1. Ihi iza mu kilunji kye kyoso ki uxinganeka yalungu ni Jihova?

 O KWILA eye waxinganekene kya se Jihova wadifu kyebhi? Ihi i uxinganeka kyoso ki uzwela ne bhukaxi ka musambu? Sumbala kitutena kumona Jihova, maji o Bibidya imujimbulula mu maukexilu avulu. O Bibidya itumbula Jihova kala “dikumbi, ngubu” ni “túbhya tubwikisa.” (Jisá. 84:11; Jih. 12:29) Mu kisumwa kyamono Ezekiyele, mwene wajimbulula Jihova kala, tadi dya safidya, fwelu ya mubhenya ni hongolo ya mubhenya we. (Ize. 1:​26-28) O ukexilu yu wa kujimbulula Jihova, utena kutubhangesa kukala ni woma.

2. Mukonda dyahi sayi amoxi kya abhonza kuzukama kwa Jihova?

² Kuma kitutena kumona Jihova, nange kutubhonza kuxikina kwila mwene watuzolo. Amoxi a banza kwila Jihova nuka wanda kwazola mukonda dya ima yayibha yabhiti ku myenyu ya. Nange ene nuka a alondekesele henda ku jitata ja. Jihova utendela kyambote kyebhi kitudivwa, wejiya we se mukonda dyahi kitubhonza kumuzukama. Phala kutukwatekesa, mwene watujimbulula o idifwa ye yambote mu Bibidya.

3. Mukonda dyahi twatokala kudilonga dingi yalungu ni henda ya Jihova?

³ O kizwelu kijimbulula Jihova mu ukexilu wa beta kota, o henda. O Bibidiya yamba kwila “Nzambi henda.” (1 Nz. 4:8) Ima yoso Jihova u ibhanga mukonda dya henda. O henda ya Nzambi yadikota, mwene u ilondekesa kana ngo ku athu amuzolo maji kate mwene ni kwa yo kamuzolo. (Mat. 5:​44, 45) Mu milongi yiyi, twanda dilonga dingi yalungu ni Jihova ni henda ye. Kyoso kituya ni kudilonga dingi yalungu ni Jihova, o henda yetu kwa mwene yanda dibandekesa dingi we.

JIHOVA WATUZOLO KYAVULU

4. O henda ya Jihova ikubhangesa kudivwa kyebhi? (Tala we ofoto.)

⁴ ‘O henda ya Jihova yadikota.’ (Tiy. 5:11) Mu Bibidya, mwene  udisokesa ni mama mukwa henda. (Iza. 66:​12, 13) Xinganeka mama wa mulanga mon’e ni henda yoso. Mwene umukwata, umukondeka bhu maku me, anga uzwela ne ni kilendu kyoso. Kyoso o mona kyadila mba wivwa ndolo, o mama ubhanga yoso phala kumubhana yabhindamena. Kyoso kitubhita mu jiphaxi, tutena kudyelela mu henda ya Jihova. O mukwa Jisálamu wasoneka: “Hele jivula jandekele ku ngi kwata mu muxima, maji mu ukamba wé, muxima wami wa batama dingi.”—Jisá. 94:19.

5. O henda ya Jihova ilombolola ihi phala eye?

⁵ Jihova fiyele. (Jisá. 103:8) Mwene keha kutuzola se twa lweza. O kifuxi kya Izalayele kya luwalesa Jihova mu veji javulu. Maji kyoso kyadyela, ya eha kubhanga o ima yayibha, Jihova wa adyelelesa kwila wa azolele, mu kwamba: “Eye wa te kyavulu ku mesu mami, wala-phe ditala dya ujitu, eme nga ku zola.” (Iza. 43:​4, 5) O henda ya Jihova ki yalunguluka. Tutena kudyelela jinga mu henda ye. Ne mwene se tutondala kyavulu, Jihova kanda tuxisa. Se tudyela ni tuvutuka kwa Jihova, twanda mona kwila mwene watuzolo hanji. O Bibidya ikanena kwila “mwene mukwa kuloloka kyavulu.” (Iza. 55:7) O Bibidya yamba kwila o muloloki yu ‘utubhana o kubhanduluka.’—Ika. 3:19.

