MBANDU YAKUDILONGA 40
Avulu Anda Kwakwatekesa Kukala Athu Ayuka
“Oso a longa jinga o mundu ku sota ni kukayela o kulunga, à kà bhenya mukwâ ni jithéthembwa katé ku hádya ni hádya.”—DAN. 12:3.
MWIMBU 151 Mwéne Wa-nda Kwixana
ITWANDADILONGA *
1. Ima yahi yanda tubhangesa kusanguluka ku Utuminu wa Kidistu wa Midi ya Mivu?
ETU enyoso twandasanguluka kyavulu kyoso o athu kyanda kwafukununa mu Utuminu wa Kidistu wa Midi ya Mivu! Oso afundu kyá jindandu jakazola ala ni hanji ya kwamona dingi. Jihova wala we ni hânji yavulu ya kufukununa dingi o athu. (Jobe 14:15) Etu enyoso twandasanguluka kyavulu mu kukala dingi kumoxi ni jindandu jetu jafu kyá, kyoso kyanda kwafukununa. Mu milongi yatundumu twadilongo kwila, o “athu ayuka,” yó o majina mâ osoneke kyá mu divulu dya mwenyu, “anda kwa fukununa phala kutambula o mwenyu.” (Ika. 24:15; Nzw. 5:29) Nange kyandabhita o Alumajedone, kikwandalaleka kyavulu o jindandu jetu andadyanga kwafukununa phala kukala ku mwenyu mu ixi. * O “athu akambe o kuyuka,” yó kexile ni ujitu wa kwijiya Jihova mba ku musidivila ande dya kufwa, “anda kwa fukununa phala kwa fundisa.”
2-3. (a) Kyebhi kyandakala o kikalakalu kya kulonga o athu mu ngongo yoso kala kilondekesa o divulu dya Izaya 11:9, 10? (b) Ihi itwanda dilonga mu milongi yiyi?
2 O athu oso akambe o kuyuka andakwafukununa, anda kwalonga. (Iza. 26:9; 61:11) O kikalakalu kiki kya kulonga o athu, nuka akibhangele mu ngongo yoso. (Tanga Izaya 11:9, 10.) Mukonda dyahi o athu andakwafukununa andabhinga kwalonga? Mukonda o athu akambe o kuyuka, anda kwafukununa phala kwalonga yalungu ni Utuminu wa Nzambi, o sata ya kukúla ya Jezú Kidistu, o dijina dya Nzambi ni maka alungu ni ungana wa Jihova wa kutumina o ngongo yoso. Katé mwene o athu ayuka andadilonga we o ima yalongo Jihova ku jiselevende jê, yalungu ni vondadi yê phala o ixi. Sayi athu asidivila Jihova ni ufiyele woso, afu ande dya kuzubha kusoneka o Bibidya. Mu kikiphe kikale o athu ayuka mba o athu akambe o kuyuka enyoso andakala ni ima yavulu phala kudilonga.
3 O milongi yiyi, yandatukwatekesa kwijiya o itambwijilu ya ibhwidisu yiyi: O kikalakalu kiki kya kulonga o athu kyandabhita mu ngongo yoso. Kyandabhita mu ukexilu webhi? Kyebhi o kikalakalu kiki kyandakwatekesa o athu phala asoneke o majina mâ mu divulu dya mwenyu sé kwajima dingi? O itambwijilu ya ibhwidisu yiyi yala ni valolo yavulu phala etu. Kala kitwandamona sayi ikanenu yala mu divulu dya Daniyele ni Dijingunwinu, yanda tukwatekesa kwijiya se ihi yandabhita ni yó anda kwafukununa. Maji twandadilonga dingi ima itusangulukisa yala mu divulu dya Daniyele 12:1, 2.
‘NDUMBA YA ATHU YÓ AYA KU KILU MU FUFUTA YA MAVU MA IXI A KÀ FUKUNUKA’
4-5. Ihi itutangela o divulu dya Daniyele 12:1 yalungu ni izuwa isukidilaku?
