MBANDU YAKUDILONGA 5
MWIMBU 108 O Henda ya Kidi ya Nzambi
Mabesá Utwala Nawu Mukonda Dya Henda ya Jihova
“Jezú Kidistu weza mu ngongo phala kubhulula akwa ituxi.” —1 TI. 1:15.
ITWANDADILONGA
Kyebhi kitutena kukatula mbote mu sata ya kukula, ni kyebhi kitutena kulondekesa o kisakidilu kyetu kwa Jihova.
1. Ihi itwatokala kubhanga phala kusangulukisa Jihova?
XINGANEKA kwila eye wabhana ujitu wambote, wa fwama ku muthu wa mu zolo. Eye weji luwala kyavulu se mwene ubhaka o ujitu yu mu kitutu se valolo anga ukamba kuzwela dingi yalungu ni ujitu yu! Ku mbandu ya kamukwa eye weji sanguluka kyavulu mu kumona kwila mwene wa mulanga kyambote o ujitu yu. O kifika kiki kitulonga ihi? Jihova watubhana Mon’é kala o sata ya kukula. Se tubhana valolo mu sata ya kukula, ni mu henda yé, Jihova usanguluka kyavulu!—Nzw. 3:16; Lom. 5:7, 8.
2. Ihi itwanda dilonga mu milongi yiyi?
2 Kupholo dya kwenda, nange kitubhana dingi valolo yavulu mu sata ya kukula. Kiki kyedi kala twamuta o ujitu wa Nzambi mu kitutu sé valolo, ki twa mu mona dingi mba kuxinganeka mu ujitu yu. Twatokala kudilanga phala kiki ki kibhite netu mu kuxinganeka mu yoso yene mu bhanga Jihova ni Kidistu phal’etu. O milongi yiyi yanda tukwatekesa kubhanga kiki. Twanda dilonga kyebhi kitutena kukatula mbote kindala, ni kyebhi kitwanda katula mbote ku hádya. Twanda dilonga we ihi itutena kubhanga phala kulondekesa o kisakidilu kyetu mu henda ya Jihova benge-benge mu kithangana kya seyalu ya Ngana.
KYEBHI KITUTENA KUKATULA MBOTE KINDALA?
3. Kyebhi kitutena kukatula mbote mu sata ya kukula kindala?
3 Twala polondo phala kukatula mbote mu sata ya kukula ya Kidistu. Mu kifika bhukaxi ka sata ya kukula, Jihova uloloka o ituxi yetu. Ki twatokala ku mujijidika phala ku tuloloka, ne kiki mwene wene mu tuloloka. O mukwa Jisalamu wembi: “Kuma, eye Ngana, u muthu wambote, u lenguluka kuloloka.”—Jisá. 86:5; 103:3, 10-13.
4. Jihova wabhana o sata ya kukula phala ananyi? (Luka 5:32; 1 Timote 1:15)
4 Avulu mudyetu axinganeka kwila Jihova kanda tuloloka dingi. Mu kidi etu enyoso tu akwa ituxi. Poxolo Phawulu wambe kwila “ki ngi fwama ku ngixana ngi poxolo.” Mwene wambe dingi: “Maji mukonda dya ngalasa ya Nzambi, ngala ngi poxolo.” (1 Ko. 15:9, 10) Kyoso ki tudyela o ituxi yetu, Jihova utuloloka. Mukonda dyahi? Mwene ubhanga kiki mukonda wa tuzolo. Se eye uluwala mu xinganeka kwila Jihova kanda kuloloka, lembalala kwila Jihova kabhana o sata ya kukula phala o athu ayuka kana, maji phala yo akwa ituxi.—Tanga Luka 5:32; 1 Timote 1:15.
