1. Mabesá ebhi utwala-nawu mukonda dya kubhanga mbandu ku kilunga kya Jihova?

 DIBESÁ dya dikota kubhanga mbandu ku kilunga kya Jihova mu izuwa yiyi yabhonzo ya sukidila-ku ya mundu yu. O mwenyu ku mundu yu, wamuya ni kubhonza dingi kala kizuwa kibhita, maji Jihova watubhana jiphange jetu ja mala ni ja ahatu phala kutukwatekesa. (Jisá. 133:1) Mwene utukwatekesa kusanguluka ku mwiji. (Efe. 5:33–6:1) Mwene utubhana o unjimu ni kutongoloka ku twabhindamena phala kukala ni kutululuka kwa kidi ku muxima wetu.

2. Ihi i twatokala kubhanga ni mukonda dyahi?

² Maji-phe, twatokala kubhanga nguzu phala kusuluka mu kusidivila Jihova ni ufiyele woso. Mukonda dyahi? Mukonda sayi ithangana akwetu atena kuzwela mba kubhanga kima ki tuluwalesa. Tutena we kuluwala mukonda dya itondalu yetu, benge-benge se twamutondala mu veji javulu. Twabhingi kukolokota mu sidivisu ya Jihova (1) kyoso o jiphange jetu kya tuluwalesa, (2) kyoso kaza dyetu kya tu luwalesa, ni (3) kyoso ki tuluwala mukonda dya itondalu yetu. Mu milongi yiyi, twanda mona o ima yoso yiyi. Twandadilonga ihi itutena o kudilonga ku phangu ya kitatu kya athu a atumbula mu Bibidya.

KOLOKOTA KYOSO O JIPHANGE JÉ KYA KULUWALESA

3. Ibhidi yebhi yene mudibhana-nayu o mundu wa Jihova?

³ O kibhidi. Sayi jiphange ala ni ifwa i tukwatesa njinda. Amukwa nange abhanga kima ki tuluwalesa mba a tutalatala kyayibha. O tufunga we atena kutondala. O ima yiyi itena kutubhangesa kudibhwidisa se twala mwene mu kilunga kya Nzambi mba kana. Amoxi muveji dya kusuluka mu kusidivila Nzambi ni “muxima  umoxi” ni jiphange mu kilunga, ene eha kudilunga ni yo a aluwalesa mba eha kuya ku yonge. (Sof. 3:9) O kwila unjimu kubhanga kiki? Tala ihi itutena kudilonga ku phangu ya athu a atumbula mu Bibidya a dibhanene we ni maka kala ya.

4. Ibhidi yebhi yadibhanene-nayu poxolo Phawulu?

⁴ O phangu ya Bibidya. O poxolo Phawulu wejidile kwila o jiphange jê mu nzumbi exile akwa ituxi. Mu kifika, amoxi mu kilunga mu Jeluzaleme exile ni woma wa kudilunga-ne mukonda kaxikinine kwila wexile dixibulu. (Ika. 9:26) Ku pholo dya kwenda, sayi athu a zwela ima yayibha yalungu ni mwene, phala kubhangesa akwa kukamba kumudyelela. (2 Ko. 10:10) Phawulu wa mono kafunga kubhanga kima kya bhangesa akwa mu kilunga kutondala. (Nga. 2:​11, 12) Ku mbandu yamukwa, Máluku, dikamba dye dya kazola, wamuluwalesele kyavulu. (Ika. 15:​37, 38) Phawulu weji tena kwehela kwila o ima yiyi i mubhangesa kudisandula ku athu oso a muluwalesele. Maji muveji dya kiki, mwene wasuluka mu kukala ni ixinganeku yambote yalungu ni jiphange je mu nzumbi, yu wa kolokotele mu kusidivila Jihova ni ufiyele woso. Ihi ya kwatekesa Phawulu o kukolokota?