6. O divulu dya Zakadiya 2:8 ditulonga ihi yalungu ni Jihova?

⁶ Tanga Zakadiya 2:8. Kuma Jihova watuzolo, mwene utendela kyambote kyebhi kitudivwa, wamesena kyavulu kutukwatekesa. Mwene uluwala kyoso kyatumona twamutala hadi. Mukonda dya kiki, tutena kudyelela ni kidi kyoso kwila, mwene wanda twivwa kyoso kitusamba: “Ngi xitile, Ngana, kala ngi mona dyesu.” (Jisá. 17:8) O dyesu kidyandu kya mukutu kyala ni valolo yavulu. Kyenyiki, mu kutusokesa ni mona dyesu, kyedi kala Jihova wamuzwela kiki: ‘Muthu woso umibhanga kyayibha enu, wabhange we kyayibha kokwami.’

7. Mukonda dyahi twatokala kukolesa o kidyelelu kyetu ku henda ya Jihova?

⁷ Jihova wamesena ku kuxikinisa kwila mwene wakuzolo. Maji mwene wejiya kwila, mukonda dya ima yayibha yabhiti ku mwenyu wetu, tutena kukala ni phata se Jihova watuzolo. Mba phe, tutena kudibhana ni ibhidi kindala itubhangesa kukamba kudyelela mu henda ya Jihova kokwetu. Ihi yanda kolesa o kidyelelu  kyetu? O kudilonga kyebhi Jihova kyene mulondekesa o henda ye kwa Jezú, ku Jikidistá a undu, ni ku etwenyoso.

KYEBHI JIHOVA KYENE MULONDEKESA O HENDA YE?

8. Mukonda dyahi Jezú wadyelele kwila Tat’e wamuzolele?

⁸ Jihova ni Mon’e wa kazola, ala kumoxi mu mivu yavulu. Mu mazunda a mivu abhiti kumoxi kudyulu, ene akolesa o ukamba wa ni henda ya. Mu kidi, séku athu abeta kota mu kudizola kala Jihova ni Jezú. Kala kyosoneke mu divulu dya Matesu 17:​5, Jihova walondekesa o henda ye kwa Jezú. Jihova weji tena kuzwela ngo kiki: ‘Yú mwene o muthu u ngamuxikina.’ Mu veji dya kiki, Jihova wamesenene kwila etu twijiya kwila mwene wazolo kyavulu Jezú. Kyenyiki mwene wa mwixana “Mon’ami wakazola.” Jihova wasangulukile kyavulu ni Jezú, bengebenge mukonda mwene wexile polondo phala kubhana mwenyu we. (Efe. 1:7) Jezú kexile ni phata kwila Tat’e wamuzolele. Mwene wejidile ni kidi kyoso kwila Jihova wamuzolele kyavulu. Mu veji javulu Jezú walondekesa kwila Tat’e wamuzolele.—Nzw. 3:35; 10:17; 17:24.

9. Kizwelu kyebhi kilondekesa o henda ya Jihova ku Jikidistá a undu? Jimbulula. (Loma 5:5)

⁹ Jihova ulondekesa we o henda ye ku Jikisitá a undu. (Tanga Loma 5:5.) Tala o kizwelu kyotumbule mu Bibidya phala kulondekesa o henda ya Jihova ku Jikidistá a undu. Yene yamba kwila Jihova ‘wezalesa’ o mixima ya ni henda. Sayi divulu disokesa o henda ya Nzambi ni menya a ngiji a mu kunguluka. O kizwelu kiki, kilondekesa kyambote o henda ya Jihova ku Jikidistá a undu! O Jikidistá a undu ejiya kwila ‘a azolo kwa Nzambi.’ (Jud. 1) O poxolo Nzwá walondekesa kyebhi kyexile mudivwa, kyoso kyasoneka: “Talesenu o henda yadikota ya tukwatela o Tata, mu kutubhana o ujitu wa ku twixana tu an’ê!” (1 Nz. 3:1) O kwila Jihova wazolo ngo o Jikidistá a undu? Kana, Jihova wene mulondekesa kwila watuzolo etwenyoso.

