1. Kibhidi kyebhi kyabhonzo kyadibhana nakyu Davidi?

DAVIDI wexile mulenga mukonda sayi muthu wamesenene kumujibha. O sobha ya Izalayele, Sawulu, wexile polondo phala kumujibha. Kyoso Davidi kyabhindamene kudya, mwene wexile mu mbanza ya Nobe, kwene kwabhingi phala kumubhana ngó tumbolo tutanu. (1 Sam. 21:1, 3) Mukusuluka, mwene ni masoladi mê adisweka mu dibanda. (1 Sam. 22:1) Kyebhi Davidi kyeza mudibhana ni maka enyá?

2. Ima yahi yavulu yayibha yabhangele Sawulu? (1 Samuwele 23:16, 17)

² Sawulu wexile ni difuba dya Davidi mukonda athu avulu amuwabhelele ni mukonda dya kutolola ita yavulu. Sawulu wejidile we kwila o kubhukumuka kwê kwabhangesa Jihova kumudituna kala sobha ya Izalayele, ni kwila Jihova wasolele Davidi phala kumubhingana mu ungana. (Tanga 1 Samuwele 23:16, 17.) Maji Sawulu mwene hanji wexile o sobha ya Izalayele, mwene wexile ni masoladi avulu, wexile ni kikwatekesu kyavulu, kyenyiki Davidi wabhingile kulenga phala kubhulula o mwenyu. Sawulu waxinganekene kwila mwene wejitena kufidisa Nzambi kutumbika Davidi ku usobha? (Iza. 55:11) O Bibidya ki izwela, maji tutena kuxikina ni kidi kyoso kwila: Sawulu wexile muta o ungana wê mukilwezu. Nzambi utolola oso asota kubhânga ni mwene!

3. Kyebhi Davidi kyadivu mu kithangana kyabhonzo kyexile mudibhana nakyu?

³ Davidi wexile diyala dyalenduka. Mwene kasolele kukala sobha ya Izalayele. Jihova mwene wamusolele phala kukala sobha. (1 Sam. 16:1, 12, 13) Sawulu wexile ni lwimbi lwavulu lwa Davidi. Maji Davidi katatela Jihova mukonda dya ibhidi yexile  mudibhana nayu; Davidi kadikalanganzele mukonda dyakukala ni kudya kwatolo phala kudidikila, mba kididi phala kukalamu. Muveji dya kiki, mwene nange wasoneka o mwimbu yú wafwama wakisakidilu kyoso kyadiswekele mudibanda, mwéne mutusanga o velusu yetu yamilongi: “Yáphe asota Jihova, kana kima kyambote kya akamba.”—Jisá. 34:10.

4. Ibhwidisu yebhi itwandadilonga kindala ni mukonda dyahi kima kyambote kudilonga o ibhwidisu yiyi?

⁴ Lelu Jiselevende javulu ja Jihova, kala ni kudya kwasoko ni ima yamukwa yabhindamena ku mwenyu. * Kiki kidi mwene bengebenge mukithangana kiki kyadibhebhu dya Covid-19. O ima yandaya ni kubhonza dingi kyoso kituya ni kuzukama dingi mu kizuwa kya ‘hadi yadikota.’ (Mat. 24:21) Mukuxinganeka o ima yiyi, twandatambwijila ibhwidisu iwana: M’ukexilu webhi Davidi ‘kana kima kyambote kyamukambele’? Mukonda dyahi twatokala kusanguluka ni ima itwala nayu? Mukonda dyahi twatokala kudyelela kwa Jihova kwila mwene wandatulanga? Kyebhi kitutena kudisokejeka kyá kindala phala o ima yandabhita kuhádya?

5-6. Jisálamu 23:1-6, itukwatekesa kyebhi kutendela o izwelu ya Davidi kyoso mwene kyambe kwila o jiselevende ja Nzambi, “kana kima kyambote kya akamba”?

⁵ Ihi ilombolola o izwelu ya Davidi kyoso kyambe, o jiselevende ja Jihova “kana kima kyambote kya akamba”? Kyoso Davidi kyasoneka o Salamu 23, mwene watumbula izwelu yadifu kiki. Kyenyiki o Salamu yiyi itena kutukwatekesa kutendela se ihi ilombolola o izwelu yiyi ya Davidi. (Tanga Jisálamu 23:1-6.) Davidi umateka o Salamu yiyi ni izwelu: “Jihova mubidi wami wala ku ng’inga ki ngibhindamena kima kana.” Mu jivelusu jakayela ja Salamu yiyi, Davidi utumbula ima yala ni valolo yakidi inangenena—mu ima yiyi mwala o ima yambote yamubhele Jihova mukonda dya kumuxikina kala kafunga kê. Jihova wamwendesa “mu njila ja kuyuka,” Mwene wakwatekesa Davidi mu ithangana yambote ni mu ithangana  yabhonzo. Davidi wejidile kwila o mwenyu wê wexile bhumaku a Jihova kala “yangu yasabhelela mba yabwingita kyambote” maji kikwejikamba ibhidi. Sayi ithangana mwene waluwalele we, wedile kala wamukwendela “mu dikôlo dya kithômbe kya kalunga,” ni kwila, kumbandu yamukwa mwene wexile ni jinguma. Maji kuma Jihova Mubhidi wê, Davidi keji “kala ni woma wa kima kyayibha.”