5. Ihi ya kwatekesa Phawulu kusuluka mu kukala ni ukamba wambote ni jiphange jê? (Kolose 3:​13, 14) (Tala we ofoto.)

⁵ Phawulu wazolele o jiphange je. O henda ya Phawulu ku akwa, yamukwatekesa kudikwatenena mu idifwa yâ yambote, muveji dya kudikwatenena mu itondalu yâ. O henda yakwatekesa we Phawulu kukumbidila o izwelu ya soneka mwene mu divulu dya Kolose 3:​13, 14. (Tanga.) Tala kyebhi mwene kya kumbidila o izwelu yiyi mu kudibhana ni Máluku. Sumbala Máluku waditunu kuya ni Phawulu kyoso kyende o njila ye ya dyanga kala mukunji wa jixi jengi, mwene kamubhakela phonzo. Ku pholo dya kwenda, kyoso Phawulu kya soneka mukanda phala kuswinisa o kilunga kya Kolose, mwene waximana Máluku, yu wamwixana mukalakadi wambote wexile mu ‘mukonda o malamba.’ (Kol. 4:​10, 11) Kyoso kyexile mu kaleya mu mbanza ya Loma, Phawulu wabhingi benge-benge kwa Máluku, phala kuya ku mukwatekesa. (2 Ti. 4:11) Tutena kumona kwila, Phawulu wa loloka o jiphange je, yu wasulukile mu kukala ni ukamba wambote ni ene. Ihi itutena o kudilonga ku phangu ya Phawulu?

6-7. Kyebhi ki tutena o kukolokota mu kulondekesa henda ku jiphange jetu sumbala ni itondalu yâ? (1 Nzwá 4:7)

⁶ Ihi i tutena o kudilonga. Jihova wamesena kwila tusuluka mu kulondekesa henda ku jiphange jetu. (Tanga 1 Nzwá 4:7.) Se phange katutalatala kyambote kala ki tendelesa o Bibidya, tutena kudyelela kwila mwene kakibhange mulwelu ni kwila wamubhanga nguzu phala kubelesela Jihova. (Jisa. 12:18) Jihova wazolo o  jiselevende jê sumbala ni itondalu yâ. Sumbala twene mulweza, mwene kabatula o ukamba we n’etu; kene mu futuluka we n’etu. (Jisá. 103:9) Tu sanguluka kyavulu mu kwijiya kwila Jihova wene mu tuloloka. Mukonda dya kiki, twatokala we kukayela o phangu yê mu kuloloka akwetu.—Efe. 4:32–5:1.

⁷ Lembalala we kwila, kuma o dizubhilu dya mundu yu dya zukama, twabhingi kuzukama dingi ku jiphange jetu. Tutena kukingila kwila o izukutisu yanda dibandekesa. Etu nange kate mwene anda tuta mu kaleya mukonda dya kixikanu kyetu. Se kiki kibhita, twanda bhindamena dingi o kikwatekesu kya jiphange jetu m’ukulu ndenge. (Jisa. 17:17) Tala ihi ya bhiti ni phange Zuze, a kafunga watungu mu ixi ya Espanha. Mwene ni jiphange jamukwa ja mala a atele mu kaleya mukonda dya kudituna kudita mu maka a jinguvulu. Mwene wambe: “Mu kaleya, kuma etwenyoso twexile mu kididi kimoxi kikyeji bhonza kudikwatesa njinda. Etu twabhingile kudilendukila mudyetu ni kudiloloka ni muxima woso. Kiki kya tukwatekesa kukala ni muxima umoxi ni kudilanga mudyetu. Etu twexile mwaxaxi ka mayala kexile mu sidivila Jihova. Sayi kizuwa, ngadikwama ku lukwaku, anga alute mu jesu. Mukonda dya kiki, kingatenene kukalakala ni lukwaku lumoxi. Maji sayi phange, wasukula o izwatu yami yu wa ngikwatekesa mu maukexilu amukwa. Ngamono o henda ya kidi mu kithangana kya kubhindama.” Kiki ki tukatekesa kumona kwila, kindala kyene o kithangana kya kubatula kabasa maka utwala-nawu ni phang’yetu!

