O ituxi yetu atena kutuloloka-yu ngo bhukaxi ka sata ya kukula ya futu Jezú ni mayinga mê. (Efe. 1:7) Maji ne-kiki, o Bibidya yamba: Nzambi “mu mwanyu wê, wakexile mu loloka o ituxi yatele o athu m’ukulu,” kifwa, ande dya Jezú kubhana o sata ya kukula. (Lom. 3:25) Kyebhi Jihova kyeji tena kulololoka o ituxi ande dya kufuta o sata ya kukula, sé kulungulula o ukexilu we wa kuyuka?

Jihova wa kanene kwila weji tumikisa “mbutu” mba muthu wejibhulula o athu eji londekesa kixikanu kwa Mwene ni ku ikanenu yê. Kyoso kyabhange o kikanenu kiki, phala mwene, kyedile kala o sata ya kukula a ifutilye kya. (Dim. 3:15; 22:18) Nzambi wejidile ni kidi kyoso kwila mu kithangana kyaxindi Mwene, o Mon’ê, mu vondadi yê, wejibhana o mwenyu wê kala sata. (Nga. 4:4; Jih. 10:​7-10) Kyoso Jezú kyexile mu ixi, Jihova wamubhana o ungana wa kuloloka ituxi ande dya kubhana o sata ya kukula. Jezú watenene kuloloka o ituxi ya athu exile ni kixikanu, mukonda wejidile kwila o sata yejibhana, yeji futa o ituxi yâ.—Mat. 9:​2-6.