1. Sayi jiselevende ja Jihova ene mudibhwidisa ihi?

 KIMA kyambote kwijiya kwila Jihova uxikina o mundu wê woso kala kibuka! O Bibidya yamba: “Jihova u sanzuka ni mundu wê.” (Jisá. 149:4) Maji sayi bhabha, amoxi mukonda dya kuluwala adibhwidisa: ‘O kwila Jihova ungixikina?’ Jiselevende javulu ja Jihova otumbule mu Bibidya, mukonda dya kuluwala sayi bhabha exile we ni phata se Jihova wa axikinine.—1 Sam. 1:​6-10; Jobe 29:​2, 4; Jisá. 51:11.

2. Jihova uxikina nanyi?

² O Bibidya ilonga kwila o athu akwa ituxi atena ku axikina kwa Jihova Nzambi. Kyebhi? Mu kukala ni kixikanu kwa Jezú Kidistu ni kwabatizala. (Nzw. 3:16) Mu kubhanga kiki tulondekesa ku athu kwila twadyela o ituxi yetu ni kwila twakanena kwa Nzambi kubhanga o vondadi yê. (Ika. 2:38; 3:19) Jihova usanguluka kyavulu kyoso kitubhanga o ima yiyi phala kukala ni ukamba ni mwene. Se tubhanga yoso phala kukumbidila o kikanenu kyetu, Jihova wandatuxikina ni kutumona kala tu makamba mê.—Jisá. 25:14.

3. Ibhwidisu yebhi itwanda tambwijila mu milongi yiyi?

³ Maji mukonda dyahi amoxi abanza kuma Jihova ka axikina? Kyebhi Jihova kyalondekesa kuma watuxikina? Ni kyebhi o Kidistá kyatena kudyelela kwila Nzambi wamuxikina?

 MUKONDA DYAHI AMOXI ABANZA KUMA JIHOVA KA AXIKINA?

4-5. Kidyelelu kyahi kitukala na-kyu se tudivwa kwila kitwala ni valolo?

⁴ Avulu mudyetu tundé undenge tubanza kwila kitwala ni valolo. (Jisá. 88:15) Sayi phange ya diyala amwixana Adrián wambe: “Ngene mudivwa kwila kingala ni valolo. Mu undenge wami, ngasambe phala o mwiji wami ukale mu Palayizu, sumbala ngaxikinine kwila kingafwamene kukalabhu.” Thonyi, o jitata jê ki Jimbangi ja Jihova, wambe: “O jitata jami nuka angitangele kwila angizolo mba asanguluka neme. Ngadivwile kwila kabasa kima kingibhanga, kingeji tena kwasangulukisa.”

⁵ Se sayi bhabha tudivwa kwila kitwala ni valolo, tutena kulembalala kwila Jihova watubheka kwa mwene. (Nzw. 6:44) Mwene umona o idifwa yambote itwala nayu, o idifwa itukamba kumona kokwetu. Umona we o mixima yetu. (1 Sam. 16:7; 2 Mal. 6:30) Kyenyiki tutena kudyelela kwila mwene utubhana valolo yavulu.—1 Nz. 3:​19, 20.

6. Kyebhi kyexile mudivwa poxolo Phawulu yalungu ni ituxi yatele mu ukulu?

⁶ Ande dya kudilonga o kidi, sayi athu mudyetu twabhange ima katé lelu itubhangesa kudivwa kyayibha. (1 Ph. 4:3) Katé mwene ni Jikidistá jafiyele aluwala mukonda dya ituxi yâ. Abha eye? O kwila o muxima wé ukufundisa? Se kyene, kima kyambote kwijiya kwila katé mwene ni jiselevende ja fiyele ja Jihova mu ukulu adivwile we kiki. Mu kifika, poxolo Phawulu wexile mudivwa kyayibha kyoso kyexile mubanza mu ituxi yê. (Lom. 7:24) Sumbala Phawulu wadyela o ituxi yê, anga amubatizala, wazwela kiki yalungu ni mwene: “Ku jipoxolo joso, eme ngala ngi ndenge,” ni kwila “bhukaxi ka athu yá, eme nga betakota mu kukala ngi mukwa ituxi.”—1 Ko. 15:9; 1 Ti. 1:15.

