1-2. Mabesá ebhi a tambula o muthu kyoso kyamubatizala?

 KISANGUSANGU kya dikota kudibatizala ni kubhanga mbandu ku mwiji wa Jihova. Ujitu wadikota kukala ni ukamba wambote ni Jihova. Sé phata etu tu xikina mu izwelu ya mukwa jisálamu Davidi kyoso kyambe: “U zediwa muthu woso eye [Jihova] wa mu solo, anga u mu bhixidisa kokwé, phala n’a tunge mu kithâdi kyé.”—Jisá. 65:4.

² Jihova kehela muthu woso-woso kubhanga mbandu ku mwiji wé. Kala ki twadilongo mu milongi yatundu-mu, Jihova ubheka kwa mwene o athu alondekesa kwila a mesena kukala ni ukamba wambote ni mwene. (Tiy. 4:8) Kyoso ki udibhakula kwa Jihova anga akubatizala, eye u muzukama mu ukexilu wa katunda. Eye utena kudyelela kwila kyoso kyanda kubatizala, mwene wanda ‘ku kulundulwila dibesá, di ku soka anga di subhuka, di bhinga ki di kala ni nzôngo yê mu ku kubhekela jimbote.’—Mal. 3:10; Jel. 17:​7, 8.

3. O Jikidistá adibhakula kya ya a abatizala, ihi yatokala kusuluka mu kubhanga? (Ndongixi 5:​4, 5)

³ Kidi kwila o batizu dimatekenu ngo. Mukonda kyoso kyanda kubatizala, eye wanda mesena kubhanga yoso i utena phala kukumbidila o kikanenu ki wabhange kwa Jihova ne mwene mu kudibhana ni jitendasa ni ibhidi ilola o kixikanu kyé. (Tanga Ndongixi 5:​4, 5.) Kuma u dixibulu dya Jezú, wanda bhanga yoso i utena phala kukayela o phangu ni itumu ya Jezú. (Mat. 28:​19, 20; 1 Ph. 2:21) O milongi yiyi yanda kukwatekesa kubhanga kiki.

 SULUKA MU KUKAYELA JEZÚ NE MWENE NI IBHIDI NI JITENDASÁ

4. Mu ukexilu webhi o maxibulu a Jezú ambata “taka”? (Luka 9:23)

⁴ Kana kuxinganeka kwila, kyoso kyanda kubatizala, kiwanda kala dingi ni ibhidi ku mwenyu. Jezú wajimbulula kyambote kwila o akayedi ye eji kwambata “taka.” Mu kidi ene eji kwambata o taka yiyi “izuwa yoso.” (Tanga Luka 9:23) O kwila Jezú wa mesenene kuzwela kwila o akayedi ye eji tala hadi ithangana yoso? Kana, ki kyene. Mwene wexile mu jimbulula ngo kwila sumbala o maxibulu me eji tambula mabesá, ene eji dibhana ni ibhidi. Sayi ibhidi itena kubhonza kyavulu.—2 Ti. 3:12.

5. Mabesá ebhi akanena Jezú phala yo a xisa ima kudima phala kuta ku pholo o Utuminu wa Nzambi?

⁵ Nange o mwiji we wene mu kuzukutisa kya, mba-phe, nange mukonda dya kuta o Utuminu wa Nzambi ku pholo ku mwenyu we, wa xisa ima yeji kubhangesa kukala ni kitadi kyavulu. (Mat. 6:33) Se kyene, utena kudyelela kwila Jihova wene mu mona o ufiyele we u wene mulondekesa. (Jih. 6:10) Eye nange wene mu mona kya o dikumbidilu dya izwelu ya Jezú kyoso kyambe: “Kana muthu waxisa dibhata, jiphange ja mala ni ja ahatu, twana ni mábhya mukonda dyami’eme ni dya njimbu yambote, ukamba kutambula luhama kindala, mu thembu yiyi, mabhata, jiphange ja mala ni ja ahatu, ji mama, twana ni mábhya, ni izukutisu ni kutambula o mwenyu wakalelaku ku mundu wa ubhe wa kezaku.” (Mál. 10:​29, 30) O mabesa u wene mu tambula a beta kota, kima kyoso-kyoso ki waxisa kudima ndenge.—Jisá. 37:4.