4 Tanga Daniyele 12:1. O divulu dya Daniyele ditulondekelesa kyebhi kyandabhita o ima ku disukilu dya izuwa. Mu kifika, Daniyele 12:1 yamba kuma Mingedi mwene Jezú Kidistu ‘wemana mu ku bhângela o an’a kifuxi kya Nzambi.’ O mbandu ya kikanenu kiki, kyamateka kudikumbidila kyoso Jezú kyamateka kutumina kala Sobha ya Utuminu wa Nzambi ku muvu wa 1914.
5 Maji polofeta Daniyele wambe we kuma Jezú “weji kwimanena” mu “thembu ya phaxi tunde kya bhanga o mwiji wa athu kiluwa ikalaku.” O divulu dya Matesu 24:21 dixana o thembu yiyi kala o thembu ya hadi yadikota. Ku disukilu dya Alumajedone Jezú wanda kwimanena mba kuzokela o mundu wa Nzambi. O divulu dya Dijingunwinu dixana o mundu wa Nzambi kala “mundu wavulu.”—Dij. 7:9, 14.
6. Kyebhi ki twejiya kwila o divulu dya Daniyele 12:2 dya muzwela yalungu ni difukunukinu dya athu dyandabhita ku hádya? Jimbulula. (Phala kwijiya dingi yalungu ni difukunukinu dya athu mu ixi, tanga o mbandu “Atangi Amadivulu Metu Ebhula” mu mulangidi yú.)
6 Tanga Daniyele 12:2. Ihi yandabhita ni mundu anda kwabhulula mu thembu yiyi ya phaxi? Mu ukulu twexile mutendela kuma o kikanenu kyamuzwela yalungu ni difukunukinu mu nzumbi, kifwa o jiselevende ja Nzambi kukala kyambote mu nzumbi. * Maji kikyene. Mu kidi o kikanenu kiki kya muzwela yalungu ni difukunukinu dya athu dyandabhita ku mundu wa ubhe wakezaku. Mukonda dyahi twamba kiki? Mukonda mu divulu dya Daniyele 12:2 mwala o kizwelu “fufuta.” Mu divulu dya Jobe 17:16 mwala we o kizwelu ‘fufutila,’ phala kuzwela yalungu ni mbila. Daniyele 12:2 dya muzwela yalungu ni difukunukinu dya athu kyoso o Alumajedone ni izuwa isukidilaku yandabhwa.
7. (a) Mu ukexilu webhi sayi athu anda kwafukununa phala kutambula o “mwenyu ki wàbhwa”? (b) Mukonda dyahi “o difukunukinu [didi] dya betakota”?
7 O divulu dya Daniyele 12:2 yamba we kuma o athu akafukunuka phala kutambula o “mwenyu ki wàbhwa.” O izwelu yiyi ilombolola ihi? Ilombolola kuma, mu midi ya mivu o athu anda kwafukununa, phala kutambula o mwenyu wakalelaku, andabhinga kudilonga ya lungu ni Jihova, kumubelesela ni kubelesela we Jezú. (Nzw. 17:3) “O difukunukinu [didi] dya betakota” o dyabhiti mu ukulu ndenge. (Jih. 11:35) Mukonda dyahi? Mukonda sayi ya a afukununa mu ukulu afu dingi, mukonda ene exile akwa ituxi.
8. Kyebhi sayi athu anda kwafukununa phala kutambula “o sonyi ni lusebhu lunangenena”?
8 Maji ki athu oso andaxikina kwalonga kwa Jihova, mukonda o kikanenu kya Daniyele 12:2 kyamba kuma sayi athu anda kwafukununa nakale ni “sonyi ni lusebhu lu nangenena.” Kiki kilombolola kwila mukonda dyakukamba kubelesela o itumu ya Jihova, o majina mâ kanda kwasoneka mu divulu dya mwenyu. Muveji dya kutambula o mwenyu wakalelaku, anda tambula o lusebhu lunangenena, mba anda “kwabwikisa.” Kyenyiki o divulu dya Daniyele 12:2 dya muzwela yalungu ni athu anda kwafukununa kyoso kyandabhita o difukunukinu dya athu. * (Dij. 20:12) Kyenyikiphe amukwa anda tambula o mwenyu wakalelaku, amoxi kana.