5. Mukonda dyahi seko muthu watokala kubanza kwila Jihova watokala ku muloloka? Jimbulula.
5 Seko muthu watokala kubanza kwila Jihova watokala ku tuloloka mukonda twabhange kya ima yavulu mu sidivisu yé. Kidi kwila Jihova ubhana valolo mu yoso itwene mu bhanga. (Jih. 6:10) Mwene katubhana o sata ya kukula phala kutufuta. Kutondala kubanza kwila Jihova wa tokala ku tuloloka mukonda twabhange kya ima yavulu. Se tubanza kiki, tulondekesa kwila ki twabhingi o sata ya kukula.—Sokesa Ngalásya 2:21.
6. Mukonda dyahi Phawulu wa kalakala kyavulu mu sidivisu ya Jihova?
6 Phawulu wejidile kwila ne mwene sé wabhangele ikalakalu yavulu phala Nzambi, ki kyene kyeji bhangesa ku muloloka. Maji mukonda dyahi mwene wa kalakala kyavulu mu sidivisu ya Jihova? Mwene wa bhange kiki mu kulondekesa kisakidilu kwa Jihova mukonda dya ngalasa yê. (Efe. 3:7) Kala Phawulu, ki twamusuluka mukusidivila Jihova phala kumona ngo o idifwa ye, maji phala kulondekesa kwila twa mu mubhana valolo.
7. Kyebhi ki tutena kukatula mbote mu sata ya kukula kindala? (Loma 5:1; Tiyaku 2:23)
7 O ukexilu wa mukwa ututena kukatula mbote kindala mu sata ya kukula, o kukala ni ukamba wambote ni Jihova. a Kala kitwamono mu milongi ya tundumu, kyoso kyatuvwala kitwexile ni ukamba ni Nzambi. Maji mukonda dya sata ya kukula twala ni “ukamba wambote ni Nzambi” ni kwila tutena kumu zukama.—Tanga Loma 5:1; Tiyaku 2:23.
8. Mukonda dyahi twatokala kusakidila Jihova bhukaxi ka musambu?
8 Phala kukala ni ukamba wambote ni Jihova twatokala kusamba. Jihova kevu ngo o misambu yetu kyoso ki twala mu kyonge maji ne mwene kyoso ki twamusamba ubheka wetu. Kyoso ki tusamba kitutandanganya kyavulu, o mixima yetu ibatama. Yiyi kiyene ngo o mbote ijila mu kusamba, sayi dingi. O musambu utena kukolesa o ukamba wetu ni Nzambi. (Jisá. 65:2; Tiy. 4:8; 1 Nz. 5:14) Kyoso Jezú kyexile mu ixi mwene wexile musamba jinga mukonda wejidile kwila Tat’e wexile mu mwivwa ni kwila o musambu weji kolesa dingi o ukamba we ni Jihova. (Luk. 5:16) Etu tumusakidila kyavulu mukonda, bhukaxi ka sata ya kukula ya Jezú, tutena kukala ni ukamba wambote ni Jihova kate mwene tutena kuzwelane bhukaxi ka musambu!
KYEBHI KITWANDA KATULA MBOTE KU HADYA?
9. Kyebhi o abhezi a fiyele a Jihova kyanda katula mbote ku sata ya kukula ku hádya?
9 Kyebhi o abhezi a fiyele a Jihova kyatena kukatula mbote ku sata ya kukula ku hádya? Jihova wanda kwabhana mwenyu wakalelaku. Athu avulu ene mubanza, kwila kiki kikyanda bhita mukonda athu avulu ene mufwa ku mivu yavulu. Maji kudimatekenu Jihova wa mesenene kwila o athu akala ni mwenyu wakalelaku. Se Adá katele kituxi seku muthu weji banza kwila kitutena kukala ni mwenyu wakalelaku. Sumbala kutena kutubhonza kuxinganeka kukala ni mwenyu wakalelaku maji tutena kuxikina kwila twanda kala ni mwenyu wakalelaku, mukonda twejiya kwila bhukaxi ka Mon’ê Jihova wa futu o dikongo phala tukale ni mwenyu wakalelaku.—Lom. 8:32.
