibhanga mukonda waluwalele. Mwene wabhana itendelesu mukonda wa azolele, wamesenene kwa alanga ku izwelu. Mwene wabhana itendelesu yabhebhuluka phala o jiphange atene ku itendela ni ku ixikina. Mu kifika, mu mukanda wasonekena akwa Kolindu, Phawulu wabhana itendelesu yanguzu.kyazubha o kusoneka o mukanda yu, mwene watumikisa Titu phala kwa akunda. Phawulu wamesenene kyavulu kwijiya kyebhi ene kyadivu ni mukanda wa atumikisa. Phawulu wasanguluka kyavulu, kyoso kyamutangela kwila, ene axikina o kitendelesu, akikumbidila mwene!—2 Kol. 7:6, 7.

12. Kyebhi o tufunga kyaswinisa o jiphange?

¹² Dyebhi o disá. O tufunga atena kukayela o phangu ya Phawulu mukusota kubhita kithangana ni jiphange. Ukexilu umoxi wakubhanga kiki, o kubhixila selu muyônge ni kuswinisa o jiphange mukudizwelesa nawu. Mu ithangana yavulu abhingi ngó kukatula tu ithangana phala kuswinisa phange wabhindama. (Loma 1:12; Efe. 5:16) O kafunga ukayela o phangu ya Phawulu uswinisa o jiphange bhukaxi ka Mak’â Nzambi, ni kwalembalesa o henda ya Nzambi kokwa. Mwene alondekesa o henda yê kujiphange. Mu ithangana yoso mwene usota kudizwelesa nawu ni ku aximana. Kyoso o kafunga kyabhinga kubhana kitendelesu mwene ukibhana bhukaxi Mak’â Nzambi. Mwene uzwela ni kidi kyoso maji ni henda mukonda wamesena kwila o phange uxikina o kitendelesu.—Nga. 6:1.

13. O itondala itena kubhangesa o kafunga kudivwa kyebhi?

¹³ Mukonda dyahi kitena kukala kibhidi. O tufunga ki athu ayuka. Kala o athu oso, ene atondala wa. (Loma 3:23) Sayi ithangana kitena kwa abhonza kutala o itondala yâ mu ukexilu watokala. Sayi amoxi, adikwatenena kyavulu mu ukexilu wâ wakukamba o kuyuka, mukonda dyakiki aluwala. Amukwa axinganeka kwila o itondalu yâ kikim’e, ni kwila kabhingi kulunuglula o ukexilu wa mwenyu wâ.

14. Kala kilondekesa Filipe 4:13, o kulenduka kwa kwatekesa kyebhi Phawulu kudibhana ni itondalu yê?

¹⁴ Phangu ya Phawulu. Mukonda dya kulenduka Phawulu waxikina kwila kejitena kudibhana ni itondala yê ubheka we. Mwene wabhindamene o nguzu itena kubhana Nzambi. M’ukulu, Phawulu wexile muthu wajiji, wexile muzukutisa o Jikidistá. Maji mukubhita kithangana watendelela kwila, wabhingile kulungulula o ukexilu ni idifwa yê. (1 Tim. 1:12-16) Ni kikwatekesu kya Jihova, Phawulu wakituka muthu wa henda, wexile mu mutendela akwa, kafunga ka lenduka. Mwene wejidile kwila, wexile mutondala kyavulu, maji  kadikwatekenena mu ixinganeku yiyi. Muveji dya kiki, wadyelele kwila, Jihova weji muloloka. (Loma 7:21-25) Mwene kexile musota kubhanga o ima ni kuyuka. Maji wakalakala ni nguzu yoso phala kukala ni idifwa yambote ya Ukidistá, ni kulenduka kwoso wadyelela mu kikwatekesu kya Jihova phala kukumbidila o kikalakalu kyê.—1 Kol. 9:27; Tanga Filipe 4:13.

15. Kyebhi o tufunga kyatena kutala o itondalu yâ mu ukexilu watokala?

¹⁵ Dyebhi o disá. O tufunga k’ene mu asola mukonda dya kukala athu ayuka, kana. Maji Jihova wamesena kwila, ene axikina o itondalu yâ, ni kukala ni idifwa ya Ukidistá. (Efe. 4:23, 24) Bhukaxi ka Bibidya, o kafunga watokala kuditonginina ni kulungulula o ukexilu wê se kwabhingi. Se kyene kyabhanga, Jihova wandamukwatekesa kusanguluka ni kukala kafunga kambote.—Tiya. 1:25.

