MBANDU YAKUDILONGA 4
MWIMBU 18 Twa Sakidila o Sata ya Kukula
O Sata Yakukula Itulonga Ihi?
“Nzambi wa tulondekesa o henda yê.”—1 NZ. 4:9.
ITWANDADILONGA
O sata yakukula ilondekesa kwila Jihova ni Jezú atuzolo kyavulu.
1. Mukonda dyahi kima kyambote kukala mu lembalasa ya kufwa kwa Jezú muvu ni muvu?
SÉ PHATA o sata yakukula ujitu wakatunda watubhana Jihova! (2 Ko. 9:15) Mukonda dya Jezú kutufwila, eye utena kukala ukamba dya Jihova Nzambi. Utena we kukala ni kidyelelu kya mwenyu wakalelaku! (Lom. 5:8) Jezú wabhange o lembalasa ya kufwa kwê phala kutukwatekesa jinga kusakidila yabhange Jihova ni mwene.—Luk. 22:19, 20.
2. Ihi itwanda dilonga mu milongi yiyi?
2 Mu muvu yu o lembalasa ya kufwa kwa Jezú, yanda bhita kya sabhalu mu kizuwa kya 12 mu mbeji ya Kasamanu. Sé phata etu enyoso twanda kala-mu. Kima kyambote ande dya kizuwa kya lembalasa ni ku izuwa ku pholo kuxinganeka mu ima yabhange Jihova ni Jezú kokwetu. Mu milongi yiyi twanda dilonga se o sata yakukula itulonga ihi yalungu ni Jihova ni Mon’ê Jezú. Mu milongi yakayela twanda dilonga o mbote itukatula mukonda dya sata yakukula ni kyebhi kitutena kusakidila o ujitu yu.
O SATA YAKUKULA ITULONGA IHI YALUNGU NI JIHOVA?
3. Kyebhi o kufwa kwa muthu umoxi ngo kweji bhulula athu avulu mu ngongo? (Tala we ofoto.)
3 O sata yakukula itulonga kwila Jihova wazolo o kuyuka. (Mate. 32:4) Kyebhi? Kyoso Adá kya bhukumukina Nzambi, wakituka mukwa ituxi yu wafu. (Lom. 5:12) Phala kutubhulula mu ituxi ni mu kalunga, Jihova watumikisa Jezú phala kutukula. Maji kyebhi o kufwa kwa muthu umoxi ngo kweji bhulula athu avulu mu ngongo? Poxolo Phawulu wajimbulula: “Mukonda bhukaxi ka kuxibhaka kwa muthu umoxi athu avulu akituka akwa ituxi, kyene we kimoxi, bhukaxi ka kutumaka kwa muthu umoxi, avulu anda kituka athu a yuka.” (Lom. 5:19; 1 Ti. 2:6) O izwelu ya Phawulu ilombolola kwila o athu oso akituka akwa ituxi mukonda dya kubhukumuka kwa muthu umoxi. Kyenyiki kwabhingile ngo muthu umoxi phala kutubhulula.
Muthu umoxi wabheka o kituxi ni kalunga. Muthu umoxi we watubhulula ku kituxi ni kalunga (Tala okaxi 3)
4. Mukonda dyahi Jihova kehela ngo o twana twa Adá eji belesela o itendelesu ya Jihova kukala ku mwenyu wakalelaku?
4 O kwila kwabhingile mwene Jezú kufwa phala kutubhulula? Mukonda dyahi Jihova kehela ngo o twana twa Adá eji belesela o itendelesu ya Jihova kukala ku mwenyu wakalelaku? Phala athu akwa ituxi kiki kyeji kala kima kyambote. Maji phala Jihova, kikyeji kala kima kyambote. Kuma Jihova muthu wayuka, se wabhangele kiki kyejikala kala Adá katele kituxi kyadikota ni kwila o twana twê kexile akwa ituxi.
5. Mukonda dyahi tutena kudyelela kwila Jihova wanda bhanga jinga o ima ni kuyuka?
5 Ihi yeji bhita se Jihova katubhele o sata yakukula ni kwila o an’á a Adá akwa ituxi eji kala ni mwenyu wakalelaku? O athu eji zwela kwila Jihova kene mubatula maka ni kuyuka. Nange o athu eji zwela kwila mwene kanda kumbidila o ikanenu yakamukwa ya bhange. Maji kitwabhingi kutandanganya ni kima kiki. Mukonda dyahi? Mukonda Jihova wabhange o kima kyayuka kate mwene wabhana o Mon’ê phala kutufwila. Tutena kudyelela kwila mwene wanda bhanga jinga o ima yayuka.
