1. Kyebhi kitutena o kwijiya kwila muthu yú tutena kumudyelela?

 O MUTHU wa fiyele, ubhanga yoso phala kukumbidila o ikanenu yê, mwene usota kuzwela o kidi ithangana yoso. (Jisá. 15:4) O athu ejiya kwila atena ku mudyelela. Twamesena we kwila o jiphange jetu atudyelela. Mu kiki phe, ihi itutena kubhanga phala a tene kutudyelela?

2. Ihi itwandadilonga mumilongi yiyi?

² Kitutokala kujijidika akwetu phala kutudyelela. Twatokala kulondekesa kuma tu athu a kutudyelela. Sayi athu amba kuma, o kidyelelu kya difwangana ni kitadi, kubhonza kukisanga phala kukala nakyu. Maji phala ku kingastala ki kubhonzo. Sé phata tutena kudyelela jinga kwa Jihova, maji phe kitutokala kujijidika o athu kutudyelela, ne kiki tubhanga yoso itutena phala ene a tu dyelele. Jihova wamesena kwila tu kayela o phangu yê mukonda o “kukalakala kwê kwoso kwa ufiyele.” (Jisá. 33:4) Mwene wamesena kwila tukayela o phangu yê. (Efe. 5:1) Twanda dilonga yalungu ni jiselevende ja Jihova akayela o phangu ya Tata yâ ya dyulu, ya alondekesa kwila jifiyele. Twanda mona we idifwa itanu yanda tukwatekesa kukala tu athu a kutudyelela.

3-4. Kyebhi Daniyele kyalondekesa kwila wexile muthu wa fiyele? Ihi itwatokala kudibhwidisa?

³ Polofeta Daniyele waxisa phangu yambote kyebhi muthu kyatena kukala muthu wa fiyele, ubhangesa athu kumudyelela. Ne mwene kyoso kya mwambata ku Babilonya kala mubhika, mwene walondekesa ku athu kuma wexile muthu wa fiyele. O athu amateka kumudyelela. Bengebenge kyoso Jihova  kya mukwatekesa jimbulula o nzoji ya Sobha ya Babilonya, Nabukodonozolo. Sayi kizuwa Daniyele watangela o sobha kwila Jihova waluwalele né. Sobha yosoyoso kejisanguluka mu kwivwa o njimbu yiyi. Daniyele wabhingile kuswina phala kutula o njimbu yiyi kwa Nabukodonozolo, mukonda Nabukodonozolo wexile muthu wa ibha kinene! (Dan. 2:12; 4:20-22, 25) Mivu yavulu kupholo Daniyele walondekesa dingi kuma mwene wexile muthu wa kidyelelu, mwene wa jimbulula ni kidi kyoso o isoneku ya moneka ku palelu ya inzo ya Nguvulu ya Babilonya. (Dan. 5:5, 25-29) Mu kusuluka Ndala mukwa Medu kumoxi ni Akayedyê amono kwila Daniyele “wakexile ni muxima wabeta ujitu.” Enyoso amono kwila Daniyele “wakexe fiyele, wendelu wê ki u moneka kisému, mba mulonga.” (Da 6:3, 4) Kidi mwene, kate mwene ni jinguvulu amono kwila Daniyele wexile muthu wakumudyelela!

⁴ Kyoso ki tuxinganeka mu phangu ya Daniyele, kima kyambote kudibhwidisa: ‘Kyebhi kya ngimona ku athu kamubheza Jihova? O kwila a ngimona kala ngi muthu wa ku ngi dyelela? O kwila ngene mukumbidila o ikalakalu yami? Mukonda dyahi twatokala kutambwijila o ibhwidisu yiyi? Mukonda se athu atumona kuma tu jifiyele, kiki kyanda bhana kijingu kwa Jihova.

5. Ihi ya kwatekesa Hananiya kukala muthu wa fiyele?

⁵ Ku muvu wa 455 A.K.K. kyoso o Nguvulu Nehemiya kyazubha kutungulula o ilumbu ya Jeluzame, mwene wasolo mayala a fiyele phala kulanga kyambote o mbanza ya  Jeluzaleme. Ku yó a asolo, muthu umoxi wexile Hananiya o kabhitangu. Amusolo phala kulanga o Mbonge. O Bibidya yamba kuma Hananiya wexile “diyala dya uthu ni ujitu, mukwa wôma wa Nzambi, akwá avulu dingi ndenge.” (Neh. 7:2) Hananiya wa kumbidila kyambote o ikalakalu yatambula mukonda mwene wazolele kyavulu Jihova, mwene kamesenene kumuluwalesa. O idifwa yiyi yanda tu kwatekesa we kutudyelela mu sidivisu ya Jihova.

