1. Mukonda dyahi sayi ithangana tukala ni woma?

 SAYI ithangana athu oso akala ni woma. Kidi kwila o kudilonga o Bibidya kwene mutubhulula ku woma wa kufwa, wa madimonyo, ni ku woma wa ima yanda bhita ku hadya. Maji ne kiki, twatungu hanji mu kithangana mwamubhita “ima ikwatesa wôma,” kala o ita, ujibhanganga ni mauhaxi. (Luk. 21:11) Etu we nange tutena kukala ni woma wa athu, kala o jinguvulu jituzukutisa, mba jindandu a sota kutufidisa kubheza Jihova. Sayi amoxi abanza kwila, kanda tena kukolokota mu ibhidi yamubhita nayu kindala mba yanda dibhana nayu ku hadya.

2. Jimbulula o maka adibhanene nawu Davidi mu mbanza ya Ngate.

² Sayi ithangana, Davidi wexile we ni woma. Mu kifika, kyoso Sobha Sawulu kyexile musota Davidi phala kumujibha, mwene walengela mu mbanza ya Ngate, mu ixi ya akwa Fidixa. O Sobha ya Ngate, Akiji, weza mu kwijiya kwila Davidi wexile o disoladi wajibhile “makwinyi a jimidi” a akwa Fidixa. Davidi ‘wexile ni wôma wavulu.’ (1 Sam. 21:​10-12) Mwene wathandanganyele se ihi yeji mubhanga Akiji. Kyebhi Davidi kyatolola o woma we?

3. Kala kilondekesa Jisálamu 56:​1-3, 11, kyebhi Davidi kyatolola o woma we?

³ Mu Salámu 56, Davidi wazwela kyebhi kyexile mu divwa kyoso kyexile mu mbanza ya Ngate. Mu Salámu yiyi Davidi wajimbulula se mukonda dyahi wexile ni woma, yu wazwela we se ihi yamukwatekesa kutolola o woma. Kyoso kyexile ni woma, Davidi wadyelele kwa Jihova. (Tanga Jisálamu 56:​1-3, 11.) O kidyelelu kye ki kyexile kya kingoho. Ni kikwatekesu kya Jihova, Davidi wasoto kubhanga kima o athu kene muxinganeka kukibhanga. Mwene wadibhangele kala wasalukile! Kyenyiki muveji dya kujibha Davidi, Akiji wamesenene kwila mwene utunda bhu pholo ye. Mu kiki Davidi watena kulenga.—1 Sam. 21:13–22:1.

4. Kyebhi kitutena kukolesa o kidyelelu kyetu kwa Jihova? Ta kifika.

 ⁴ Etu we tutena kutolola o woma se tudyelela kwa Jihova. Maji kyebhi kitutena kukolesa o kidyelelu kyetu kwa Jihova, bengebenge kyoso kitukala ni woma? Tumone kifika. Se akutangela kwila wala ni uhaxi wabhonzo, ku dimatekenu nange wanda kala ni woma. Maji wanda tena kutululuka, se wadyelela kwa dotolo ye. Mwene nange wasakele kya athu avulu exile ni uhaxi wenyu. Mwene ukwivwa ni kilendu, kyoso ki uya ni kumujimbulwila se ihi yamukukwatesa o woma, anga ukubhangesa kudivwa kwila wamesesa ku kukwatekesa. Mwene nange ukutangela kwila, wanda saka o uhaxi we kala kya sakele akwenu exile kya ni uhaxi wenyu, ya adisanze. Kyene kimoxi we, tutena kukolesa o kidyelelu kyetu kwa Jihova, mu kuxinganeka mu yoso yabhange kya Jihova, mu ima yamubhanga kindala, ni mu ima yanda bhanga hanji phala etu. Kiki kyene kyabhangele Davidi. Kyoso kituya ni kudilonga yalungu ni izwelu ya Davidi itusanga mu Sálamu 56, xinganeka kyebhi we ki utena kukolesa o kidyelelu kye kwa Jihova, ni kutolola o woma.

IHI YABHANGE KYA JIHOVA?