6. Kyebhi o sata yakukula ilondekesa o henda ya Jihova kokwetu? (1 Nz. 4:9, 10)
6 O sata yakukula itukwatekesa kutendela kwila Jihova mukwa kuyuka, maji itukwatekesa we kumona o henda ya Jihova kokwetu. (Nzw. 3:16; tanga 1 Nzwá 4:9, 10.) Jihova watumikisa Mon’ê phala kutufwila, mukonda mwene wamesena kwila tukala ni mwenyu wakalelaku, mwene wamesena we kwila tubhanga mbandu ya mwiji wê. Kyoso Adá kyate kituxi, Jihova wamukaye ku mwiji wê. Mukonda dya kiki kyoso kya tuvwala kitubhange hanji mbandu ya mwiji wa Jihova. Maji mukonda dya sata yakukula athu oso akala ni kixikanu kwa Nzambi anga amubelesela anda bhanga mbandu ku mwiji wê. Ne mwene kindala tutena kya kukala ni ukamba wambote ni Jihova ni jiphange jetu. Ni kidi kyoso Jihova watuzolo kyavulu!—Lom. 5:10, 11.
7. Jezú watale hadi yavulu ande dya kufwa. Kiki kitulonga ihi yalungu ni henda ya Jihova kokwetu?
7 Tutena kutendela kyambote o henda yatukwatela Jihova kyoso kitubanza kwila Jihova watale hadi yavulu kya mono Mon’ê kufwa. Satanaji wamba kwila seku selevende ya Jihova wanda kolokota fiyele kwa mwene se udibhana ni ibhidi. Phala kulondekesa kwila Satanaji mukwa makutu, Jihova wehela Jezú kutala hadi ande dya kufwa. (Jobe 2:1-5; 1 Ph. 2:21) Jihova wamono o atwameni a jingeleja kusebhulula Jezú, o masoladi kubeta Jezú ni kumuphaphela ku taka. Jihova wamono o Mone’ê wakazola kutala hadi yavulu kate kyafu. (Mat. 27:28-31, 39) Jihova weji tena kufidisa Jezú kutala hadi yoso yiyi. Mukifika kyoso athu kyambe: “Nzambi a mu bhulule, se wa mu wabhela,” Jihova weji tena kubhanga kiki. (Mat. 27:42, 43) Se Nzambi wabhangele kiki, Jezú keji tena kutukula mu kiki kitweji kala ni kidyelelu. Jihova wehela Mon’ê kutala hadi kate kyafu.
8. O kwila Jihova wevu ndolo kyoso kyamono Mon’ê kutala hadi? Jimbulula. (Tala we ofoto.)
8 Kitwatokala kubanza, kuma Jihova Muteni-a-yoso, mwene kevu ndolo! Mwene watubhange mu kidifwanganu kyê, kiki kitulonga kwila tutena kulondekesa o idifwa yalanayu mwene, mu kiki se twivwa ndolo, Jihova wivwa we. O Bibidya yamba kwila mwene wivwa ndolo ni kuluwala. (Jisá. 78:40, 41) Xinganeka mu musoso wa Mbalahamu ni Izake. Jihova watumu Mbalahamu phala kusatela mon’ê umoxi-elele. (Dim. 22:9-12; Jih. 11:17-19) Xinganeka o kuluwala kwexile naku Mbalahamu kyoso kya kwata o phoko phala kujibha mon’ê. Jihova wabetele dingi kota mu kuluwala kyoso kya mono Mon’ê kumubeta ni kumujibha ku athu ayibha!—Tala mu jw.org o vidyu Imite a Sua Fé—Abraão, Parte 2.
Jihova wevu ndolo yavulu mukumona Mon’ê kutala hadi (Tala okaxi 8)
9. O divulu dya Loma 8:32, 38, 39 itulondekesa ihi yalungu ni Jihova?
9 O sata yakukula itulondekesa kwila Jihova wabeta dingi kota mukutuzola o jindandu jetu ni makamba metu jakazola ndenge. (Tanga Loma 8:32, 38, 39.) Seku phata Jihova wabeta dingi kota mukutuzola etu ndenge. Wamesena kukala ni mwenyu wakalelaku? Jihova wala dingi ni hanji wakukubhana mwenyu wakalelaku eye ndenge. Wamesena kwila o ituxi ye akuloloka-nayu? Jihova wala ni hanji yavulu yakuloloka o ituxi yé. Mwene wamesena ngó kwila tumusakidila mukonda dya sata yakukula ni kwila tumubelesela. O sata yakukula ujitu ulondekesa kuma Jihova watuzolo kyavulu. Ku mundu wa ubhe twanda dilonga dingi ima yavulu yalungu ni henda ya Jihova.—Ndo. 3:11.
