1. Mukonda dyahi kitudiwana mu kumona kwila, o athu ku mundu yú kadyelela akwâ?

 O ATHU ku mundu yú wa Satanaji kejiya se andadyelela kwa nanyi. Mu ithangana yoso o akwa wenji, o jinguvulu ni atwameni a jingeleja, ene muluwalesa o athu. Avulu we amba kuma katena kudyelela ku makamba mâ, ku jivizinyu jâ katé mwene ku jindandu jâ. Kitudiwana dingi mu kwivwa o jihundu jiji, mukonda o Bibidya yajimbulula kyá o maka enyá. Yene yamba: ‘Mu izuwa isukidilaku . . . , o athu anda . . . kamba ufiyele, . . . anda kala akwa kutatela akwâ, . . . anda kala akwa kulungulukila akwâ.’ O izwelu yiyi ilombolola kwila, o athu ku mundu yú ejilondekesa o idifwa ya Dyabhu, o muthu kitutena kumudyelela. Mwene we o nzambi ya mundu yú.—2 Ti. 3:1-4; 2 Ko. 4:4.

2. (a) Ananyi utwatokala kudyelela ni muxima wetu woso? (b) Sayi athu ene mudibhwidisa ihi?

² Kuma tu Jikidistá, twejiya kwila twatokala kudyelela kwa Jihova. (Jel. 17:7, 8) Tudyelela ni kidi kyoso kwila mwene watuzolo ni kwila nuka wandabwazeka o makamba mê. (Jisá. 9:10) Tutena we kudyelela kwa Kidistu Jezú mukonda mwene watufwila. (1 Ph. 3:18) Twamono ku mwenyu wetu kwila o Bibidya itubhana we itendelesu itutena kudyelela. (2 Ti. 3:16, 17) Tuxikina ni muxima woso kwila, tutena kudyelela kwa Jihova, Jezú ni mu Bibidya. Maji sayi athu adibhwidisa se mu ithangana yoso atena kudyelela ku jiphange mu kilunga. Se twamba kuma kyene, mukonda dyahi tutena kwadyelela?

3. Ujitu webhi wadikota utwala nawu? (Máluku 10:29, 30)

³ Jihova watusolo phala kubhanga mbandu ya mwiji wê mu ngongo yoso. Yú ujitu wadikota, utubhekela mabesá avulu! (Tanga Máluku 10:29, 30.) Mu ngongo yoso twala ni jiphange azolo kyavulu Jihova kala kitwazolo etu, abhanga we yoso yatena phala kubelesela o itumu ya Jihova. Etu twatokala mu jixi javulu, tuzwela madimi avulu, o uzwatelu wetu ki wadifu we.  Maji né kiki twadizolo kyavulu, né mwene kyoso kitudisanga mu veji ya dyanga ni jiphange jetu. Tusanguluka we kyavulu mu kukala kumoxi ni ene phala kubheza o Tata yetu ya dyulu!—Jisá. 133:1.

4. Mukonda dyahi twabhingi kukala ku mbandu ya jiphange jetu?

⁴ Kiki kyene o kithangana kitwatokala kukala dingi ni jiphange jetu, mukonda ene mutukwatekesa kwambata o ima yatunemena. (Lom. 15:1; Nga. 6:2) Ene atukwatekesa kukula mu nzumbi ni kukolokota mu kukala makamba a Jihova. (1 Te. 5:11; Jih. 10:23-25) Banza hanji: Ihi yejibhita n’etu se kitwejikala ni kilangidilu kya jiphange mu kilunga phala kutukwatekesa kudituna o ijijidiku ya Satanaji ni ya mundu wê wayibha? Kwakambe ngó bhofele Satanaji ni athu ala ku mbandu yê andazukutisa o jiselevende ja Nzambi. Mu kithangana kyenyókyo twandaswina kyavulu mu kukala ni jiphange jetu ku mbandu yetu!