5. Phala kutolola o woma, Davidi waxinganeka mu ihi? (Jisálamu 56:​12, 13)

⁵ Sumbala o mwenyu wa Davidi wexile mu kilwezu, mwene wadikwatenena mu kuxinganeka mu ima yabhangele kya Jihova. (Tanga Jisálamu 56:​12, 13.) Ku mwenyu we woso, Davidi wexile muxinganeka mu ukexilu yu. Mu kifika, sayi ithangana mwene wexile muxinganeka mu ibhangelu ya Jihova. Kiki kyexile mu mulembalesa o kutena kwala naku Jihova, ni kwila mwene wazolo kyavulu o athu. (Jisá. 65:​6-9) Mwene we wexile muxinganeka mu ima yabhangele Jihova phala akwa. (Jisá. 31:19; 37:​25, 26) Davidi wexile muxinganeka bengebenge mu ima yabhangele kya Jihova phala mwene. Jihova wakwatekesele ni kulanga Davidi tunde mu undenge. (Jisá. 22:​9, 10) Se phata, o kuxinganeka mu ima yiyi kwakwatekesa Davidi kukolesa o kidyelelu kye kwa Jihova!

6. Kyoso kitukala ni woma, ihi yanda tukwatekesa kudyelela kwa Jihova?

⁶ Kyoso ki ukala ni woma, dibhwidise, ‘Ihi yabhange kya Jihova?’ Xinganeka mu ibhangelu ya Jihova. Mu kifika, ‘talesa kyambote’ kyebhi  Jihova kyene mulanga o jinjila ni itulu, sumbala o ima yiyi ka ibhange mu kidifwanganu kya Nzambi, ni kwila ki yene mu mubheza. Kiki kitukwatekesa kumona kwila Jihova wanda beta kutulanga dingi etu. O kuxinganeka mu maka ya, kutena kubandekesa dingi o kidyelelu kyetu. (Mat. 6:​25-32) Xinganeka we mu ima yene mubhanga Jihova phala o abhezi’e. Eye utena kudilonga phangu imoxi ya muthu amutumbula mu Bibidya walondekesa kixikanu kya kyadikota, mba utena kutanga musoso wa jisevelende ja Jihova mu izuwa yetu. a Ku mbandu yamukwa, xinganeka kyebhi Jihova kyene mu kulanga kya. Kyebhi mwene kyakukwatekesa kwijiya o kidi kya Bibidya? (Nzw. 6:44) Kyebhi kyene mutambwijila o misambu ye? (1 Nz. 5:14) Mbote yahi iwene mu katula izuwa yoso mu sata ya Mon’e wa kazola?—Efe. 1:7; Jih. 4:​14-16.

7. Kyebhi o musoso wa polofeta Daniyele wakwatekesa phange Vanessa kutolola o woma we?

⁷ Phange Vanessa, b watungu mu ixi ya Haiti, wadibhana ni maka amukwatesa woma. Sayi diyala mu mbanza mwatungu, wexile mu muxinda ni mu mutumikisa jinjimbu izuwa yoso, mu kumujijidika phala kuzeka ne. Ni kuswina kwoso, phange Vanessa wamutangela kwila ka mesenene kubhanga kiki. Maji kiki kyabhangesa o diyala kuthathamana kyavulu, kate mwene wamukusu. Mwene wambe: “Ngexile ni woma wavulu.” Kyebhi phange Vanessa kyatolola o woma we? Mwene wabhange yoso yatenene phala kudilanga. Sayi kafunga wamukwatekesa kuzwela ni axiku dya ngoji. Maji phange Vanessa wadikwatenena we mu kuxinganeka kyebhi Jihova kyalangele o jiselevende je m’ukulu. Phange Vanessa wambe: “O muthu ngadyanga kumuxinganeka polofeta Daniyele. Sumbala kexile ni kikuma, mwene amutakula mu dikungu dya jihoji jexile ni nzala yavulu. Maji, Jihova wamulange. Mwene wajika o makanu a jihoji. Kyenyiki, ngabhingi kwa Jihova phala kubhangesa o diyala dyodyo kweha kungibanza ni kubatula o maka, mukonda ki kwexile dingi kima kingejitena o kubhanga. Mu kusuluka ki ngexile dingi ni woma.”—Dan. 6:​12-22.

