1-2. Ibhidi yebhi itena kudibhana nayu o jiselevende jafiyele ja Jihova?

 O IMA yayibha itubhita nayu, itena kulungulula o mwenyu wetu mu ukexilu ki tu ufikile. Mu kifika, sayi phange ya diyala amwixana Luis, a weza mu kwijiya kwila wexile ni uhaxi wayibha kinene. O dotolo wa mutangela kwila kwamukambele ngo tumbeji phala kufwa. Phange Monika ni mwadi we, exile mubhanga ikalakalu yavulu mu nzumbi kumoxi. Maji sayi kizuwa, phange Monika weza mu kwijiya kwila mwadi we wexile muta ituxi ya makota mu kaswekele mu mivu yavulu kya. Sayi phange ya muhatu amwixana Phalasa wabhingile kuxisa o inzo ye sé kukimesena, mukonda dya kitembu kya nguzu kyexile mu kwiza. Kyoso kyavutuka, wamono kwila o kitembu kyabulu o inzo ye. Mu ithangana yofele, o mwenyu wa phange Luis, Monika ni Phalasa, walunguluka. O kwila wadibhanene kya ni kima kyayibha kinene kyalungulula o mwenyu we ni lusolo?

² Sumbala tu jiselevende ja fiyele ja Jihova, ne kiki twene mudibhana hanji ni ibhidi ni kukata, kala kibhita ni athu oso mu ngongo. Tutena we kudibhana ni izukutisu ijila ku athu a zembe o mundu wa Nzambi. Sumbala Jihova kafidisa o ima yiyi kubhita n’etu, mwene wakanena kutukwatekesa. (Iza. 41:10) Ni kikwatekesu kye, tutena kusuluka mu kukala ni kisangusangu, kusola kyambote, ni kumukala fiyele ne mwene mu kubhita mu ithangana yabeta o kubhonza. Mu milongi yiyi, twanda zwela yalungu ni maukexilu awana a Jihova kutukwatekesa, kyoso kitubhita mu ithangana yabhonzo ku mwenyu wetu. Twanda mona we ihi itwabhingi o kubhanga phala kukatula mbote mu kikwatekesu kibhana Jihova.

JIHOVA WANDA KU KULANGA

3. Ihi itena kutubhonza kubhanga kyoso kitwamudibhana ni ibhidi?

³ Ihi itena kubhonza phala etu? Kyoso kitudibhana ni kibhidi,  kitena kutubhonza kuxinganeka kyambote ni kusola ni unjimu. Mukonda dyahi? Tutena kukala ni kikote kyavulu ku muxima. O kitongolwelu kyetu kitena kwizala ni ixinganeku yavulu itena kututhandanganyesa. Tutena kudivwa kala twa jimbidila, sé kwijiya se tuditela kwebhi. Tala kyebhi kyadivu o jiphange jiyadi ja ahatu ji twatumbula kudima, mu kithangana kyexile mudibhana ni ibhidi. Phange Phalasa wambe: “Kyoso o kitembu kya nguzu kyabulu o inzo yami, ngadivu kala ngajimbidila, hadi yangivudile.” Mu kuzwela yalungu ni mwadi we wamunganala, phange Monika wambe: “Eme nga luwalele kyavulu. Nga divwile kala angikubu phoko ku muxima. Kyangibhonzele kyavulu kate mwene kubhanga o ikalakalu yami ya kizuwa ni kizuwa. Nuka ngabanzele kwila o kima kiki kyejibhita n’eme.” Kyebhi Jihova kya kanena kutukwatekesa kyoso kitudivwa kala o ibhidi yaneme kyavulu?

