Kyoso kyabhiti o muvu wa 1940, o jitata jami amateka kudilonga o Bibidya ni Jimbangi ja Jihova. Ku pholo dya kwenda ene kasuluka mu kudilonga o Bibidya, maji mam’etu wasuluka mu kutambula o Mulangidi ni Despertai! Ku muvu wa 1950, o jitata jami axikina kuya mu kyônge kya dikota mu mbanza ya Nova York.

Mu kubhita kithangana Phange Lawrence Jeffries wamateka kungisota kubhata dyami mukonda mwene wandalele kyavulu kungilonga o Bibidya. Ku dimatekenu kingaxikinine o ulongelu wa Jimbangi ja Jihova wakukamba kudita mu maka a jinguvulu. Mukonda ngexile mubanza kuma se kibhukala muthu uxikina kuya mu usoladi kwejikwiza jinguma ni kutolola o ixi ya Estados Unidos. Phange Jeffries wangibhwidisa: “Xinganeka hanji se athu oso bhabha mu ixi ya Estados Unidos abheza Jihova Nzambi. Ihi yejibhita se o jinguma ejikwiza phala kubhanga ni athu?” O kibhwidisu kiki kyangikwatekesa kumona kwila o ima ingakexile mubanza yexile ima yayibha. Mukonda dya kiki ngamesenene kudilonga dingi yalungu ni Jihova.

Kyenyiki ngabhiti ola javulu ni kutanga o Despertai! ni Milangidi yaxisa mam’etu kubhata. Mu kubhita thembu ngamono kwila, o ima ingexile mutanga yexile mwene o kidi, ngaxikina kudilonga o Bibidya ni Phangyetu papá Jeffries. Anga ngamateka kuya mu yônge, ngawabhela we o ima ingakexile mukwivwa. Eme ngakituka muboki. Kyoso kingadilongo kwila o kizuwa kya Jihova kyazukama kyá, ngalungulula o ima ingamesenene ku mwenyu wami. (Sof. 1:14) Kingimesenene dingi kuya mu xikola yakatunda, ngamesenene kya ngó kulonga o Bibidya ku athu.

Mu kizuwa kya 13 kya mbeji ya Kanake ka 1956, ngazubha o xikola ya kaxi, kyabhiti izuwa itatu angibatizala mu kyônge kya ilunga. Mu kithangana kyenyókyo kingejidile kwila Jihova wejingibesowala kyavulu  mu kubhakula o mwenyu wami kwa mwene, ni kwila ngejisanguluka mukutambula milongi yavulu mu kilunga kya Jihova ni mu kudibhakula phala kulonga o athu.

Kyoso kyabhiti mbeji jisamanu, tunde kyangibatizala, ngakituka muboki wathembu yoso. Mu Kikalakalu Kietu Kia Utuminu kya mbeji ya Kayadi ka 1956 mwexile milongi yakexile muswinisa o jiphange kuya mukwatekesa mu ididi mwabhindamene dingi aboki. Eme ngamono kwila o milongi yiyi yangitokalele mwene, mukonda ngamesenene kyavulu kukwatekesa mu ididi yiyi.—Mat. 24:14.

Ngayi mu sidivila mu mbanza ya Edgefield, mu mbandu ya lwiji ya Carolina. Mu kilunga twexile ngó tu aboki atanu. Ngexile mubhana 100 ya ji ola mu mbeji imoxi. Twexile mubhanga o yônge yetu mu inzo ya phange, ngexile ni ikalakalu yavulu mu sidivisu ya kuboka ni jimbandu javulu mu yônge. Mu kukalakala kyavulu mu kilunga, ngamono kwila ngexile mudilonga dingi yalungu ni Jihova.

Sayi muhatu mutudi ungexile mudilonganê o Bibidya, wexile ni inzo mwakexile mu sumbisa jikaxá. Mwene wangibhana salu phala kukalakala nê kaxaxi ka kizuwa, watubhana we ka kididi mutwexile mu dyongeka.

Phangyetu papá Jeffries, wexile ni mona amwixana manu Jolly Jeffries, watundu ku Brooklyn, mu mbanza ya Nova York, wayi mutukwatekesa mu mbanza mu ngakexile. Sayi phange watubhana kadikalu, mwene mu ngatungile kumoxi ni manu Jolly.