6. Kyebhi Tikiku kyalondekesa kwa poxolo Phawulu kuma wexile muthu wa fiyele?

⁶ Tala o phangu ya Tikiku, mwene wexile kidistá wa fiyele amudyelele kyavulu kwa poxolo Phawulu. Kyoso Phawulu kyakexile mu kaleya, mwene wadyelele Tikiku, wexile “musidivila Ngana ni ufiyele woso.” (Efe. 6:21, 22) Phawulu kabhingi ngo phala Tikiku kwambata o mikanda yasonekene ku jiphange ku Efezu ni ku Kolose maji wamubhingi we phala kwa swinisa. O phangu ya Tikiku, i tu lembalesa o jiphange javulu ja fiyele ene mulanga o ibhindamu yetu mu nzumbi.—Kol. 4:7-9.

7. Phangu yebhi itukatula mu kwijiya kwila o tufunga ni akwatekexi atufunga athu a fiyele?

⁷ Lelu twasanguluka kyavulu mukukala ni tufunga ni akwatekexi a tufunga twa fiyele mu ilunga yetu. Kala kyabhange Daniyele, Hananiya ni Tikiku, ene alanga wé kyambote o ikalakalu yâ. Mu kifika, kyoso kituya ku yônge, twejiya kuma o tufunga asolo o jiphange andabhanga o jimbandu mu kyônge kya kaxi ka semana. O tufunga asakidila kyavulu kyoso kyamona kwila o jiphange adisokejeka kyambote phala kubhanga o jimbandu jâ. Mu kifika, kyoso kitwixana o maxibulu metu phala kuya mu kyônge kya disukilu dya semana, etu twejiya ni kidi kyoso kwila sayi phange wandabhanga o diskulusu dya katunda, kandajimba kana. Twadyelela we kwila twanda kala ni madivulu phala kubhanga o kikalakalu kya kuboka! Ni kidi kyoso, twejiya kwila o jiphange a tukala kupholo atulanga kyambote mu nzumbi. Tusakidila kyavulu Jihova watubhana o tufunga! Maji kyebhi kala muthu mudyetu kyatokala kulondekesa kwila muthu wa fiyele?

8. Mukulondekesa henda ku jiphange, mukonda dyahi twatokala kudilanga? (Jisabhu 11:13)

⁸ Etu twazolo kyavulu o jiphange jetu, twamesena o mbote yâ. Maji twatokala kudilanga phala kituzwele ima yalungu ni myenyu yâ. Mu kilunga kya Jikidistá mu hama yadyanga, mwexile athu akwa “kulongolola akwa, adita mu maka angene, ni kuzwela ima ki yatokala.” (1 Ti. 5:13) Mu kidi seku muthu mudyetu wamesena kubhanga kiki. Maji xinganeka muthu ututangela kima kyalungu ni mwene, utubhinga phala ki tu tangele dingi muthu wengi. Mu kifika phange ya muhatu ututangela kima kyalungu ni mwene nange wa mu dibhana ni uhaxi wa bhonzo kyavulu mba kibhidi kyengi, maji mwene utwambela phala kituzwele muthu. Se kiki kibhita twatokala kubhanga yatubhingi mwene. * (Tanga Jisabhu 11:13.) Kindala twandamona ima yengi kitutokala ku itangela muthu wengi.

9. Kyebhi kala muthu ku mwiji utena kulondekesa kwila muthu wa fiyele?

⁹ O maka a mwiji. Kala muthu ku mwiji watokala kukondeka o maka atokala ku mwiji. Mu kifika, o diyala umona kwila o muhatu wê wala ni kifwa kibhangesa o athu kwolela,  mwene kanda tangela athu engi o kifwa kiki kya muhatu wé, mukonda wamuzolo, mwene kamesena kuluwalesa muhatu wé. (Efe. 5:33) O minzangala a wabhela we kwaxila. O jitata abhingi kuxila o twana twâ. Ene katokala kutangela o itondalu ya twana twâ ku athu engi. (Kol. 3:21) Kumbandu yengi o twana katokala kutangela o maka a mwiji ku muthu wosowoso, o maka ejibhangesa muthu ku mwiji kudivwa kyayibha. (Mate. 5:16) Se athu oso ku mwiji a kumbidila a kondeka o maka a mwiji, o ukamba ku mwiji wandakola dingi.

