MBANDU YAKUDILONGA 4
Mukonda Dyahi Twenemuya Mulembalasa
“Bhangenu jinga kyenyiki mu ku ngibanza eme.”—LUKA 22:19.
MWIMBU 20 Wa Bhana o Mon’é wa Kazola
ITWANDADILONGA *
1-2. (a) Bengebenge mukithangana kyebhi kitulembalala o ndandu yetu wafu? (b) Ihi yatendelesa Jezú mu usuku ande dya kufwa?
KABASA o kithangana kyafu o muthu utwazolo, tumulembalala hanji. Etu tumubanza dingi kyavulu kyoso kibhixila o kizuwa kyafu.
2 Mu mivu yoso, etu tudyongeka kumundu woso, mufesa ya kizuwa kyafu o muthu utwazolo kyavulu, Jezú Kidistu. (1 Phe. 1:8) Etwenyoso tulembalala kuma mwene wabhana o mwenyu wê kala sata, phala kutubhulula kukituxi ni kalunga. (Mat. 20:28) Mukidi, Jezú wamesena kwila o akayedyê alembalala o kufwa kwê. M’usuku ande dya kufwa mwene wabhange o seyalu yakatunda yu watendelesa: “Bhangenu jinga kyenyiki mu ku ngibanza eme.” *—Luka 22:19.
3. Ihi itwandadilonga mu milongi yiyi?
3 Sayi kakibuka kofele kaya mu Lembalasa ya kufwa kwa Kidistu ala ni kidyelelu kya kuya kudyulu. Maji o avulu dingi ayamu, yó ala ni kidyelelu kya kutunga mu palayizu mu ixi. Mumilongi yiyi twandamona se mukonda dyahi o ibuka iyadi yiyi ikala ni hanji ya kuya mu Lembalasa mumivu yoso. Twandatala we kyebhi kitukatula mbote mu kuya mu Lembalasa. Tumateke kumona o ima ibhangesa o Jikidistá a a undu kuya mu Lembalasa.
MUKONDA DYAHI O JIKIDISTÁA A UNDU AYA MU LEMBALASA
4. Mukonda dyahi o Jikidistá a a undu adya ku mbolo ni kunwa ku vinyu mu Lembalasa?
4 Muvu ni muvu, o Jikidistá a a undu asota kuya mu Lembalasa phala kudya ku mbolo ni kunwa ku vinyu. Maji mukonda dyahi ene adya ku mbolo ni kunwa ku vinyu? Phala kutambwijila o kibhwidisu kiki, tala yabhiti mu usuku wasukinaku wa Jezú mu ixi. Kyoso kyabhu o Phasu, mu usuku wenyo, Jezú wabhange o seyalu, itwixana Lembalasa ya Kufwa Kwa Jezú. Mwene wabhitisa o mbolo ni vinyu ku 11 ajipoxolo jafiyele, yu wa atangela phala kudya ni kunwa. Jezú wa atangela maka alungu ni ikutu iyadi: O kikutu kya ubhe ni kikutu kya Utuminu. * (Luka 22:19, 20, 28-30) O kikutu kiki kyajikula o njila phala o jipoxolo jojo ni kakibuka kofele keji kituka jisobha ni akunji ku dyulu. (Dij. 5:10; 14:1) O Jikidistá a a undu asubhuka mu ixi, * ene abhanga mbandu mu ikutu iyadi yiyi, ene ngó atena kudya ku mbolo ni kunwa ku vinyu mu Lembalasa.
5. Ihi yejiya o Jikidistá a a undu yalungu ni kidyelelu kyawu kya kuya ku dyulu?
5 Sayi dingi kima kyengi kibhangesa o Jikidistá a a undu kukala ni hanji yavulu yakuya mu Lembalasa: Ya abhana o kithangana kya kuxinganeka mu kidyelelu kyawu. Jihova wabhana kidyelelu kya kathunda—kutambula mukutu ki ufu ki ubolo ku dyulu, phala kutumina ni Jezú Kidistu ni yó abhanga mbandu kumuxinda wa 144.000 ni ujitu wakukala bhupholo ya Jihova Nzambi! (1 Kol. 15:51-53; 1 Nzw. 3:2) O Jikidistá a a undu ejiya kwila a exana phala kutambula o ujitu wakuya ku dyulu. Maji phala ene kuya ku dyulu, atokala kukolokota mu ufiyele kate ku ufwilu wâ. (2 Tim. 4:7, 8) O kiki kibhangesa o Jikidistá a a undu kuxinganeka kyavulu yalungu ni kidyelelu kyâ kya kuya ku dyulu. (Titu 2:13) O yalungu ni “jimbudi jamukwa”? (Nzwá 10:16) Ima yebhi ya abhangesa kuya mu Lembalasa?
