1. Ibhidi yebhi etu enyoso twene mudibhana nayu?

 IZUWA yoso twene musola ima. Sayi ima ki ibonzo ku isola, kala ihi itwanda matala mba kithangana kyebhi kitwanda zeka. Maji o ima yamukwa ibonza kyavulu ku isola. O ima itusola, itena kufunyisa o sawidi yetu, o kisangusangu kya mwiji wetu ni ya yo amubheza Jihova kumoxi netu. Twamesena kwila o ima itusola ibhekela mbote kokwetu ni ku mwiji wetu. Kya beta dingi kota, twamesena kwila o ima i tusola isangulukisa Jihova.—Lom. 12:​1, 2.

2. Ihi itwatokala kubhanga phala kusola kyambote?

² Nange o muthu utena mwene kusola kyambote o ima (1) tokwesa, (2) xinganeka mu ibanzelu ya Jihova (3) xinganeka kyambote mu jindunge jiwanda tambula. O milongi yiyi yanda zwela yalungu ni maka enya.—Jisa. 2:11.

TOKWESA

3. Kifika kyebhi kitena kutukwatekesa kutendela kwila twatokala kutokwesa ande kya kusola kima?

³ O kima kyadyanga itwatokala kubhanga phala kusola kyambote, o kutokwesa. Mukonda dyahi kima kyambote kubhanga kiki? Xinganeka muthu wamukata uya ku musaki. O kwila o musaki ande dya ku mu tokwesa umubhana kya o milongo? Kana, kikyene. Phala kusola kyambote o ima, eye we  watokala kutokwesa kyambote ni kutonginina se yebhi o milongi yanda kukwatekesa dingi. Kyebhi kitutena kubhanga kiki?

4. Kala kyamba o Jisabhu 18:​13, ihi iwatokala kubhanga phala kusola ni unjimu? (Tala we ofoto.)

⁴ Eye utena kwijiya o ima mu kubhanga ibhwidisu. Xinganeka kwila akwixana phala kuya mu fesa. O kwila wanda kuya? Se kiwejiya o mukwa fesa, mba o ima yasokejeka mwene, eye watokala kudibhanga o ibhwidisu yiyi: “Kwebhi ni kizuwa kyahi kyanda bhita o fesa? Athu akuxi anda kala-mu? Nanyi wanda langa o ima mu fesa? Ananyi anda kala-mu? Ihi yanda bhanga-mu? Kwanda kala-mu uholwa?” O itambwijilu ya ibhwidisu yiyi yanda kukwatekesa kusola ni unjimu.—Tanga Jisabhu 18:13.

5. Se wejiya kya o ima yoso ihi i watokala kubhanga?

⁵ Mu kusuluka kyoso kiwanda kwijiya kyambote o ima, xinganeka kyambote. Xinganeka kwila mu fesa yiyi mwanda kala athu kabelesela o itumu ya Bibidya, ni kwila kwanda kala uholwa wavulu. Ihi i ubanza? O kwila o fesa yiyi yanda kala mwene fesa yambote? (1 Ph. 4:3) Mba o kwila o ola yanda bhita o fesa yene o ola ya kyonge kyê mba o ola iwene muboka? Kyoso ki ubanza mu ima yoso yanda bhita mu fesa, eye wanda sola kyambote. Maji kwala dingi kima kiwatokala kubhanga. Eye wejiya kya o ima, maji  eye watokala kudibhwidisa: Kyebhi Jihova kyadivwa yalungu ni maka enyá?—Jisa. 2:6.

XINGANEKA MU IBANZELU YA JIHOVA

6. Kala kyamba Tiyaku 1:​5, mukonda dyahi twatokala kusamba kwa Jihova mu kumubhinga kikwatekesu?

⁶ Samba kwa Jihova phala ku kukwatekesa kutendela ihi ibanza mwene yalungu ni maka enya. Jihova wa kanena kutubhana o umjimu phala kutongolola o ima yanda mu sangulukisa. Mwene u bhana unjimu “ku athu enyoso ni ngalasa sé kwabazela.”—Tanga Tiyaku 1:5.

