1. Kala kilondekesa Malakiya 3:16, divulu dyebhi dyamusoneka Jihova ni ihi yalamu?

 TUNDE ukulu Jihova wene musoneka divulu dya katunda. Mu kidi, mu divulu didi mwala o majina a jiselevende jê jafiyele kala Abele. * (Luk. 11:50, 51) Maji mwene kasuku ngó ku Abele. Jihova wamusuluka kubhanga kiki katé mwene mu izuwa yetu, mu divulu didi mwala kyá mazunda ni mazunda a majina a athu. Mu Bibidya o divulu didi adixana kala, ‘divulu dya dilembalelu,’ “divulu dya mwenhu,” ni “mukanda wa mwenyu.” Maji phe o milongi yiyi yanda zwela o divulu didi kala “divulu dya mwenyu.”—Tanga Malakiya 3:16; Dijingunwinu 3:5; 17:8.

2. Mu divulu didi mwala o majina ananyi? Kyebhi kyatena kusoneka o majina metu mu divulu didi dya mwenyu?

² Mu divulu didi mwala o majina a athu asidivila mba abheza Jihova ni ufiyele woso, yó a bhana we valolo yavulu ku dijina dya Jihova. O athu yá andatena kutambula o mwenyu wakalelaku. Lelu we se twamesena kwila o dijina dyetu dikala mu divulu didi, twatokala kukala ni ukamba wambote ni Jihova bhukaxi ka sata ya kukula ya Kidistu. (Nzw. 3:16, 36) Kikale yó ala ni kidyelelu kya kuya kudyulu mba kya kukala mu ixi katé ku hádya ni hádya, enyoso abhanga nguzu yavulu phala o majina mâ a asoneke mu divulu didi dya mwenyu!

3-4. (a) Se lelu o majina metu osoneke mu divulu dya mwenyu, o kwila twandatambula kyá o mwenyu wakalelaku? Jimbulula. (b) Ihi itwandamona mu milongi yiyi ni mu milongi yakayelaku?

³ O kwila athu oso asoneka o maji mâ mu divulu dya mwenyu ku hádya anda tambula o mwenyu wakalelaku? Phala kutambwijila o kibhwidisu kiki, tu mone ihi yazwela Jihova kwa  Mozé mu divulu dya Makatukilu 32:33. Mwene wambe: “Woso wa ngi te kituxi, mwene ngi mu jimuna mu divulu dyami.” Kiki kilombolola kwila o majina ala kyá mu divulu didi atena kwajima. Jihova utena kukatula mba kujima o majina ala kyá mu divulu didi. (Dij. 3:5) Kyenyikiphe twatokala kubhanga yoso ni yoso phala Jihova a soneke o majina metu mu divulu didi, mu ukexilu u nangenena kate ku hádya ni hádya.

⁴ Nange kiki kitubhangesa kukala ni phata. Mukifika: Ihi yamba o Bibidya yalungu ni majina osoneke mu divulu dya mwenyu ni yó akambe kwasonekamu? Thembu kuxi yó ala ni majina mu divulu dya mwenyu, andatambula o mwenyu wa kalelaku? Ihi yandabhita ni yó afu sé kudilonga yalungu ni Jihova? O kwila ene andatena kukala ni kithangana phala kusoneka o majina mâ mu divulu dya mwenyu? Twandamona o itambwijilu ya ibhwidisu yiyi mu milongi yiyi ni mu milongi yakayelaku.

MAJINA ANANYI OSONEKE MU DIVULU DYA MWENYU?

5-6. (a) Kala kyosoneke mu divulu dya Filipe 4:3, majina ananyi osoneke mu divulu dya mwenyu? (b) Thembu kuxi o majina mâ andanangenena mu divulu dya mwenyu?

⁵ Majina ananyi osoneke mu divulu didi? Phala kutambwijila o kibhwidisu kiki, twandazwela yalungu ni ibuka itanu ya athu. Mu ibuka yiyi twandamona kwila sayi athu o majina mâ osoneke mu divulu dya mwenyu, o athu amukwa kana.

⁶ O kibuka kyadyanga kya athu ala ni majina mu divulu dya mwenyu, ó athu andatumina kumoxi ni Jezú ku dyulu. O kwila lelu o majina mâ osoneke mu divulu dya mwenyu? Kyene osoneke! Kala kyatange poxolo Phawulu ku ‘akalakadi ni akwâ’ mu mbanza ya Filipe, o majina a Jikidistá a undu, a exana phala kutumina kumoxi ni Jezú, osoneke kyá mu divulu dya mwenyu. (Tanga Filipe 4:3.) Maji phala  o majina mâ anangenene mu divulu didi, ene atokala kukolokota mu ufiyele wâ. Kyoso kyandazubha kutambula o kidimbu kya sukina, kikale ande dya hadi ya dikota mba ande dya kufwa, kyene ngó o majina mâ kyandanangenena katé ku hádya ni hádya mu divulu didi.—Dij. 7:3.

