1-3. Ibhidi yebhi itena kubhangesa o mundu wa Jihova kudila?

KYEBHI o kithangana kyasukinaku ki wadidi? Sayi ithangana tudila masoxi akusanguluka. Maji muveji javulu, tudila mukonda dya kuluwala kwa muxima. Mukifika, tudila kyoso kitufunda ndandu yakazola. Phange Weza, watungu ku Estados Unidos, wambe: “Sayi ithangana, o ndolo yakufunda mon’ami, yexile mungibhekela kuluwala kwavulu, kyedile kala seku dingi kima kitena kungikonda o malamba. Ngadivwile kwila, kingejitena kukolokota mu dilamba didi.” *

² Kwala dingi ima yamukwa itena kutudidisa. Phange Hiromi, muboki wathembu yoso ku ixi ya Japão, wambe: “Sayi ithangana ngiluwala mukonda o athu mu ukunji kaxikina kwivwa o njimbu ya Bibidya. Sayi ithangana ni masoxi mu mesu, ngisamba, ngibhinga kwa Jihova phala kungikwatekesa kusanga muthu wamusota o kidi.”

³ O kwila wadivwile kya kala kya divu o jiphange jiji? Avulu mudyetu adivu we kiki. (1 Phe. 5:9) Etu twamesena ‘kusidivila Jihova ni kusanguluka,’ maji sayi bhabha tumubheza ni masoxi akufunda, kuluwala mba ibhidi ilola o ufiyele wetu kwa Nzambi. (Jisá. 6:6; 100:2) Ihi itwatokala kubhanga phala kutolola o ibhidi yiyi?

4. Ihi itwandadilonga mu milongi yiyi?

⁴ Tutena kudilonga ima yavulu kuphangu ya Jezú. Sayi ithangana, tubhita we mu ibhidi itubhangesa ‘kudila.’ (Nzwá 11:35; Luka 19:41; 22:44; Jihe. 5:7) Tu bhitulule o izulukutu yiyi. Kyoso kituya ni ku ibhitulula twandamona we o madisá ututena kudilonga. Twandamona we kyebhi kitwatokala kudibhana ni ibhidi imoneka ku mwenyu, itudidisa.

5. Yalungu ni Jezú ihi itudilonga mu izulukutu yosoneke mudivulu dya Nzwá 11:32-36?

⁵ Mu kixibhu kya muvu wa 32 K.K., Lazalu, kamba dya muxima dya Jezú, wakatele, anga ufwa. (Nzwá 11:3, 14) Lazalu wexile ni phange jiyadi, Madiya ni Málata, Jezú wazolele kyavulu o mwiji yú. O ahatu aluwalele kyavulu mukonda dya kufwa kwa phangyâ. Kyoso kyafu Lazalu, Jezú wende njila kate ku Betanya, kwatungile Madiya ni Málata. Málata kyevu kwila Jezú wamukwiza, wayi kumusanga ni lusolo. Xinganeka kyebhi kyexile mudivwa, kyoso Málata kyambe: “Ngana, eye se wa kexile-bhu, phang’ami hinu kafu.” (Nzwá 11:21) Mu kubhita tu ithangana kyoso kyabhixila, Jezú wamono Madiya ni athu amukwa exile mudila kyavulu, kyenyiki, mwene “anga udila.”—Tanga Nzwá 11:32-36.

6. Mukonda dyahi Jezú wadidi mukithangana kyenyokyo?

⁶ Mukonda dyahi Jezú wadidi mu kithangana kyenyokyo? O divulu Estudos Perspicaz das Escrituras, ditambwijila: “O kufwa kwa Lazalu, ni kudila kwa jiphange jê, kwamubhangesa ‘kukumba ku muxima ni kudila.’” * Jezú nange waxinganeka mundolo yevu kamba dyê mu kithangana kya katele ni kuxinganeka we kyebhi o nguzu yê kiyayi ni kusosoloka kate kyatula o mwenyu. Jezú wadidi we mukonda dya kumona o malamba a Madiya ni Málata, mukudila phangyâ wafu. Se ufunda dikamba mba ndandu yakazola, sé phata, wandakala we mumalamba, wandadila we kiki. Tala madisá atatu utudilonga mukizulukutu kiki.

