1. Kyebhi kitutena kubhita kithangana ni Jihova?

ETU twa wabhela kubhita kithangana ni athu utwazolo. O makaza asanguluka, awabhela kyavulu kubhita kithangana kumoxi. O minzangala, awabhela we kubhita kithangana ni makamba mâ. Etwenyoso twa wabhela kubhita kithangana ni jiphange jetu mu nzumbi. O kya beta dingi kota, twazolo kubhita kithangana ni Nzambi yetu. Tutena kubhanga kiki, mukusamba kwa mwene, kutanga o Mak’â mê, kuxinganeka mu vondadi yê, ni mu idifwa yê yambote. O ithangana itubhita ni Jihova, yala ni valolo yavulu!—Jisá. 139:17.

2. Ibhidi yebhi itudibhana nayu?

² Etu twa wabhela kubhita kithangana ni Jihova, maji sayi ibhidi itudibhana nayu. Kuma o ikalakalu yatuvulu kumwenyu, kitena kubhonza kusanga kithangana phala o ima mu nzumbi. O salu yetu, o kulanga o mwiji, kutena kubhinga ithangana yavulu, kate tudivwa kwila, kitwala dingi ni kithangana phala kusamba, kudilonga ni kuxinganeka mu ima itwadilongo.

3. Ihi dingi itena kunyana o kithangana kyetu?

³ Sayi dingi kima kyamukwa kitena kunyana o kithangana kyetu. Se tu kamba kudilanga, tutena kulanduka mukubhanga ima yengi, ne mwene ki ima yayibha, maji itena kunyana o kithangana kitweji ngastala mukukolesa o ukamba wetu ni Jihova. Mukifika, xinganeka yalungu ni itonokenu. Etwenyoso twawabhela kukala ni kithangana kya kunyoha. Se tulanduka anga tungastala ithangana yavulu, né mwene mu itonokenu yambote, kitwandakala ni kithangana kyasoko phala kubheza Jihova. Twabhingi kutula o itonokenu mu kididi kye.—Jisa. 25:27; 1 Tim. 4:8.

4. Ihi itwandadilonga kindala kiki?

 ⁴ Mu milongi yiyi, twandamona se mukonda dyahi twabhingi kusola o ima yabetakota ku mwenyu wetu. Twandamona kyebhi kitutena kukatula mbote mukithangana kitubhita ni Jihova, ni kyebhi kitutena kukatula mbote mukukayela o unjimu wa Jihova mu ukexilu utukalakala ni kithangana kyetu.

5. Kuxinganeka mu kitendelesu kitusanga mu mukanda kwa akwa Efezu 5:15-17 kukwatekesa kyebhi o minzangala kusola kyambote ku mwenyu wâ?

⁵ Sola kyambote o ima ku mwenyu wé. O minzangala ene muthandanganya kyavulu yalungu ni kusola o ima yabetakota ku mwenyu wâ. Kumbandu yengi, o alongexi muxikola ni jindandu kamubheza Jihova, atena ku aswinisa kubhanga o xikola yakatunda ni kusota salu yanda kwa abhekela fuma kumundu. Kusola kukayela o mwenyu yú, kwanda kwa anyana ithangana yavulu. Maji o jitata ni makamba mu kilunga aswinisa o minzangala kubhakula o myenyu yâ mu sidivisu ya Jihova. Ihi itena kukwatekesa o minzangala yazolo Jihova, kusola kyambote? O kitena kwa akwatekesa, o kutanga ni kuxinganeka mu mukanda kwa akwa Efezu 5:15-17. (Tanga.) Kyoso kyaya ni kutanga o jivelusu jiji, o munzangala utena kudibhwidisa: ‘Yebhi ‘o vondadi ya Jihova’? Ihi ingatokala kusola phala kusangulukisa o muxima wê? Ihi yandangikwatekesa kukalakala kyambote ni kithangana kyami?’ Kana kujimba kwila “o izuwa yiyi yayibha,” ni kwila, o mundu wa Satanaji, kwa kambe ngó, wandabhité. Unjimu kubhanga o ima isangulukisa Jihova ku mwenyu wetu.