XINGANEKA MU IMA YAMUBHANGA JIHOVA KINDALA

8. Ihi yaxikinine Davidi ni kidi kyoso? (Jisálamu 56:8)

⁸ Sumbala o mwenyu wa Davidi wexile mu kilwezu kyoso kyexile mu mbanza ya Ngate, mwene kehela o woma kumutolola. Muveji dya kiki, wasolo kuxinganeka mu yoso yexile mubhanga Jihova phala mwene mu kithangana kyenyokyo. Davidi watenene kumona kwila Jihova wexile ku mwendesa ni kumulanga, ni kwila wexile mutendela kyebhi kyexile mudivwa. (Tanga Jisálamu 56:8.) Davidi wexile ni kikwatekesu kya makamba, kala Jonata. Mwene amukwatekesa we kwa Mukunji Wadikota Ahimeleke. (1 Sam. 20:​41, 42; 21:​6, 8, 9) Sumbala Sobha Sawulu wandalele kumujibha, Davidi watena kulenga yu wabhuluka. Mwene waxikinine ni kidi kyoso kwila Jihova wejidile kyambote ihi yexile mubhita ni mwene, ni kyebhi kyexile mudivwa.

9. Jihova umona ihi yalungu n’etu?

⁹ Kyoso ki udibhana ni kibhidi kikubhekela woma, lembalala kwila Jihova umona o kibhidi kye, ni kwila wejiya kyebhi ki wamudivwa mukonda dya kibhidi kiki. Mu kifika, Jihova ka monene ngo o ukexilu wayibha wexile mutalatala akwa Izalayele ku Ijitu, maji wamonene we o “malamba mâ.” (Mak. 3:7) Davidi wembi kwila Jihova wamonene o “kubhindama” kwe ni “jiphaxi” je. (Jisá. 31:7) Kyoso o mundu wa Nzambi wexile mutala hadi mukonda dya kubhukumuka kwa, “Mwene wevile we dilamba.” (Iza. 63:9) Kyoso ki ukala ni woma, Jihova utendela kyambote kyebhi ki udivwa, ni kwila wamesena kyavulu ku kukwatekesa kutolola o woma we.

10. Mukonda dyahi uxikina kwila Jihova ukusuwa, ni kwila wanda kukwateksa kudibhana ni kibhidi kyosokyoso kimoneka?

 ¹⁰ Se wamudibhana ni kibhidi kyadikota, nange kikubhonza kumona kyebhi Jihova kyamukukwatekesa. Ihi i utena kubhanga? Bhinga kwa mwene n’akujikule o mesu ni umone o kikwatekesu kye. (2 Jis. 6:​15-17) Mu kusuluka, xinganeka: O kwila sayi diskulusu mba kitambwijilu mu kyonge kyakubhana nguzu? Sayi divulu, vidyu, mba mwimbu wakuswinisa? O kwila sayi phange wakuswinisa ni izwelu yambote mba wakutangela velusu ya Bibidya? Etu nange tudijimba kyebhi o henda ya jiphange jetu ni kiswinisu kya Mak’a Nzambi kyatukwatekesa. Kyenyiki, twatokala kubhanga jinga nguzu phala kulembalala kwila o jiphange jetu ni Mak’a Nzambi, ala maujitu a katunda atubhana Jihova. (Iza. 65:13; Mál. 10:​29, 30) O maujitu ya alondekesa kwila Jihova ukusuwa. (Iza. 49:​14-16) Alondekesa we kwila eye utena kumudyelela.

11. Ihi yakwatekesa phange Aida kutolola o woma we?

¹¹ Phange Aida, watungu mu ixi ya Senegal, wamono kyebhi Jihova kyamukwatekesa mu ibhidi. Kuma mwene o mona wadyanga, o jitata je exile mu kingila kwila mwene unganyala kitadi kyasoko phala kulanga o ibhindamu ye, ni jitata. Maji kyoso kyasosolola o ima ku mwenyu phala kukala muboki wathembu yoso, mwene wadibhana ni ibhidi ya kukamba kitadi kyasoko. O mwiji we afutulukile kyavulu ni mwene. Phange Aida wambe: “Eme ngexile ni woma wa kwila kingejitena kukwatekesa o jitata jami, ni kwila athu oso kejingiwabhela dingi. Eme kate ngatatela Jihova mu kwehela o ima kubhonza kiki.” Ku pholo dya kwenda, mwene wevu diskulusu mu kyonge. Mwene wixi: “O phange wabhange o diskulusu watulembalesa kwila Jihova wejiya se ihi itubhangesa kukala ni hele mba woma. Ni itendelesu ingatambula bhukaxi ka tufunga ni jiphange jamukwa, bhofelebhofele, ngatena dingi kukolesa o kixikanu kyami kya kwila Jihova wangizolo. Kyoso kingasambe kwa Jihova, o kidyelelelu kyami kya kwila mwene weji ngikwatekesa, kyadibandekesa. Ngexile we ni kutululuka kwa muxima mukumona kyebhi mwene kyexile mutambwijila o misambu yami.” Ku pholo dya kwenda, phange Aida wasange salu yamukwatekesa kudikila o ibhindamu ye mu sidivisu ya thembu yoso, ni kukwatekesa we o jitata ni athu amukwa. Mwene  wambe: “Ngadilongo kudyelela ngo kwa Jihova. Kindala, kyoso kingizubha o kusamba, kingikala dingi ni woma.”