7. Yalungu ni Jihova, ihi itudilonga ku masoxi ambombo Jezú mukonda dya makamba mê?

⁷ Jihova wejiya o ndolo yetu. Jezú “kilombolwelu kya kidifwa” kya Tat’ê. (Jihe. 1:3) Kyoso Jezú kyadidi, mwene walondekesa kyebhi kidivwa Jihova. (Nzwá 14:9) Se wamudibhana ni ndolo yakufunda ndandu, utena kudyelela kwila, Jihova utala, waluwala we kyavulu mu yoso iwamubhita. Mwene wamesena kyavulu kukonda o malamba mê.—Jisá. 34:18; 147:3.

8. Mukonda dyahi tutena kudyelela kwila Jezú wandafukununa o jindandu jetu jakazola jafu?

 ⁸ Jezú wamesena kufukununa o jindandu jé. Ande dya kudila, Jezú watangela Málata: “Phang’é wandu fukunuka.” Málata waxikina mu izwelu ya Jezú. (Nzwá 11:23-27) Kuma mubhezi wafiyele wa Jihova, Málata wejidile o misoso ya maufukunukinu abhangele o jipolofeta Elija ni Elizewu. (1 Jis. 17:17-24; 2 Jis. 4:32-37) Málata wejidile we kuma, Jezú wafukunwine we athu. (Luka 7:11-15; 8:41, 42, 49-56) Eye we utena kudyelela ni muxima woso kwila, wandamona dingi o jindandu jé jafu kyá. O masoxi a Jezú aximbakatesa o makamba mê exile ni malamba, alondekesa we kwila, mwene wamesena kyavulu kufukununa o athu!

9. Kala Jezú, kyebhi ki utena kuximbakatesa o makamba mê afundu? Bhana phangu.

⁹ Eye utena kukonda o malamba a yó afundu o ndandu. Jezú kadidi ngó ni Málata, maji wamwivu we, wamutangela maka alungu ni difukunukinu. Tutena we kubhanga kiki kwa yó amubhita mumalamba akufunda. Phange Dani, kafunga watungu ku ixi ya Austrália, wambe: “Kyoso kingafundu muhatu wami, ngabhingile kiximbakatesu. Makaza avulu exile mungivwa usuku ni mwanya. Ene angehela kudila muhatu wami, kexile ni jisonyi mukungimona kudila. Ene angikwatekesa we mumaukexilu avulu, kala kusukula o dikalu dyami, kusumba kudya, kate ni kulamba, mu ithangana ingalembwele kubhanga o ima yiyi. Ene asambe we n’eme muveji javulu. Ene alondekesa kwila exile makamba akidi, ‘jindandu jidimonekena mu jiphaxi.’”—Jisa. 17:17.

10. Jimbulula o izulukutu yosoneke mu divulu dya Luka 19:36-40.

¹⁰ Jezú wabhixila mu Jeluzaleme mu kizuwa kya 9 ya mbeji ya Nizá mu muvu wa 33 K.K. Kyoso kyexile muzukama mu mbanza, kibuka kya athu kyazale milele ni izwatu ya mu kikoka ande dya mwene ku kijiya, phala kumwijidisa kwila, amusolo kala Sobha yâ. Sé phata, kyokyo kyexile kithangana kyakusanguluka. (Tanga Luka 19:36-40.) Maji mukusuluka, o maxibulu mê adiwana ni ima yabhiti. ‘Mu kuya mu kubhixila, [Jezú] umona o mbanza, anga udila.’ Ni masoxi mu mesu, Jezú wabhange polofesiya ya ima yayibha yejibhita ni athu atungile mu Jeluzaleme, mu kithangana ni mbandu.—Luka 19:41-44.

11. Mukonda dyahi Jezú wadidi o athu atungile mu Jeluzaleme?

¹¹ Jezú wevu ndolo kumuxima wê, mukonda, sumbala ni ima yayibha yeji kwa abhita, o Jijudé kejixikina o njimbu ya Utuminu. Kiki kyeji bhangesa Jeluzaleme ku ibwika, Judé yoso yeji subhuka kukibwika, eji mwambata ni kumubalakala. (Luka 21:20-24) Kima kya kuluwala, maji, kala kyazwelele Jezú, athu avulu kamuxikina. Mukididi kiwatungu, kyebhi o athu kyene mutambulula o njimbu yambote ya Utuminu? Se atolo a ixikina, ihi i utena kudilonga ni masoxi a Jezú? Tala madisá atatu.