6. Ihi yasolo Madiya, ni mukonda dyahi tuzwela kwila, mwene wasolo ni unjimu?

⁶ Ta kupholo o ima yabetakota. Sayi bhabha, phala kukalakala kyambote ni kithangana kyetu, twabhingi kuxisa ima kudima, né mwene ki kima kyayibha kukibhanga. O musoso wa Jezú kyoso kyayi kubhata dya Madiya ni Málata, ujimbulula kyambote o kidi kiki. Kuma wasangulukile mukuzalela Jezú, Málata wadibhakula mukulamba kudya kwambote, kwa sunga. Mu kithangana kiki, Madiya wexile mukatula mbote mukuxikama bhumbandu ya Mesene yê, ni kwivwa o milongi yê. Sumbala Málata kabhangele kima kyayibha, Jezú wambe kuma, Madiya ‘wasolo o mbandu yabetakota.’ (Luka 10:38-42) Mukubhita kithangana, Madiya nange wajimbi o kudya kwadile mu kizuwa kyokyo, maji kajimbi o ima yamulongo Jezú. Madiya wawabhelele kubhita kithangana ni Jezú, etu we twa wabhela kubhita kithangana ni Jihova. Kyebhi kitutena kukalakala kyambote ni kithangana kyetu?

7. Mukonda dyahi twatokala kungastala kithangana mukusamba, kudilonga ni kuxinganeka mu ima itwadilongo?

⁷ Xikina kwila, o kusamba, kudilonga ni kuxinganeka mu ima iwadilongo, kubhanga mbandu mu ubhezelu wetu. Kyoso kitusamba, twamuzwela ni Tata yetu yadyulu, watuzolo ni muxima woso. (Jisá. 5:7) Kyoso kitudilonga o Bibidya, twamu “d’ijiya kyambote ni Nzambi,” o Fixi ya unjimu woso. (Jisa. 2:1-5) Kyoso kituxinganeka mu ima itwadilongo yalungu ni Jihova, tuxinganeka mu idifwa yê yambote, tulembalala we o ima yambote yamesena kubhanga mwene phala etu ni athu oso mu ngongo. Yú wene o ukexilu wabetakota wakukalakala ni kithangana kyetu. Maji ihi itena kutukwatekesa kubhanga kiki?

8. Ihi itudilonga mukwijiya kwila, Jezú wakalakala kyambote ni kithangana kyabhiti mu kikangalakata?

 ⁸ Se kibhana sola kididi kyatululuka. Tala o phangu ya Jezú. Ande dya kumateka o ukunji wê mu ixi, Jezú wabhiti 40 a izuwa mu kikangalakata. (Luka 4:1, 2) Mu kithangana kyexile ubheka, Jezú watenene kusamba kwa Jihova, ni kuxinganeka mu ima yamesene Tate’ê kwila mwene u ibhanga. Kiki kya pelepalala Jezú phala kudibhana ni jitendasá jejimoneka mu kithangana ni mbandu. Kyebhi ki utena kukatula mbote mu phangu ya Jezú? Se monzo yenu mwala mu athu avulu, kitena kubhonza kusanga kididi kyatululuka. Se kiki kyamubhita neye, sota kuya bhukididi kyengi kyatululuka. Phange Julie wene mubhanga kiki, kyoso kyamesena kubhita kithangana ni Jihova bhukaxi ka musambu. Mwene ni mwadi wê, atungu mu kanzo kofele ku ixi ya França, kiki kimubhonza kukala ubheka sé kumulandukisa. Phange Julie wajimbulula: “Izuwa yoso, ngiya mu njaludim. Kwenyoko, ngitena kukala ubheka, ngilunga o muxima wami mukuzwela ni Jihova.”

9. Sumbala wexile ni ima yavulu yakubhanga, kyebhi Jezú kyalondekesa kwila ubhana valolo ku ukamba wê ni Jihova?

⁹ Jezú wexile ni ima yavulu yakubhanga ku mwenyu wê. Mu ukunji wê mu ixi, athu avulu exile kumukayela kabasa kididi kyaditela, o kiki kyexile kumungastala kithangana. Sayi kizuwa, “o mbonge yoso anga ibhongoloka bhu kanga dya’nzo mwa kexi Jezú” phala kumumona. Né kiki, mwene wasoto kithangana phala kulanga o ukamba wê ni Jihova. Ande dya kuma kukya, mwene wexile mu “di meneka mu yangu” phala kubhita kithangana ni Tat’ê.—Mál. 1:32-35.

10-11. Kala kilondekesa Matesu 26:40, 41, kitendelesu kyahi kyatokala kyabhana Jezú ku maxibulu mê mu njaludim ya Ngetesemane? Maji ihi yabhiti?

¹⁰ Kudisukilu dya ukunji wê, mu usuku wasukina wa mwenyu wê mu ixi, Jezú wasoto kididi kyatululuka phala kuxinganeka ni kusamba. Mwene wasange o kididi kiki mu njaludim ya Ngetesemane. (Mat. 26:36) Mu kithangana kyokyo, Jezú wabhana kitendelesu kyatokala kyalungu ni kusamba, ku maxibulu mê.