7. Kyebhi ki utena kulondekesa kwila wala ni unjimu? Bhana phangu.

⁷ Kyoso ki zubha kusamba kwa Jihova mu kumubhinga kikwatekesu, tonginina kyambote phala kwijiya se mwene watambhwijila kya o musambu we. Mu kifika, se wa mubhanga njila anga wajimbidila eye utena kubhinga kikwatekesu ku muthu watungu mu mbanza yenyonyo phala ku kukwatekesa. Maji o kwila eye weji suluka mu kwenda ande dya ku kukwatekesa? Kana. Eye weji bhana matwi mu yoso yeji kutangela. Kyene kimoxi we ni Jihova, kyoso ki umubhinga unjimu, sota kumona o kitambwijilu bhukaxi ka kitangelu kyé kya Bibidya yalungu ni ima iwabhingi ku musambu. Mu kifika, eye utena kusola kuya mba kana mu fesa yiyi, mu kudilonga ihi izwela o Bibidya yalungu  ni jifesa jayibha, kudilunga ni athu ayibha, ni kuta o Utuminu wa Nzambi ku pholo, o ima ya kamukwa ndenge.—Mat. 6:33; Lom. 13:13; 1Ko. 15:33.

8. Ihi i watokala o kubhanga se wamusota itendelesu? (Tala we ofoto.)

⁸ Ne kiki, sayi ithangana eye ubhinga kikwatekesu phala kusanga itendelesu iwa musota. Eye utena kusanga kikwatekesu bhukaxi ka jiphange jakulu mu nzumbi. Eye we utena kukatula mbote mukutokwesa ubheka we. Kwene milongi yavulu mu madivulu metu, kala o Kadivulu ka Kutokwesa Phala o Jimbangi ja Jihova ni mu Jivelusu ja Bibidya Jitukwatekesa ku Mwenyu Wetu. Lembalala kwila twamesena kusola o ima yanda sangulukisa Jihova.

9. Kyebhi kitutena kwijiya kwila o kima kitwasolo kyanda sangulukisa Jihova? (Efezu 5:17)

⁹ Kyebhi kitutena kwijiya kwila o kima kitwasolo kyanda sangulukisa Jihova? Kyadyanga twatokala kumwijiya kyambote. O Bibidya yamba: “O unjimu wala mu kudijiya ni yo Ukola.” (Jisa. 9:10) Kyene, o unjimu wakidi wijila mu kwijiya o idifwa ya Jihova ni kikanenu kye, o ima ya zolo mwene mba ya ima zembe mwene. Dibhwidise: ‘Kuma ngejiya kya yalungu ni Jihova, kima kyahi ki ngi tena o kusola phala kumusangulukisa?’—Tanga Efezu 5:17.

10. Mukonda dyahi o itumu ya Bibidya ya beta dingi kota o ijila ya mwiji mba ya ixi ndenge?

¹⁰ Sayi bhabha phala kusangulukisa Jihova kitwatokala kubhanga o ima ya wabhela o athu. Mu kifika, sayi jitata atena kujijidika monâ wa muhatu kukazala ni diyala wala ni kitadi kyavulu, mba muthu utena kubhana imbamba yavulu mu kilembu yonene, ne mwene se mwene kala kyambote mu nzumbi. Kidi kwila o jitata a mesena kwila o moné ukala ni jimbote javulu ku mwenyu, maji mwene watokala kudibhwidisa: O kwila o diyala didi dyanda ngi kwatekesa kukolesa o ukamba wami ni Jihova? Kyebhi Jihova kya tala o maka enya? Tusanga o kitambwijilu mu divulu dya Matesu 6:33. Jezú wa tendelesa o Jikidista mu kiki-phe “dyangenu kusota o Utuminu wa Nzambi.” Sumbala tubhana kijingu ku jitata jetu ni kuxila o athu mu mbambe yetu, o kima kya beta dingi kota phala etu o kusangulukisa Jihova.

XINGANEKA KYAMBOTE MU JINDUNGE JIWANDA TAMBULA

11. Kidifwa kyebhi kitusanga mu Filipe 1:​9, 10 kyanda ku kwatekesa kusola ni unjimu?

¹¹ Kuma watange kya o itumu ya Bibidya yalungu ni maka u wa mudibhana nawu eye watokala kuxinganeka se ihi i wanda sola. (Tanga Filipe 1:​9, 10.) O kutongoloka kwanda ku kwatekesa kuxinganeka se ihi itena kubhita mu ima i wanda sola. Sayi ithangana kikubhonzwe kusola kima. Maji sayi ima kubhonza kyavulu ku isola. O kutongoloka kwanda ku kwatekesa kusola ni unjimu ne mwene mu ithangana ya bhonzo.