5. Mukonda dyahi sayi bhabha kubhonza kudyelela o jiphange jetu?

⁵ Maji sayi bhabha kubhonza kudyelela o jiphange jetu se ene atangela o kikutu kyetu ku athu engi. Mba nange sayi muthu mu kilunga wazwela mba wabhange kima kya tuluwalesa kyavulu. Se kiki kibhita, kitena kutubhonza kwadyelela. Né kiki ihi itena kutukwatekesa kudyelela o jiphange jetu?

6. Kyebhi o henda itena kutukwatekesa kudyelela ku jiphange jetu? (1 Kolindu 13:4-8)

⁶ Phala kudyelela o jiphange jetu, twatokala kwazola. O mukanda wa dyanga ku akwa Kolindu kibatulu 13, ulondekesa kyebhi kikala o mukwa henda. O idifwa yiyi yotumbule mu kibatutulu kiki, itena kutukwatekesa kudyelela o jiphange jetu mba kwadyelela dingi se atuluwalesa. (Tanga 1 Kolindu 13:4-8.) Mu kifika,  o velusu ya 4 yamba kuma “o mukwa henda, mukwa mwanyu.” Jihova utukwatela mwanyu né mwene kyoso kituta kituxi. Mu kiki, twabhingi kulondekesa o mwanyu ku jiphange jetu se ene azwela mba abhanga ima itena kutuluwalesa mba ku tuthathamesa. O velusu ya 5 yamba: “[O mukwa henda] kakala ni njinda ni lusolo. Kene mubanza mu ima yayibha.” Kitumesena kubanza “mu ima yayibha,” mu kubhaka ku muxima o ima yayibha yatubhange akwetu phala kwatangela dingi ku hádya. O divulu dya Ndongixi 7:9 ditutangela kwila kitutokala “kulenguluka ku kala ni njinda.” Kima kyambote kukumbidila o izwelu yala mu Efezu 4:26: “Dikumbi ki dikufwile mu njinda”!

7. Kyebhi o itendelesu itusanga mu divulu dya Matesu 7:1-5 itukwatekesa kudyelela ku jiphange jetu?

⁷ Kima kya mukwá kyanda tukwatekesa kudyelela o jiphange jetu, o kwamona kala kya amona Jihova. Nzambi wa azolo, mwene kene mubhaka mba kutonginina o ituxi yâ. Etu we kitutokala kubhanga kiki. (Jisá. 130:3) Mu veji dya kudikwatenena ku itondalu yâ, twatokala kubhanga nguzu phala kudikwatenena mu idifwa yâ yambote, ni kuxinganeka mu ima yambote itena kubhanga ene. (Tanga Matesu 7:1-5.) Né mwene kyoso kyatuluwalesa, tuxikina kwila ene kandalele kutuluwalesa, amesenene kubhanga o mbote, mukonda o mukwa henda “uxikina mu ima yoso.” (1 Ko. 13:7) O izwelu yiyi ilombolola kwila, twabhingi kudyelela ku muthu se mwene watubhange kyá kima kitubhangesa kumudyelela. *

8. Kyebhi ki utena kudilonga kudyelela o jiphange jé?

⁸ Phala kuxila muthu kubhinga kithangana, kyene we kimoxi ni kidyelelu. Kyebhi ki utena kudilonga kudyelela ku jiphange jé? Ejiyawu kyambote. Zwela nawu ande dya kumateka o kyônge ni kudisukilu. Boka kumoxi ni ene. U akwatela mwanyu, mu kwabhana kithangana nalondekesa kwila, ene athu atena kwadyelela. Ku dimatekenu, eye utena kuxinganeka kyambote mu ima iwandatangela akwenu. Kyoso o ukamba wenu ki wandaya ni kukula, wandakala dingi ni vondadi ya kwatangela o ima yamukwá. (Luk. 16:10) Maji ihi iwatokala kubhanga se phangyé ubhanga kima kikubhangesa kukamba kumudyelela? Kana kubatula o ukamba wenu ni lusolo, mu veji dya kiki mubhane hanji kithangana. Kana kwehela kwila, o kima kyakubhange muthu umoxi kikubhangesa kukamba kudyelela o jiphange jé. Phala kutendela kyambote o maka yá, twandadilonga o phangu yatuxila o jiselevende ja Jihova, akolokota mu kudyelela akwâ, sumbala abhange kima kya aluwalesa.