AVULU ANDA KWAKWATEKESA KUKALA ATHU AYUKA
9-10. Ananyi anda bhenya kala o “mwanya wa dyulu”? O kiki kyanda bhita thembu kuxi?
9 Tanga Daniyele 12:3. Ihi dingi yanda bhita mu “thembu ya phaxi”? O divulu dya Daniyele 12:2, 3 ditutangela we o kima kyamukwa kyanda bhita kyoso kyandabhwa o hadi ya dikota.
10 Ananyi anda bhenya kala “o mwanya wa dyulu”? O izwelu ya Jezú yala mu divulu dya Matesu 13:43 itukwatekesa ku tambwijila o kibhwidisu kiki: “Mu kithangana kyenyókyo, o athu ayuka anda bhenya kála o dikumbi, mu Utuminu wa Tata yâ.” Kala kilondekesa o jivelusu jala ande dya velusu yiyi, Jezú wa kexile muzwela yalungu ni “an’a Utuminu,” o jiphange jê, o Jikidistá ja undu anda sidivilane kumoxi mu Utuminu wa dyulu. (Mat. 13:38) Kyenyiki Daniyele 12:3 yamuzwela yalungu ni Jikidistá ja undu ni kikalakalu kyanda bhanga mu Utuminu ya Midi ya Mivu.
Mu midi ya mivu o Jikidistá ja undu andakala kumoxi ni Jezú mu kikalakalu kya kulonga o athu yalungu ni Jihova mungongo yoso (Tala okaxi 11)
11-12. Mu midi ya mivu o Jikidistá ja undu andabhanga ihi?
11 Kyebhi o Jikidistá ja undu anda kwatekesa “athu avulu kusanga o kuyuka”? Mu midi ya mivu o Jikidistá ja undu andakala ku moxi ni Jezú Kidistu mu kikalakalu kya kulonga o athu yalungu ni Jihova. Mukonda o Jikidistá ja undu, kanda kala ngó Jisobha kana, maji anda kala we akunji. (Dij. 1:6; 5:10; 20:6) Kala akunji, ene anda kwatekesa o athu, kiki kilombolola kwila bhofele bhofele ene anda kwatekesa oso mu ixi kukala athu a yuka. (Dij. 22:1, 2; Ize. 47:12) O Jikidistá ja undu anda sanguluka mu kubhanga o kikalakalu kiki!
12 Ananyi anda kwakwatekesa kukala athu ayuka? O athu anda kwafukununa, o athu andabhuluka ku Alumajedone, ni twana twoso anda kwavwala ku mundu wa ubhe. Kudisukilu dya midi ya mivu, athu oso mu ixi anda kala athu ayuka. Kyenyiki thembu kuxi o athu enya anda kwasoneka o majina mâ mu divulu dya mwenyu mu ukexilu unangenena?
O POLOVA YA SUKINA
13-14. Ande dyakutambula o mwenyu wakalelaku, o athu ayuka andabhinga kubhanga ihi?
13 Twabhingi kulembalala kwila, o kukala muthu wayuka ki kilombolola kuma o muthu wandatambula kya o mwenyu wakalelaku. Xinganeka ya bhiti ni Adá ni Eva. Ene exile athu ayuka, maji phala kukala ni mwenyu wakalelaku atokalele kubelesela o itumu ya Jihova Nzambi. Majiphe ene abhukumukina Jihova.—Lo 5:12.