10. Mu ukexilu webhi wakatunda Jihova walondekesa o henda ye kokwe?

¹⁰ Mu ukexilu webhi wakatunda Jihova walondekesa o henda ye kokwetu? Bhukaxi ka sata ya kukula. Séku muthu walondekesa kya henda kala yiyi! (Nzw. 3:16; Lom. 5:8) Jihova wabhana Mon’e wakazola, mu kumwehela kufwa phala kutuloloka o ituxi ni tutene kukala tu makamba Me. (1 Nz. 4:10) Kyoso kituxinganeka mu yoso yabhange Jihova ni Jezú phala kutukula, tutendela dingi kyambote kwila ene azolo kyavulu kala muthu mudyetu. (Nga. 2:20) Jihova kafutu o sata ya kukula mukonda ngo dya kuyuka kwe. O sata ya kukula ujitu wa henda. Jihova walondekesa o henda ye kokwetu mu kubhakula o mwenyu wa muthu wabeta dingi kota mu kukala ni valolo phala mwene—Mon’e Jezú. Jihova wehela Mon’e kutala hadi ni kufwa mukonda dyetu.

11. O divulu dya Jelemiya 31:​3, ditulonga ihi?

¹¹ Kala kitwamono, Jihova kabhake ngo o henda ku muxima we, maji mwene u ilondekesa kokwetu. (Tanga Jelemiya 31:3.) Jihova watuzukamesa kwa mwene mukonda watuzolo. (Sokesa Matendelelu 7:​7, 8.) Kanaku kima mba muthu utena kutusondolola ku henda ya Nzambi. (Lom. 8:​38, 39) O henda yiyi ikubhangesa kudivwa kyebhi? Tanga o Sálamu 23, ni umone kyebhi kyadivu Davidi mukonda dya henda ya Jihova, ni kyebhi kitutena kudivwa we mukonda dya henda yiyi.

KYEBHI KU UDIVWA MUKONDA DYA HENDA YA JIHOVA?

12. Kyebhi ki weji jimbulula o Sálamu 23?

¹² Tanga Jisálamu 23:​1-6. Mu Sálamu ya 23, Davidi walondekesa o kidyelelu kye kya kwila Jihova wamuzolole, ni kwila wexile mu  mulanga. Mwene wajimbulula o ukamba wadikota wexile nawu mwene ni Jihova. Kate wexana Jihova kala Mubhidi we. Davidi wexile mudivwa kwila wala mu kididi kyakondama mukonda wehelele Jihova ku mwendesa, yu wadyelele kwa Mwene ni muxima woso. Davidi wejidile kwila Jihova weji mulondekesa henda izuwa yoso ya mwenyu we. Mukonda dyahi mwene wexile ni kidyelelu kiki?

13. Why was David sure of Jehovah’s care?

¹³ ‘Ki kwanda ngikamba kima.’ Davidi wadivwile kwila exile mu mulanga kyambote mukonda Jihova wexile mu mubhana yoso ya bhindamene. Davidi wejidile we kwila Jihova wexile kamba dye ni kwila wamuxikinine. Kiki kyene kyamubhangesa kudyelela kwila kabasa kima kyejibhita ku pholo, Jihova weji suluka mu kulanga o ibhindamu ye yoso. Kuma Davidi wadyelele kwila Jihova wamuzolele, ni kwila wejimulanga, kiki kyamukwatekesa kutolola o hele ni kusanguluka ku mwenyu.—Jisá. 16:11.

