1. Mu izuwa ya lelu o athu atandanganya dingi ni ihi?

 NANGE wamono kya kwila o athu mu izuwa ya lelu atandanganya ngo ni ene, katandanganya ni akwa. Mu kifika sayi athu ene mudinanza mu internete. Maji athu ofele ene mubhana kijingu kwa Jihova. Mu milongi yiyi twandadilonga ihi ilombolola kubhana kijingu kwa Jihova ni ihi itubhangesa kubhanga kiki. Twanda dilonga we kyebhi kitutena kubhana kwa Nzambi o kijingu kyamutokala ni kyebhi Jihova kyanda ximanesa o dijina dyê ku hádya.

IHI ILOMBOLOLA KUBHANA KIJINGU KWA JIHOVA?

2. Ihi yabhange Jihova ku Mulundu wa Sinayi? (Tala we o yakapa.)

² O Bibidya ilondekesa kwila Jihova mwene o Nzambi watokala kutambula o kijingu kyoso. Kyoso Jihova kya bhulula akwa Izalayele ku Ijitu, mwene walondekesa kwila mwene o muteni wa yoso. Xinganeka mu ima yabhiti: Mazunda a athu akondoloka o Mulundu wa Sinayi phala kwiva o ima yeji kwatangela Jihova. Dituta dya dikota anga divungina o mulundu. Anga o dixi dya vungina o mulundu, mu kusuluka o ixi yatunguta. Kwexile inuminu ni jinzaji. Anga evu koloneta ayixiki ni dízwi dya swina. (Mak. 19:​16-18; 24:17; Jisá. 68:8) Kyoso Jihova kya bhange kiki, o akwa Izalayele adiwanene kyavulu ni fuma yala nayu Jihova.

3. Kyebhi kitubhana kijingu kwa Jihova?

 ³ Maji o kwila etu tutena kubhana kijingu kwa Jihova? Kyene, tutena. Ukexilu umoxi wa kubhana kijingu kwa Jihova, kyoso ki tuzwela ni athu yalungu ni kutena kwê ni idifwa yê. (Iza. 26:14) Sobha Davidi wabhana kijingu kwa Jihova. Sayi kizuwa mwene wasambe ku pholo dya mundu: “Unéne wé eye u Jihova, ni kutena, ni kijingu, ni kutolola ni ungana. Mukonda ima yoso yé-eye u Jihova, eye u Suke-ku wala ku thandu dya ima yoso.” Kyoso Davidi kya zubha kuzamba, “o kyonge kyoso anga ki ximana Jihova Nzambi.”—1 Mal. 29:​11, 20.

4. Kyebhi Jezú kyabhana kijingu kwa Tat’e?

⁴ Kyoso Jezú kyexile mu ixi mwene wabhana kijingu kwa Tat’e, mukuzwela ku athu kwila Jihova mwene wamubhana o kutena kwa kubhanga o madiwanu. (Mál. 5:​18-20) Jezú wa bhana we kijingu kwa Jihova mukutalatala kyambote o athu ni kwatangela kwila Tat’e mukwa henda. Sayi kizuwa Jezú wexile mulonga mu dilombe. Mwenyomo mwexile muhatu a mu katesa kwala o nzumbi yayibha mu kwinyi ni dinake dya mivu. Mukonda dya kiki mwene wa kotamene, katenene né ngó kubhetuka. Mwene wexile mutala hadi yavulu! Jezú wamukwatela henda, wamuzukama yu wa mwambela: “Muhatu, disanze ku uhaxi wé.” O Bibidya itutangela o ima yabhiti: “Jezú watula o maku mê kuthandu dya muhatu, mu kithangana kyenyókyo mwene wadisanze, anga umateka kuximana Nzambi.” (Luk. 13:​10-13) O muhatu wa ximana kyavulu Jihova mukonda wa mukwatekesa o kudisanza. O muhatu wejidile se mukonda dyahi wa ximanene Nzambi, etu we twejiya se mukonda dyahi tuximana Nzambi.

IHI ITUBHANGESA KUBHANA KIJINGU KWA JIHOVA?