4. Kala kilondekesa Filipe 4:​6, 7, Jihova wa tukanena ihi?

⁴ Ihi ibhanga Jihova? Mwene ukanena kutubhana “o kutululuka kwa Nzambi.” (Tanga Filipe 4:​6, 7.) O kutululuka kuku, kulombolola o kuximbakata kutukala naku ku muxima ni mu kilunji, mukonda dya ukamba wakolo utwala nawu ni Jihova. O kutululuka kuku, “kusomboka o kitongolwelu kyoso,” kiki kilombolola kwila, kwa beta dingi kota kima kyosokyoso kitutena kuxinganeka ndenge. Mu kifika, o kwila eye wa sambele kya kwa Jihova ni kuswina kwoso, anga wa diwana mu kumona kwila mu kubhita ithangana wa tululukile kya? Eye wadivu kiki mukonda dya “kutululuka kwa Nzambi.”

5. Kyebhi o kutululuka kwa Nzambi kutena kulanga o mixima ni ilunji yetu?

⁵ Filipe 4:7 izwela we kwila, o kutululuka kwa Nzambi, “kwanda langa o mixima ni ilunji yenu.” O kizwelu “kulanga,” exile mu kitumbula phala kuzwela yalungu ni masoladi exile mulanga o mbanza phala ki mubokone jinguma. O athu atungile mu mbanza a tenene kuzeka ni kutululuka, mukonda ejidile kwila o masoladi exile mu alanga kyambote. Kyene we kimoxi, kyoso o kutululuka kwa Nzambi kulanga o muxima ni kilunji kyetu, etu tu ximbakata, tudivwa kala twala mu kididi kya kondama. (Jisá. 4:8) Kala kya bhitile ni Ana, ne mwene se o ima ku mwenyu wetu ilunguluka ni lusolo, tutena hanji kukala ni kutululuka. (1 Sam. 1:​16-18) Kala kitwene mumona, ki kitubhonzo kuxinganeka kyambote ni kusola ni unjimu, se twatululuka.

6. Ihi itutena kubhanga phala tukatule mbote mu kutuluka kwa Nzambi? (Tala we ofoto.)

⁶ Ihi itwatokala kubhanga? Kyoso ki ukala ni ibhidi, exana o ‘mulangidi.’ Kyebhi ki utena kubhanga kiki? Samba kate ki udivwa kwila wala ni kutululuka kwa Nzambi. (Luk. 11:9;  1 Te. 5:17) Phange Luis twamutumbula kudima, wambe se ihi yabhange mwene ni muhatu we Ana phala kudibhana ni maka, kyoso kyeza mu kwijiya kwila kwa mukambele ngo tumbeji phala kufwa. Phange Luis wambe: “Mu ithangana kala yiyi, kibhonza kyavulu kubatula maka alungu ni kulanga o sawidi, ni ima yamukwa. Maji etu twatena ngo kukala ni kutululuka mu kithangana kiki kyabhonzo, mukonda twexile musamba.” Phange Luis ni muhatu we ambe kwila, ene exile musamba ni kuswina kwoso, mu kubhinga kwa Jihova phala ku abhana kilunji kya tululuka, muxima wa ximbakata, ni unjimu phala kusola kyambote. Ene adivu kwila kiki kya akwatekesa. Se wamudibhana ni kibhidi kyabhonzo, kolokota mu kusamba. Mu kubhanga kiki wanda tena kumona o kutululuka kwa Jihova kulanga o muxima ni kilunji kye.—Lom. 12:12.

JIHOVA WANDA KUFIKIDILA

7. Kyebhi kitutena kudivwa kyoso kitudibhana ni kibhidi kyabhonzo?

⁷ Ihi itena kubhonza phala etu? Kyoso kitudibhana ni kibhidi kyabhonzo, nange kitutena kuxinganeka, kudivwa ni kubhanga o ima kala kitwexile mu ibhanga. Kala o naviyu mu musanza wa kalunga a ilundula ku mabuku ni ku kitembu, etu we kyoso ki tukala ni ibhidi tutena kudivwa kala amutulundujula ku kitembu kya nguzu. Phange Ana, twamutumbula kya, wexile ni ixinganeku yavulu kyoso kyafu mwadi we Luis. Mwene wambe: “Sayi ithangana ngexile ni kikote kyavulu ku muxima, ngamateka kudikwatela henda. Ngexile we ni njinda mukonda dya kufwa kwe.” Mu ithangana yamukwa, phange Ana wexile mudivwa ubheka, yu wathandanganyele we mukonda dya ibhidi yexile mudibhana nayu, mu kubatula o maka exile mubatula kyambote mwadi we kyoso kyexile ku mwenyu. Sayi bhabha, mwene wexile mudivwa kala wala bhukaxi ka kitembu kya nguzu mu musanza wa kalunga. Kyebhi Jihova kyatukwatekesa kyoso kitudibhana ni ibhidi kala yiyi?