7. Kidyelelu kyahi kitukala na-kyu se twadyela o ituxi itwatele mu ukulu?

⁷ Se tudyela o ituxi itwatele mu ukulu, Tat’etu ya dyulu ukanena kutuloloka. (Jisá. 86:5) Tutena kudyelela mu ima izwela Jihova mu maka mê.—Kol. 2:13.

8-9. Kyebhi kitutena kudyelela kwila Jihova watuxikina?

⁸ Etu enyoso twamesena kubhanga yoso ni yoso phala kusidivila Jihova. Maji amoxi adivwa kwila katena kubhanga kima kyasoko kibhangesa Jihova ku axikina. Sayi phange ya muhatu amwixana Amanda wambe: “Ngene mubanza kwila o ima ingibhanga ki yasoko. Mu ithangana yavulu ngimesena kubhanga ima kingeji tena kuibhanga. Kyoso kingilembwa kubhanga o ima inga mesena, ngidivwa kyayibha, ngibanza we kuma Jihova kamungimona kyambote.”

⁹ Kyebhi kitutena kudyelela kwila Jihova watuxikina? Lembalala kwila Jihova katubhingi ima kitutena ku ibhanga. Se tubhanga o ima yabetakota mu sidivisu yê, mwene wanda iwabhela. Xinganeka we mu phangu ya yó a atumbula mu Bibidya asidivila Jihova ni muxima woso. Xinganeka mu phangu ya Phawulu. Mu mivu yavulu wakalakala ni nguzu yoso, wende jinjila javulu, wakwatekesa we kubhanga ilunga yavulu. Kyoso o ima yalunguluka ku mwenyu wê, yu katenene dingi kuboka kyavulu, o kwila Jihova kamuxikinine dingi? Kana ki kyene. Mwene wasuluka ni kubhanga yejitena o kubhanga, anga Jihova wexile mu mubesowala. (Ika. 28:​30, 31) Kyene we kimoxi, o ima itubhana kwa Jihova kiyadifu. O kyabetakota o kuxinganeka se mukonda dyahi twamubhanga kiki. Tumone maukexilu atulondekesa kwila Jihova watuxikina.

 KYEBHI JIHOVA KYALONDEKESA KWILA WATUXIKINA?

10. Kyebhi kitutena kwivwa Jihova kuzwela kwila watuxikina? (Nzwá 16:27)

¹⁰ Bhukaxi ka Bibidya. Jihova wawabhela kulondekesa kwila wazolo o mundu wê. Luyadi o Bibidya yamba kwila, Jihova wambe kuma Jezú mwéne o Mon’ê wakazola ni kwila wamuxikina. (Mat. 3:17; 17:5) O kwila eye wamesena kwila Jihova ukutangela kuma wakuxikina? Jihova kazwela n’etu tunde ku dyulu, maji uzwela n’etu bhukaxi ka Bibidya. Kyoso kitutanga o izwelu ya Jezú ya zwela ku maxibulu mê, kyedi kala Jihova wamututangela kwila watuzolo. (Tanga Nzwá 16:27.) Jezú wakayela ni kuyuka kwoso o idifwa ya Tat’ê. O maxibulu a Jezú exile akwa ituxi, né kiki amukayela ni ufiyele woso. O Bibidya yamba kwila Jezú wa ambela kwila wa azolele. Kyoso kitutanga o izwelu yiyi ya Jezú, tutena kuxinganeka kwila Jihova wamuzwela kiki phala etu.—Nzw. 15:​9, 15.

11. Mukonda dyahi o kubhita mu ibhidi, ki kilombolola kwila Nzambi katuxikina dingi? (Tiyaku 1:12)

¹¹ Bhukaxi ka ima ibhanga mwene. Jihova wala polondo phala kutukwatekesa, utubhana itwabhindamena mu xitu. Sayi bhabha, Jihova utwehela kubhita mu ibhidi, kala kyabhitile ni Jobe. (Jobe 1:​8-11) Kyoso kitubhita mu ibhidi, ki kilombolola kwila Nzambi katuxikina dingi. O ibhidi itukwatekesa kulondekesa o henda yetu kwa Nzambi ni kwila twamudyelela. (Tanga Tiyaku 1:12.) Mu ibhidi twanda mona o henda yê ni kikwatekesu kyê phala kukolokota.