Mu mbandu mu twexile, o athu ku salu exile mwafuta kitadi kyofele. Mu kukalakala mu kizuwa kya muvimba exile mu tufuta 831 mba 1247 ya jikwanza. Sayi kizuwa ngayi kusumba kudya, nga ngastala o kitadi kyoso. Mu kubhita kakithangana kweza diyala, wangibhwidisa se eme kingandalele kukalakala ni mwene phala kungifuta 415 ja jikwanza, mu kukalakala ola imoxi. Mwene wangibhana o salu phala kukalakala izuwa itatu mu kukomba o kididi mwakexile mutunga jinzo. Ngamono kwila Jihova wexile mu ngikwatekesa phala ngitene kusuluka kuboka mu mbanza ya Edgefield. Né mwene ni ibhidi yoyo, ngatenene kuya mu kyônge kya dikota kya jixi javulu, kyabhiti mu mbanza ya Nova York ku muvu wa 1958.

Mu kizuwa kya kayadi kya kyônge kya dikota kwabhiti kima kya katunda, ngejidile phange ya muhatu, muboki wa thembu yoso, amwixana mana Ruby Wadlington, wexile musidivila ku dyembu dya Gallatin, mu mbanza ya Tennessee. Kiyadi kyetu twamesenene kukalakala kala akunji a jixi jengi, kyenyiki twayi mu kyônge phala yó amesenene kudilonga mu Xikola ya Ngiliyade. Twamateka kuditumikisa mikanda, ngayi mubhanga diskulusu dya katunda mu kilunga mwakexile mana Ruby, ngamubhingi phala kukazalane. Anga ngayi mu sidivila mu kilunga kyenyókyo, étu twakazala ku muvu wa 1959.

Kyoso kingexile ni 23 kya mivu angisolo phala kukala kupholo dya kibuka kya tufunga mu kilunga kya mbanza ya Gallatin. Etu adyangele kutukunda ku kafunga ka ilunga, amwixana manu Charles Thompson. Mwene wakudile mu nzumbi, wejidile ima yavulu, né kiki ande dya kubhanga kima wexile hanji  mu ngibhwidisa o ibhindamu yexile nayu o jiphange mu kilunga ni kyebhi o tufunga twa mukwa twa ilunga, kyabatula o maka. Ngadilongo ni mwene kwila kima kyambote kubhanga ibhwidisu ni kwijiya yoso yalungu ni maka ande dya kwabatula.

Mu mbeji ya Kasambwadi ka 1964, angisolo phala kuya mu Xikola ya Ukunji wa Utuminu, o xikola yiyi yabhiti mu mbanza ya Nova York, yabhange mbeji imoxi. O alongexi angikwatekesa kuzukama dingi kwa Jihova ni kukala dingi ni hanji ya kudilonga.

Ku muvu 1965 mu mbeji ya katatu mana Ruby ni eme, atubhana o kikalakalu kya kukunda o ilunga. O ididi itwatokalele kukunda yavudile. Mu kifika, yamateka ku dyembu dya Knoxville, mu mbanza ya Tennessee, katé bhwazukamene o dyembu dya Richmond, mu mbanza ya Virginia. Twatokalele we kukunda o ilunga mu mbandu ya thunda ya Carolina, ya Kentucky, ni ku mbandu kufwila o dikumbi mu mbanza ya Virginia. Mukonda dya itumu ya jinguvulu ku Estados Unidos ngexile ngó mu kunda o ilunga mwakexile o jiphange ambundu, mukonda o ambundu ni mindele katokalele kudyôngeka kumoxi. O jiphange exile jingadyama, ngadilongo nawu kwila, kima kyambote kuwana ni akwetu abhindama, o ima itwala nayu. Sayi phange wexile kyá mu kunda o ilunga mu mivu yavulu, wangilongo disá dyakatunda. Mwene wa ng’ambela: “Se wamesena kuditunda kyambote mu kikalakalu kyé, kala uphange ya akwenu. Kana kukala xefe yâ, mukonda se ene akumono kala uphange yâ, andatena kuxikina o itendelesu yé ni kikwatekesu kyé.”