¹¹ Tala yabhiti. Ene nange abhixila mu njaludi ya Ngetesemane mukaxi ka usuku. Jezú watangela o maxibulu mê: ‘Kolokotenu mu ku dilanga,’ yu wayi musamba ubheka. (Mat. 26:37-39) Maji kyoso mwene kyayi musamba, kwaxala, o maxibulu aya kukilu. Kya asange azeka, Jezú wa atendelesa dingi wixi: “Langidilenu, mu sambe [jinga].” (Tanga Matesu 26:40, 41.) Mwene wa tonginina kwila, o maxibulu alalamene, atohokele we. Ni henda yoso, Jezú wamono kwila “o xituphe ya bhwila.” Né kiki, Jezú watundu muveji jiyadi phala  kuya musamba, o kyoso kyavutuka, wasange o maxibulu azeka dingi, muveji dya kusamba.—Mat. 26:42-45.

12. Ihi itwatokala kubhanga se tulembwa kusamba mukonda dya kulalamana ni kubhwila?

¹² Sola o kithangana kyatokala. Sayi ithangana tulembwa kusamba mukonda dya kulalamana ni kubhwila. Se kiki kyamubhita neye, ejiya kwila k’eye ngó. Ihi i utena kubhanga? Avulu exile ni kifwa kya kusamba kwa Jihova mu usuku, atonginina kwila kota se akibhanga mu ngoloxi, mukonda o mukutu kiwabhwila luwa kyavulu. Amukwa amono kwila, kuxikama mba kwimana, kwa akwatekesa kyoso kya musamba. Abhaphe se ulembwa kusamba mukonda dya kulalamana mba kuluwala kyavulu? Tangela kwa Jihova kyebhi kiwamudivwa. Utena kudyelela kwila, Tat’etu ya henda, wandatendela yamubhita neye.—Jisá. 139:4.

13. Kyebhi o mitelembe itena kutulandukisa kyoso kitwamusamba, kudilonga ubheka ni kitukala muyônge?

¹³ Tula dikanga o ima itena kukulandukisa kyoso kiwamudilonga. O musambu kiwene ngó o ukexilu wakukolesa o ukamba wetu ni Jihova. Kudilonga o Mak’â Nzambi ni kuya muyônge kutukwatekesa kuzukama dingi kwa Nzambi. O kwila sayi kima ki utena kubhanga phala kukatula mwene mbote mu ithangana yakudilonga ubheka ni kuya muyônge? Dibhwidise, ‘Ihi yene mungilandukisa kyoso kingiya muyônge mba ngisota kudilonga ubheka?’ O kwila o ixanu ni jinjimbu jiwene mutambula mumutelembe we wakafwetele? Lelu mazunda ni mazunda a athu ala ni mitelembe. Akwakutokwesa amono kwila, kyoso kitusota kulunga o muxima mukudilonga, o kukala ngó mwene ni mutelembe bhumbandu kutena kya kutulandukisa. O Mulongexi wadilongo kyebhi kikalakala o kilunji kya muthu wambe: “O kilunji kyé kikikala mukima kiwamubhanga, maji kikale kwengi.” Ande dya kumateka o yônge ya ilunga mba yamakota, ene mutulembalesa muveji javulu phala kusosolola o dizwi dya mitelembe yetu yakafwetele, phala kitulandukise akwetu. O kwila tutena we kubhanga kiki phala o mitelembe yetu ki itulandukise mukithangana kitukala ni Jihova?

14. Kala kilondekesa Filipe 4:6, 7, kyebhi Jihova kya tukwatekesa phala kitulanduke?

¹⁴ Bhinga kikwatekesu kwa Jihova bhukaxi  ka musambu phala ki ulanduke. Kyoso ki utonginina kuma o kilunji kyé kyamuditela kwengi, mu kithangana kya kudilonga ubheka mba muyônge, bhinga kikwatekesu kwa Jihova. Se watandanganya mba walalamana, kyandabhonza kulunga o muxima ni kilunji mu ima yalungu ni ubhezelu wetu, maji watokala kukibhanga mwene. Bhinga o kutululuka kwandalanga o muxima ni ‘kilunji’ kyé.—Tanga Filipe 4:6, 7.

15. Mbote yahi itukatula mu kubhita kithangana ni Jihova?

¹⁵ Se usota kithangana phala kudizwelesa, kwivwa ni kuxinganeka kwa Jihova, wandakatula mbote yavulu. Kyebhi? Kya dyanga, wandakala ni unjimu wakusola kyambote. O Bibidya itudyelelesa kwila “woso wenda ni jinjimu, u biluka njimu.” (Jisa. 13:20) Kyenyikiphe, kubhita kithangana ni Fixi ya unjimu, Jihova, kwandakubhekela dingi unjimu. Wandakwijiya kyambote kyebhi ki utena kusangulukisa o muxima wê, ni kulenga o ima imuluwalesa.