10. Ihi yabhingi phala kukala dikamba dya kidi? (Jisabhu 17:17)

¹⁰ Ya lungu ni makamba metu. Kithangana ni mbandu nange tumesena kudikunda ni dikamba dyetu o ima ya tukala ku muxima mba o ibhidi i twamudibhana nayu. Nange o kuzwela o ima itwamudibhana nayu kubhonza, mukonda kitwala ni ukexilu wa kuzwela ku akwetu o ima yala ku muxima wetu. Etu tuluwala se twívwa kwila kamba dyetu wazwela o ima i twamudibhana nayu ku muthu wengi. Kumbandu yamukwá, tusanguluka mu kukala ni dikamba kazwela o maka utwala nawu ku muthu wengi. Yú dikamba dya kidi “u zola mu thembu joso.”—Tanga Jisabhu 17:17.

11. (a) Kyebhi o tufunga ni ahatu’â atena kulondekesa kuma ene athu afiyele? (b) Ihi itutena kudilonga mu phangu ya kafunga wabatula maka mu kilunga mukusuluka wa dibundu ni mwiji wê? (Tala o foto.)

¹¹ Mu kilunga. O tufunga kene mu zwela o maka akaswekele, edi “kala diswamenu kiza o kitembu” phala o jiphange mu kilunga. (Iza. 32:2) Twejiya kwila tutena kuzwela ku tufunga yoso itwamubhita nayu, mukonda tudyelela kwila ene kandatangela muthu wengi. Kitutokala kwajijidika phala kututangela o kikutu kya kilunga. Twasanguluka we kyavulu mu kwijiya kwila o ahatu atufunga kene mwajijidika phala kwatangela o maka amubhita nawu o jiphange mu kilunga. Didi dibesá dyadikota! Sayi phange muhatu wa kafunga wambe: “Kyoso o jiphange mu kilunga a dikunda ni mwadi wami, kyoso ene kyabhindamena kikwatekesu mu nzumbi, mwadi  wami kene mu ngitangela o ibhindamu ya jiphange ni maka ala nawu, né mwene o majina mâ. Kiki kingisangulukisa kyavulu! Mukonda kingikwata kubanza mu maka amubhitanawu o jiphange mu kilunga, o maka kingejiya kwabatula. Kiki kingibhangesa kudizwelesa kyambote ni jiphange joso mu kilunga. Ngejiya we ni kidi kyoso kwila o maka mami mwadi wami kenemutangela muthu wengi mu kilunga, kiki ki ngi bhangesa kumudyelela kyavulu.” Etwenyoso twamesena kukala tu athu afiyele, phala akwetu atutudyelele. Maji ihi yanda tukwatekesa kukala tu athu afiyele? Tudilonge idifwa itanu.

12. Mukonda dyahi tutena kuzwela kwila o henda kyene o kidifwa kyabetakota kibhangesa kutudyelela ku akwetu? Bhana phangu.

¹² O henda kyene o kidifwa kyabetakota kibhangesa kutudyelela ku akwetu. Jezú wambe kuma o itumu yabetakota o kuzola Jihova ni akwetu. (Mat. 22:37-39) Etu twazolo Jihova, mukonda dya kiki twamesena kukayela o phangu yê yayuka mu kukala tu athu akutudyelela. Mu kifika se tuzola o jiphange jetu ki twandamwanga o maka amubhita ni jiphange jetu ku athu engi. Kitwandazwela we ima itena kwa bhekela jisonyi, ndolo yavulu ku muxima mba kwabhangesa kudivwa kyayibha.—Nzw. 15:12.

13. Kyebhi o kulenduka kwanda tukwatekesa kukala tu athu afiyele?

¹³ O kulenduka kwanda tukwatekesa kukala tu athu afiyele. O Kidistá walenduka kasota kudifumanesa mwaxaxi ka akwâ, mu kudyanga kwatangela o ima ya ubhe. (Fil. 2:3) Mwene kadilondekesa ku akwetu kuma wejiya ima yakaswekele, katokala ku ijimbulula we ku akwâ. Se tukala tu athu alenduka kitwandazwela ku akwetu o ibanzelu yetu yalungu ni milongi ki yala mu Bibidya mba mu madivulu metu.