9. (a) Kyebhi Ana kyasuluka mu kubelesela o kitendelesu kya Jihova kya kumubheza mu balaka ya kutakanena, sumbala ni itondalu ya athu akexile musidivilamu? (b) O musoso wa Ana ukulonga ihi yalungu ni kudyelela mu itendelesu ya Jihova? (Tala o foto.)

⁹ O kwila sayi muthu wala ni kikalakalu kyadikota mu kilunga, wabhange kyá kima kya kuluwalesa? Se kyene, wandadilonga ima yavulu ku phangu ya Ana. Mu kithangana kyenyokyo, o Mukunji wa Dikota Eli, mwéne o muthu wexile ku pholo mu ubhezelu wa akwa Izalayele kwa Jihova. Maji o an’ê kexile mubhana phangu yambote. Ene akexile ni kikalakalu kyadikota, akexile mubhanga ufusa wavulu. Né kiki o tata yâ kexile mwabazela mu ukexilu watokala. Jihova kakatula Eli ku kikalakalu kyexile mubhanga. Né kiki Ana wasuluka mu kubelesela o kima kyoxinde Nzambi kya kwila, o athu atokalele kumubheza mu balaka ya kutakanena, kyoso Eli kyexile musidivila kala mukunji  wa dikota. Kyoso Eli kyamono Ana kusamba ni kuluwala kwoso, mwene wafikile kwila Ana wakowidile. Mu kithangana kyenyokyo Ana waluwalele kyavulu. Eli wamuxongwena sé kwijiya hanji kyambote o ima yakexile mubhita. (1 Sam. 1:12-16) Né kiki, Ana wakanena kwila se wejivwala mon’a diyala, wejimubheka mu balaka ya kutakanena phala kumulanga kwa Eli. (1 Sam. 1:11) O kwila kwabhingile hanji kubatula o maka alungu ni an’â Eli? Kyene mwene! Jihova wa abatula mu kithangana kyatokala. (1 Sam. 4:17) Jihova we wabesowala Ana mu kumubhana mon’a diyala, amwixana, Samuwele.—1 Sam. 1:17-20.

10. Kyebhi Sobha Davidi kyasuluka mu kudyelela akwâ sumbala athu engi amulungulukile?

¹⁰ O kwila kamba dyé dya kazola wakulungulukila kyá? Se kyene, o phangu ya Sobha Davidi yanda kukwatekesa. Mwene wexile ni dikamba amwixana Ahitofele. Kyoso mon’a Davidi, Abisalone kyamesenene kutambula o usobha wa tata yê, Ahitofele wadibundu ni Abisalone phala kulungulukila Davidi. Nange Davidi wadivu kyayibha mu kumona kwila mon’ê Abisalone ni muthu wexile mu fika kwila wexile kamba dyê amulungulukila! Maji Davidi kehela kwila, o kima kiki kyabhange Abisalone ni Ahitofele kimubhangesa kukamba kudyelela athu amukwá. Mwene wasuluka mu kudyelela kamba dyê dya mukwá, muthu wafiyele, amwixana Husayi, mwene kaxikina kulungulukila Davidi. Ima yavulu yabhangesa Davidi kudyelela Husayi. Husayi walondekesa kwila, wexile kamba dyambote, mwene wate o mwenyu wê mu kilwezu phala kubhulula Davidi.—2 Sam. 17:1-16.