5. Ihi itubhangesa kuximana Jihova?

⁵ Etu tuximana Jihova mukonda tumuxila kyavulu. Sayi ima yavulu itubhangesa kumuxila. Jihova mwene o Muteni-a-Yoso, mwene kene mubhwila. (Jisá. 96:​4-7) O ima yabhange mwene ilondekesa kwila mwene wala ni unjimu wavulu. Mwene watubhana o mwenyu ni ima yoso itwabhindamena phala kukala ku mwenyu. (Dij. 4:11) Mwene fiyele. (Dij. 15:4) Mwene ubhanga ngo ima yambote, mwene ukumbidila o ikanenu yê yoso. (Josu. 23:14) Mukonda dya kiki polofeta Jelemiya wambe kiki yalungu ni Jihova: “Eye ngó wa fwama ku ku kwatela woma; mbata mu’axaxi ka jinjimu joso ja akwa jixi, ni mautuminu mâ, kana-mu wa di fwangana n’eye”! (Jel. 10:​6, 7) Sé phata twala ni ima yavulu itubhangesa kuxila Tat’etu Jihova. Maji sayi dingi idifwa yengi ya Jihova itubhangesa ku muzola.

6. Mukonda dyahi twazolo Jihova?

⁶ Etu tubhana kijingu kwa Jihova mukonda twamuzolo ni muxima woso. Tumone o idifwa ya Jihova itubangesa kumuzola. Mwene mukwa kukwatela henda. (Jisá. 103:13; Iza. 49:15) Kyoso ki tutala hádi mwene udivwa kyayibha. (Zak. 2:8) Mwene utukwatekesa kumwijiya kyambote ni kukala tumakamba mê. (Jisá. 25:14; Ika. 17:27) Mwene we mukwa kulenduka, ‘u bhetama mu ku tala o ima i bhita ni mu dyulu ni mu ngongo, ngadyama u mu zangula ku fufuta.’ (Jisá. 113:​6, 7) Mukonda dya ima yoso yiyi etu tubhana kijingu kwa Nzambi yetu.—Jisá. 86:12.

7. Ujitu webhi utwala nawu?

⁷ Tubhana kijingu kwa Jihova mukonda twamesena kwila o athu amwijiya. Mukonda  dyahi athu avulu kejiya o kidi kyalungu ni Jihova? Mukonda Satanaji waxiti o ilunji ya athu mwavundu ni kwila mwene wene mumwanga makutu alungu ni Jihova. (2 Ko. 4:4) Satanaji waxikinisa o athu kwila Jihova, Nzambi yayibha, katuzolo ni kwila mwene wene mubheka o hadi yoso mu ngongo. Maji twejiya o kidi kyalungu ni Nzambi! Twala ni ujitu wa kukwatekesa o athu kwijiya Nzambi ni kumubhana kijingu. (Iza. 43:10) O Sálamu 96 itukwatekesa kubhana kijingu kwa Jihova. Mu kudilonga o Sálamu yiyi, xinganeka kyebhi ki utena kubhana kwa Jihova o kijingu kya mutokala.

KYEBHI KITUTENA KUBHANA KWA JIHOVA O KIJINGU KYA MUTOKALA?

8. Mu ukexilu webhi ututena kubhana kijingu kwa Jihova? (Sálamu 96:​1-3)

⁸ Tanga Sálamu 96:​1-3. Tutena kubhana kijingu kwa Jihova mu ima ituzwela yalungu ni mwene. O jivelusu jiji jituswinisa ‘kwimbila Jihova,’ kuximana “o dijina dyê,” kutanga “o ubhulukilu wê kizuwa ni kizuwa,” ni kutumbula “o fuma yê mu’axaxi ka” jixi jengi. Tubhana kijingu kwa Tat’etu ya dyulu mu maukexilu oso yá. O jiselevende ja Jihova mu ukulu exile mutangela o athu yalungu ni mwene ni hanji yoso. (Dan. 3:​16-18; Ika. 4:29) Kyebhi kitutena kubhanga we kiki?

9-10. Ihi i wadilongo ku musoso wa Ângela? (Tala we ofoto.)

⁹ Tala yabhiti ni phange watungu ku Estados Unidos, amwixana Ângela. a Ni kuswina kwoso wazwela yalungu ni Jihova ku salu yê. Mu kizuwa kyê kyadyanga ku salu, mwene ni jikoleka ja mukwa ja ubhe, a abhingi phala kuzwela yalungu ni myenyu yâ. Mana Ângela wasokejeka jifoto phala kujimbulula ku jikoleka jê o kusanguluka kwala naku mu kukala Mbangi ya Jihova. Maji ande dya mwene kumateka kuzwela, sayi koleka yê wazwela kwila wexile Mbangi ya Jihova, yu wamateka kuzwela kyayibha yalungu n’etu. Mana Ângela wambe: “Muxima wami wamateka o kuteketa. Maji ngabanze: ‘O kwila nganda kwehela muthu kuzwela kyayibha yalungu ni Jihova? Inga nganda muzokela?’”