Sayi kizuwa twexile mukunda kilunga mwexile aboki ofele, mana Ruby wamateka kulonga o Bibidya ku kilumba wexile mona muhatu wakexile ni muvu umoxi. Kyoso o jiphange katenene kumulonga o Bibidya, mana Ruby wexile mumulonga mu kumutumikisa mikanda. Kyoso kitwakundu dingi o kilunga kyenyókyo, o muhatu wayi mu yônge yoso. Phange jiyadi ja ahatu aboki akatunda, ayi musidivila mwatungile o muhatu mwenyó. Ene asuluka kudilonganê o Bibidya. Mu kubhita kakithangana o muhatu amubatizala. Ku muvu wa 1995 ku Betele ya Patterson sayi munzangala wa muhatu, wakexile muzwela ni mana Ruby, mwene o mona wa muhatu wadilongo o Bibidya ni mana Ruby. Mwene ni mwadi wê akexile mudilonga mu Xikola ya Ngiliyade. Kwabhtile kyá 30 a mivu sé kudimona dingi.

Kyoso kitwexile mukunda o ilunga mu mbanza ya Florida twabhindamene dikalu, mu kusuluka twatenene kusumba dikalu, ki dyatele kitadi kyavulu. Maji mu semana yakayela o dikalu dyazangaka. Twaxindi kwa phange twejidile kuma wejitena kutukwatekesa. Mwene watumikisa mukalakadi wê, yu wayudika o dikalu. Mu kusuluka watubhana kitadi, yu waditunu kumufuta. Kiki kyatulondekesa ni kidi kyoso kwila Jihova ulanga mwene o jiselevende jê ni kwila kima kyambote kuwana ni akwetu o ima itwala nayu.

Kyoso kitwexile mukunda o ilunga, o jiphange akexile mutuzalela ku mabhata mâ. Kiki kyatukwatekesa kukala ni makamba avulu. Sayi kizuwa, ngexile musoneka o lelatodyu ya kikalakalu kitwabhange mu kilunga kimoxi, o phaphela nga ixisa kuthandu dya makina. Mu usuku, kyoso kingavutuka ngamono kwila o mona wa mivu itatu, wa jiphange jatuzalela, wasoneka we mu lelatodyu yiyi. Mu mivu yavulu, kupholo ngexile mutonoka nê mukumulembalesa kwila mwene wangikwatekesa kusoneka o lelatodyu.

Ku muvu wa 1971, twatambula o kikalakalu kya kukunda o tufunga twa ilunga mu mbanza ya Nova York. Etu twadiwana kyavulu! Mukonda mu kithangana kyenyókyo ngexile ngó ni 34 kya mivu. Eme we ngexile o phange yadyanga mumbundu kwakunda, maji ene akexile mungitambulula ni henda yoso.

Mu kukalakala kala ngi mubhidi wa tufunga twa ilunga, semana ni semana ngexile mubhanga madiskulusu mu yônge ya ilunga. Tufunga twavulu twa ilunga akexile kyá mubhanga o kikalakalu kiki mu mivu yavulu, eme ndenge. Umoxi mudyâ, o phange wabhange o diskulusu dyami dya batizu. Phange yamukwá, Theodore Jaracz, kupholo dya kwenda wabhange mbandu ku Kibuka Kya Utuminu. Kwexile we jiphange javulu akulu mu nzumbi exile musidivila ku Betele ya Brooklyn. Eme ngasangulukile kyavulu mu kumona kuma tufunga twa ilunga ni jiphange akwa Betele, akexile mungiswinisa kyavulu. Ngamono kuma ene exile tufunga twa henda adyelele ni nguzu yoso mu Mak’â Nzambi, akexile we mukwatekesa o kilunga kya Jihova ni ufiyele woso. O kulenduka kwâ kwabhebhulukisa dingi o kikalakalu kyami kya kukunda o tufunga twa ilunga.

Ku muvu wa 1974 o Kibuka Kya Utuminu kyasolo jiphange jamukwá phala kukunda o tufunga twa ilunga. Eme angisolele dingi phala kukala ngi kafunga ka ilunga. Angitumikisa mu mbandu ya lwiji ya Carolina. Maji mu kithangana kyenyókyo, o jinguvulu ku Estados Unidos kexile dingi mufidisa o jiphange ambundu kudyôngeka ni mindele. Kiki kilombolola kwila o jiphange joso ejitena kyá kukala kumoxi mu yônge. Kiki kyatusangulukisa kyavulu!