IHI YANDABHANGA JIHOVA KU PHOLO?

12. Kala kizwela o divulu dya Jisálamu 56:​9, kidyelelu kyahi kyexile nakyu Davidi?

¹² Tanga Jisálamu 56:9. O velusu yiyi ilondekesa kima kyamukwa kyakwatekesa Davidi kyoso kyexile ni woma. Sumbala o mwenyu we wexile hanji mu kilwezu, mwene waxinganeka mu ima yejibhanga hanji Jihova ku pholo phala kumukwatekesa. Davidi wejidile kwila Jihova wejimubhulula mu kithangana kyatokala. Ku mbandu yamukwa, Jihova wambele kwila Davidi wejikala o Sobha wejibhingana ku ungana mu Izalayele. (1 Sam. 16:​1, 13) Phala Davidi, kabasa kikanenu kya Jihova, kyejidikumbidila ni kidi kyoso.

13. Kidyelelu kyahi kitutena kukala nakyu kwa Jihova?

¹³ Ihi yakanena Jihova phala eye? Etu ki tukingila kwila Jihova utubhulula ku ibhidi yetu yoso. c Maji lembalala kwila, ibhidi yosoyoso itudibhana nayu ku mundu yu, Jihova wanda itolola ku mundu wa ubhe. (Iza. 25:​7-9) Se phata o Mubhangi wetu wala ni kutena kwasoko, wa kutusaka ku mauhaxi m’etu, ni kubwika o jinguma jetu joso.—1 Nz. 4:4.

14. Tutena kuxinganeka mu ima yebhi?

¹⁴ Kyoso ki ukala ni woma, xinganeka mu ima yandabhanga Jihova ku hadya. Xinganeka kyebhi kiwanda divwa kyoso Satanaji kanda kalaku dingi, o athu ayibha anda kwabhwika anga kwanda kala ngo athu ambote, ni kumona o ukexilu wa ituxi kuya ni kubhwa bhofelebhofele. Mu kyonge kyadikota kya muvu wa 2014, abhangemu kifika kyalondekesa kyebhi kitutena kuxinganeka mu kidyelelu kyetu. O kifika kyalondekesa tata wexile muzwela ni mwiji we se kyebhi kyejikala o dilombolwelu dya divulu dya 2 Timote 3:1-5, se muveji dya kuzwela yalungu ni ukexilu wayibha wa athu mu izuwa yasukidilaku, dyejizwela yalungu ni ukexilu wa athu mu Palayizu. Mwene wambe: “Ku mundu wa ubhe, kwanda kala kusanguluka kwavulu. Mukonda o athu anda zola akwa, anda zola o ima ya nzumbi, anda lenduka, anda ximana Nzambi, anda belesela tata ni mama, anda kala akwa kusakidila, anda kala jifiyele, anda kala ni henda ya miji yâ, anda kumbidila o ima yabakana, anda zwela jinga ima yambote yalungu ni akwa, anda ditumina jihanji, anda kala athu a batama mixima, anda wabhela kubhanga o mbote, anda kala athu a kidi, anda kala athu ambote, anda ditulula, anda kala azodi a Nzambi kana a jivondadi jâ, anda xila Nzambi ni muxima woso; kala jinga ni athu a kala kiki.” O kwila eye wene muzwela ni mwiji we mba jiphange mu nzumbi, yalungu ni kyebhi kyanda kala o mwenyu ku mundu wa ubhe?