⁶ Kyenyikiphe katé bhabha twasange o kitambwijilu kya kibhwidisu kyetu: Mu ukexilu webhi, Davidi ‘kana kima kyambote kyamukambele’? Mwene wexile ni ima yoso yabhindamene phala kuzukama ni kukolesa o ukamba wê ni Jihova. O kusanguluka kwê kikwexile mukwijila mukonda dya jimbote. Davidi wasangulukile ni ima yexile kumubhana Jihova. O kima kyabetele dingi kota phala Davidi o dibesá ni kilangidilu kya Nzambi.

7. Kala kidikisa o divulu dya Luka 21:20-24, o Jikidistá mu hama ya dyanga atungile mu Judeya adibhanene ni kibhidi kyebhi?

⁷ Mu izwelu ya Davidi tutena kumona kwila kima kyambote kutala o jimbote mu ukexilu watokala. Kikima kyayibha kusanguluka ni ima mba jimbote jitwala naju, maji kitwatokala kulunga o mwenyu wetu mu ima yiyi. Kwexile kima kyakatunda kyatokalele kutendela o Jikidistá mu hama ya dyanga, atungile mu Judeya. (Tanga Luka 21:20-24.) Jezú wadimwine kyá kuma o kithangana kiki kyejibhixila kyoso o mbanza ya Jeluzaleme eji “ikondoloka ni ifuxi ya masoladi.” Kyoso kyeji mona o ima kubhita ene atokalele ‘kulengela ku milundu.’ Se ene alengele, ejibhuluka, maji atokalele kuxisa ima yavulu kudima. Tumivu kudima o Mulangidi wambele kiki: “Ene axisa mabhya mâ, jinzo, katé mwene ni jimbote javulu. Mukonda dya kudyelela kukilangidilu ni mu kikwatekesu kya Jihova, ene ate o ubhezelu wa Jihova kupholo dya ima yedile kala yala ni valolo.”

8. Disá dyahi dya katunda ditutena kudilonga ni ima yabhiti ni Jikidistá mu hama ya dyanga, atungile mu Judeya?

⁸ Disá dyahi dya katunda ditutena kudilonga ni ima yabhiti ni Jikidistá mu hama ya dyanga, atungile mu Judeya? O Mulangidi wambele kiki: “Kupholo nange twandadibhana ni ibhidi yandalondekesa kyebhi kitutala o jimbote; o kwila yene o ima yabetakota phala etu inga o kubhuluka kutunda kwa Nzambi kyene o kima kyabhetakota? Kyoso kyandakwiza o dizubhilu twandabhinga kukolokota ni kuxisa ima kudima. Twandabhinga kubhanga yoso itutena, kala kyabhangele o Jikidistá mu hama ya dyanga, atungile mu Judeya.” *

9. Kiswinisu kyebhi ki usanga mu izwelu ya poxolo Phawulu itusanga mu mukanda kwa akwa Jihebelewu?

⁹ Eye utena kuxinganeka o ibhidi yadibhanayu o Jikidistá mu hama ya dyanga mu kuxisa o ima kudima ni kumateka mwenyu wa ubhe mu kididi kyengi? Ene abhingile kudyelela kwila Jihova weji kwa akwatekesa mu ima yabhindamene. Maji ene kakambele kikwatekesu. Mivu itanu ande dya Masoladi akwa Loma kukondoloka o mbanza ya Jeluzaleme, poxolo Phawulu wabhele itendelesu yambote kwa akwa Jihebelewu: “Ki mu kale mu akwa lwimbi lwa kitadi, yoso imwamono imisoke. Kuma Nzambi wambe wixi: Eme nuka nga kà mi xisa, ki nga kà mi ehelela we, kana. Wila kiki, tu kolokotyenu ni kwila: Ngana mwène mukwatekexi wami, eme ki ngi kala ni woma. Hé muthu u ngi bhanga-hi?” (Jihe. 13:5, 6) Se phata, phala yó atele o kitendelesu kya poxolo Phawulu ku muxima mba abelesele ande dya akwa Loma kukondoloka o mbanza, kikyabhonzele kumateka mwenyu wa ubhe mba kulungulula o mwenyu wâ mu inzo ya ubhe ni mu kididi kya ubhe. Ene adyelele ni kidi kyoso kuma Jihova weji langa o ibhindamu yâ. O izwelu ya Phawulu ituxikinisa  kwila tutena we kudyelela kuma Jihova wandadikila o ibhindamu yetu.