14. Kyebhi Jihova kyatena kutulanga?

¹⁴ Jihova utulanga ni henda yoso, bengebenge kyoso kitubhita ni ima yayibha ku mwenyu wetu. Phange Kinita, a wamusidivila ku Betele mu 20 a mivu ndenge, kejidile kyebhi kyeji kwatekesa o mwiji we kyoso kyexile mudibhana ni ibhidi yavulu mu kithangana kimoxi. O tat’e wakwata uhaxi wa AVC (trombose), phang’ye ya muhatu amute mu kamukonde, o mwiji wadibhana we ni maka akukamba kitadi, ya a xala sé inzo. Kyebhi Jihova kyalondekesa o henda ye kwa ene? Phange Kinita wambe: “Jihova walange o mwiji wami mu kwabhana yoso yabhindamene kabasa kizuwa. Mu veji javulu, Jihova watubhana dingi ima, o itwexile mu  kingila ndenge! Ithangana yoso ngene muxinganeka kyebhi Jihova kyene mutukwatekesa, eme nuka nganda jimba o henda ye kokwetu. O kuxinganeka mu ima yiyi kwene mu ngikwatekesa kukolokota mu ithangana ya ibhidi.”

15. Mukonda dyahi Davidi wexile muximbakata? (Tala we ofoto.)

¹⁵ Mwene ungibhana nguzu. Sayi ithangana, Davidi wexile muluwala mukonda dya ibhidi ni ima yavulu yayibha yexile mubhita nayu. (Jisá. 18:​4-6) Maji ne kiki, o henda ya Jihova ni ukexilu wexile mu mulanga yexile mu muximbakatesa. Jihova wexile mu kwendesa o dikamba dye dya tohokele ni kumunyohesa mu ididi yambote. Mukonda dya kiki Davidi watenene dingi kukala ni nguzu ni kusuluka mu kusidivila Jihova ni kisangusangu.—Jisá. 18:​28-32.

16. Kyebhi Jihova kyene mulondekesa o henda ye kokwe?

¹⁶ Lelu we kyene kimoxi, twene mudibhana ni ibhidi yavulu yabhonzo. Maji mukonda dya henda ya Jihova, twala hanji ni mwenyu, ‘ki twajimi o mbutu kana.’ (Kud. 3:22; Kol. 1:11) Tala o phangu ya phange Lakele. Mwene watale hadi yavulu kyoso mwadi we wamuxisa, yu weha kusidivila Jihova, mu kithangana kya dibhebhu dya COVID-19. Ihi yabhange Jihova phala kumukwatekesa? Phange Lakele wambe: “Jihova wa ngibhangesa kudivwa kwila wangizolo. Mwene wangikwatekesa bhukaxi ka makamba avulu a bhiti kithangana n’eme, a ngibhekela kudya, a ngitumikisa jinjimbu, a ngiswinisa bhukaxi ka Bibidya, a ngibhangesa kwolele, ya a suluka mu kungilembalesa kwila Jihova wexile mu ngilanga. Ithangana yoso ngisakidila Jihova mu kungibhana mwiji wadikota, wangizolo kyavulu.”

17. Mukonda dyahi Davidi kexile “ni woma wa kima”?

¹⁷ ‘Ki ngala ni woma wa kima, mukonda eye wala n’eme.’ Mu veji javulu o mwenyu wa Davidi wexile mu ilwezu, yu wexile we ni jinguma javulu exile indanda. Maji, o henda ya Jihova yamubhangesa kudivwa kwila exile mu mulanga. Davidi wexile mudivwa kwila Jihova wexile ne ithangana yoso. O kiki, kyamutululukisa. Kyenyiki, mwene wembi: “[Jihova] wa ngikudila ku ima yoso ingikwatesa woma.” (Jisá. 34:4) Sumbala sayi ithangana wexile ni woma wavulu, mwene watenene kutolola o woma we, mukonda wejidile kwila Jihova wamuzolele.