16. Ihi itena kubhita se o kafunga udikwatenena mu itondalu ya akwa?

¹⁶ Mukonda dyahi kitena kukala kibhidi. Kuma o tufunga abhita ithangana yavulu ni jiphange mukilunga, ene atena kwijiya kyambote o itondalu yâ. Kyenyikiphe, se kadilange, o tufunga atena kuthathamana, kutalatala sé henda mba kufundisa o jiphange. Phawulu wadimuna o Jikidistá kwila, Satanaji, wejikiwabhela se ene akala ni ukexilu yú.—2 Kol. 2:10, 11.

17. Kyebhi Phawulu kyexile mutala o jiphange jê?

¹⁷ Phangu ya Phawulu. Mwene wexile mutala jinga o jiphange jê mu ukexilu watokala. Mwene wejidile kyambote o itondalu yâ, mukonda sayi ithangana yexile mumuluwalesa. Maji Phawulu wejidile kwila, se muthu utondala, kikilombolola kwila, mwene muthu wayibha. Mwene wazolele o jiphange jê, wexile mulunga o muxima mu idifwa yâ yambote. Se kyabhonzele ku jiphange jê kubhanga o kima kyatokala, mwene wexile musola kuxinganeka kwila, amesena mwene kubhanga o kima kyatokala, maji abhindamena ngó kikwatekesu.

18. Ihi iwadilongo mu ukexilu wa dibhana Phawulu ni Evodya ni Sindike? (Filipe 4:1-3)

¹⁸ Mukifika, xinganeka ngó kyebhi Phawulu kyadibhana ni jiphange jiyadi ja ahatu, mukilunga kya akwa Filipe. (Tanga Filipe 4:1-3.) Evodya ni Sindike nange adikwatele, kyenyiki, kexile dingi makamba. Phawulu ka afundisa, ka atalatala sé henda, maji walungu o muxima wê mu idifwa yâ yambote. O jiphange jiyadi jiji, asidivila kya Jihova ni ufiyele woso mu mivu yavulu. Phawulu wejidile kwila, Jihova wa azolele. O kwa atala mu ukexilu wambote, kwabhangesa Phawulu kuswinisa o jiphange jiji kubatula o maka mudyâ. O kulunga o muxima mu idifwa yambote kwa bhekela kusanguluka kwa Phawulu, kwamukwatekesa kukala ni ukamba wambote ni jiphange mukilunga kyokyo.

19. (a) Kyebhi o tufunga kyatena kutala o jiphange jâ mu ukexilu watokala? (b) Ihi i utena kudilonga ku foto ya kafunga wamuzelesa o Kididi kya Ubhezelu?

 ¹⁹ Dyebhi o disá. Tufunga, sotenu kutala o idifwa yambote ya jiphange jenu. Ene oso akwa ituxi, maji ala we ni idifwa yambote itutena kuwabhela. (Fil. 2:3) Mukidi, sayi ithangana, o tufunga andabhinga kubhana itendelesu kwa phange ya diyala mba yamuhatu. Maji, kala kyabhangele Phawulu, o tufunga atokala kudilanga phala kadikwatenene mu izwelu mba ibhangelu iluwalesa ya phange. Muveji dya kiki, o tufunga atokala kudikwatenena mu henda ni kukolokota kwâ mu sidivisu ya Jihova Nzambi, ni mu nguzu yâ ya kubhanga o ima yambote. Se o tufunga alunga o muxima mu idifwa yambote ya jiphange, o jiphange andadivwa kwila a azolo kujiphange joso mukilunga.

20. Kyebhi o tufunga kyatena kusuluka ni kukatula mbote mu phangu ya Phawulu?

²⁰ Enu tufunga, mwandamona kwila, kusuluka ni kudilonga o phangu ya Phawulu, kwandamikwatekesa. Mu kifika, mu Índice das Publicações da Torre de Vigia, eye utena kusota o mbandu “Paulo,” anga usota “exemplo para os anciãos.” Kyoso ki uya ni kutanga o milongi iwandasangamu, utena kudibhwidisa: ‘O phangu ya Phawulu ingikwatekesa kyebhi kusanguluka mu kukumbidila o kikalakalu kyami kya kafunga?’

21. Ihi itena kudyelela o tufunga?

²¹ Tufunga, lembalalenu kwila, Jihova kamumumibhinga kukala mu athu ayuka, maji wamesena ngó kwila, mumukala fiyele. (1 Kol. 4:2) Jihova wasangulukile ni kikalakalu kya nguzu ni ufiyele walondekesa Phawulu. Dyelela kwila, Jihova ubhana we valolo mu yoso iwene mubhanga mu sidivisu yê. Jihova “kanda jimba o kikalakalu kyenu ni henda i mwene mu londekesa mu dijina dyê mu kukwatekesa o athu o’sole ni mu kukolokota mu kwa kwatekesa jinga.”—Jihe. 6:10.