14. Kyebhi o kutongoloka kubhangesa akwetu kutudyelela?

¹⁴ O kutongoloka kwandakwatekesa o Kidistá kwijiya o “kithangana kya kuzwela ni kithangana kya ku di xibha.” (Ndo. 3:7) Mu jixi javulu, sayi sabhu yamba kwila: “O kuzwela ulu, o kudixibha phalata.” Kiki kilombolola kwila o kudixibha kota, o kuzwela ndenge. O kiki kyene kyamba Jisabhu 11:12: “O wa tetuluk’ó, u di xibha ni mwene hudí.” Tala o phangu ya kafunga kamoxi, wala ni kikalakalu kiki mu mivu yavulu. Ene mumwixana mu ilunga yengi phala kukwatekesa kubatula maka. Sayi kafunga wene musidivilane kumoxi wambe: “Mwene udilanga kyavulu phala kazwele maka akaswekele a ilunga ku tufunga ni akwâ.” O kutongoloka kwa kafunga kaka, kwakwatekesa o tufunga twa kilunga kyê ku muxila kyavulu, mu kiki amudyelela dingi. Ene adyelela kwila mwene kandatangela o maka a kilunga kyâ ku tufunga twengi.

15. Bhana phangu ilondekesa kwila se muthu ukala mukwa kuzwela o kidi, atena kumudyelela dingi.

¹⁵ O kuzwela o kidi ukexilu wamukwa ubhangesa akwetu kutudyelela. Etu tudyelela kwa yó enemuzwela o kidi. (Efe. 4:25; Jih. 13:18) Xinganeka kwila eye wamesena kukala ni uhete wa kulonga. Mu kiki ubhinga kwa phange phala kwivwa o mbandu iwandabhanga mu kyônge. Wejibhinga kwa nanyi phala kukala neye? Muthu ukuzwela o kidi ni henda inga yó uzwela ima phala kukusangulukisa ngó? Wejisota muthu ukutangela o kidi. O Bibidya yamba: “Sembele o kubazela kwa di aneka bhu pholo ya mundu, dikwe o henda yala ngó mu kaswekele. Jifidila ji tu kwama o dikamba, ji di bhanga ijimbwete ya jihenda.”  (Jisa. 27:5, 6) Nange kubhonza kwivwa o ima yandazwela o kamba dyetu, maji kupholo o itendelesu yê yandatukwatekesa kyavulu.

16. Kala kyambe Jisabhu 10:19, mukonda dyahi twatokala kuditumina o jihanji?

¹⁶ O kuditumina jihanji. Se twamesena kuma akwetu atudyelela, etu twatokala kuditumina o jihanji. O kidifwa kiki kitukwatekesa kukamba kutangela akwetu o maka akaswekele utwejiya. (Tanga Jisabhu 10:19.) Nange ki tubhonza kulanga o jihanji jetu kyoso kitwala mu internete. Se kitudilange tutena kuzwela maka akaswekele ku athu avulu. Kyoso ki tuta njimbu mu internete, o athu a itambula ene kyá ngó ejiya se ihi yandabhanga ni njimbu yiyi, etu kitutena dingi kubhanga kima. O kuditumina jihanji kutukwatekesa we kudixibha se o jinguma jetu atujijidika kuzwela ima itwejiya kwila yandata o mwenyu wa jiphange jetu mu kilwezu. Mu jixi mwafidisa o ikalakalu yetu, kiki kibhita kyoso jiphange jetu kyamwabhanga ibhwidisu ku axiku dya ngoji. Se kiki bhita tutena kukumbidila yazwela Jisálamu 39:1: “Dikanu dyami ngi di kuta jingoji.” Etu twamesena tukala afiyele mu maka yá ni mu maka amukwá. Ki kale ku mwiji, mu kilunga mba mu kudibhana ni makamba metu, twabhingi kukala tu jifiyele. Phala akwetu kutudyelela, twatokala kuditumina o jihanji.

17. Kyebhi kitutena kukwatekesa o jiphange joso mu kilunga kudidyelela?

¹⁷ Etu tusakidila kyavulu Jihova mu kutubhana o mwiji wasanguluka, adizolo, adidyelela mudyâ ni kwila ene akwa kidi. Etu enyoso twala ni kikalakalu kya kukala tu athu afiyele. Se kala muthu mudyetu ulondekesa o henda, o kulenduka, uzwela o kidi ku jiphange jetu, ni kuditumina jihanji, o jiphange joso mu kilunga andadidyelela. Twatokala kubhanga nguzu izuwa yoso phala akwetu atudyelele. Se tukayela o phangu ya Nzambi yetu, Jihova, twandatena kulondekesa kuma tu athu afiyele mu ithangana yoso.