12. Ihi itutena kudilonga mu musoso wa Dimitri?

¹² Banza yabhiti ni phange ya diyala amwixana Dimitri, watungu mu kibatu kya Azya. Mwene kexile dingi mukalakala né kusanga salu yengi mu jimbeji javulu. Phala kulondekesa kwila wadyelela kwa Jihova, wasolo kuboka dingi kyavulu. Jimbeji javulu jabhiti katena kusanga salu. Mu kusuluka wakwata uhaxi, katenene dingi kutunda ku hama. Wamateka kubanza kwila kexile dingi munumi wambote, tata yambote ni kwila Jihova kamuxikinine dingi. Sayi kizuwa, mu usuku mon’ê wa muhatu weza ni phaphela mwexile o divulu dya Izaya 30:15 dyamba: ‘O kudyelela ni kuximbakata, kwanda kumibhekela uzônda.’ Mwene wa yambata mu hama ya tata, yu wamwambela: “Papá, kyoso ki wanda divwa kyayibha, lembalala o izwelu yiyi.” Dimitri  wamono kwila ni kikwatekesu kya Jihova, o mwiji wê wexile hanji ni kudya, izwatu ni inzo. Mwene wambe: “Ngamono kwila ngatokalele ngó kutululuka ni kusuluka mu kudyelela kwa Nzambi.” Se wamudibhana we ni kibhidi kiki, dyelela kwila Jihova wamukulanga ni kwila wamukukwatekesa kukolokota.

13. Jihova ulondekesa kwila watuxikina bhukaxi ka nanyi, ni kyebhi kyabhanga kiki?

¹³ Bhukaxi ka jiphange jetu. Jihova ulondekesa kwila utuxikina, bhukaxi ka jiphange jetu. Mu kifika, mwene ubhangesa o jiphange jetu kutuswinisa ni izwelu yâ mu kithangana kyatokala. Kyene kyabhiti ni phange ya muhatu watungu mu kibatu kya Azya. Mwene watandanganyele kyavulu. Kexile dingi mukalakala, yu wakwata uhaxi wabhonzo. Mu kusuluka mwadi wê wate kituxi kya dikota, anga amukatula o ujitu wakukala kafunga. Mwene wambe: “Kingexile mutendela se mukonda dyahi o ima yiyi yexile mubhita neme. Ngabanze kwila nange ngabhangele ima yayibha, kyenyiki-phe Jihova kangixikinine dingi.” Mwene wabhingi kwa Jihova phala ku mudyelelesa kwila wamuxikina hanji. Kyebhi Jihova kyabhange kiki? O phangyetu wambe: “O tufunga mu kilunga azwela neme, ya angikwatekesa kumona kwila Jihova wangizolo hanji.” Mu kusuluka wabhingi dingi o kikwatekesu kya Jihova. Mwene wambe: “Mu kizuwa kyenyokyo, ngatambula mukanda wa jiphange mu kilunga. Kyoso ki ngayile ni kutanga, ngamono kwila Jihova wangivu.” Bhukaxi ka izwelu ya akwetu, Jihova ulondekesa kwila watuxikina.—Jisá. 10:17.

14. Ukexilu webhi dingi ulondekesa kwila Jihova watuxikina?

¹⁴ Jihova ulondekesa kwila watuxikina kyoso o jiphange jetu kya tubazela. Mu kifika, mu hama ya dyanga, Jihova wabhana  kutena kwa poxolo Phawulu phala kusoneka 14 kya mikanda phala o jiphange jê. Mu mikanda yiyi Phawulu wabhana itendelesu yabhindamene o jiphange, maji waibhana ni henda. Mukonda dyahi Jihova wabhangesa kwila Phawulu ubhana o itendelesu yiyi? Mukonda Jihova Tata yambote, mwene ubazela ‘woso wa mu zolo.’ (Jisa. 3:​11, 12) Kyenyiki kyoso kyatubazela bhukaxi ka Bibidya, ki kilombolola kwila Nzambi katuxikina dingi, maji kilombolola kuma mwene watuzolo kyavulu. (Jih. 12:6) Ima yebhi dingi yanda tulondekesa kwila Nzambi watuxikina?