8. Kala kyosoneke mu divulu 1 Phetele 5:​10, Jihova utubhana kidyelelu kyahi?

⁸ Ihi ibhanga Jihova? Mwene utudyelelesa kwila wanda tufikidila. (Tanga 1 Phetele 5:10.) Kyoso kikumoneka kitembu kyadikota mu kalunga, o naviyu atena ku izambesa ni nguzu yoso. Phala kukwatekesa kudibhana ni ibhidi yiyi, jinaviyu javulu jala ni ifikidilu ku mbandu jiyadi, yedi kala mabhebhe a mbiji. O ifikidilu yiyi iboba mu menya. O ifikidilu yiyi ikwatekesa o navyu phala ki idizambese kyavulu. Kyenyiki o athu amukwendelamu adivwa kyambote anga abhanga o njila ni kutululuka. Maji, ifikidilu yavulu ikalakala dingi kyambote, se o naviyu yamuya kupholo. Kyene kimoxi, Jihova wanda tufikidila we kyoso kitusuluka mu kumusidivila ni ufiyele woso, mu ithangana ya ibhidi.

9. Kyebhi o jifalamenda jetu ja kutokwesa, jitukwatekesa mu kudibhana ni ibhidi? (Tala we ofoto.)

 ⁹ Ihi itwatokala kubhanga? Kyoso ki udivwa kwila o ibhidi yabhonzo kyavulu, bhanga yoso iwatena phala usuluke mu kusamba, kuya mu yonge ni kuboka. Mu kidi, Jihova ka kingila kwila tubhanga ima yatundu o nguzu yetu. (Sokesa ni Luka 21:​1-4.) Katula we kithangana phala kudilonga ubheka ni kuxinganeka mu ima i udilonga. Mukonda dyahi? Mukonda, Jihova, bhukaxi ka kilunga kye, wene mutubhana milongi yavulu yambote itukwatekesa kukolokota mu ithangana ya ibhidi. Phala kusanga o milongi iwabhindamena, utena kusota mu jifalamenda ja kutokwesa, kala o aplikativu JW Library^®, Índice das Publicações da Torre de Vigia, ni Kadivulu ka Kutokwesa Phala o Jimbangi ja Jihova. Phange Monika, twamutumbula kudima, wambe kwila mwene watokwesa mu jifalamenda jiji kyoso kyamateka kudivwa kyayibha mukonda dya maka exile mubhita nawu. Mu kifika, mwene watokwesa o kizwelu “njinda.” Mu ithangana yamukwa, mwene watokwesa o izwelu “kunganala” ni “ufiyele.” Mu kusuluka, mwene watange o milongi ya tokwesa, kate kyamateka kudivwa kyambote. Phange Monika wambe: “Kyoso kingamateka o kutokwesa, nga thandanganyele kyavulu. Maji kyoso kingasuluka mu kutanga, ngadivu kwila Jihova wexile mu ngindwakuna. Kyoso kingayi ni kutanga, ngamono kwila Jihova wexile mutendala kyebhi kingexile mudivwa, yu wexile mu ngikwatekesa.” O kikwatekesu kitunda kwa Jihova, kitena we kukubhana o nguzu iwabhindamena phala kulanga o ixinganeku ye, kate ki utululuka.—Jisá. 119:​143, 144.