12-13. Kyebhi o kutongoloka kwanda ku kwatekesa kusola salu ni unjimu?

¹² Xinganeka mu kifika kiki. Eye wamusota salu phala kukwatekesa o mwiji we. Kumoneka salu jiyadi. Eye utonginina se o salu yalungu ni ihi, se phala kukalakala kwebhi ni ithangana ikuxi iwanda bhita ku salu yiyi. Mukidi o Bibidya ki ifidisa o salu jiji jamoneka. Nange eye wanda sola o salu i wa wabhela dingi, mba o salu mwanda kufuta kitadi kyavulu. Maji watokala kuxinganeka mu ima yengi ande dya kusola.

¹³ Mukifika, o kwila o salu yiyi yanda ngifidisa kuya mu yonge? O kwila o kithangana ki  wanda bhita ku salu yanda kwatekesa o mwiji we kusanguluka kumwenyu ni kuzukama dingi kwa Jihova? O kudibhanga o ibhwidisu yiyi yanda ku kukwatekesa kuta ku pholo “o ima ya beta dingi kota,” kala o ubhezelu we ni kulanga o ibhindamu ya mwiji we. O kukala ni kitadi kyavulu ndenge. Kyenyiki sola ni unjimu, Jihova wanda kubesowala.

14. Kyebhi o kutongoloka ni henda kyanda kutukwatekesa kukamba kubhangesa akwetu kuta kituxi?

¹⁴ O kutongoloka kutukwatekesa we kutonginina se kyebhi o athu kyanda divwa ni ima itusola, kyenyiki kitubhangese ‘akwetu kuta kituxi.’ (Fil. 1:10) O kusola o izwatu yetu ni kudizelesa kima kyala ni valolo yavulu. Mukifika, nange tusola kuzwata mu ukexilu ki wadifu ni wa akwetu. Maji se o athu mu kilunga mba bhukanga a divwa kyayibha ni ukexilu yu? O kutongoloka kwanda kutukwatekesa kuxila o ibanzelu ya. O henda yanda kutukwatekesa kusota o mbote ‘ya akwetu’ ni kwaxila. (1 Ko. 10:​23, 24, 32;  1 Ti. 2:​9, 10) Twanda sola ima yanda londekesa o henda yetu ni kuxila akwetu.

15. Ihi itwatokala o kubhanga ande dya kusola kima?

¹⁵ Se wamesena kusola kima, xinganeka mu mbote ijila mu ima i wasolo. Jezú watulongo kwila ande kya kusola kima, twatokala kuxikama “hanji phala kuxinganeka.” (Luk. 14:28) Xinganeka se ithangana ikuxi iwanda bhindamena phala kubatula o maka. Sayi ithangana eye utena kubhinga kikwatekesu ku mwiji we phala kukukwatekesa kusola kyambote. Mukonda dyahi kima kyambote kubhanga kiki? Kiki kilondekesa kwila kwabhingi kulungulula ima mu ixinganeku ye mba o jindunge janda kubhana janda kukwatekesa kyavulu. Kyoso ki ubhinga kikwatekesu ku mwiji we anga ukayela o jindunge ja, eye utena kusola kyambote ni kusanguluka ku mwenyu.—Jisa. 15:22.

SOLA O IMA YANDA KUBHEKELA MABESÁ

16. Ihi yanda kukukwatekesa kusola kyambote? (Tala we o kaxa “Kyebhi ki Utena Kusola ni Unjimu?”)

¹⁶ Se ukayela kyambote yoso itwazwela kudima wanda kala polondo phala kusola ni unjimu. Eye wa tokwesa o itumu ya Bibidya yanda kukwatekesa kusola ima yanda sangulukisa Jihova. Kindala eye utena kubhinga kwa Jihova phala kukukwatekesa kuditunda kyambote mu ima i wasolo.

17. Ihi i watokala kubhanga plala kusola kyambote?

¹⁷ Ne mwene se mu ukulu wabatwile kyambote o maka, ejiyakyu kwila kima kyambote kudyelela jinga kwa Jihova mu veji dya kudyelela mu kwijiya kwe mba ku nguzu ye. Mwene ngo utena kukubhana o kwijiya kwa kidi ni kutongoloka. (Jisa. 2:​1-5) Jihova utena kukukwatekesa kusola ima yanda mu sangulukisa.—Jisá. 23:​2, 3.