10. Ihi ya mukingila o Jikidistá ja a undu ni jimbundi ja mukwa?
10 Sumbala twanda tambula o ujitu wa mwenyu wakalelaku ku hádya, maji Jihova wamesena kwila tuxinganeka mu izuwa yiyi. O Jikidistá ja a undu ala ni hanji ya kuya ku dyulu phala kutumina o ixi kumoxi ni Kidistu. (Dij. 20:6) O jimbudi ja mukwa amukingila kutambula o mwenyu wakalelaku mu ixi. (Dij. 21:3, 4) O kwila eye wala ni hanji ya kutambula o mwenyu wakalelaku? Jihova watubhange phala kukala ni mwenyu wakalelaku mu ixi ni kusanguluka mu kidi.
11-12. Mabesá ebhi utwanda tambula mu Palayizu? (Tala we o jifoto.)
11 Xinganeka kyebhi kyanda kala o mwenyu mu Palayizu. Kitwanda tandanganya dingi ni kukata, ni kufwa. (Iza. 25:8; 33:24) Jihova wanda tubhana o ima yoso i twamesena. Ihi i wanda mesena kudilonga mu Palayizu? O kwila kudilonga kuxika mwimbu? O kwila kudilonga dingi yalungu ni yama? Sé phata, kwanda bhinga atungi a jinzo ni idimakaji. Kwanda bhinga we athu phala kuyudika o imbamba, kulamba ni kuyudika o ji jaludim. (Iza. 35:1; 65:21) Mu Palayizu, wanda kala ni kithangana phala kubhanga o ima yoso yiyi ni ima yamukwá dingi.
12 Twanda sanguluka kyavulu mu kutambulula o athu anda kwafukununa! (Ika. 24:15) Xinganeka mu kusanguluka ku twanda kala naku mu kudilonga yalungu ni Jihova bhukaxi ka ibhangelu yê. (Jisá. 104:24; Iza. 11:9) Kyabeta dingi kota, eye kiwanda ta dingi kituxi, mu kiki wanda tena kubheza kyambote Jihova sé kumubhinga muloloki wa ituxi! Dikwatenene mu kidyelelu kyé kya kutambula o mwenyu wakalelalu “muveji dya kudiwabhela ngó kathangana ni jivondadi ja ituxi.” (Jih. 11:25) O mabesá utwanda tambula ku hádya anda tusangulukisa kyavulu, kima kyoso-kyoso kitukala nakyu ku mundu yú, ndenge. O mwenyu mu Palayizu, ki kidyelelu ngó kyahatu kana. Kyanda dikumbidila mwene. O mabesá oso yá anda kala mwene kidi, mukonda dya henda yatulondekesa Jihova mu kutumikisa Mon’ê phala kutufwila!
Kima kyahi ki wamesena kubhanga dingi mu Palayizu? (Tala ojikaxi 11-12)
TWATOKALA KUXIKINA O HENDA YA JIHOVA
13. Kyebhi kitutena kusakidila Jihova mu kutubhana o sata ya kukula? (2 Kolindu 6:1)
13 Kyebhi kitutena kusakidila Jihova mu kutubhana o sata ya kukula? Mu kulondekesa kwila o kima kyabeta-kota ku mwenyu wetu, o kusidivila Jihova. (Mat. 6:33) Jezú wafu “phala oso ala ku mwenyu kabhange dingi o vondadi yâ, maji abhange o vondadi ya yó wa afwila, anga a mu fukununa.” (2 Ko. 5:15) Jihova wene mutulondekesa o henda yê mu kutuloloka.—Tanga 2 Kolindu 6:1.
14. Kyebhi kitulondekesa kwila tudyelela mu itendelesu ya Jihova?
14 Tutena kusakidila we Jihova, mu kudyelela ni kukayela o itendelesu yê. Kyebhi? Ande dya kusola se twanda dilonga mu xikola yakatunda, mba se salu yebhi i twanda xikina, twatokala kwijiya hanji se Jihova wamesena kwila tubhanga ihi. (1 Ko. 10:31; 2 Ko. 5:7) Kyoso kitukala ni kixikanu kwa Jihova, o ukamba wetu ni mwene ukola dingi, tudyelela dingi kwila twanda tambula o mwenyu wakalelaku.—Lom. 5:3-5; Tiy. 2:21, 22.