¹⁰ Kyoso koleka yê kyazubha kuzwela, mana Ângela wasambe ku muxima wê. Mukusuluka mwene watambwijila ni kuxila  kwoso: “Kyoso kyangivwala o jitata jami exile we Jimbangi ja Jihova. Katé lelu, ngi Mbangi ya Jihova.” Sumbala kwexile kibhidi, maji mana Ângela watululukile. Mwene walondekesa jifoto. Mu jifoto jiji mwene ni jiphange jamukwa asanguluka kyavulu mu kubheza Jihova. Mana Ângela wazwela ni jikoleka ni kuxila kwoso. (1 Ph. 3:15) Ihi yabhiti? Kyoso Ângela kyazubha o kuzwela o diyala wa tululuka. Watumbula kate mwene misoso yambote ya unzangala we kyoso kyexile mudilunga ni Jimbangi ja Jihova. Ângela wambe: “Twatokala kuzokela Jihova. Ujitu wadikota kuzwela o kidi kyalungu ni dijina dyê.” Etu wetu tutena kuximana Jihova ne mwene se o athu akamba kumuxila.

11. Tunde ukulu kyebhi o abhezi akidi kyene mu kumbidila o kitumu ki tusanga mu divulu dya Jisálamu 96:8?

¹¹ Tutena kujingisa Jihova mu kumubhana o ima yambote itwala-nayu. (Tanga Jisálamu 96:8.) O abhezi a kidi ene kya mujingisa Jihova mu ukexilu yu. (Jisa. 3:9) Mu kifika o akwa Izalayele a bhanene o kitadi kya ni ima yexile ni valolo yavulu phala kukwatekesa kutunga o tembulu ni kwilanga. (2 Jis. 12:​4, 5; 1 Mal. 29:​3-9) Maxibulu avulu a Jezú exile mu bhana ‘o jimbote jâ, phala kukwatekesa Jezú ni jipoxolo.’ (Luk. 8:​1-3) O Bibidya yamba kwila sayi Jikidistá akwatekesele o jiphange ja mu nzumbi atungile mu mbanza yengi exile mu bhita ni nzala, ni kitadi kyexile nakyu. (Ika. 11:​27-29) Lelo we tutena kuximana Jihova bhukaxi ka ima itwala nayu.

12. Kyebhi o kitadi kitwene mu sangela kitena kuximanesa Jihova? (Tala we ofoto.)

¹² Tulondekesa kwila tuximana Jihova bhukaxi ka kitadi kitwene mu sangela. Mu kizuwa kya 27 ku mbeji ya Kasamanu ku muvu wa 2020 sayi jurnale ku Zimbabwe ya jimbulula o ibhidi yexile mu dibhana nayu o athu mukonda dya nzala. Mazunda a athu afu mukonda dya nzala. Sumbala ni ibhidi yabhonzo yexile mu dibhana nayu, phange Prisca wasulukile mu kuboka mu jikwalata ni mu jisesa, o jivizinyu je exile mu mulokalala mukonda dya kuya mu sidivisu ya kuboka mu veji dya kusota salu, exile mu mutangela “Eye wanda fwa ni nzala.” Prisca wa dyelele kwila Jihova weji mu langa, kyenyiki mwene wambe, “Jihova nuka wanda bwazeka o jiselevende je.” Mu kubhita ithangana  yofele o jiphange a mu bhekela milongo. O kilunga kya kwatekesa phange Prisca bhukaxi ka ima itwene mu sangela. O jivizinyu ja phange Prisca adiwanene kyavulu, ene ambe “Nzambi nuka wakubwazekele, etu twamesena we kudilonga yalungu ni mwene.” Sambwadi dya jivizinyu je amateka kuya mu yonge.