15. Sumbala phange Tanja wexile ni woma, ihi yamukwatekesa kukolokota mu ufiyele we?

¹⁵ Tala o phangu ya phange ya muhatu, amwixana Tanja, watungu ku mbandu ya Thunda ya ixi ya Macedónia. O jitata je, jexile mu mufidisa kudilonga o Bibidya. Maji, o kuxinganeka mu ima yanda bhanga Jihova ku hadya kwamukwatekesa kukolokota fiyele kyoso kyexile ni woma. Mwene wambe: “Sayi ima ingexile ni woma kwila yejibhita, yabhiti mwene. Izuwa yoso kyoso kingexile mutunda ku kyonge, mam’etu wexile mungibeta. O Jitata jami angikusu kwila eji ngijibha se nga kitukile Mbangi ya Jihova.” Mu kusuluka, phange Tanja amukaye kubhata. Kyebhi kyadibhana ni maka enya? Mwene wambe: “Ngadikwatenena mu kuxinganeka mu kisangusangu kya kalelaku kingejikala nakyu, mu kusola kukolokota mu ufiyele wami. Eme we ngexile muxinganeka kwila o mabesá anda ngibhana Jihova ku mundu wa ubhe abeta o kuvula ima yoso ingaxisa kudima ku mundu yu ndenge. Ku mbandu yamukwa, o ima yoso yayibha twanda ijimba kya.” Phange Tanja wakolokota mu ufiyele we. Ni kikwatekesu kya Jihova, mwene watena kusanga kididi phala kukala  bhu. Kindala, phangeTanja dikaza. Wakazala ni phange ya fiyele. Kiyadi kya, amusidivila ni kisangusangu kyoso mu sidivisu ya thembu yoso.

KOLESA O KIDYELELU KYE KWA JIHOVA KINDALA

16. Ihi yanda tukwatekesa kuswina kyoso kitwanda mona o ima yokanene mu divulu dya Luka 21:​26-28?

¹⁶ Mu kithangana kya hadi yadikota, o athu ku mundu woso, “anda kumbama ni wôma.” Maji o mundu wa Nzambi wanda swina ni kukolokota. (Tanga Luka 21:​26-28.) Mukonda dyahi ki twanda kala ni woma? Mukonda twadilongo kya kudyelela kwa Jihova. Phange Tanja, twamutumbula kudima, wambe kwila o ima yabhiti ku mwenyu we m’ukulu, ya mu mukwatekesa kindala kudibhana ni ibhidi yamukwa yabhonzo. Mwene wambe: “Ngadilongo kwila, Jihova utena kutukwatekesa kukolokota kabasa kibhidi kitudibhana nakyu, ni kutubesowala. Sayi ithangana tutena kudivwa kala o athu amukwa ala ni kutena kwa kututolola, maji mu kidi Jihova wabeta kota mu kutena, ene ndenge. Ku mbandu yamukwa, sumbala o ibhidi imoneka kala yabhonzo kyavulu, yene yanda bhwa.”

17. O velusu yetu ya muvu wa 2024 yanda tukwatekesa kyebhi? (Tala o foto yakapa.)

¹⁷ Kwala ima yavulu lelu itena kutukwatesa woma. Maji kala Davidi, tutena kufidisa o woma kututolola. O velusu yetu ya muvu wa 2024, o musambu wa Davidi kwa Jihova. Mwene wambe: ‘Mu kithangana kyosokyoso phe ki ngiza o woma ngi dyelela ngo kokwé.’ (Jisá. 56:3) Mu kuzwela yalungu ni velusu yiyi, sayi mutokwexi wa Bibidya wambe: Davidi kadikwatenena mu kuxinganeka mu ima yexile mu mukwatesa woma, mba mu ibhidi ye. Muveji dya kiki, mwene wadyelela kwa Yo weji mubhulula.” Mu jimbeji kupholo, xinganeka mu velusu yetu ya muvu bengebenge kyoso ki udibhana ni ibhidi yabhonzo kyavulu. Katula kithangana phala kuxinganeka mu yoso yabhange Jihova m’ukulu, yamubhanga kindala, ni yanda bhanga ku hadya. Mu kiki, kala Davidi, eye utena kuzwela: ‘Nga dyelela kwa Nzambi; ki ngi kala dingi ni woma.’—Jisá. 56:4.