MUKONDA DYAHI O JIMBUDI JAMUKWA JIYA MU LEMBALASA
6. Mukonda dyahi o jimbudi jamukwa jiya mu Lembalasa mivu yoso?
6 O Jimbudi jamukwa kene mudya kumbolo ni kunwa o vinyu mu Lembalasa, maji jisanguluka mukukalamu. Ku muvu wa 1938, o yó exile ni kidyelelu kya kutunga mu ixi, kyene kya exana muveji ya dyanga phala kuya mu Lembalasa. O Mulangidi wa 1 wa mbeji ya Katanu wa 1938, wambe: “O athu oso ayuka [o jimbudi jamukwa] andakala mu kyônge kiki ni kutala yene mubhita. . . . O kiki kithangana kyakusanguluka.” O kiki kyedi kala yó, a exana kufesa ya ukaza asanguluka, kyene kimoxi we, o jimbudi jamukwa asanguluka mu kukala mu Lembalasa.
7. Mukonda dyahi o jimbudi jamukwa akinga ni hanji yoso kwivwa o diskulusu dya Lembalasa?
7 O jimbudi jamukwa axinganeka we mukidyelelu kyâ. Ene akingila o diskulusu dya Lembalasa ni hanji yoso mukonda dya akwatekesa kulunga o mixima yâ ku ima yandabhanga Kidistu ni 144.000 a athu afiyele anda tumina né mu Midi Yamivu. Mu kwa endesa kwala o Sobha Jezú Kidistu, andakwatekesa mu kikalakalu kya kukitula o ixi palayizu ni kukwatekesa o athu mu ixi kukala athu ayuka. O mazunda ni mazunda athu aya mu Lembalasa, asanguluka kyavulu mukuxinganeka mu kikumbidilu kya jipolofesiya ja Bibidya, kala jitusanga mu divulu dya Izaya 35:5, 6; 65:21-23; Dijingunwinu 21:3, 4. Mukuxinganeka kyebhi kyandadivwa mukudisanga ni jindandu jâ ku mundu wa ubhe, ene akolokota mu kidiyelelu kyâ kyalungu ni hádya, aswinina dingi musidivisu yâ kwa Jihova.—Mat. 24:13; Nga. 6:9.
8. Kima kyebhi dingi kibhangesa o jimbudi jamukwa kuya mu Lembalasa?
8 Tala o kima kyengi kibhangesa o jimbudi jamukwa kuya mu Lembalasa. Ene amesena kulondekesa o henda yâ ni kukwatekesa o Jikidistá a a undu. O Mak’â Nzambi ambele kuma kikale o Jikidistá a a undu ni yó ala ni kidyelelu kya kutunga mu ixi, eji kalakala kumoxi. O kiki kyeji bhita kyebhi? Tulale ifika.
9. Kyebhi kyeji dibhana o jimbudi jamukwa ni Jikidistá a a undu kala kilondekesa o polofesiya itusanga mu divulu dya Zakadiya 8:23?
9 Tanga Zakadiya 8:23. O polofesiya yiyi ijimbulula o ukamba wambote weji kala bhukaxi ka jimbudi jamukwa ni Jikidistá a a undu. O izwelu “Judé imoxi” ni “enu” ilombolola kibuka kimoxi—o Jikidistá a a undu asubhuka. (Loma 2:28, 29) O “kwinyi dya muthu a tokala ku madimi m’engi ma miji yoso mu ngongo” alombolola o jimbudi jamukwa. Ene a “naminina,” kifwa adikwatenena ni ufiyele woso ku Jikidistá a a undu, mukubhanga o ubhezelu wakidi. Kyenyiki mu usuku wa Lembalasa o jimbudi jamukwa alondekesa kwila a dikwatenena ku Jikidistá a a undu mukuya mu Lembalasa.
10. Ihi yabhange Jihova mukukumbidila o polofesiya itusanga mu divulu dya Izekiyele 37:15-19, 24, 25?
10 Tanga Izekiyele 37:15-19, 24, 25. Jihova wakumbidila o polofesiya yiyi, mukubhangesa o Jikidistá a a undu ni jimbudi jamukwa, kukalakala kumoxi ni henda yoso. O polofesiya yiyi, itumbula iximbu mba mixi iyadi. O yó ala ni kidyelelu kya kuya kudyulu, edi kala o kiximbu kwasoneka “kwa Juda” (o mwiji mwexile mutunda o jisobha ja Izalayele), o yó ala ni kidyelelu kya kutunga mu ixi, edi kala o muxi kwasoneka “ya Ifalayime.” * Jihova weji bunda o ibuka iyadi yiyi ni ikale “yene imoxi ngó.” Kiki kilombolola kwila, ene eji sidivila kumoxi o Sobha yâ, Jezú Kidistu. Mivu yoso, o Jikidistá a a undu ni jimbudi jamukwa, aya mu Lembalasa, kana kala ibuka iyadi yaditungula, maji kala “kilunga kimoxi” atumaka “mubidi umoxi ngó.”—Nzwá 10:16.