12. Ihi itutena kudilonga yalungu ni Jihova ku masoxi a Jezú yalungu ni akayedyê?

¹² Jihova ulanga o athu. O masoxi a Jezú atulembalesa kwila, Jihova ulanga o athu. “Mwène kamesena kwila kukala muthu utexika, mbata wa mesena enyoso eza mu kudyela.” (2 Phe. 3:9) Lelu, tulondekesa kwila twazolo jiviziyu jetu mukusota kwa atudila o njimbu yambote ni mwanyu woso.—Mat. 22:39. *

13-14. Kyebhi Jezú kyakwatela henda ku athu ni kyebhi kitutena we kukala ni kidifwa kiki?

 ¹³ Jezú wakalakala ni nguzu yoso mu ukunji. Mwene walondekesa o henda yê ku athu, mu kwa abokela kabasa kithangana kyamonekene. (Luka 19:47, 48) Ihi yamuswinisa kubhanga kiki? Jezú wa akwatele henda. Sayi ithangana, avulu amesenene kwivwa o izwelu ya Jezú, katé mwene, Jezú ni maxibhulu mê “ka tenene ngó kúdya.” (Mál. 3:20) Mwene waboko we m’usuku, mukonda avulu exile ngó ni kithangana kiki phala kumwivwa. (Nzwá 3:1, 2) Ku athu evu o milongi ya Jezú, atolo akituka maxibulu mê. Maji, oso amwivu, atambula umbangi. Lelu, etu twamesena kubhana ku athu oso o kithangana kya kwivwa o njimbu yambote. (Ika. 10:42) Phala kubhanga kiki, sayi bhabha kubhinga kulungulula o ukexilu wetu wakutula o njimbu yambote.

¹⁴ Kala polondo phala kulungulula se kubhinga. Se tuboka ngó mukithangana kimoxi, nange kitwandatena kuzwela ni athu atena kuxikina o njimbu yambote. Phange muboki wathembu yoso, amwixana Madisela wambe: “Eme ni mwadiwami tusota kwixana mu mutelembe wakafwetele o athu, mu ithangana ki idifu. Mukamenemene, tuboka mu ididi yakusumbisa. Ku mediya, mukithangana kya kunyoha kusalu, avulu akala mu ikoka, kyenyiki, tuboka ni kadikalu kamadivulu. Mu ngoloxi, tusota kya o athu mu mabhata mâ.” Muveji dya kudikwatenena mu kithangana ni ukexilu wakuboka utwawabhela, twatokala kukala polondo phala kulungulula ni tutene kuboka mukithangana kitusanga o athu. Se tubhanga kiki, Jihova wandatubesowala.

15. Ihi yabhiti mu usuku wasukina wa mwenyu wa Jezú mu ixi, kala kyosoneke mu divulu dya Luka 22:39-44?

¹⁵ Mukubhita kithangana, mu kizuwa kya 14, mu mbeji ya Nizá, muvu wa 33 K.K., Jezú wayi mu njaludim ya Ngetesemane. Kwenyoko, mwene walundulula o muxima kwa Jihova. (Tanga Luka 22:39-44.) Mu ithangana yiyi yabhonzo, Jezú “udyonda, ni kudila masoxi.” (Jihe. 5:7) Mukonda dyahi Jezú wasambe mu usuku wasukina, ande dya  kumujibha? Mwene wasambe phala kubhinga nguzu, n’a kale jinga fiyele kwa Jihova, ni kubhanga o vondadi Yê. Jihova wevu o ndolo ya Mon’ê mu musambu wabhange, yu watumikisa anju phala kumukolokotesa.