JIHOVA WANDA KU KUKWATEKESA

10. Nange kyebhi kitudivwa kyoso kitubhita ni maka abhonzo kinene?

¹⁰ Ihi itena kubhonza phala etu? Kyoso kitubhita ni maka abhonzo kinene, nange sayi izuwa twanda zoza mu xitu ni mu kilunji. Tutena kudivwa kala muthu wexile mulenga ni lusolo maji kindala kamutena dingi mukonda wadikwama, yu wa mutenguna. Kitena kutubhonza kubhanga o ima ki yexile mutubhonza mu ukulu, mba nange kitukala dingi ni vondadi ya kubhanga o ikalakalu itwawabhelele kyavulu. Kala Elija, kitena kutubhonza kyavulu kubalumuka anga tumesena ngo kuzeka. (1 Jis. 19:​5-7) Jihova wakanena kubhanga ihi phala kutukwatekesa kyoso kituzoza?

11. Mu ukexilu webhi wamukwa Jihova utukwatekesa? (Jisálamu 94:18)

¹¹ Ihi ibhanga Jihova? Mwene wakanena kutukwatekesa. (Tanga Jisálamu 94:18.) Kala  kibhita ni muthu mukwa kulenga wadikwama, ubhindamena kikwatekesu phala n’atene kwenda, etu we tutena kubhindamena kikwatekesu phala kusuluka ni ikalakalu yetu mu sidivisu ya Jihova. Mu ithangana yiyi, Jihova utudyelelesa: ‘Eme, ngi Jihova Nzambi yé, ngi ku kwata mu lukwaku lwé lwa dilu; hé ngi ku ambela, ngixi: Ku kale ni woma, eme nganda kukwatekesa.’ (Iza. 41:13) Sobha Davidi wamono o kikwatekesu kiki kya Jihova. Kyoso kyadibhana ni ibhidi ni izukutisu ya jinguma, mwene wazwela kwa Jihova: “Lukwaku lwé lwa ngi kwata.” (Jisá. 18:35) Maji phe, kyebhi Jihova kyatukwatekesa?

12. Kyoso kituzoza, Jihova utena kutukwatekesa bhukaxi ka nanyi?

¹² Mu ithangana yavulu, Jihova ubhangesa kwila akwetu atukwatekesa. Mu kifika, mu kithangana kyoso Davidi kyazozele, kamba dye Jonata wamukundu phala kumuswinisa ni kumukolokotesa. (1 Sam. 23:​16, 17) Kyene we kyabhiti ni Elija, Jihova wamubhana kikwatekesu bhukaxi ka Ilizewu. (1 Jis. 19:​16, 21; 2 Jis. 2:2) Lelu, Jihova utena kutukwatekesa bhukaxi ka jindandu, makamba, mba tufunga. Maji, kyoso kituluwala nange tumesena ngo kukala ubheka, kitukala ni vondadi ya kukala ni akwetu. Ki kima kyayibha kudivwa kiki. Ihi itutena kubhanga phala kutambula o kikwatekesu kya Jihova?

13. Ihi itwatokala o kubhanga phala kukatula mbote mu kikwatekesu kya Jihova? (Tala we ofoto.)

¹³ Ihi itwatokala kubhanga? Tolola o vondadi ya kumesena kukala ubheka. Kyoso kitudisondolola ku akwetu, tutena kumateka kudixinganeka ngo mudyetu, ni mu maka utwamudibhana nawu. O ixinganeku yiyi, itena kutufidisa kusola o ima ni unjimu. (Jisa. 18:1) Kidi kwila, etwenyoso twa bhindamena kithangana phala kukala ubheka, bengebenge kyoso kitubhita ni kibhidi ku mwenyu wetu. Maji phe, se tukala ubheka mu ithangana yavulu, kiki kyanda tufidisa kutambula o kikwatekesu kya Jihova bhukaxi ka akwetu. Kyenyiki, mu ithangana ya ibhidi, ne mwene se kya mukubhonza kyavulu, xikina o kikwatekesu kya mwiji, makamba, ni tufunga. Tala kala Jihova wa mukukwatekesa bhukaxi ka athu ya.—Jisa. 17:17; Iza. 32:​1, 2.