KOLOKOTA KYOSO KAZA DYÊ KYA KULUWALESA

8. Ibhidi yebhi yene mudibhana-nayu o makaza?

⁸ O kibhidi. Ukaza woso wala ni ibhidi. O Bibidya izwela ni kidi kyoso kwila o athu a kazala anda bhita ni “ibhidi ku mwenyu.” (1 Ko. 7:28) Mukonda dyahi? Mukonda o diyala ni muhatu akwa ituxi, kiyadi kyâ ala ni idifwa ki idifu, ni kwila kawabhela ima imoxi. Nange kala muthu a musase mu ukexilu wengi mba ni ijila ki idifu. Sayi ithangana, ene atena kulondekesa idifwa kexile mu ilondekesa kyoso kyexile muditangesa. O ima yiyi itena ku bheka maka mu ukaza. Muveji dya kulembalala kwila kiyadi kyâ a tondala, mukonda dya kiki atokala kubhanga yoso phala kubatula o maka, ene nange a ditatela. Ene kate atena kumateka kubanza kwila phala kuzubha o maka, atokala kudisenga mba kubatula mwene o ukaza. Maji o kwila o kudisenga mba kubatula o ukaza kwene kwanda zubha o maka? b Tumone phangu mu Bibidya ya muthu wa kolokotele mu ukaza sumbala ni ibhidi yabhonzele kinene.

9. Kibhidi kyebhi kyadibhanene-nakyu Abingayile?

⁹ O phangu ya Bibidya. Abingayile wa kazalele ni Nabale, a mutumbula mu Bibidya kala diyala dyayibha, wexile kindanda. (1 Sam. 25:3) Kya bhonzele kyavulu phala Abingayile kutunga ni diyala didi. O kwila Abhingayile weji tena kusota ndunge phala kabatula o ukaza? Kyene se wa kyandalele. Mu kifika, mwene wejitena kubhanga kiki, kyoso Davidi, o muthu weji kala sobha ya Izalayele, kyendele phala kujibha Nabale mukonda dya kuxongwena Davidi ni masoladi mê. (1 Sam. 25:​9-13) Abingayile weji tena kulenga, ni kwehela kwila Davidi ujibha Nabale. Maji mwene kabhange kiki. Muveji dya kiki, wadyondela Davidi phala kajibhe Nabale. (1 Sam. 25:​23-27) Mukonda dyahi Abingayile wa bhange kiki?

10. Nange ihi ya kwatekesele Abingayile kukolokota mu ukaza wa bhonzele kyavulu?

¹⁰ Abigayile wazolele Jihova, yu wexile muxila  o itumu yê yalungu ni ukaza. Se phata mwene wejidile kyambote, ihi yazwelele Nzambi kwa Adá kyoso kyamubhanene Eva phala kukala muhatu we. (Dim. 2:24) Abingayile wejidile kwila Jihova umona o ukaza kala kima kikola. Mwene wamesenene kusangulukisa Nzambi. Kiki kyene kyamuswinisa kubhanga yoso yatenene, phala kubhulula akwa dibhata dyê, kate mwene ni mwadi wê. Ni lusolo-lwoso mwene wafidisa Davidi kujibha Nabale. Abingayile wexile we polondo phala kubhinga muloloki sumbala ki mwene watondalele. Se phata, Jihova wazolele kyavulu o muhatu yu waswina, mukwa henda. Ihi itena kudilonga o mayala ni ahatu ku phangu ya Abingayile?

11. (a) Ihi i kingila Jihova ku makaza? (Efezu 5:33) (b) Ihi i utena o kudilonga mu ima yabhange mana Nzumba phala kulanga o ukaza we? (Tala we ofoto.)