10. Kima kyahi kya “dilongo” Phawulu yu watutangelakyu we?

¹⁰ Phawulu wabhana kitendelesu kyadifu kiki kwa Timote, o kitendelesu kiki phala etwenyoso. Mwene wambe: “Kala kiki, se twa monophe kya kudya ni kya kudivunga, ima yenyiyi itusoke.” (1 Tim. 6:8) O kwila kiki kulombolola kwila kitutena dingi kusanguluka ni kudya kutwala naku, inzo, mba kusumba izwatu mu kithangana ni kithangana? Kiki kikyene kyamesenene kuzwela poxolo Phawulu. Phawulu wambe kuma etu twatokala kusanguluka ni ima itwala nayu, kabasa o jimbote. (Fil. 4:12) Kiki kyene kya “dilongo” Phawulu. O kima kyabetakota phala etu o ukamba wetu ni Nzambi, seku kima mba jimbote jitwala naju jikatula o kididi kiki.—Haba. 3:17, 18.

11. Disá dyebhi ditutena kudilonga mu izwelu ya Mozé ku akwa Izalayele yalungu ni kusanguluka ni ima itwala nayu?

¹¹ Nange o ima ituxinganeka kuma twa ibhindamena, Jihova ka imono kwila twa ibhindamena mwene. Tala ihi yambele Mozé ku akwa Izalayele kyoso ene kyabhitile 40 amivu mu kikangalakata: “Kuma Jihova Nzambi yé ikalakalu yoso ya maku mê wa izediwisa mwene; mwene wa ki’jiya kyambote kwila eye u ngenji’a-thumba wala kwenda mu kikangalakata kya dikol’iki; o mu makwinyi awana amivu oso yá, Jihova Nzambi yé wa ku bande mwene, ki kwala kima kya ku kambe.” (Mate. 2:7) Mu 40 amivu Jihova wadikila o  akwa Izalayele ni maná. O yalungu ni izwatu—o izwatu yatundile nayu ku Ijitu kiyatandukile. (Mate. 8:3, 4) Sumbala sayi amoxi axinganekene kwila o ima yóyo kiya asokele, maji Mozé walembalesa akwa Izalayele kuma ene exile ni ima yoso yabhindamene. Jihova wandakiwabhela se tubhanga nguzu phala kusanguluka ni ima itubhana kate ni mu ima yofele, ni ku itala kala dibesá ni kusakidila mukonda dya ima yiyi.

12. Ihi ilondekesa kwila Davidi wadyelele mwene kwa Jihova kana kokwe?

¹² Davidi wejidile kwila Jihova muthu wafiyele, mwene ulanga oso yó amuzolo. Sumbala o mwenyu wê wexile mu ilwezu kyoso Davidi kyasoneka o Salamu ya 34, ni mesu akixikanu, Davidi wamono “anju ya Jihova ikala jinga” kumulangidila. (Jisá. 34:7) Nange Davidi wasokesa o anju ya Jihova ni disoladi mu mukawu, wamumulangidila jinga ku jinguma. Sumbala wexile disoladi dya nguzu, Jihova wamukanene kumubhanga sobha, Davidi kadyelele mu mauhete mê akutakula o ditadi ni funda mba wakuphela ni xibhata phala kutolola o jinguma. (1 Sam. 16:13; 24:12) Davidi wadyelele kwa Nzambi ni kwila o anju ya Jihova ‘ukudila oso amukwatela o wôma.’ Mukidi, etu lelu kitukingila kuma Jihova ubhanga madiwanu phala kutulangidila. Maji twejiya kwila oso yó adyelela kwa Jihova andatambula o mwenyu wakalelaku né mwene se ene afwa kindala.

13. Kyoso Ngongo dya Mangongo kyandamesena kutubwika, mukonda kumesu mâ twamoneka kala kitwala ni muthu phala kutulangidila mba kutukudila, kidyelelu kyahi kitwandakala nakyu? (Tala ofoto yakapa.)