Ku muvu wa 1976, angitumikisa phala kukunda o ilunga ku mbanza ya Georgia. Eme ngidilembalala o kizuwa kingabhangele diskulusu dya thambi dya twana tutanu twambundu. Sayi muthu watele túbhya mu inzo, mu kiki enyoso ajikatele. O mam’â wakexile mu inzo yakusaka mukonda dya jifidila. O jiphange mindele ni ambundu akexile muya mu inzo ya kusaka kukunda o jitata. O henda yiyi yadikota ingamono yangibhangesa kudiwana kyavulu. O henda yiyi ilondekesa o jiselevende ja Nzambi yene mwakwatekesa kudibhana kyambote katé mwene ni ibhidi ya makota.

Ku muvu wa 1977 atusolo phala kukwatekesa mu jimbeji jofele mu kikalakalu kyakexile mubhanga ku Betele ya Brooklyn. Ku disukilu dya kikalakalu kyokyo phange jiyadi jatokalele ku Kibuka Kya Utuminu adyongeka n’eme, angibhwidisa se eme ni mana Ruby twejitena kyá kukala ku Betele. Etu twaxikina.

Mu 24 kya mivu ku Betele, ngakalakala mu Kibuka Kya Sidivisu. Mu kibuka kiki o jiphange ene mudibhana ni maka abhonzo. Ande dya kwabatula abhingi kuxinganeka kyavulu. Mu mivu yavulu o Kibuka Kya Utuminu kyene mubhana itendelesu bhukaxi ka Bibidya phala kukwatekesa o Kibuka Kya Sidivisu. O itendelesu yiyi yene mukwatekesa kutambwijila ibhwidisu yavulu, ikwatekesa mu jixikola mwene mudilonga o tufunga twa ilunga, o tufunga mu ilunga ni aboki athembu yoso. O milongi yiyi yene mukwatekesa athu avulu kukula mu nzumbi ni kukolesa o kilunga kya Jihova.

Tundé ku muvu wa 1995 ndu 2018, twexile ni ujitu wa kukunda Jibetele javulu mu ngongo yoso. Ngexile mudyongeka ni jiphange akwa ibuka ya jifiliyale, akwa Betele, akunji a jixi jengi phala kwaswinisa ni kwakwatekesa kubatula o maka akexile nawu ni kudibhana kyambote ni ibhidi yâ. Mukonda dya kiki, eme ni mana Ruby exile mutuswinisa kyavulu mu kwivwa o misoso ya jiphange. Mu kifika kyoso kitwakundu o ixi ya Ruanda ku muvu wa 2000, o misoso ya jiphange mu ixi yenyoyo yatula mwene ku mixima yetu mu kumona kyebhi o jiphange mu ixi yoso ni ku Betele kyatena kukolokota mu maka abhiti mu ixi yoso ku muvu wa 1994. Ku muvu wenyú o athu mu ixi akexile mudijibha jibha. Jiphange javulu afundu jindandu jâ ni makamba mâ. Né mwene ni ibhidi yoso yiyi, o jiphange exile ni kixikanu kyakolo, kidyelelu, ni kisangusangu kyadikota.

Kindala kiki twala kyá ni 80 a mivu ndenge. Ku 20 a mivu abhiti, ngasidivila mu Kibuka Kya Filiyale ya Estados Unidos. Eme nuka ngadilongele mu xikola ya katunda. Né kiki ngatambula o ulongelu wabeta dingi kota mu ngongo yoso, o ulongelu utubhana Jihova bhukaxi ka kilunga kyê. Kiki kyangikwatekesa kulonga o Bibidya ku athu phala ene nakale ni mbote ni mabesá katé ku hádya ni hádya. (2 Ko. 3:5; 2 Ti. 2:2) Ngamono kyebhi o njimbu ya Bibidya ikwatekesa o athu kulungulula o mwenyu wâ ni kukala ni ukamba wambote ni Mubhangi wâ, Jihova Nzambi. (Tiy. 4:8) Katé kiki, mana Ruby ni eme, twene mubhanga yoso itutena phala kusuluka mu kuswinisa o jiphange kubhana valolo ku ujitu ala nawu wa kudilonga yalungu ni Jihova ni kulonga o kidi kya Bibidya ku athu. Yú wene o ujitu wabetakota utena kukala nawu o selevende ya Jihova!