14 Kudisukilu dya midi ya mivu o athu oso mu ixi anda kala athu ayuka. O kwila ene anda suluka mu kubelesela Jihova kate ku hádya ni hádya? Inga andakala kala Adá ni Eva—sumbala ene exile athu ayuka, maji akambele kubelesela Jihova ? Twanda dilonga o itambwijilu ya ibhwidisu yiyi.
15-16. (a) Thembu kuxi o athu anda tena kulondekesa o ufiyele wâ kwa Jihova? (b) Kala kilondekesa o divulu dya Dijingunuinu 20:15 ihi yanda bhita ni yó anda bhukumukina Jihova ni ihi yanda bhita ni athu avulu amukwa?
15 Ku midi ya mivu Satanaji andamuta mu kaleya. Mu kithangana kyokyo, mwene kandatena kunganala dingi o athu. Maji kyoso kyandabhita o midi ya mivu Satanaji anda mukatula mu kaleya. Mwene wanda fikisa dingi kunganala o athu ayuka. O kithangana kiki, akixana o polova ya sukina. O athu oso mu ixi anda kala ni kithangana kya kulondekesa kwila ene azokela, axila o ungana wa Jihova ni dijina dyê. (Dij 20:7-10) O ima yandabhanga o athu ne mwene ni izukutisu ya Satanaji, yanda londekesa se ene atena mwene kwasoneka o majina mâ mu divulu dya mwenyu, mu ukexilu unangenena kate ku hádya ni hádya.
16 O Bibidya ituthangela kuma sayi athu anda bhukumukina Jihova, kala kyabhange Adá ni Eva, kitwejiya se akuxi. Enya kandaxikina kuzokela mba kuxila o ungana wa Jihova. Ihi yandabhita ni ene? Dijingunwinu 20:15 yamba: “Woso ka musoneka o dijina dyê mu divulu dya mwenyu, a mutakula we mu kizanga kya túbhya.” O athu yá anda bhukumukina o ungana wa Jihova andafwa, kandavutuka dingi kumwenyu. Maji sayi athu avulu kanda xikina kwanganala dingi kwa Satanaji mu polova ya sukina. Kyenyikiphe o majina mâ anda kwa soneka mu divulu dya mwenyu mu ukexilu unangenena.
IHI YANDABHITA “MU IZUWA ISUKIDILAKU?”
17. Ihi yatangela o anju kwa polofeta Daniyele yalungu ni izuwa yetu? (Daniyele 12:4, 8-10)
17 Kisangusangu kyadikota kwijiya o ima yandabhita ku hádya! Maji we o anju ya tangela polofeta Daniyele yalungu ni ima ya mu bhita mu izuwa yetu, “mu izuwa isukidilaku.” (Tanga Daniyele 12:4, 8-10; 2 Ti. 3:1-5) O anju yatangela polofeta Daniyele wixi: “O kwijiya-phe kwa k’àya ni ku dibandekesa.” Kiki kilombola kwila o jiselevende ja Nzambi eji tendela dingi kyambote o divulu dya Daniyele. O anju yamutangela we kwila mu thembu yiyi o ‘akwa phulu eji bhanga dingi o phulu ni kwila o akwa phulu ne ngó umoxi weji tendela.’
18. Kwakambe ngó bhofele ihi yandabhita ni athu ayibha?
18 Mu izuwa ya lelu o athu ene mubhanga ima yayibha mba phulu, ene afika kwila kanda kwabwika. (Mal. 3:14, 15) Maji kwakambe ngó bhofele Jezú wandafundisa o athu adifwangana ni jihombo, wanda kwasandula mwaxaxi ka athu adifu ni jimbudi. (Mat. 25:31-33) O athu ayibha kandabhuluka ku hadi yadikota, ene kanda kwafukununa we phala kukala ku mundu wa ubhe. O majina mâ kanda kwasoneka mu ‘divulu dya dilembalelu’ kala kyamba Malakiya 3:16.