6. Mukonda dyahi wanda bhinga kusuluka mu kubhânga ni “jihânji ja xitu” kyoso kyanda kubatizala?

⁶ Kyoso kyanda kubatizala, eye wanda bhinga hanji kubhânga ni “jihânji ja xitu.” (1 Nz. 2:16) Kiki kyanda bhita mukonda eye u mukwa ituxi hanji. Sayi ithangana eye nange wanda divwa kala kya divwile poxolo Phawulu. Mwene wasoneka kiki: “kwila moxi dyami, ngawabhela mwene o kijila kya Nzambi. Maji moxi dyami, mwala kijila kyengi kya mubhânga ni kijila kya kilunji kyami, kyene kya mu ngikutila mu ubhika wa kijila kya kituxi kyala mu mukutu wami.” (Lom. 7:​22, 23) Eye nange utena kuluwala mukonda dya kubhânga ni jihânji jayibha. Maji o kuxinganeka mu kikanenu ki wabhange kwa Jihova kyoso ki wadibhakula, kwanda bandekesa o nguzu ye ya kubhânga ni tendasá. Mu kidi, o kikanenu kye kya kudibhakula, kyanda kukwatekesa kudibhana ni jitendasá. Kiki kibhita kyebhi?

7. Kyebhi o kudibhakula kwa Jihova ku kwatekesa kukolokota fiyele kwa mwene?

⁷ Kyoso ki u dibhakula kwa Jihova, eye wamudituna eye mwene. Kiki kilombolola kwila eye usola kudituna o jivondadi je ni jimbambe ji waxindi, phala kusangulukisa Jihova. (Mat. 16:24) Kyenyiki, kyoso ki wanda dibhana ni tendasá mba kibhidi, kiwanda bhinga dingi kudibhwidisa se ihi i wanda bhanga. Mukonda eye wasolo kya se ihi i wanda bhanga—o kukala fiyele kwa Jihova. Eye wanda mesena kusuluka mu kusangulukisa Jihova. Mu ukexilu yu, eye wanda bhanga kala kya bhangele Jobe. Sumbala wa dibhanene ni ibhidi yabhonzele kyavulu, mwene wadikwatenena mu ufiyele we. Ni muxima woso mwene wambe kiki: “Nuka ngi di sandula mu kidi kyami.”—Jobe 27:5.

8. Kyebhi o kuxinganeka mu musambu we wa kudibhakula ku kwatekesa kudibhana ni tendasá?

⁸ Mu kuxinganeka mu musambu we wa kudibhakula kwa Jihova, wanda sanga nguzu phala kudibhana ni tendasá yoso-yoso. Mu kifika, o kwila weji londekesa kwila wa muwabhela muhatu mba diyala dyangene? Mu kidi, kana! Eye wakanena kya kwa Jihova kwila, nuka weji bhanga kima kala kiki. Se ubhanga yoso phala o jihânji jayibha kijikule ku muxima we, kupholo dya kwenda, kiwanda bhinga kubhânga phala kujitolola. Eye wanda ‘lenga’ o “njila ya akwa ituxi.”—Jisa. 4:​14, 15.

9. Kyebhi o kuxinganeka mu musambu we wa kudibhakula kutena we ku kukwatekesa kusuluka mu kuta o ubhezelu wa Jihova ku pholo ku mwenyu we?

 ⁹ Ihi i weji bhanga se kumoneka salu i kufidisa kuya mu yonge? Se phata eye weji dituna. Ande dya kumoneka o salu yiyi, eye wasolo kya kudituna salu yoso-yoso yeji ku kufidisa kuya mu yonge. Kyenyiki, eye kiwanda xikina salu kala yiyi ni kuxinganeka kwila wanda tena hanji kuta o vondadi ya Jihova ku pholo ku mwenyu we. O kuxinganeka mu phangu ya Jezú kutena kutukwatekesa. Mwene wa swinine mu kusangulukisa Tat’e. Kala Jezú, swina we mu kudituna kabasa kima ki luwalesa Jihova.—Mat. 4:10; Nzw. 8:29.

10. Kyebhi Jihova kyanda kukwatekesa “kusuluka mu kukayela” Jezú, kyoso kyanda kubatizala?

¹⁰ Mu kidi, o ibhidi ni jitendasá i kubhana kithangana kya kulondekesa o vondadi ye ya “kusuluka mu kukayela” Jezú. Utena kudyelela kwila, Jihova wanda kukwatekesa kusuluka mu kukayela Jezú. O Bibidya yamba: “Nzambi fiyele, mwene kanda myehela kwila a mitendala katé bhwa suku o nguzu yenu. Maji kyoso ki kumoneka o jitendasá, mwene wanda mibhana o ditundilu, phala mutene kukolokota.”—1 Ko. 10:13.