MAUKEXILU AMUKWA ALONDEKESA KWILA JIHOVA WATUXIKINA

15. Jihova ubhana o nzumbi yê ikôla kwa nanyi, ni mukonda dyahi kiki kitubhana kidyelelu?

¹⁵ Jihova ubhana o nzumbi ikôla kwa yó wa axikina. (Mat. 12:18) Twatokala kudibhwidisa: ‘O kwila ku mwenyu wami ngene mulondekesa o idifwa yatokala ku ibundu ya nzumbi ikôla?’ O kwila kindala eye wene mulondekesa dingi mwanyu ku akwenu, o ki wamateka kusidivila Jihova ndenge? Kyoso ki uya ni kulondekesa dingi o idifwa yatokala ku ibundu ya nzumbi ikôla, wanda dyelela kwila Jihova wa kuxikina!—Tala o kaxa “ O ibundu ya nzumbi yenyiyi . . . ”

16. Jihova wasolo nanyi phala kuboka o njimbu yambote, kiki kikubhangesa kudivwa kyebhi? (1 Tesalonika 2:4)

¹⁶ Jihova ubhana ku athu wa axikina o ujitu wa kuboka o njimbu yambote. (Tanga 1 Tesalonika 2:4.) Sayi phange ya muhatu amwixana Jocelina wamono o kidi kiki kyoso kyexile mubokela o athu. Sayi kizuwa wabalumuka ni kikote ku muxima. Mwene wambe: “Ngexile mu divwa kala kingala ni valolo. Ngexile ngi muboki wa thembu yoso ni kwila kyokyo kyexile kizuwa kyami kya kuboka. Ngasambe, éme ngayi muboka.” Mu kizuwa kyenyokyo, Jocelina wazwela ni muthu wambote amwixana Madiya, waxikina kudilonga o Bibidya. Jimbeji ku pholo, Madiya wambe kwila kyoso Jocelina kyaphuphu ku dibhitu dyê, mwene wexile musamba phala Nzambi kumukwatekesa. Jocelina wambe: “Mu kubanza mu musoso yú, ngadivu kala Jihova wexile mungitangela: ‘Ngakuxikina.’” Kidi kwila, ko athu oso anda xikina o njimbu yetu. Maji tutena kudyelela kwila, Jihova usanguluka kyavulu kyoso kitubhanga yoso ni yoso ni tuboke o njimbu yambote ku akwetu.

17. Ihi iwadilongo ni izwelu ya mana Vicky yalungu ni sata ya kukula? (Jisálamu 5:12)

 ¹⁷ Jihova ubhana o valolo ya sata ya kukula kwa yó wa axikina. (1 Ti. 2:​5, 6) Ihi itwatokala kubhanga se tudivwa kwila Jihova katuxikina, nemwene twala ni kixikanu mu sata ya kukula ni kwila atubatizala kya? Lembalala kwila, kitutokala kudyelela ku muxima wetu, maji twatokala kudyelela kwa Jihova. Phala mwene, woso yo waxikana ku sata ya kukula kifwa muthu wa yuka, mwene u mubesowala. (Tanga Jisálamu 5:12; Lom. 3:26) Kuxinganeka mu sata ya kukula kwakwatekesa phange ya muhatu amwixana Vicky. Sayi kizuwa kyazubha mu kubanza ku sata ya kukula ya Jezú, mwene wambe: “Jihova wa ngi londekesa mwanyu mu ithangana yavulu. . . . Maji kyedi kala nga kexile ku mu tangela: ‘O henda yé ki ya soko phala kuloloka o ituxi yami. O sata ya Mon’é ki ya soko phala kufuta o ituxi yami.’” Maji mukonda dya kuxinganeka ku ujitu wa sata ya kukula, wamateka kumona kwila, Jihova wamuzolele mwene kyavulu. Se tubanza mu sata ya kukula, twanda mona kwila Jihova watuzolo ni kwila watuxikina.

18. Se tuzola o Tata yetu ya dyulu, tutena kudyelela mu ihi?

¹⁸ Né mwene se tukumbidila itwadilongo mu milongi yiyi, sayi bhabha twanda luwala ni kudibhwidisa se Jihova watuzolo. Se kiki kibhita, lembalala kwila mwene uxikina “yó amuzolo.” (Tiy. 1:12) Kyenyiki zukama kwa Jihova, katula we mbote mu maukexilu oso amukulondekesa Jihova kwila wakuxikina. Mu ithangana yoso, lembalala kwila Jihova “sé-ku muthu wa mukala dikanga.”—Ika. 17:27.