18. Kyebhi o kudyelela mu henda ya Jihova kutena kukuswinisa kyoso ki ukala ni woma?

¹⁸ Kyebhi o kwijiya kwila Jihova watuzolo, kutubhana nguzu kyoso kitudibhana ni ibhidi itukwatesa woma? Sayi muboki wa thembu yoso, amwixana Suza, wajimbulula kyebhi kyadivu mwene ni mwadi we, kyoso mon’a wa diyala wadijibha. Mwene wambe: “Kyoso kima  kyayibha kinene kala kiki kibhita ku mwenyu we, eye uluwala kyavulu, ukala ni woma wavulu wa kwila kwanda bhita dingi ima yayibha. Maji o henda ya Jihova, yatubhangesa kudivwa kwila twala kididi kya kondama ni kwila a mutulanga.” Phange Lakele, twamutumbula kudima, udilembalala: “Sayi kizuwa mu usuku ngexile ni kikote kyavulu ku muxima, ngathandanganyele, ngexile we ni woma wavulu. Kyenyiki, ngasambe kwa Jihova ni dizwi dya swina. Bhenyobho ngadivu kwila mwene wa ngitululukisa o muxima, yu wa ngiximbakatesa, kala kibhanga o mama ku kabwetele ke. Mu kusuluka ngayi ku kilu. Nuka nganda jimba o kithangana kyenyokyo.” Sayi kafunga amwixana Thonyi, wabhiti mivu iwana mu kaleya mukonda dya kudituna kukala disoladi. Kyebhi mwene kyamono o henda ni kikwatekesu kya Jihova? Mwene wambe: “Jihova walange o ibhindamu yami yoso. Mu kidi, mwene wangibhana dingi o ingabhindamene dingi. Kiki kyakolesa dingi o kidyelelu kyami kya kwila ngitena kumudyelela ni muxima woso. Ku mbandu yamukwa, Jihova bhukaxi ka nzumbi ye ikola, wangibhana kusanguluka, sumbala o kaleya kexile kididi kiluwalesa. O kiki kyangikwatekesa kumona kwila se ngisuluka mu kudyelela kwa Jihova, nganda mona o henda ye kokwami. Mu kiki, ngamateka kusidivila kala muboki wa thembu yoso, kyoso kingexile hanji mu kaleya.”

ZUKAMA KWA NZAMBI YE YA HENDA

19. (a) O kwijiya kwila Nzambi watuzolo, kutubhangesa kusamba mu ukexilu webhi? (b) Ukexilu webhi wa Jihova wakulondekesa o henda u wawabhela dingi? (Tala o kaxa “Izwelu Itukwatekesa Kudivwa Kwila Jihova Watuzolo.”)

¹⁹ O misoso yoso itwazwela, ilondekesa kwila, Jihova, “o Nzambi ya henda,” wala n’etu! (2 Ko. 13:11) Mwene usuwa kala muthu mudyetu. Twaxikina ni kidi kyoso kwila ‘henda yê itukonda mbandu ni mbandu.’ (Jisá. 32:10) Kyoso kituya ni kuxinganeka mu ukexilu wene mutulondekesa o henda, twanda mona kwila mwene utusuwa kyavulu, mu kiki twanda muzukama dingi. Tutena kusamba kwa mwene se woma, ni kumutangela kwila twabhindamena kyavulu o henda ye. Tutena kumutangela o ima yoso ituthandanganyesa, mu kudyelela kwila mwene ututendela ni kwila wamesena kyavulu kutukwatekesa.—Jisá. 145:​18, 19.

20. Kyebhi o henda ya Jihova ituzukamesa kwa mwene?

²⁰ Kala o muthu wamukwivwa mbambi uzukama ku tubhya phala kwota, kyene we kimoxi, etu twamesena kuzukama ku henda ya Jihova. O henda ya Jihova yadikota. Kyenyiki, sanguluka mukonda Jihova wakuzolo. Etwenyoso tuxikanyenu o henda ya Jihova, mu kuzwela: “Nga zolo Jihova!”—Jisá. 116:1.