7. Kala kilondekesa o divulu dya Dijingunwinu 7:16, 17 thembu kuxi o mundu wavulu wa jimbudi ja mukwa kyanda kwasoneka o majina mâ mu divulu dya mwenyu mu ukexilu unangenena kate ku hádya ni hádya?

⁷ O kibuka kya kayadi, o kibuka kya mundu wavulu wa jimbudi jamukwa. O kwila o majina mâ osoneke we kyá mu divulu dya mwenyu? Kyene mwene. Maji o kwila o majina mâ andanangenena mu divulu didi kyoso kyandabhita o Alumajedone? Kyene mwene. (Dij. 7:14) Jezú wambe kwila o athu yá adifwangana ni jimbudi “anda tambula o mwenyu wakalelaku.” (Mat. 25:46) Majiphe kyoso kyandabhita o ita ya Alumajedone, o yó andabhuluka, kandatambula kyá o mwenyu wakalelaku mu kithangana kyenyókyo. O majina mâ andakala mu divulu dya mwenyu mu ukexilu utena kujimuka. Ngana yetu Jezú, kyoso kyandatumina mu Midi ya Mivu, “wanda kwa inga ni kwa endesa bhu jihotho ja menya a mwenyu.” O athu andabelesela o itendelesu ya Kidistu ni kwila Jihova wandakwamona kala jiselevende jê ja fiyele, o majina mâ andakwasoneka mu divulu dya mwenyu mu ukexilu unangenena katé ku hádya ni hádya.—Tanga Dijingunwinu 7:16, 17.

8. Ananyi kosoneke o majina mâ mu divulu dya mwenyu? Ihi yandabhita ni ene?

⁸ O kibuka kya katatu kyalungu ni jihombo anda kwa bwika mu ita ya Alumajedone. O majina mâ kosoneke mu divulu dya mwenyu. Jezú wambe kuma, enyá “anda kwa bwikisa.” (Mat. 25:46) Ni kikwatekesu kya nzumbi ikôla, Phawulu wambe kuma, “enya anda ku afundisa ni ku abwikisa katé ku hádya ni hádya.” (2 Te. 1:9; 2 Ph. 2:9) Kyene we kyandabhita ni yó ate kituxi ku nzumbi ikôla kyoso kyakexile ku mwenyu. Ene we anda kwabwika, kandatambula o mwenyu wakalelaku. Ene kanda kwafukununa. (Mat. 12:32; Mál. 3:28, 29; Jih. 6:4-6) Kindala tudilonge yalungu ni ibuka iyadi ya athu anda kwafukununa phala kutunga mu ixi.

ANANYI ANDA KWAFUKUNUNA?

9. Kala kyojimbulule mu divulu dya Ikalakalu 24:15, ibuka yebhi iyadi anda kwafukununa phala kukala mu ixi? Mukonda dyahi twamba kuma o ibuka iyadi yiyi ki yadifu?

⁹ O Bibidya ilonga kuma, sayi ibuka iyadi ya athu ala ni kidyelelu kya kwafukununa phala kutunga mu ixi, o “athu ayuka ni athu akambe o kuyuka.” (Tanga Ikalakalu 24:15.) “O athu ayuka” yó ande dya kufwa, asidivila Jihova ni ufiyele woso. O “athu akambe o kuyuka” yó afu sé kusidivila Jihova. Mu kidi o athu yá kabhange ima yambote. O kwijiya kuma o ibuka iyadi ya athu anda kwafukununa, o kwila tutena kuzwela kuma o majina mâ osoneke mu divulu dya mwenyu? Phala kutambwijila o kibhwidisu kiki, twandadilonga kibuka mu kibuka.

10. Mukonda dyahi Jihova wandafukununa o “athu ayuka”? (Yalungu ni difukunukinu mu ixi, tanga o mbandu “Atangi Amadivulu Metu Ebhula” mu mulangidi yú.)

¹⁰ O kibuka kya kawana kyalungu ni “athu ayuka.” O athu ayuka yó ande dya kufwa, o majina mâ osonekene kyá mu divulu dya mwenyu. Maji o kwila kyoso ene kyafu, Jihova wajimi o majina mu divulu didi? Kana, enyá ala hanji mu “kilunji” kya Jihova. Mukonda Jihova “ki Nzambi ya madifundu, maji ya athu ala ku mwenyu, mukonda phala mwene, ene oso ala ku mwenyu.” (Luk. 20:38) Kiki kilombolola kuma kyoso o athu ayuka kyanda kwafukununa, ku dimatekenu o majina mâ  mu divulu dya mwenyu, anda kala hanji mu ukexilu utena kujimuka. (Luk. 14:14) Sé phata o athu ayuka, kyoso kyanda kwafukununa andatambula o ujitu wakukala “jingana m’oxi yoso.”—Jisá. 45:16.