O SATA YAKUKULA ITULONGA IHI YALUNGU NI JEZÚ?
10. (a) Jezú watandanganyele kyavulu ni ihi? (b) Mu mawukexilu ebhi Jezú walondekesa kwila Tat’ê uzwela jinga o kidi? (Tala we o kaxa “ O Ufiyele wa Jezú Wajingisa o Dijina Dya Jihova.”)
10 Jezú utandanganya kyavulu ni ima ibanza o athu yalungu ni Tat’e. (Nzw. 14:31) Jezú watandanganyele kyavulu ni ima yeji zwela o athu yalungu ni Jihova se mwene wakambele kumubelesela. Mukonda dya kiki mwene wasambe: “Tata yami, se kibhana, o dikáwu didi ngi katule-dyu.” (Mat. 26:39) Kuma Jezú wakolokota fiyele kate mu ufwilu wê, mwene walondekesa kwila Satanaji mukwa makutu ni kwila Tat’ê uzwela jinga o kidi.
11. Kyebhi Jezú kyalondekesa kwila wazolele kyavulu o athu? (Nzwá 13:1)
11 O sata ya kukula ilondekesa kwila Jezú usuwa kyavulu o athu, benge-benge o maxibulu mê. (Jisa. 8:31; tanga Nzwá 13:1.) Mukifika, Jezú wejidile kwila weji dibhana ni ibhidi yavulu mu ngongo mumu, benge-benge o kufwa kwe. Mwene kabhangele ngo kiki mukonda wazolele kyavulu Tat’ê maji mukonda wa zolele we kyavulu o athu. Jezú walondekesa o henda yiyi mukuboka, kulonga ni kukwatekesa o athu. Kate mwene mukizuwa kya kufwa kwe, mwene wasukula o inama ya jipoxolo, wa alongo, wa aswinisa, wa akondo we o malamba. (Nzw. 13:12-15) Kyoso Jezú kya mu phaphele kutaka, mwene wazwela hanji ni kifumbe yalungu ni Palayizu, watangela we Nzwá phala kulanga many’â. (Luk. 23:42, 43; Nzw. 19:26, 27) Jezú kalondekesa ngo kwila wazolele o athu kyoso kyexile phala kufwa, maji mwene wa azolele ku mwenyu we woso.
12. Kyebhi Jezú kyamutukwatekesa lelu?
12 Kidi kwila Kidistu “wafu mu lumoxi,” ne kiki mwene wene mubhanga hanji ima yavulu phala etu. (Lom. 6:10) Xinganeka mu ima yamubhanga mwene kindala ni ima yanda bhanga ku hádya mukonda dya sata yakukula: Lelwidi mwene Sobha, Mukunji wadikota ni mutwameni wa kilunga. (1 Ko. 15:25; Efe. 5:23; Jih. 2:17) Mwene we wamukwendesa o kikalakalu kya kubhongolola o Jikidistá a a undu ni mundu wavulu. a O kikalakalu kiki kyandabhwa ngó ande dya hadi yadikota kubhwa. (Mat. 25:32; Mál. 13:27) Mwene ukwatekesa o kimbadi kya fiyele mukutubhana o kudya mu nzumbi mu izuwa yiyi yasukidilaku. (Mat. 24:45) Mu utuminu wê wa midi ya mivu wanda suluka mu kutukwatekesa. Se phata Jihova wabhana Mon’ê phala kutukwatekesa kate kuhádya ni hadya!
SULUKA MUKUDILONGA IMA YA UBHE
13. Kyebhi o kuxinganeka itukwatekesa kumona henda ya Jihova ni ya Jezú kokwetu?
13 Eye utena kusuluka mukudilonga yalungu ni henda ya Jihova ni Jezú mu kusuluka muxinganeka mu sata yakukula. Eye utena kubhanga kiki mukutanga divulu dimoxi dya Bibidya dizwela yalungu ni mwenyu wa Jezú mukithangana kya lembalasa. Kana kutanga ibatulu yavulu mu kithangana kimoxi ngó. Mu veji dya kiki tanga ngó ibatulu yofele phala kumona kyambote o henda ya Jihova ni ya Jezú. Zwela ni akwenu o ima iwanda dilonga.