19. Kindala kiki kyene o kithangana kya kubhanga ihi? Ni mukonda dyahi? (Malakiya 3:16-18)
19 Kindala kiki kyene o kithangana kya kulondekesa o kixikanu bhukaxi ka ibhangelu yetu, ni kwila kitwala mwaxaxi ka athu ayibha. (Tanga Malakiya 3:16-18.) Jihova wamukwongeka o athu kala “makembu” mê mba athu a fwama bhupholo yê. Sé phata etwenyoso twamesena kukala bhukaxi ka athu enya.
Twanda sanguluka kyavulu kyoso kitwanda mona Daniyele ni jindandu jetu ni makamba metu kyoso kyanda kwafukununa ku mundu wa ubhe! (Tala okaxi 20)
20. Kima kyahi kya kanena Jihova kwa Daniyele? Mukonda dyahi tukingila o kikumbidilu kya kikanenu kiki?
20 Etu lelu twala mu ithangana itubhekela kisangusangu. Maji ku hádya kwanda kala ima yanda tusangulukisa kyavulu. Kwakambe ngó bhofele o athu ayibha anda kwabwikisa. Mukusuluka twanda mona o kikumbidilu kya kikanenu kyatangela Jihova kwa polofeta Daniyele: “Wa kà fundumuka anga u tambula o undundu we wa ku xikamena.” (Dan. 12:13) Sé phata twamukingila ni hanji yoso, kyoso Daniyele, o makamba metu ni jindandu jetu kyanda “balumuka.” Kyenyikiphe, bhanga yoso phala kukala fiyele. Se ubhanga kiki Jihova wandasoneka o dijina dyé mu divulu dya mwenyu.
MWIMBU 80 “Lolenu, mu Mone Kuma, Jihova Wene ni Mbote”
^ Mu milongi yiyi twandamona se ihi yalunguluka mu ukexilu wetu wakutendela o izwelu yala mu divulu dya Daniyele 12:2, 3. Twandadilonga we o kikalakalu kyandabhita mu ngongo yoso kya kulonga o athu yalungu ni Jihova, ni ananyi andabhanga o kikalakalu kiki ni thembu kuxi kyandabhita. Twandamona we kyebhi o kikalakalu kiki kyandakwatekesa o athu kudisokejeka phala o polova yasukina ku disukilu dya Utuminu wa Kidistu wa Midi ya Mivu.
^ Nange o athu afu ku izuwa isukidilaku ene andadyanga kwafukununa, kyene ngó kyanda fukununa yó afu ande dya izuwa isukidilaku, mwiji ni mwiji. Se o ima ibhita mu ukexilu yú, o athu atungile mu kithangana kimoxi andatena kutambula o jindandu jâ jafu kyá. Né mwene se o ima ibhita mu ukexilu yú mba kana, o Bibidya itutangela kwila o difukunukinu dya athu andaya ku dyulu, dyandabhita sé kavwanza, “kala muthu mu kithangana kyê kyatokala.” Se o difukunukinu dya athu andaya ku dyulu dyandabhita sé kavwanza, tutena kuzwela ni kidi kyoso kwila o difukunukinu mu ixi dyandabhita we sé kavwanza.—1 Ko. 14:33; 15:23.
^ O dilombolwelu didi dya ubhe. O dilombolwelu dyala mu divulu Preste Atenção à Profecia de Daniel! kibatulu 17, ni mu A Sentinela de 1 de Julho 1987, mafwe 21-25 dyokulu kya.
^ Majiphe o divulu dya Ikalakalu 24:15 dizwela yalungu ni “athu ayuka” ni athu “akambe o kuyuka.” O divulu dya Nzwá 5:29 dizwela yalungu ni athu “abhange ima yambote” ni yó “abhange ima yayibha.” O izwelu yiyi yamuzwela yalungu ni ima yabhange o athu anda kwafukununa ande dya kufwa kwâ.