¹³ Kuhádya, o kidyelelu kyetu mu uhete wa Jihova wa kutulanga andakilola. Kyoso o Ngongo dya Mangongo, o kifuxi kya jixi kyandamesena kubwika o mundu wa Nzambi, etu twandamoneka kala twala mu kilwezu. Twandabhinga kudyelela kuma Jihova utena kutulanga, wandatubhulula. Phala o jinguma jetu twandamoneka kala tujimbudi sé o kilangidilu kya mubhidi. (Ize. 38:10-12) Etu kitwandakala ni mata, kitwandabhânga. O jinguma jetu jandatumona kala kitubhonzwetu phala kututolola. Ene kandamona o ima itwandamona ni meswetu akixikanu,—o jianju ku jikabalu andakondoloka o mundu wa Nzambi, andakala polondo phala kutukudila. Mukidi ene kandatena kutendela o ima yiyi. Ene kala ni kidyelelu kwa Nzambi. Ene andasasumuka kyoso o kifuxi kyamasoladi ajianju kyandabhânga phala kutukudila!—Dij. 19:11, 14, 15.

14. Ihi itwatokala kubhanga kindala mukudisokejeka yalungu ni hádya?

¹⁴ Ihi itwatokala kubhanga kindala mukudisokejeka yalungu ni hádya? Kya dyanga, etwenyoso twatokala kutala o jimbote mu ukexilu watokala, mukonda sayi kizuwa, yoso itwala nayu yandaxala kudima. Etu na twabhingi kusanguluka ni ima itwala nayu ni kusanguluka kyavulu mukonda dya ukamba wetu ni Jihova. Se twijiya dingi kyambote o Nzambi yetu, twandadyelela mu uhete wê wa kutulanga kyoso o Ngongo dya Mangongo kyandamesena kwiza kutubhwika.

15. Mu unzangala wê, ihi yabhiti ni Davidi yamulongo kwila Jihova nuka weji mwehelela?

¹⁵ Tala ihi yakwatekeksa we Davidi ni kyebhi kyene kitena kutukwatekesa mukudibhana ni ibhidi. Davidi wambe: “Lolenu, mu mone kuma Jihova wene ni mbote; muthu yó ulunga woso wamudyelela mwene.” (Jisá. 34:8) O izwelu yiyi ijimbulula se mukonda dyahi Davidi wejidile kwila Jihova wejimukwatekesa. Mu ithangana yoso Davidi wadyelele kwa Jihova, kyenyiki, Nzambi kamwehelela lembwa. Kyoso Davidi kyexile munzangala, mwene wabhânge  ni dizonda Ngoliya, wambela ku disoladi dya nguzu: “Lelu mwene, Jihova wanda kubhakula bhu lukwaku lwami.” (1 Sam. 17:46) Mukusuluka, kyoso Davidi kyexile musidivila o sobha, Sawulu, muveji javulu sobha wasoto kumujibha. Maji ‘Jihova wexile’ ni Davidi. (1 Sam. 18:12) Kuma Davidi wamonene kyá o kikwatekesu kya Jihova m’ukulu, mwene wadyelele ni kidi kyoso kwila eji mukwatekesa mu ibhidi yoso.

16. Ukexilu webhi we watokala ututena ‘kulola’ o mbote ya Jihova?

¹⁶ Se tudyelela mu itendelesu ya Jihova kindala, twandadyelela we kwila hádya mwene wandatubhulula. Kubhinga kixikanu ni kudyelela kwa Jihova phala kubhinga kwa phatala yetu phala tuye mu kyônge kya ilunga mba kyônge kyadikota, ni kubhinga phala kutusosolola ji ola mba izuwa yakukalakala phala tutene kukala ni kithangana kya kuya muyônge ni kuboka. Xinganeka kwila phatala yetu udituna ni kwila atukatula kusalu. O kwila twandakala ni kixikanu kya kwila Jihova nuka wandatwehelela mba kutubwazeka ni kwila mwene wandasuluka jinga kudikila o ibhindamu yetu? (Jihe. 13:5) Avulu ala musidivisu ya thembu yoso atena kumona kyebhi Jihova kya akwatekesa mu kithangana kyabhindamene kima. Jihova fiyele.

17. Yebhi o velusu ya muvu wa 2022, ni mukonda dyahi yene yatokala mwene?

¹⁷ Ni Jihova kumbandu yetu, etu kitwala ni kima kitutesa wôma kuhádya. Nzambi yetu nuka wandatwehelela se tuta o Utuminu wê kupholo. Phala kutulembalala kuma etu twabhingi kudisokejesa kindala phala o ibhidi yandakwiza kuhádya ni kudyelela kwila Jihova nuka wandatwehelela, o Kimbandi Kya Fiyele wasolo o divulu dya Jisalamu 34:10 kala o velusu ya muvu wa 2022: “Yáphe asota Jihova, kana kima kyambote kya akamba.”