11. O “jimbudi” jotumbule mu divulu dya Matesu 25:31-36, 40, adyanga kulondekesa kyebhi o kikwatekesu kyâ ku jiphange ja Kidistu?
11 Tanga Matesu 25:31-36, 40. O “jimbudi” mukifika kiki, jilombolola o athu awabha o mixima mu izuwa yasukidilaku, ala ni kidyelelu kya kutunga mu ixi, kifwa, o jimbudi jamukwa. Ni ufiyele woso, ene akalakala kumoxi ni jiphange a a undu ja Kidistu, mu ku akwatekesa kukumbidila o kikalakalu kyâ kyonene—kya kuboka ni kubhanga maxibulu ku mundu woso.—Mat. 24:14; 28:19, 20.
12-13. Mu maukexilu ebhi dingi o jimbudi jamukwa akwatekesa o jiphange ja Kidistu?
12 Mivu yoso, mu jisemana ande dya Lembalasa, o jimbudi jamukwa akwatesa o jiphange ja Kidistu, mukudibhakula mu kambanya ka kwixana o athu phala kuya mu Lembalasa. (Tala okaxa “ O Kwila Eye Wamudisokejeka Kyá Phala o Lembalasa?”) Ene asokejeka yoso phala kubhanga o Lembalasa, né mwene se mukilunga kyâ kimwala Kidistá a mu undu. O jimbudi jamukwa asanguluka mukukwatekesa o jiphange ja Kidistu mumaukexilu yá. O jimbudi jiji jejiya kwila, Jezú utala kuma, yoso yabhanga ku jiphange jê, edi kala amu ibhanga kwa mwene.—Mat. 25:37-40.
13 Ihi dingi itubhangesa kuya mu Lembalasa, kabasa o kidyelelu kitwala nakyu?
MUKONDA DYAHI ETWENYOSO TWENE MUYA MU LEMBALASA?
14. Kyebhi Jihova ni Jezú kyatulondekesa o henda yadikota?
14 Tusakidila kyavulu o henda yalondekesa Jihova ni Jezú kokwetu. Jihova wene mulondekesa o henda yê kokwetu mumaukexilu avulu, maji sayiku ukexilu umoxi watundu oso. Nzambi yetu walondekesa o henda yadikota yatukwatela, mukutumikisa Mon’ê wakazola phala kutala o hadi ni kufwa, mukonda dyetu. (Nzwá 3:16) Twejiya kwila, Jezú walondekesa we henda yadikota mukuxikina kubhana o mwenyu wê phala kutubhulula. (Nzwá 15:13) Etu nuka twandatena kufuta o henda yatulondekesa Jihova ni Jezú. Maji tutena kulondekesa o kisakidilu kyetu mu ukexilu utwambata o mwenyu wetu, mu kizuwa ni kizuwa. (Kol. 3:15) Etu tuya mu Lembalasa mukonda twamesena kulembalala o henda yatukwatela ene, ni kyebhi kitutena we kwa alondekesa o henda yetu.
15. Mukonda dyahi kikale o Jikidistá a a undu ni jimbudi jamukwa abhana valolo yavulu kusata yakukula?
15 Etu tubhana valolo yavulu ku ujitu wa sata yakukula. (Mat. 20:28) O Jikidistá a a undu abhana valolo kusata yakukula, mukonda yene ya abhangesa kukala ni kidyelelu kya kuya ku dyulu. Mukonda dya kixikanu kyâ musata ya Kidistu, Jihova wa amono kuyuka, yu wa asumbu kala twana twê. (Loma 5:1; 8:15-17, 23) O jimbudi jamukwa jilondekesa we kisakidilu musata yakukula. Mukonda we dya kixikanu kyâ mu sata ya Kidistu, ene azele kumesu a Nzambi, ala ni ujitu wakumusidivila, ala ni kidyelelu kyakubhuluka “mu hadi yadikota.” (Dij. 7:13-15) Kikale o Jikidistá a a undu kikale o jimbudi jamukwa, alondekesa o kisakidilu kyâ musata yakukula, mu kuya mu Lembalasa mumivu yoso.
16. Ihi dingi itubhangesa kuya mu Lembalasa?
16 O kima kyamukwa kitubhangesa kuya mu Lembalasa, kya kwila, twamesena kubelesela Jezú. Kabasa o kidyelelu kyetu, etu tusota kubelesela o kitumu kyabhana Jezú, mu usuku wabhange o Lembalasa ya dyanga, kyoso kyambe: “Bhangenu jinga kyenyiki, mu ku ngibanza eme.”—1 Kol. 11:23, 24.
