1. Mukonda dyahi o kizuwa kya Lembalasa kyene o kizuwa kya beta dingi kota ku muvu? (Luka 22:​19, 20)

 PHALA o mundu wa Jihova, o kizuwa kya Lembalasa ya kufwa kwa Kidistu, kyene o kizuwa kya beta dingi kota ku muvu. Kiki kyene ngo o kizuwa kyatendelesa Jezú ku akayedi’e phala kukilembalala. (Tanga Luka 22:​19, 20.) Kwala ima yavulu itubhangesa kukingila ni hanji yoso o kizuwa kya Lembalasa. Tuzwele bhofele yalungu ni ima yiyi.

2. Ima yebhi itubhangesa kukingila ni hanji yoso o kizuwa kya Lembalasa?

² O Lembalasa itukwatekesa kuxinganeka mu valolo ya sata ya kukula. Yene itulembalesa kyebhi kitutena kulondekesa o kisakidilu kyetu mu sata ya Jezú. (2 Ko. 5:​14, 15) Itubhana we kithangana ‘phala ku diswinisa’ ni jiphange jetu. (Lom. 1:12) Jiphange javulu kene muya dingi mu yonge, andaya mu Lembalasa. Mukonda dya ku atalatala ni henda mu kizuwa kya Lembalasa, amoxi a vutuka mu kilunga. Athu avulu a diwana ni ima yamona ni yevwa mu Lembalasa. Kiki kya abhangesa kumesena kudilonga o Bibidya. O ima yoso yiyi, ibhangesa o Lembalasa kukala kima kya katunda phala etu!

³ Twene mu kingila we ni hanji yoso o Lembalasa, mukonda twejiya kwila mu kizuwa kiki tukala kumoxi ni jiphange jetu ku mundu woso. Mu kizuwa kyenyiki, o Jimbangi ja Jihova ku mundu woso, a dyongeka kyoso kiboba o dikumbi. Etwenyoso twivwa diskulusu dijimbulula o valolo ya sata ya kukula. Tuximana Nzambi bhukaxi ka mimbu iyadi, a bhitisa o mbolo ni vinyu,  anga tu tambwijila “kyene” ku misambu iwana. Mu 24 a ji ola, ilunga yoso abhanga o kyonge kiki mu ukexilu umoxi. Utena kuxinganeka o kisangusangu kikala nakyu Jihova ni Jezú, mu kutumona etwenyoso ku abhana kijingu mu ukexilu yu?

⁴ Mu milongi yiyi, twanda zwela yalungu ni ibhwidisu yiyi: Kyebhi kitutena kupelepalala o muxima wetu phala o Lembalasa? Kyebhi kitutena kukwatekesa akwetu kukatula mbote mu Lembalasa? Kyebhi kitutena kukwatekesa o jiphange jetu kene muya dingi mu yonge? O itambwijilu ya ibhwidisu yiyi, yanda tu kwatekesa kukala polondo phala o kizuwa kiki kyakatunda.

KYEBHI KITUTENA KUPELEPALALA O MUXIMA WETU PHALA O LEMBALASA?

5. (a) Mukonda dyahi twatokala kuxinganeka mu valolo ya sata ya kukula? (Jisálamu 49:​7, 8) (b) Ihi iwadilongo mu vidyu ni dyambu Mukonda Diahi Jezú Uafu?

⁵ Ukexilu umoxi wa beta kota wa kupelepalala o muxima wetu phala o Lembalasa, o kuxinganeka mu valolo ya sata ya kukula ya Jezú Kidistu. Séku kima kitwejitena kubhanga phala kubhuluka ku kituxi ni kalunga. (Tanga Jisálamu 49:​7, 8; Tala we o vidyu Mukonda Diahi Jezú Uafu?) a Kyenyiki, Jihova wabhange yoso phala Jezú a bhane o mwenyu we phala kutubhulula. Kikale Jihova mba Jezú, abhange kima kyadikota, kyabhonzele kyavulu. (Lom. 6:23) Kyoso kituya ni kuxinganeka mu yoso yabhange Jihova ni Jezú phala etu, o kisakidilu kyetu ku sata ya kukula, kyanda dibandekesa. Twanda zwela yalungu ni ima yofele ngo maji yabhonzele kyavulu, yabhange Jihova ni Jezú phala mbote yetu. Maji kyadyanga, ihi yabhingile phala kubhana o sata ya kukula?