¹¹ Ihi itutena o kudilonga. Jihova wamesena kwila o diyala ni muhatu a kazala, akala jinga kumoxi, ne mwene se umoxi mudyâ wabhonzo kyavulu kutunga-ne. Jihova usanguluka kyavulu, kyoso kyamona o makaza kubhanga nguzu phala kubatula o maka ni kudilondekesa henda yakidi ni kudixila! (Tanga Efezu 5:33.) Tala o phangu ya mana Nzumba. Mu kubhita mivu isamanu kyoso kya kazala, mana Nzumba wamateka kudilonga o Bibidya ni Jimbangi ja Jihova, mu kusuluka a mubatizala. Mana Nzumba wambe: “Mwadi wami kakiwabhela. Mwene wexile ni difuba dya Jihova. Mwene wexile mu ngisebhulula ni ku ngikusa kwila weji ngixisa.” Ne kiki, mana Nzumba wakolokota mu ukaza we. Mu 50 a mivu, mwene wabhange nguzu yavulu phala kuxila ni kulondekesa henda kwa mwadi we. Mwene wambe dingi: “Kyoso o mivu kyayi ni kubhita, ngamateka kutendela dingi kyambote, kyebhi kyexile mudivwa mwadi wami, ni kuzwela-ne ni henda ni kilendu. Mu kwijiya kwila o ukaza kima kikola phala Jihova, ngabhange yoso i ngatenene phala kulanga o ukaza wami. Nuka ngasoto ndunge ya kuxisa mwadi wami.” c Se kumoneka ibhidi mu ukaza we, utena kudyelela kwila Jihova wanda kukwatekesa o kukolokota.

KOLOKOTA KYOSO KI ULUWALA MUKONDA DYA ITONDALU YÉ

12. Kibhidi kyebhi ki tutena kudibhana-nakyu se twate kituxi kyadikota?

¹² O kibhidi. Tutena kuluwala kyavulu se twate kituxi kyadikota. O Bibidya ilondekesa ni kidi kyoso kwila o ituxi yetu itena kutubhangesa ‘kutoloka o muxima.’ (Jisá. 51:17) Sayi phange a mwixana Matulu wabhange nguzu mu mivu yavulu phala kukala mukwatekexi wa tufunga. Maji, mwene wate kituxi kyadikota, kyamubhangesa kudivwa kwila kalondekesa ufiyele kwa Jihova. Mwene wambe: “Kyoso ki ngabanze  mu kima ki ngabhangele, o kitongolwelu kyami kyamateka kungifundisa. Ngadivu mwene kyayibha. Ngasambe kwa Jihova ni kudila. Ngidilembalala kwila, mu kithangana kyenyokyo, ngaxinganeka kwila Nzambi nuka weji ngisuwa ni kungivwa dingi, mukonda ngamuluwalesele kyavulu.” Se twate kituxi kyadikota, nange tutena kukala ni ndolo yavulu ku muxima anga tumateka kubanza kwila Jihova watubhe dikunda, ni kwila kanda xikina dingi o ubhezelu wetu. (Jisá. 38:4) Se kyene ki wamudivwa, xinganeka mu phangu ya muthu amutumbula mu Bibidya, wakolokotele mu kusidivila Jihova ni ufiyele, sumbala watele kituxi kyadikota.

13. Kituxi kyebhi kyadikota kyatele Phetele, ni itondalu yebhi yadyangele o kuta ande dya kuta o kituxi kiki?

¹³ O phangu ya Bibidya. Mu usuku ande dya Jezú kufwa, poxolo Phetele watondala mu veji javulu, yu wasuku mu kubhanga o kima kya betele-kota mu kuyibha dingi ku mwenyu we woso. Kyadyanga, Phetele wadidyelele kyavulu mudyê mwene, anga walondekesa o kudizangeleka mu kuzwela kwila weji kala fiyele ne-mwene se o jipoxolo jamukwa ejixisa Jezú. (Mál. 14:​27-29) Mu kusuluka, kyoso kyexile mu njaludim ya Jetesemane, mu veji javulu Phetele katenene kutona, wakexile mu zeka. (Mál. 14:​32, 37-41) Ku pholo dya kwenda, kyoso kyamono athu avulu ejile ni jixibhata ni jimbangala phala kukwata Jezú, Phetele walenge. (Mál. 14:50) Mu kusuka-ku, mu veji jitatu Phetele waditunu kwila kejidile Jezú, kate mwene wamateka kudituna ni kuloka. (Mál. 14:​66-71) Kyebhi kyadivu Phetele kyoso kyamono kwila watele kituxi kya dikota? Wexile ni ndolo yavulu ku muxima anga wadidi kyavulu; nange wamateka kuditatela mukonda dya kikuma kye. (Mál. 14:72) Xinganeka-phe ngo o malamba a Phetele mu ithangana ku pholo, kyoso kamba dye Jezú kya mujibha. Se phata Phetele wadivwile kwila kexile dingi ni valolo!