11. Kyebhi selevende imoxi ya Nabale kyalondekesa kwila wadyelela Abingayile?

¹¹ Tala o phangu ya selevende imoxi ya Nabale. Davidi ni masoladi mê, ni henda yoso alange o jiselevende ja diyala mukwa Izalayele amwixana Nabale. Mu kubhita kakithangana, Davidi wabhingi kwa Nabale wexile mvwama, kima kyosokyoso kya kudya kyamesenene kwabhana mwene. Kyoso Nabale kyaditunu o kima kyabhingi Davidi, Davidi njinda yamukwata, wamesenene kujibha o mayala oso kubhata dya Nabale. Sayi selevende ya Nabale watangela o maka yá kwa muhatu wa Nabale, Abingayile. Kuma watokalele ku dibhata dya  Nabale, wejidile kwila o mwenyu wê wexile bhu maku a Abingayile. Mu veji dya kulenga, mwene wadyelele kwila Abingayile wejitena kubatula kyambote o maka. Mwene wexile ni kidyelelu kiki mukonda Abingayile amwijidile kala muhatu wa kilunji. O ima yabhiti kupholo yalondekesa kyambote kwila, mwene wejitena mwene kudyelela kwa Abingayile. Abingayile ni kuswina kwoso wafidisa Davidi kubhanga o kima kyamesenene. (1 Sam. 25:2-35) Mwene wadyelele kwila Davidi wejilondekesa unjimu.

12. Kyebhi Jezú kyalondekesa kwila wadyelela o maxibulu mê sumbala ni itondalu yâ?

¹² Jezú wadyelela o maxibulu mê sumbala ni itondalu yâ. (Nzw. 15:15, 16) Kyoso Tiyaku ni Nzwá kyabhingi kwa Jezú kididi kya katunda mu Utuminu wa Nzambi, Jezú kaxinganeka kwila ene kafwamene kusidivila Jihova, kakatula ku Tiyaku ni Nzwá o ujitu wa kukala jipoxolo jê. (Mál. 10:35-40) Ku pholo, o maxibulu mê moso amulenge mu usuku kyoso kyamukwata. (Mat. 26:56) Né kiki, Jezú wakolokota mu kukala ni kixikanu kwa ene. Mwene wejidile kyambote o itondalu yâ, né kiki “mwene wasuluka mu ku azola katé kudisukilu.” (Nzw. 13:1) Jezú kyoso kyamufukununa, wabhana kikalakatu kyadikota ku 11 dya jipoxolo jê kya kwendesa o kikalakalu kya kubhanga maxibulu ni kulanga o jimbudi jê jakazola. (Mat. 28:19, 20; Nzw. 21:15-17) Ima yavulu yejibhangesa Jezú kudyelela o maxibulu mê sumbala exile akwa ituxi. Enyoso asidivila ni ufiyele woso katé kyafu. Sé phata, Ana, Davidi, o selevende ya Nabale, Abingayile ni Jezú atubhana phangu yambote ya kudyelela athu akwa ituxi.

13. Ihi itena kutubhangesa kukamba kudyelela ku tufunga?

¹³ O kwila watange kyá kima ku muthu, anga wamono kwila mwene watangela muthu wengi? Kiki kitena kuluwalesa kyavulu. Sayi kizuwa, phange yamuhatu watange kikutu ku kafunga. Mu kizuwa kyakayela, o muhatu wa kafunga waswinisa o phange yú wamuhatu, mu kumutangela yalungu ni kikutu kyatangela kwa mwadi wê. Sé phata, o phangyetu wamubhonzele kyavulu kudyelela ku kafunga. Maji o phange wabhange o kima kyatokala, wabhingi kikwatekesu. Mwene wazwela ni kafunga kengi yalungu ni maka yá, o kafunga wamukwatekesa kudyelela dingi ku tufunga.

14. Ihi yakwatekesa phange imoxi kudyelela dingi tufunga tuyadi?

¹⁴ Sayi phange ya diyala, waluwalele thembu yavulu ni tufunga tuyadi, mwene wamono kwila katenene kwadyelela. Maji mwene wamateka kuxinganeka mu yazwela phange wakulu mu nzumbi. Mwene wambe tu izwelu twofele, maji twala ni kutena kwavulu, mwene wambe: “Satanaji mwéne o nguma yetu, ko jiphange jetu kana.” O phange waxinganeka kyavulu mu izwelu yiyi, wasambe kwa Jihova, mu kusukako wabhange paze ni tufunga tuyadi.