6. Ihi yabhingile phala kubhana o sata ya kukula?

⁶ O kukula, o futu ibhana o muthu phala kusumba kima kyexile nakyu kya. O diyala dya dyanga Adá, wexile ni mwenyu wayuka. Kyoso kyate o kituxi, mwene wa texi o ujitu wa kukala ni mwenyu wa kalelaku. Mwene katexi o ujitu yu phala mwene ngo, maji we phala o an’e oso. Phala kusumba dingi o kima kyatexi Adá, Jezú wabhana o mwenyu we wayuka kala sata. Kyoso kyexile mu ixi, Jezú “katele kituxi, mu kanu dyê ki mwa monekene makutu.” (1 Ph. 2:22) Kyoso Jezú kyafu, mwene wexile muthu wayuka, kala kyexile Adá ande dya kufwa. Kyenyiki, mu kubhakula o mwenyu we kala sata, Jezú watena kufuta o mwenyu watexi Adá.—1 Ko. 15:45; 1 Ti. 2:6.

7. Ibhidi yebhi yadibhana nayu Jezú kyoso kyexile mu ixi?

⁷ Jezú wa belesela Tat’e ya dyulu ni kuyuka kwoso, sumbala ni ibhidi yavulu yadibhana nayu mu ixi. Jezú amuvwala kala mona wayuka, o jitata je exile akwa ituxi, maji ne kiki, mwene wexile mu abelesela. (Luk. 2:51) Mu unzangala, mwene wabhingile kubhanga nguzu phala kudituna o ijijidiku ya akwa, nange a mesenene kumubhangesa kubhukumukina o jitata mba kukamba ufiyele kwa Jihova. Kyoso kyexile kya mwadyakime, Jezú wabhingile kukolokota mu kudibhana ni jitendasá ja Satanaji. O Dyabhu kate mwene watangela Jezú phala kweha kubelesela Nzambi. (Mat. 4:​1-11) Satanaji wamesenene kyavulu kubhangesa Jezú kuta kituxi phala kumufidisa kufuta o sata ya kukula.

⁸ Mu kithangana kya ukunji we mu ixi, Jezú wadibhana ni ibhidi yamukwa dingi. O jinguma je amuzukutisa, ya a mesenene kumujibha. (Luk. 4:​28, 29; 13:31) Mwene wabhingile we kudibhana ni itondalu ya akayedi’e. (Mál. 9:​33, 34) Kyoso kyexile mu mufundisa, a mubhana kibetu, a musebhulula. Mu kusuluka, a mubhangesa  kwivwa ndolo yavulu, ya amujibha kala kifumbe. (Jih. 12:​1-3) Mu ithangana yasukina ya mwenyu we, Jezú wabhingile kukolokota mu jiphaxi sé o kikwatekesu kya Tat’e. b—Mat. 27:46.

9. Kyebhi kitudivwa mu kuxinganeka mu sata ya Jezú? (1 Phetele 1:8)

⁹ Mu kidi, Jezú watale hadi yavulu phala kufuta o sata ya kukula. Kyoso kituxinganeka mu ima yoso yabhange Jezú ni mu hadi yoso yatale phala o mbote yetu, o henda yetu kwa mwene idibandekesa dingi.—Tanga 1 Phetele 1:8.

10. O kwila kya bhonzele phala Jihova kubhana o sata ya kukula? Jimbulula

¹⁰ Ihi itwamba yalungu ni Jihova? Kima kyahi kyabhonzo kyabhange mwene mu vondadi ye, phala Jezú atene kubhana o sata ya kukula? O ukamba wala nawu Jihova ni Jezú, wene wa beta dingi kota. Seku tata ni mona a dizolo kala ene. (Jisa. 8:30) Kyenyiki, xinganeka kyebhi kyadivu Jihova mu kumona Jezú kubhita mu jiphaxi javulu mu ixi. Se phata Jihova wevu ndolo yavulu mu kumona Mon’e kumutalatala kyayibha, kumusebhulula, ni kutala hadi.

11. Bhana phangu ilondekesa kyebhi Jihova kyadivu kyoso Jezú kyamujibha.

¹¹ Tata yosoyoso wafundu kya mona, wejiya kyambote o ndolo ibhekela o kufwa kwa mona. Etu twala ni kixikanu kyakolo ku difukunukinu, maji kiki ki kitufidisa kwivwa ndolo kyoso kitufunda ndandu ya kazola. O phangu yiyi, itukwatekesa kutendela kyebhi kyadivu Jihova kyoso kyamono o mon’e wakazola kutala hadi ni kufwa ku muvu wa 33 K.K. c—Mat. 3:17.