11. O “athu akambe o kuyuka” andabhinga kudilonga ihi, ande dya kusoneka o majina mâ mu divulu dya mwenyu?

¹¹ O kibuka kya katanu ó “athu akambe o kuyuka.” O athu akambe o kuyuka, yó ande dya kufwa nange kejidile o ijila ya Jihova, mukonda dya kiki kabhangele ima yayuka. Enya o majina mâ kosonekene mu divulu dya mwenyu. Maji Nzambi wanda kwafukununa phala kwabhana kithangana phala o majina mâ osoneke mu divulu dya mwenyu. O athu yá akambe o kuyuka andabhinga kikwatekesu kyavulu. Ande dya kufwa, amoxi mudyâ akexile mubhanga ima yayibha, ima ya ufusa. Phala kwijiya o ijila yiyi, mukonda dya kiki ene andabhinga kwalonga kyebhi kyabelesela o ijila yayuka ya Jihova. Phala kwalonga kubhanga kiki, o Utuminu wa Nzambi wandakwendesa kikalakalu kyadikota kya kulonga o athu nuka akibhangele mu ngongo yoso.

12. (a) Ananyi andalonga o athu akambe o kuyuka? (b) Ihi yandabhita ni athu abhukumikina o itumu ya Jihova?

¹² Nanyi wandalonga o athu akambe o kuyuka kyoso kyandakwafukununa? O mundu wavulu ni athu ayuka anda kwafukununa. Phala o athu akambe o kuyuka atene kwasoneka o majina mâ mu divulu dya mwenyu, ene atokala kubhanga ukamba ni Jihova, kubhakula o myenyu yâ kwa Jihova ni kwa batizala. Tundé ku dyulu Jezú Kidistu ni Jikidistá a undu anda kwakwatekesa kukula mu nzumbi. (Dij. 20:4) Se bhukala muthu ubhukumukina o itumu ya Jihova, mwene kandatena kutambula o ujitu wakukala ni mwenyu wakalelaku, né mwene se ukala kyá ni hama ya mivu. (Iza. 65:20) Jihova ni Jezú atena kutanga o mixima ya athu, maji ene kandakwehela muthu wosowoso kubhanga kima kyayibha ku mundu wa ubhe.—Iza. 11:9; 60:18; 65:25; Nzw. 2:25.

 IHI ILOMBOLOLA KUFUKUNUNA O ATHU PHALA KUTAMBULA O MWENYU NI KWAFUNDISA?

13-14. (a) Mu ukulu kyebhi kitwexile mutendela o izwelu ya Jezú yala mu divulu dya Nzwá 5:29? (b) Izwelu yebhi yala mu velusu yiyi itena kutukwatekesa kutendela o maka enyá?

¹³ Jezú wajimbulula yalungu ni athu anda kwafukununa phala kukala mu ixi. Mwene wambe kiki: “Ki mu diwane mukonda dya ima yiyi, kuma kithangana kikiza kya athu oso ala mu jimbila kwívwa o dízwi dyê, ni kutunda-mu. Oso abhange ima yambote, anda kwa fukununa phala kutambula o mwenyu, oso abhange ima yayibha, anda kwa fukununa phala kwa fundisa.” (Nzw. 5:28, 29) Ihi yamesenene kuzwela Jezú?

¹⁴ Mu ukulu twexile mutendela kwila, Jezú wexile muzwela o ima yandabhanga o athu kyoso kyanda kwafukununa. Kifwa sayi athu anda kwafukununa ni kubhanga ima yambote, maji o athu amukwá anda kwafukununa ni kubhanga ima yayibha. Majiphe Jezú kazwela kwila o athu andatunda mu jimbila andabhanga ima yambote mba ima yayibha. Mwene wazwela yalungu ni ima yabhiti kyá. Mu velusu yiyi mwene wazwela yalungu ni athu “abhange ima yambote” ni yó “abhange ima yayibha.” Kiki kilondekesa ni kidi kyoso kwila mwene wamuzwela o ima abhange ande dya kufwa. O milongi yiyi ya ubhe mwene, mukonda ku mundu wa ubhe seku muthu wandabhanga dingi o ima yayibha. O athu akambe o kuyuka abhange o ima ande dya kufwa. Mu kikiphe, kyebhi kitutena kutendela o izwelu ya Jezú kyoso mwene kyambe kuma sayi athu anda “kwa fukununa phala kutambula o mwenyu,” o athu akamukwa anda “kwa fukununa phala kwa fundisa”?