MBOTE YAHI ITUKATULA MUKUYA MU LEMBALASA
17. O lembalasa itukwatekesa kyebhi kuzukama dingi kwa Jihova?
17 Tuzukama dingi kwa Jihova. (Tiya. 4:8) Kala kitwadilongo, o Lembalasa itubhana kithangana kya kuxinganeka mu kidyelelu kyatubhana Jihova ni kubanza mu henda yadikota yalondekesa kokwetu. (Jel. 29:11; 1 Nzw. 4:8-10) Kyoso kituxinganeka mu kidyelelu kyetu kyalungu ni hadya, ni mu henda yatukwatela Nzambi, o henda ni ukamba wetu ni Jihova ukola dingi.—Loma 8:38, 39.
18. Kuxinganeka mu phangu ya Jezú kutuswinisa kubhanga ihi?
18 Tumesena kukayela o phangu ya Jezú. (1 Phe. 2:21) Mu izuwa ande dya Lembalasa, etu tudilonga o musoso wa Bibidya walungu ni izulukutu yabhiti ni Jezú mu semana yê yasukina mu ixi, o kufwa kwê ni difukunukinu dyê. Mukusuluka, mu usuku wa Lembalasa, o diskulusu ditulembalesa o henda yatukwatela Jezú. (Efe. 5:2; 1 Nzw. 3:16) O kudilonga ni kuxinganeka muphangu ya Jezú, kwandatubhangesa kumesena ‘kwenda kala kyendele mwene.’—1 Nzw. 2:6.
19. Ihi itwatokala kubhanga phala kukala jinga mu henda ya Nzambi?
19 Etu twamesena kubhanga yoso phala kukala jinga mu henda ya Nzambi. (Juda 20, 21) Etu tukala mu henda ya Nzambi, kyoso kitubhanga yoso itutena phala kumubelesela, kuzelesa o dijina dyê, ni kusangulukisa o muxima wê. (Jisa. 27:11; Mat. 6:9; 1 Nzw. 5:3) O kuya mu Lembalasa kutubhangesa kwambata o mwenyu wetu izuwa yoso, mu ukexilu ulondekesa kala twamuzwela kiki kwa Jihova: ‘Ngamesena jinga kukala mu henda yê katé kuhádya ni hadya!’
20. Ima yahi yambote itubhangesa kuya mu Lembalasa?
20 Kikale se twala ni kidyelelu kya kuya ku dyulu mba kukala mu ixi, etwenyoso twala ni ima yambote itubhangesa kuya mu Lembalasa. Mivu yoso itudyongeka mu kizuwa kya lembalasa, tulembalala o ufwilu wamuthu utwazolo, Jezú Kidistu. O kyabetakota, tulembalala o henda yadikota yatukwatela, o henda yalondekesa Jihova, mukutumikisa Mon’ê kala sata yakukula. Mu muvu yú, o Lembalasa yandabhita kya Sesa mu usuku, kya 15 ya mbeji ya Kasamanu, 2022. Etu twazolo Jihova ni Mon’ê, kyenyikiphe, mu kizuwa kya kulembalala o ufwilu wa Jezú, twandabhanga yoso phala kikukale kima kitufidisa kuya mu Lembalasa.
MWIMBU 16 Jihova wa solo Sobha yetu
^ kax. 5 Kikale se o kidyelelu kyetu kya kuya kudyulu mba kya kutunga mu palayizu mu ixi, etwenyoso tusota kuya mu Lembalasa mivu yoso. Mu milongi yiyi twandazwela se ima yahi itubhangesa kuya mu Lembalasa ni mbote yahi itukatula mukubhanga kiki
^ kax. 2 O izwelu yiyi a isoneka we mu ukexilu yú: “Bhangenu kiki phala kungilembalala eme” mu (Bíblia fácil de ler).
^ kax. 4 Phala kwijiya dingi yalungu ni kikutu kya ubhe ni kikutu kya Utuminu, tala o milongi “Mwa ka Kala ‘Utuminu wa Akunji’” Mu Mulangidi wa 15 wa mbeji ya Kamusasadi wa 2014, mu mafwe 15-17.
^ kax. 4 IZWELU YOJIMBULULE: O kizwelu o Jikidistá a a undu asubhuka, kilombolola o Jikidistá a a undu ala hanji mu ixi.
^ kax. 10 Phala kwijiya dingi yalungu ni polofesiya ya iximbu iyadi, itusanga mu divulu dya Izekiyele kibatulu 37, tala o divulu A Adoração Pura de Jeová É Restaurada! mafwe 130-135, jikaxi 3-17.