14. Ihi ya kwatekesa Phetele o kukolokota mu kusidivila Jihova? (Tala ofoto .)

¹⁴ Ima yavulu ya kwatekesa Phetele kukolokota mu kusidivila Jihova. Mwene kadisondolola ku akwâ; muveji dya kiki, wayi kwexile o maxibulu amukwa, ene anga amuswinisa. (Luk. 24:33) Mu kusuluka, kyoso Jezú kyamufukununa, wamoneka kwa Phetele, nange wabhange kiki phala kumuswinisa. (Luk. 24:34; 1 Ko. 15:5) Mu kusuluka, muveji dya kubazela Phetele mukonda dya itondalu ye, Jezú wamutangela kwila weji tambula maujitu avulu a katunda. (Nzw. 21:​15-17) Phetele wejidile kwila watele kituxi kyadikota, maji ne-kiki wasuluka mu kubhanga o ima yatokala. Mukonda dyahi? Mukonda mwene wejidile ni kidi kyoso kwila, o Mesene ye, Jezú, wamuzolele hanji. O maxibulu amukwa asuluka we mu kumukwatekesa. Ihi itutena o kudilonga ku phangu ya Phetele?

15. Jihova wamesena kwila tuxikina mu ihi? (Jisálamu 86:5; Loma 8:​38, 39) (Tala we ofoto.)

 ¹⁵ Ihi i tutena o kudilonga. Jihova wamesena kwila tuxikina kwila mwene watuzolo, ni kwila wala polondo phala kutuloloka. (Tanga Jisálamu 86:5; Loma 8:​38, 39.) Kyoso ki tuta kituxi, twene muditatela. Ki kima kyayibha kudivwa kiki. Maji, kitwatokala kubanza kwila Jihova katuzolo dingi mba-phe kanda tuloloka. Muveji dya kiki, twatokala kubhinga kikwatekesu ni lusolo-lwoso. Phange Matulu, twamutumbula kudima, wambe: “Eme ngatele kituxi mukonda ngadyelele mu nguzu yami phala kulenga o tendasá.” Mwene wamono kwila wabhingile kuzwela ni tufunga. Mwene wambe: “Kyoso ki ngazwela ni tufunga, ene angikwatekesa kumona o henda ya Jihova kokwami. Ngadivu kwila, o tufunga angizolele we. Ene angikwatekesa kudyelela kwila Jihova kangibhele dikunda.” Etu we tutena kudyelela kwila, Jihova watuzolo kyavulu ni kwila uloloka o ituxi yetu se tu dyela, tusota o kikwatekesu, anga tubhanga nguzu phala kituvutukile dingi mu itondalu yetu. (1 Nz. 1:​8, 9) Se tudyelela kwila Jihova watuzolo ni kwila wamesena kutuloloka, kitwanda kweha kumusidivila ne-mwene se tulweza.

16. Mukonda dyahi eye wamesena kukolokota mu sidivisu ya Jihova?

¹⁶ Jihova ubhana valolo yavulu mu nguzu itubhanga phala kumusidivila mu izuwa yiyi yabhonzo isukidila-ku. Ni kikwatekesu kya Jihova, tutena kukolokota sumbala ni itondalu yetu mba ya akwetu. Tutena kusuluka mu kuzola o jiphange jetu, ne-mwene se atuluwalesa. Tutena kulondekesa o henda yetu kwa Nzambi ni kuxila o ukaza, mu kubhanga yoso itutena phala kubatula kabasa maka a moneka mu ukaza wetu. Se tuta kituxi kyadikota, tutena kusota o kikwatekesu kya Jihova, kuxikina o henda ni muloloki wê, ni kusuluka mu kumusidivila. Tutena kudyelela kwila, twanda tambula mabesá avulu, se tukamba ‘kubhwila mu kubhanga o ima yambote.’—Nga. 6:9.