12. Ihi itutena kubhanga mu jisemana ande dya Lembalasa?

¹² Tunde lelu kate mu kithangana kya Lembalasa, sota kudilonga dingi yalungu ni sata ya kukula, kikale ubheka mba mu ubhezelu ku mwiji. Tokwesa mu Kadivulu ka Kutokwesa Phala o Jimbangi ja Jihova (se kala kya mu dimi dye) mba mu madivulu amukwa phala kwijiya dingi yalungu ni sata ya kukula. d Bhanga we yoso phala kukayela o kitangelu kya Bibidya kya Lembalasa, kimoneka mu kadivulu Ukexilu wa Ukidistá ni Ukunji Wetu—Milongi Phala o Yônge. Mu kizuwa kya Lembalasa, kana kujimba kutala o Ubhezelu wa Matina wa kizuwa kyenyokyo. Se tu pelepalala o muxima wetu phala o Lembalasa, twanda tena we kukwatekesa akwetu kukatula mbote.—Eji. 7:10.

 KWATEKESA AKWENU KUKATULA MBOTE MU LEMBALASA

13. Kyebhi o kima kyadyanga kitutena kubhanga phala kukwatekesa o athu kukatula mbote mu Lembalasa?

¹³ Kyebhi kitutena kukwatekesa akwetu kukatula mbote mu Lembalasa? O ndunge yadyanga, o kwa exana phala o Lembalasa. Muveji dya kwixana ngo yo twene muzwela nawu kya mu ukunji, tutena kusoneka o majina a athu amukwa utwejiya, ni kwa exana we. O athu enya atena kukala o jindandu jetu, jikoleka jetu ja salu, ja xikola, ni athu amukwa dingi utwejiya. Ne mwene se kitwala ni ixanu yasoko mu ukexilu wa phaphela, tutena kwa tumikisa o ixanu bhukaxi ka mitelembe. Nange twanda diwana mu kumona kwila athu avulu utwa exana ayi mwene mu Lembalasa.—Ndo. 11:6.

14. Bhana phangu ilondekesa o valolo ya kubhana kixanu muveji dya kuzwela ngo.

¹⁴ Lembalala kwila o kubhana kixanu ku muthu kwala ni nguzu yavulu, o kumutangela ngo bhukaxi ka izwelu ndenge. Sayi phange ya muhatu wadiwana kyoso o mwadi we ki Mbangi ya Jihova, wamutangela kwila wejikuya we mu Lembalasa kumoxi ni mwene. Mukonda dyahi o phange ya muhatu wadiwana? Mukonda mu veji javulu kudima, mwene wexile mu muswinisa phala kuya mu Lembalasa, maji o mwadi we nuka waxikinine. Ihi phe yalunguluka mu kithangana kiki? Mwadi we wambe: “Angibhana kixanu.” Mwene wazwela kiki mukonda sayi kafunga wexile mudizwelesa ne kyambote, wa mubhanene kixanu. O mwadi wa phang’yetu wayi mu Lembalasa mu muvu wenyo, yu wasuluka mukuya mu mivu yavulu kupholo.

15. Ihi itwamesena kulembalala jinga kyoso kitwixana o athu phala o Lembalasa?

¹⁵ Ejiya kyu kwila, o yo utwa exana atena kukala ni ibhwidisu yavulu—bengebenge se nuka ayile mu yonge yetu. Kyenyiki, tutena kuxinganeka kya mu ibhwidisu nange yanda tubhanga. (Kol. 4:6) Mu kifika, amoxi nange ebhwidisa: ‘Ihi yanda bhita mu kyonge kiki?’ ‘Kyanda bhanga thembu kuxi?’ ‘Ihi ingatokala kuzwata?’ ‘O kwila ngatokala kufuta kima phala kuya mu kyonge kiki?’ ‘O kwila kyoso kinganda kala mu Lembalasa anda ngibhinga kitadi?’ Kyoso kitwixana muthu phala o Lembalasa,  tutena kumwibhwidisa: “O kwila wala ni kibhwidisu?” Mu kusuluka tambwijila kabasa kibhwidisu kyakala nakyu. Tutena we kwalondekesa o jividyu Lembalala o Kufua Kua Jezú ni Ihi Iene mu Bhanga Bhu Kididi Kia Ubhezelu? phala kukwatekesa o athu kutendela ihi yene mubhita mu yonge yetu. O disá dya 28 dya divulu Sanguluka Katé Kuhádya ni Hádya! dyala ni milongi yambote itutena kuzwela nawu.