KYEBHI KI UTENA KUSULUKA MU KUKAYELA JEZÚ

11. Ukexilu webhi umoxi wa beta-kota wa kusuluka mu kukayela Jezú? (Tala we ofoto.)

¹¹ Jezú wa sidivila Jihova ni muxima woso, yu wakolokotele mu kumuzukama bhukaxi ka musambu. (Luk. 6:12) Mu kidi, ukexilu umoxi wa beta-kota wa kusuluka mu kukayela Jezú, kyoso kyanda kubatizala, o kukolokota mu kubhanga ima yanda ku kuzukamesa dingi kwa Jihova. O Bibidya yamba: “Kuma twala kyá ni kixikanu kyakolo, twatokala kusuluka mu kwenda mu ukexilu yú.” (Fil. 3:16) Sayi ithangana, eye wanda kwivwa misoso ya jiphange a suwu o mbambe  ya kusanzumuna o ukunji wa. Ene nange a bhange o Xikola ya Akunji a Utuminu mba ayi mu sidivila mu ididi mwa bhindamena dingi aboki. Se kikwala kima ki kufidisa, eye utena we kusuwa o mbambe yiyi. O mundu wa Jihova a wabhela kusota maukexilu a kusanzumuna o ukunji wa. (Ika. 16:9) Maji ihi i twamba se kindala k’utena hanji kusuwa o mbambe yiyi? Kana kuxinganeka kwila o akwenu yó asuwu o mbambe yiyi, a beta-dingi-kota, eye ndenge. O kima kya beta-kota, o kukolokota. (Mat. 10:22) Kana kudijimba kwila eye usangulukisa kyavulu Jihova, kyoso ki ubhanga yoso i utena phala kumusidivila. Yu ukexilu wambote wa kusuluka mu kukayela Jezú kyoso kya kubatizala.—Jisá. 26:1.

12-13. Ihi i utena o kubhanga se udivwa kwila o kisangusangu kye mu sidivisu ya Jihova kya muzoza? (1 Kolindu 9:​16, 17) (Tala we o kaxa “ Suluka mu Kulenga.”)

¹² Ihi i watokala kubhanga se udivwa kwila kiwamubhanga dingi misambu ni muxima woso kala m’ukulu, mba kiwawabhela dingi kyavulu o kikalakalu kya kuboka? Ihi i twamba se k’wamukatula dingi mbote yavulu mu kitangelu kye kya Bibidya kala m’ukulu? Se o maka ya a mateka kyoso kya kubatizala, kana kubanza kwila k’wala dingi ni kikwatekesu kya nzumbi ikola ya Jihova. Eye u mukwa ituxi, o ibanzelu yé itena kulunguluka mu ithangana ni ithangana, lelu kiki mungu kiki. Se o kuswina kwe kumateka kuzoza, xinganeka mu phangu ya poxolo Phawulu. Sumbala wexile musota kukayela Jezú, maji wejidile kwila sayi ithangana weji kala ni vondadi yavulu maji mu ithangana yamukwa, kana. (Tanga 1 Kolindu 9:​16, 17.) Mwene wambe: “Né mwene se ki ngi kibhange mu vondadi yami, kyene o kikalakalu kya ngibhana Nzambi.” Kiki kilombolola kwila, Phawulu wexile mubhanga nguzu phala kukumbidila o ukunji we kikale se mu kithangana kyenyokyo wexile ni vondadi mba kana.

¹³ Kyene kimoxi we, kana kusola mba kubhanga kima, mukonda ngo dya ukexilu u  wamudivwa. Diswinise phala kubhanga o kima kyatokala, ne mwene se udivwa kwila kiwala ni vondadi ya ku kibhanga. Se usuluka mu kubhanga o kima kyatokala, ku pholo dya kwenda, o ixinganeku ye itena kulunguluka. O kukala ni kifwa kya kudilonga o Bibidya ubheka, kusamba, kuya mu yonge ni kuboka, kyanda ku kwatekesa kusuluka mu kukayela Jezú kyoso kya kubatizala. O kukolokota kwe kwanda swinisa we o jiphange je mu nzumbi.—1 Te. 5:11.

‘KOLOKOTA MU KU DI TONGININA’

14. Ima yebhi iwatokala kutonginina, ni mukonda dyahi? (2 Kolindu 13:5)

¹⁴ Kyoso kyanda kubatizala, kima kyambote kusuluka mu kuditonginina. (Tanga 2 Kolindu 13:5.) Mu kithangana ni kithangana, kima kyambote kutonginina kyebhi kyala o mwenyu we. Mu kifika, tonginina se wene musamba izuwa yoso, kutanga ni kudilonga o Bibidya, kuya mu yonge ni mu sidivisu ya kuboka. Sota kusanga maukexilu a kukatula dingi mbote mu ima yiyi. Mu kifika, dibhwidise: ‘O kwila ngitena kujimbulula ku akwetu o milongi yadyanga, kifwa yoyo ya bhebhuluka-ku dingi itusanga mu Bibidya? O kwila sayi kima ki ngitena kubhanga phala ku fwamesa ni kuwabhela dingi o ukunji wami? Mu kusamba o kwila ngene mutumbula mwene o ima i ngabhindamena? O kwila o misambu yami ilondekesa kwila ngadyelela kwa Jihova ni muxima woso? Ngene muya mu yonge ithangana yoso? Ihi i ngitena kubhanga phala kukatula dingi mbote mu yonge ni kukwatekesa phala yene yende kyambote?’