16. Mukonda dyahi Jezú watandanganyele kyoso kyexile mu samba mu njaludi ya Ngetesemane?

¹⁶ Se phata, Jezú wadidile kyoso kyexile musamba mu njaludi ya Ngetesemane, mwene watandanganyele mukonda o athu eji mutala kala muthu wakambe kuxila o dijina dya Nzambi. Mwene wejidile we kyambote o kikalakalu kyadikota kyexile nakyu kya kuzokela ni kuzelesa o dijina dya Tat’ê. Se eye wamudibhana ni kima kyamukuthandanganyesa, kyamulola o ufiyele wé kwa Jihova, ihi i utena kudilonga ni kudila kwa Jezú? Tudilonge dingi madisá atatu.

17. Ihi itutena kudilonga yalungu ni Jihova mu ukexilu watambwijila o misambu ya Jezú?

¹⁷ Jihova wivwa o kudyonda kwé. Jihova wevu o misambu ya Jezú. Mukonda dyahi? Mukonda o kima kyabetele dingi kota phala Jezú o kulondekesa o ufiyele kwa Tat’ê ni kuzelesa o dijina Dyê. Se o kima kyabetakota phala etu o kukala fiyele kwa Jihova ni kuzelesa o dijina dyê, mwene wandatambwijila o misambu yetu ni kutukwatekesa.—Jisá. 145:18, 19.

18. M’ukexilu webhi Jezú wexile dikamba dya henda utendela akwa?

¹⁸ Jezú wivwa o ndolo yé. Se twamudibhana ni malamba, tusanguluka kyavulu kyoso kyatuximbakatesa ku makamba, kotelele yó adibhana we ni ibhidi yadifu ni yetu. O dikamba didi, Jezú. Mwene wejiya kyebhi kitudivwa, kyoso kituzoza, anga tubhinga kikwatekesu. Mwene wejiya o kuzoza kwetu, mwene wandabhanga yoso phala tutambule o kikwatekesu kitwabhindamena “mu kithangana kyatokala.” (Jihe. 4:15, 16) Jezú waxikina o kikwatekesu kya anju mu njaludi ya Ngetesemane, etu we twatokala kuxikina o kikwatekesu kitubhana Jihova, kikale se tukitambula bhukaxi ka madivulu, kadivulu, vidyu, kiswininu kya kafunga kyoso kya tukunda, mba dikamba dya kulu munzumbi.

19. Kyebhi kitutena kukala ni nguzu kyoso kitudibhana ni ibhidi ilola o ufiyele wetu? Bhana phangu.

¹⁹ Jihova wandakubhana “o kutululuka kwa  Nzambi.” Kyebhi Jihova kyandatukwatekesa? Kyoso kitusamba, tutambula “o kutululuka kwa Nzambi kwa somboka o kitongolwelu kyoso kya muthu.” (Fil. 4:6, 7) O kutululuka kwa Jihova, kutululukisa o muxima ni ixinganeku yetu. Tala kyebhi kiki kyabhiti ni phange Luziya. Mwene wambe: “Eme ngexile mudivwa ubheka. Sayi ithangana, o kudivwa kiki kwexile mungibhangesa kuxinganeka kwila, Jihova kangizolo. Maji kyoso kingixinganeka kiki, ngitangela kwa Jihova kyebhi kingamudivwa, sé kulaleka. O musambu ungikwatekesa kutululuka.” Kala kilondekesa phangu yiyi, o musambu utena kutukwatekesa kusanga o kutululuka.

20. Madisá ebhi utwadilongo alungu ni masoxi a Jezú?

²⁰ Kiximbakatesu ni madisá ahi ambote ututena kudilonga kumasoxi a Jezú? Atulembalesa kukwatekesa o makamba metu afundu jindandu, ni kudyelela kwila, Jihova ni Jezú andatukwatekesa kyoso kitufunda ndandu. Atuswinisa we kuboka ni kulonga ni henda yoso, mukonda Jihova Nzambi ni Jezú Kidistu, alondekesa o kidifwa kiki. Twatambula we kiximbakatesu mu kwijiya kwila, Jihova ni Mon’ê wakazola, atendela kyebhi kitudivwa, ejiya o kuzoza kwetu, andatukwatekesa. Kyenyikiphe, tusulukyenu ni kukumbidila yoso itwadilongo, kate o kizuwa kyoso Jihova kyandakumbidila o kikanenu kya kutu “kondona o masoxi moso ku mesu [metu]!”—Dij. 21:4.