JIHOVA WANDA KU KUSWINISA

14. Ima yebhi itena kutubhekela woma?

¹⁴ Ihi itena kubhonza phala etu? Tutena kudibhana ni maka atubhangesa kukala ni woma. O Bibidya ilondekesa kwila, sayi ithangana, o jiselevende ja fiyele ja Jihova exile ni woma, ni aluwalele mukonda dya jinguma ni ibhidi yamukwa.  (Jisá. 18:4; 55:​1, 5) Kyene kimoxi we, atena kutuzukutisa ku xikola, ku salu, mba ku jinguvulu. Kate mwene tutena kukala ni woma wa kufwa mukonda dya uhaxi. Mu ithangana yiyi, nange tutena kudivwa kala mon’a ndenge amubwazeka. Kyebhi Jihova kyatukwatekesa kyoso kitubhita mu ima yiyi?

15. Kidyelelu kyahi kitubhana o divulu dya Jisálamu 94:19?

¹⁵ Ihi ibhanga Jihova? Mwene utuswinisa anga ututululukisa. (Tanga Jisálamu 94:19.) Mu kutanga o sálamu yiyi, tutena kuxinganeka kakilumba wala ni woma wavulu anga kamutena kuzeka mukonda dya kinuminu kya mvula ni jibuya ja jinzaji. Tutena kuxinganeka tat’e kubhixila bhwala mwene, umukwata, anga umukondeka kate kyaya ku kilu. Sumbala o kinuminu kya mvula ni jibuya ja jinzaji, ki jabhu luwa, maji mukonda dya tat’e kumukondeka, o mona udivwa kyambote, kakala dingi woma. Kyoso kitudibhana ni maka atukwatesa woma, twanda bhindamena kwila Tat’etu ya dyulu utukondeka bhu maku me, kate kitutululuka. Kyebhi kitutena kutambula o kiximbakatesu kiki kya Jihova?  

16. Ihi itutena o kubhanga phala kukatula mbote mu kiswinisu kya Jihova? (Tala we ofoto.)

¹⁶ Ihi itwatokala kubhanga? Bhita kithangana kyasoko ni Jihova—mu kusamba ni kutanga o Mak’a me. (Jisá. 77:​1, 12-14) Se ukala ni kifwa kiki, o kima kyadyanga kiwanda bhanga kyoso kikumoneka maka, o kulengela kwa Tat’e ya dyulu. Tangela Jihova ihi ya mukukwatesa o woma ni ihi ya mu kuthandanganyesa. Mu kusuluka, ehela Jihova kuzwela n’eye ni kukuswinisa bhukaxi ka Bibidya. (Jisá. 119:28) Mu kutanga o Bibidya, eye utena kusanga mbandu mba jivelusu, jitena kukuswinisa kyoso ki ukala ni woma. Mu kifika, o izwelu itusanga mu divulu dya Jobe, Jisálamu, Jisabhu, ni izwelu ya Jezú mu kibatulu 6 kya divulu dya Matesu, itena kukuswinisa. Kyoso ki uya ni kusamba kwa Jihova ni kutanga o Mak’a me, wanda divwa kwila mwene wamukuswinisa.

17. Kidyelelu kyahi kitutena kukala nakyu?

¹⁷ Tutena kudyelela kwila Jihova wanda kala jinga n’etu phala kutukwatekesa, mu ithangana yabhonzo ku mwenyu wetu. Etu nuka twanda kala ubheka. (Jisá. 23:4; 94:14) Jihova wakanena kutulanga, kutufikidila, kutukwatekesa, ni kutuswinisa. Yalungu ni Jihova, o divulu dya Izaya 26:3 dyamba: “Eye, Jihova, woso wa te muxima wa tenena kokwé, eye wa kà mu bhaka ni kutululuka kwa kidi, mukonda mwene wa ku dyelela eye.” Mu kiki, dyelela kwa Jihova, bhanga yoso i utena phala kukatula mbote mu kikwatekesu kibhana mwene. Se ubhanga kiki, eye wanda tena kukala ni nguzu, ne mwene mu ithangana yabhonzo.