15-16. Ihi i wadilongo mu phangu ya phange Lubertu yalungu ni kulenga tendasá?

¹⁵ Twa tokala we kutonginina se mbandu yebhi ya mwenyu wetu bhu twa bhindamena kikwatekesu. O musoso wa phange amwixana Lubertu, ujimbulula kyambote o maka enya. Mwene wambe: “Kyoso ki ngexile ni 20 a mivu, ngexile ni salu ya kaxaxi ka kizuwa. Sayi kizuwa kyoso ki ngazumbuka ku salu, sayi koleka yami ya muhatu, wa ngixana phala kuya kubhata dyê. O koleka yami wambe kwila ‘tweji kala ngo ubheka wetu, ni kwila ngeji ki wabhela.’ Ku dimatekenu, kingaditunu ni kuswina kwoso, maji mu kusuluka, ngamwambela kwila kana, anga ngamujimbulwila se mukonda dyahi.” Phange Lubertu walenge o tendasá, kiki kima kya kuximana. Maji ku pholo dya kwenda, kyoso kya xinganeka mu ima ya bhitile, mwene wamono kwila hinu weji batula o maka mu ukexilu wengi. Mwene wajimbulula: “Eme kingaditunu ni lusolo-lwoso mba ni kuswina kala kya bhangele Zuze ni muhatu wa Potifale. (Dim. 39:​7-9) Mu kidi, o kumona kwila kya ngibhonzele kyavulu kudituna o kixanu, kya ngithandanganyesa kyavulu. O kiki kya ngikwatekesa kumona kwila, ngabhingile kukolesa o ukamba wami ni Jihova.”

 ¹⁶ Eye wanda katula mbote yavulu se u ditonginina kala kya bhangele phange Lubertu. Ne mwene se wa ditundu kyambote mu kulenga o tendasá, dibhwidise, ‘O kwila ngalaleka kyavulu phala kudituna?’ Se umona kwila wabhingi kulungulula-ku kima, kana kuluwala. Mu veji dya kiki, sanguluka mukonda kindala wejiya kya se bhebhi bhu wabhingi kulungulula. Samba yalungu ni maka ya, anga bhanga ima yanda kolesa o vondadi ye ya kubelesela o itumu ya Jihova.—Jisá. 139:​23, 24.

17. Kyebhi o musoso wa manu Lubertu walungu ni kujingisa o dijina dya Jihova?

¹⁷ Sayi dingi ima itutena kudilonga ku musoso wa phange Lubertu. Mwene wa suluka mu kuzwela: “Kyoso ki ngaditunu o kixanu kya koleka yami, mwene wambe, ‘Eye waditundu kyambote!’ Bhenyobho, ngamwibhula se ihi ya mesenene kuzwela. Mwene wajimbulula kwila, sayi kamba dye dya diyala wexile Mbangi ya Jihova m’ukulu, wamutangela kwila o minzangala yoso Jimbangi ja Jihova, ene mubhanga ima yayibha mu kaswekele. Ene kanda kala fiyele se a atendela phala kubhanga ufusa. Kyenyiki, o koleka yami watangela kamba dye kwila weji ngitendala, phala kumona se eme ngexile we ni ukexilu yu. Mu kithangana kyenyokyo, ngasangulukile kyavulu mu kwijiya kwila ngabhana kijingu ku dijina dya Jihova.”

18. Ihi i wanda bhanga tunde mu kithangana kyanda kubatizala? (Tala we o kaxa “ Milongi Iyadi i Wanda Wabhela Kyavulu.”)

¹⁸ Kyoso ki udibhakula kwa Jihova ni kukubatizala, eye ulondekesa kwila wamesena kuzelesa o dijina dya Jihova, ne mwene se kumoneka ibhidi yabhonzo. Utena kudyelela kwila Jihova wejiya o ibhidi yoso i wene mudibhana-nayu ni jitendasá ji wene mu lenga. Mwene wanda besowala o nguzu i wene mubhanga phala kukolokota fiyele. Dyelela kwila, bhukaxi ka nzumbi yê ikola, mwene utena kukubhana o nguzu i wabhindamena phala kuditunda kyambote. (Luk. 11:​11-13) Ni kikwatekesu kya Jihova, eye wanda tena kusuluka mu kukayela Jezú, kyoso kyanda kubatizala.