16. Ibhwidisu yebhi dingi itena kukala nayu o athu aya mu Lembalasa?

¹⁶ Mu disukilu dya Lembalasa, o athu nange atena kukala hanji ni ibhwidisu yavulu. Ene nange ebhwidisa se mukonda dyahi seku muthu wadi ku mbolo ni kunwa ku vinyu, mba mukonda dyahi athu ofele ngo akibhange. Ene nange we ebhwidisa se o Lembalasa tu ibhanga veji jikuxi. Ene nange amesena kwijiya se o yonge yoso ya Jimbangi ja Jihova a ibhanga mu ukexilu umoxi. Sumbala jipondo javulu jalungu ni ibhwidisu yiyi, a jizwela mu diskulusu dya Lembalasa, o athu eza nu kyonge muveji yadyanga, anda bhindamena hanji kwa jimbulwilaju dingi kyambote. O milongi ni dyambu, “Mukonda Dyahi o Jimbangi ja Jihova a Lembalala o Seyalu ya Ngana mu Ukexilu ki Udifu ni Jingeleja Jengi?” yala mu sayte jw.org, itena kukwatekesa mu kutambwijila o ibhwidisu ya. Twamesena kubhanga yoso itutena—ande dya Lembalasa, mu kithangana kya kyonge kiki, ni kyoso kibhita o kyonge—phala kukwatekesa o athu andala kwivwa, kukatula mbote mu Lembalasa.—Ika. 13:48.

KWATEKESA O JIPHANGE JETU KENE MUYA DINGI MU YONGE

17. Kyebhi o tufunga kyatena kukwatekesa yo kene muya dingi mu yonge? (Izekiyele 34:​14, 18)

¹⁷ Mu kithangana kya Lembalasa, kyebhi o tufunga kyatena kukwatekesa yo kene muya dingi mu yonge? Londekesa kwila eye wene mu asuwa. (Tanga Izekiyele 34:​12, 16.) Ande dya Lembalasa, bhanga yoso phala utene kuzwela nawu. Tangelawu kwila eye wa azolo ni kwila wamesena ku akwatekesa. Wa exana phala kuya mu Lembalasa. Se ene axikina kuya, wa asangesa ni kisangusangu kyoso. Kyoso kibhita o Lembalasa, suluka mu kudizwelesa  mba kuxinda ku jiphange jetu jiji ja kazola, ni ku abhana kabasa kikwatekesu mu nzumbi kyabhindamena phala kuvutuka kwa Jihova.—1 Ph. 2:25.

18. Kyebhi ene oso mu kilunga kyatena kukwatekesa yo kene muya dingi mu yonge? (Loma 12:10)

¹⁸ Oso mu kilunga atena kukwatekesa yo kene muya dingi mu yonge axikina kuya mu Lembalasa. Kyebhi? Mu ku atalatala ni henda, ku abhanga mbote, ni ku axila. (Tanga Loma 12:10.) Lembalala kwila kitena kubhonza kyavulu phala o jiphange jetu jiji ja kazola, kuvutuka dingi mu kuya mu yonge. Nange ene akala ni hele kwila o jiphange kanda kwatambulula kyambote. e Mu kyenyiki phe, kana kwabhanga ibhwidisu ya akwatesa jisonyi mba kuzwela kima kitena kwa kwama ku muxima. (1 Tes. 5:11) O jiphange jiji atokala ku mwiji wetu. Etu tusanguluka kyavulu mu kudilunga nawu dingi phala kubheza Jihova kumoxi!—Jisá. 119:176; Ika. 20:35.

19. Mbote yebhi ijila mu kulembalala o kufwa kwa Jezú?

¹⁹ Tusakidila Jezú mu kututangela phala kulembalala o kufwa kwe mivu yoso. Twejiya kyambote se mukonda dyahi o Lembalasa yala ni valolo. Kyoso kituya mu Lembalasa, kikale etu mba akwetu tukatula mbote mu maukexilu avulu. (Iza. 48:​17, 18) O henda yetu kwa Jihova ni kwa Jezú idibandekesa. Tubhana dingi valolo mu yoso yabhange ene phala etu. O ukamba ni jiphange jetu ukola dingi. Tutena we kukwatekesa akwetu mu kudilonga kyebhi kyatena kutambula o mabesá atubhekela o sata ya kukula. Mu kiki, tubhangyenu yoso itutena, phala tukale polondo phala o Lembalasa—o kizuwa kya beta kota ku muvu!