16. Kyebhi o kubhita kithangana ni Jihova kubandekesa o uhete wetu wakulonga?

¹⁶ Kayadi, wandabandekesa o uhete wé wakulonga. Mu kulonga o Bibidya kumuthu, o mbambe yetu o kumukwatekesa kuzukama kwa Jihova. Se tuzwela kyavulu ni Tata yetu ya dyulu, o henda yetu kwa mwene yandadibandekesa dingi, twandakwatekesa we dingi kyambote o dixibulu kuzola Jihova. Kiki kyene kyabhiti ni Jezú. Mwene wajimbulula o idifwa ya Tat’ê ni izwelu ya henda, yakilendu. O kiki kyakwatekesa o maxibulu mê kuzola we Jihova.—Nzwá 17:25, 26.

17. Mukonda dyahi o kusamba ni kudilonga kubandekesa o kixikanu kyetu?

¹⁷ Katatu, o kixikanu kyé kyandadibandekesa dingi. Tala ibhita kyoso ki ubhinga itendelesu, kiximbakatesu mba kiswinisu kwa Nzambi. Ithangana yoso yandatambwijila o misambu yé, o kixikanu kyé kidibandesa dingi. (1 Nzw. 5:15) Ihi dingi ibandekesa o kixikanu kyetu? O kudilonga ubheka. O kyabetakota, “o kuxikana kwijila mù kwivwa o hundu.” (Loma 10:17) Maji, phala kukolesa o kixikanu, kwabhingi kima kyengi, kubandekesa ngó o kwijiya kikusoko. Ihi dingi itwabhingi kubhanga?

18. Mukonda dyahi twabhingi kuxinganeka mu ima itwadilongo? Bhana phangu.

¹⁸ Twabhingi kuxinganeka mu ima itwadilongo. Tala o phangu ya musoneki wa Sálamu 77. Mwene watandanganyele mukonda mwene ni akwa Izalayele oso, ka axikinine dingi kwala Jihova. O kuthandanganya kuku kwamubhekela xixakilu. (Jivelusu 2-8) Ihi yabhange mwene? Mwene watangela kwa Jihova,  wixi: “Ngi xinganeka we ku ima yoso i yene kuyudika, ngi ta muxima ku ukalakelu wé wa madiwanu!” (Velusu 12) Mukidi, o mukwa Jisálamu yú, wejidile yoso yabhangele Jihova m’ukulu phala o mundu wê, maji ni hele kumuxima, o diyala didi dyebhudisa: “Nzambi o kwila kejidila dingi kulenduka? Kifwa o kyadi kyê wa ki jikila kyá mu njinda?” (Velusu 9) O mukwa Jisálamu waxinganeka mu ibhangelu ya Jihova, ni mu henda yalondekesa Nzambi m’ukulu. (Velusu 11) Ihi yabhiti? O mukwa Jisálamu waxikina kwila, Jihova kamwehelela, kehelela we o mundu Wê. (Velusu 15) Kyene kimoxi neye. O kixikanu kyandadibandekesa dingi se uxinganeka jinga mu ima yabhange kya Jihova phala o mundu wê, ni yene yene mubhanga phala kukulanga.

19. Mbote yahi dingi itukatula se tubhita kithangana ni Jihova?

¹⁹ Kawana, kyabeta dingi kota, o henda yé kwa Jihova yandadibandekesa dingi. O henda, yene dingi yandakubhangesa kubelesela Jihova, kuxisa ima kudima phala kumusangulukisa ni kukolokota mu ibhidi. (Mat. 22:37-39; 1 Kol. 13:4, 7; 1 Nzw. 5:3) Seku kima kyabeta dingi kota, o ukamba wambote ni Jihova ndenge!—Jisá. 63:1-8.

20. Ihi iwandabhanga phala kubhita jinga kithangana ni Jihova?

²⁰ Lembalala kwila, o musambu, o kudilonga ubheka ni kuxinganeka mu ima iwadilongo, yalungu ni ubhezelu wetu kwa Jihova. Kala kyabhange Jezú, sota kididi kyatululuka, phala kubhita kithangana ni Jihova. Lenga o ima itena kukulandukisa. Bhinga kikwatekesu kwa Jihova phala ulunge muxima mu ima munzumbi. Se ukalakala kyambote ni kithangana kyé kindala kiki, Jihova wandakubhana o futu ya mwenyu wakalelaku, ku mundu wobhe wa Nzambi.—Mál. 4:24.