15. Mu jisemana ande dya Lembalasa ni kyoso kyanda bhita o Lembalasa, kyebhi kitutena kusakidila o henda yatukwatela Jihova?
15 Kwala dingi ukexilu wengi ututena kusakidila o henda yatukwatela Jihova. Mu kukalalaka ni nguzu yoso mu jisemana ande dya Lembalasa ni kyoso kyanda bhita o Lembalasa. Twanda bhanga yoso ni yoso phala kukala mu Lembalasa ni kwixana akwetu. (1 Ti. 2:4) Lombolola ku athu u wanda kwa exana mu Lembalasa se ihi yanda bhita-mu. U alondekesa o vidyu Mukonda Diahi Jezú Uafu? ni Lembalala o Kufua Kua Jezú. Enu mu tufunga, exanenu o jiphange azoza mu nzumbi. Xinganeka o kusanguluka ku kala naku Jihova, Jezú ni jianju, kyoso muthu wazoza, uvutuka mu kilunga kyê! (Luk. 15:4-7) Mu Lembalasa, tusanguluka mu kukala ni jiphange jetu, benge-benge mu kukala ni yó twa exana ni yó azoza mu nzumbi nuka dingi ayile mu kyonge. Twamesena kwila ene adivwa kyambote!—Lom. 12:13.
16. Mukonda dyahi twatokala kubhanga dingi mu sidivisu ya Jihova, mu jisemana ande dya Lembalasa ni kyoso kyanda bhita o Lembalasa?
16 Tutena kubhanga dingi mu sidivisu ya Jihova, mu jisemana ande dya Lembalasa ni kyoso kyanda bhita o Lembalasa. Yú ukexilu wambote wa kusakidila Nzambi ni Kidistu mu yoso yene mubhanga kokwé. Kyoso kituboka kyavulu, tumona dingi o kikwatekesu kya Jihova ni kwila tumudyelela dingi. (1 Ko. 3:9) Twakudyondo, bhanga we o Kitangelu Kya Bibidya Kya Lembalasa kyala mu kadivulu Tanga o Mikanda Ikôla Izuwa Yoso mba o kitangelu kyala mu kamukanda Milongi Phala o Yônge. O kitangelu kiki kya Bibidya utena kukibhanga ubheka wé, mba kumoxi ni mwiji wé.
17. Jihova usanguluka ni ihi? (Tala we o kaxa “ Maukexilu Ututena Kulondekesa o Kisakidilu Kyetu mu Henda ya Jihova.”)
17 Mukonda dya ibhidi i wamudibhana nayu ku mwenyu, nange kiwanda tena kubhanga dingi mu sidivisu yé kwa Jihova. Mwene kene musokesa o kikalakalu ki ubhanga ni kikalakalu kya akwenu, mwene ubhana valolo mu yoso i wene mubhanga. Mwene wene mumona o nguzu yoso i ubhanga phala kulondekesa o kisakidilu kyé mu sata yakukula.—1 Sam. 16:7; Mál. 12:41-44.
18. Mukonda dyahi tusakidila Jihova Nzambi ni Jezú Kidistu?
18 Xinganeka ku mabesá utwala nawu kindala mukonda dya sata ya kukula: O muloloki wa ituxi yetu, o ukamba ni Jihova ni kidyelelu kya mwenyu wakalelaku. Tulondekese jinga o kisakidilu kyetu kwa Jihova mukonda dya mabesá yá. (1 Nz. 4:19) Tulondekese we o kisakidilu kwa Jezú watukwatela henda, mu kutufwila bhukididi!—Nzw. 15:13.
MWIMBU 154 Tudizolyenu