14. Kala kilondekesa Jisálamu 119:97 kyebhi o kutokwesa itena kutukwatekesa kusuluka mukudilonga yalungu ni sata yakukula ni milongi yamukwa? (Tala we ofoto.)
14 Se wamusidivila kya Jihova mu mivu yavulu, nange udibhwidisa se utena kudilonga dingi ima ya ubhe, yalungu ni henda, kuyuka kwa Jihova ni sata yakukula. Mu kidi twanda suluka ni kudilonga ima yavulu yalungu ni maka enya. Ihi itwatokala kubhanga? Tanga ni kudilonga o milongi ya Bibidya itusanga mu madivulu metu. Se usanga milongi kiwamuyitendela kyambote, tokwesa dingi. Mukusuluka xinganeka mu mbote iwakatula mu milongi iwadilongo yalungu ni Jihova, Mon’ê ni henda yawu kokwetu.—Tanga Jisálamu 119:97.
Sumbala twamusidivila kya Jihova mu mivu yavulu, tutena kubandekesa o kwijiya kwetu kwalungu ni sata yakukula (Tala okaxi 14)
15. Mukonda dyahi kima kyambote kusota kudilonga ima ya ubhe mu Bibidya?
15 Kana kuluwala se umona kwila kiwamu sanga milongi ya ubhe kyoso ki ukatula kithangana phala kutanga ni kutokwesa. Dixinganeke kala muthu wamusota ulu. O muthu wamusota o ulu, ubhita ji ola kate mwene izuwa yavulu phala kuyisanga. Maji ne kiki mwene kabhwila, usuluka mukusota mukonda wejiya kwila se usanga ne mwene kambandu kofele ka ulu, o kambandu kaka ka ulu kala ni valolo yavulu. Maji o milongi yoso ya ubhe itudilonga mu Bibidya, yabeta mukukala ni valolo o ulu ndenge! (Jisá. 119:127; Jisa. 8:10) Mu kiki suluka mukutanga o Bibidya ni kusota kudilonga ima ya ubhe.—Jisá. 1:2.
16. Kyebhi kitutena kukayela o phangu ya Jihova ni ya Jezú?
16 Kyoso ki udilonga, xinganeka kyebhi ki utena ku kumbidila o ima iwadilongo. Mu kifika kayela o phangu ya kuyuka ya Jihova. Kayela o phangu ya Jezú ya kulondekesa henda kwa Jihova ni ku athu, mukukala polondo phala kubhanga o ima ya wamesena Jihova ni kukwatekesa akwenu, ne mwene se kukubhonza kubhanga kiki. Kayela we o phangu ya Jezú mu kubhana umbangi ku athu phala natene we kulondekesa kixikanu ku ujitu wa abhana Jihova, o sata yakukula ya Jezú.
17. Ihi itwanda dilonga mu milongi yakayela?
17 Se tusuluka mukudilonga yalungu ni sata yakukula, twanda bandekesa dingi o henda yetu kwa Jihova ni kwa Jezú. Mukonda dya kiki ene wa anda tuzola dingi. (Nzw. 14:21; Tiy. 4:8) Mu kiki tusuluke mukukatula mbote mu yoso itubhana Jihova phala kusuluka kudilonga yalungu ni sata yakukula. Mu milongi yakayela twanda dilonga o mbote itukatula mukonda dya sata yakukula ni kyebhi kitutena kusakidila o ujitu yu.
MWIMBU 107 Nzambi, o Phangu ya Henda
a Mu divulu dya Efezu 1:10, Poxolo Phawulu wambe: ‘Kwongeka o ima ku dyulu.’ Mu divulu dya Matesu 24:31 ni Máluku 13:27 Jezú wambe: ‘Kubhongolola o athu ósole.’ O kima kyexile muzwela Poxolo Phawulu ni Jezú ki kyadifu. Phawulu wazwela o kithangana kyoso Jihova kyasola o muthu phala kutumina ni Jezú ku dyulu. Jezú wexile muzwela o kithangana kyoso o Jikidistá a a undu kyanda kwa bhongolola ku dyulu mu hadi yadikota.