13. Kyebhi kitutena kuximana Jihova bhukaxi ka wendelu wetu? (Jisálamu 96:9)

¹³ Tanga Jisálamu 96:9. Tutena kuxima Jihova bhukaxi ka wendelu wetu. O akunji exile musidivila ku kalatódyu atokalele kusukula o maku ni inama ithangana yoso. (Mak. 40:​30-32) Twatokala kuzela mu wendelu wetu woso. (Jisá. 24:​3, 4; 1 Ph. 1:​15, 16) O Bibidya yamba kwila twatokala kubhanga yoso ni yoso phala ku “zula o ukexilu wokulu ni ku zwata o ukexilu wa ubhe.” Kiki kilombolola kwila ki twatokala kubhanga ima iluwalesa Jihova. Twatokala kuxinganeka mu ukexilu ulondekesa kwila twamukayela Jihova ni idifwa yê. (Kol. 3:​9, 10) Ni kikwatekesu kya Jihova o muthu wala ni idifwa yayibha utena kulungulula o ukexilu wê ni kukala ni idifwa yambote.

14. Ihi iwadilongo ku musoso wa manu Jasintu? (Tala we ofoto.)

¹⁴ Mukifika manu Jasintu wexile mukwa usweya kate mwene o athu exile mumwixana Dimonyu. Mwene amubalakalele o kufwa mukonda dya ima yayibha yexile mu bhanga. Kyenyiki kyoso kyayi ni kukingila o kithangana kya kumujibha mwene waxikina kudilonga o Bibidya ni phange wexile mu kunda o kaleya mwexile manu Jasintu. Sumbala manu Jasintu wabhangele ima yavulu yayibha mwene walungulula o ukexilu we wa ibha. Manu Jasintu, kyoso kyexile phala kumujibha, kyoso kyayile ni kumulekela, o alangidi a kaleya akexile mu dila kikale mayala ni ahatu. Sayi xefe ya alangidi wambe: “Manu Jasintu wakexile mwaxaxi kajipelezu jayibhile dingi, kindala mwene wala mwaxaxi kajipelezu ayuka dingi.” Kyoso manu Jasintu kyamujibha, mu semana yakayela o jiphange ayile mu kaleya phala kubhanga kyonge. Kwenyoko ene amonoko pelezu nuka wayile mu kyonge. Mukonda dyahi mwene wasolo kuyaku? Mwene wadiwanene kyavulu kyoso kyamono manu Jasintu kulungulula o ukexilu wa mwenyu wê,  mwene wamesenene kwijiya se ihi yatokalele kubhanga phala kubeza Jihova. Se phata o idifwa yetu yambote itena kubhana kijingu kwa Jihova!—1 Ph. 2:12.

KYEBHI JIHOVA KYANDA XIMANESA O DIJINA DYÊ KU HÁDYA?

15. Kyebhi Jihova kyanda ximanesa o dijina dyê ku hádya? (Jisálamu 96:​10-13)

¹⁵ Tanga Jisálamu 96:​10-13. O velesu ya sukina ya Jisálamu 96 ilondekesa kwila Jihova, Sobha ni Mufundixi wa yuka. Kyebhi Jihova kyanda ximanesa o dijina dyê ku hádya? Mukubheka o kuyuka mu ixi. Kwakambe ngo bhofele mwene wanda bwika o Babilonya ya dikota mukonda ene mutanga makutu avulu alungu ni mwene. (Dij. 17:​5, 16; 19:​1, 2) Kyoso o ima yiyi kyanda bhita nange sayi athu anda mateka kubheza Jihova. Mukusukaku mu Alumajedone Jihova wanda bwika o mundu woso wa Satanaji, mwene wanda bwika yo amuzembe ni yo ene mu muxongwena. Maji wanda bhulula yo amuzolo ene mumubhana kijingu. (Mál. 8:38; 2 Te. 1:​6-10) Kyoso kyanda bhita o polova yasukina, ku disukilu dya midi ya mivu ya utuminu wa Kidistu, Jihova wanda zelesa o dijina dyê. (Dij. 20:​7-10) Mukithangana kyenyokyo, “o ixi ya k’ezala ni kwijiya kwa fuma ya Nzambi, mukwâ ni menya ki ezalesa o musanza wa kalunga.”—Haba. 2:14.

16. Etu enyoso twamesena kubhanga ihi? (Tala we ofoto.)

¹⁶ Kyanda kala kithangana kya katunda kyoso o athu oso kyanda bhana kwa Jihova o kijingu kya mutokala! Katé mwene lelu, tubhange yoso phala kuzwela yalungu ni Nzambi, ni kumubhana kijingu. Phala kutukwatekesa kubhanga kiki, o Kibuka kya Utuminu kyambe kwila o divulu dya Jisálamu 96:8 yene o velusu yetu ya muvu wa 2025, yene yamba: “Bhakulenu kwa Jihova o fuma yatokala dijina dyê.”