15. Mukonda dyahi kubhinga kithangana phala kudyelela dingi o jiphange? Bhana phangu.

¹⁵ O kwila akukatula kikalakalu mu kilunga? Kiki kitena kutubhekela ndolo ku muxima. Sayi phange ya muhatu amwixana mana Grete ni many’â, exile musidivila Jihova ni ufiyele woso mu ixi ya Alemanha ku mivu ya 1930, kyoso kyafidisa o kikalakalu kya Jimbangi ja Jihova mu ixi yiyi. Mana Grete wawabhelele o kikalakalu kyakexile nakyu kya kusoneka O Mulangidi phala o jiphange jê. Maji kyoso o jiphange kyejidile kwila tat’ê wazembele o Jimbangi ja Jihova, amukatula o kikalakalu kiki. O jiphange afikile kwila mwene wejibhana o majina a jiphange jetu ku jinguma jetu. Mana Grete wadibhanene dingi ni ibhidi yamukwá. Mu mivu yoso ya Ita ya Kayadi Yabhiti ku Mundu Woso, o jiphange kexile mubhana kwa  mwene ni kwa many’â o madivulu, kexile we muzwela nawu kyoso kyexile mudisanganawu mu kikoka. Kiki kya abhekela mwene ndolo yavulu! Kuma o ndolo yavudile, mana Grete wambe kwila kyabhiti mivu yavulu phala mwene kuloloka o jiphange ni kwadyelela dingi. Maji ku disukilu, mwene wamono kwila, se Jihova waloloka o jiphange, mwene we watokalele kwaloloka. *

16. Mukonda dyahi twatokala kutolola kima kyosokyoso kitubhangesa kukamba kudyelela akwetu?

¹⁶ Se wabhiti kyá mu maka kala yá, bhanga yoso phala kudyelela dingi o jiphange jé. Nange wabhingi hanji kithangana, maji Jihova wandakubesowala mu nguzu iwamubhanga. Mu kifika, se twadile kyá kudya kwexile ni mvwenenu, twandadilanga dingi ni ima itudya. Maji kitwandakwimana kudya, mukonda m’ukulu twadile kyá kudya kwexile ni mvwenenu. Kyene we kimoxi, kitutokala kwehela kwila se phange imoxi watuluwalesa, kitwandadyelela dingi né ngó muthu umoxi. Mukonda twejiya kwila ene akwa ituxi. Kyoso kitudyelela dingi ku jiphange, twandasanguluka dingi, ni kuxinganeka ihi itutena kubhanga phala kukwatekesa mu kilunga kyetu kudidyelela.

17. Mukonda dyahi kima kyambote kudyelela akwetu? Ihi itwandadilonga mu milongi yakayela?

¹⁷ O athu ku mundu wa Satanaji ku akwâ, maji tutena kudyelela o jiphange jetu mukonda twa azolo, ene we atuzolo. O kudyelelu kuku kwandatukwatekesa kusanguluka dingi, kukala dingi kumoxi ni jiphange jetu. O ku hádya kwandatukwatekesa kyoso kitwanda dibhana ni ibhidi yavulu. Maji ihi iwatokala kubhanga se muthu wakuluwalesa, eye ku mudyelela dingi? Sota kumona o ima kala Jihova, belesela o itumu ya Bibidya, zola ni muxima woso o jiphange jé, dilonge ku misoso ya Bibidya. Tutena kujimba o ndolo itwalanayu ni kudyelela dingi akwetu. Kyoso kitubhanga kiki, twandakala ni makamba avulu a “beta kota, o phange ndenge.” (Jisa. 18:24) Maji o kudyelela akwetu ki kusoko, twatokala we kubhanga yoso phala akwetu atudyelele. Mu milongi yakayela, twandamona kyebhi kitutena kulondekesa kwila, o jiphange jetu atena kutudyelela.