15. Ananyi anda “kwa fukununa phala kutambula o mwenyu,” ni mukonda dyahi?

¹⁵ O athu ayuka, abhange o ima yambote ande dya kufwa, “anda kwafukununa” phala kutambula o mwenyu, mukonda o majina mâ osoneke kyá mu divulu dya mwenyu. Kiki kilombolola kwila o difukunukinu dya athu “abhange ima yambote” otumbule mu divulu dya Nzwá 5:29; dyene dimoxi dya “athu ayuka “ otumbule mu divulu dya Ikalakalu 24:15. O ulongelu yú wa kidi mwene, mukonda dya ima yosoneke mu divulu dya Loma 6:7 yamba: “Woso wafu a muloloka o ituxi yê.” Kiki kilombolola o ituxi yate o athu ayuka ande dya kufwa, Jihova walolokayu kyá mba wa ijimi kyá, mwene ulembalala ngó o ufiyele wâ. (Jih. 6:10) O athu ayuka, ku mundu wa ubhe andabhinga kukala fiyele kwa Jihova phala kusoneka o majina mâ mu divulu dya mwenyu.

16. Mu ukexilu webhi o athu “anda kwa fukununa phala kwa fundisa”?

¹⁶ Abhaphe o yalungu ni athu exile mubhanga ima ibha ande dya kufwa? Sumbala o ituxi yâ yololoke, ene kasidivila Jihova kyoso kyexile ku mwenyu. O majina mâ kosoneke luwa mu divulu dya mwenyu. O divulu dya Nzwá 5:29 yamba o athu abhange o ima yayibha “anda kwa fukununa” o athu ya ene amoneka mu divulu dya Ikalakalu 24:15, kuma o “athu akambe o kuyuka.” Ene “anda kwa fukununa phala kwa fundisa.” * O kufundisa kwâ kulombolola kwila, ene anda kwafukununa phala kwatonginina. (Luk. 22:30) Kiki kyandakala o kithangana phala kumona se anda kwasoneka o majina mâ mu divulu dya mwenyu. Se o athu yá akambe o kuyuka adituna kubhanga o ima yayibha yexile mubhanga mu ukulu ni kudibhakula kwa Jihova, ene andatena  kwasoneka o majina mâ mu divulu dya mwenyu.

17-18. O athu anda kwafukununa andabhinga kubhanga ihi? Kala kizwela Dijingunwinu 20:12, 13, o athu anda kwafukununa anda kwafundisa mu ihi?

¹⁷ Mu Utuminu ya Midi ya Mivu mwandakala mikanda ya ubhe. O athu ayuka ni athu akambe o kuyuka anda kwafukununa, andabhinga kudilonga o ijila yanda sangamu. Yá ene o maka amono Nzwá mu kisuma kyê Mwene wambe: “Ngamono o madifundu, o makota ni jindenge emana bhu pholo ya kyandu, nga mono we mikanda yo jikule. Maji ajikula mukanda wa mukwa: O mukanda wa mwenyu. O madifundu a afundisa mu ima yosoneke mu mikanda, kala muthu a mu fundisa mu ibhangelu yê.”—Dij. 20:12, 13.

¹⁸ O athu anda kwafundisa mu ihi? O kwila anda kwafundisa mukonda dya ituxi yatele ande dya kufwa? Kana! Twatokala kudilembalala kuma o muthu kyoso kyafwa, o ituxi yê a iloloka kyá. O “ibhangelu” yâ, ko ima yabhange ande dya kufwa. Mu kiki, ene andakwafundisa mu ima yandabhanga ku mundu wa ubhe, mukonda kwenyoko ene andakwijiya kyá o ijila ya Jihova. Kiki kyandabhita we ni athu afiyele otumbule mu Bibidya kala Nowé, Samuwele, Davidi ni Daniyele. Ene andabhinga kudilonga ima yalungu ni Jezú Kidistu, kukala ni kixikanu ku sata ya Kidistu. Se o mayala ya afiyele andabhinga kudilonga ima yavulu, xinganeka o athu akambe o kuyuka anda kwafukununa?

19. Ihi yandabhita ni yó eha kusidivila Jihova?

¹⁹ Maji ihi yandabhita ni yó eha o ujitu wa kusidivila Jihova? Dijingunwinu 20:15 yamba: “Woso ka musoneka o dijina dyê mu divulu dya mwenyu, a mutakula we mu kizanga kya túbhya.” Kyene mwene, enyá kandakala ni ujitu wa kwafukununa. Mu kiki twatokala kusuluka mukubhanga nguzu phala o majina metu akale mu divulu dya mwenyu katé ku hádya ni hádya!

20. Kisangusangu kyebhi kitwandakala nakyu mu Utuminu wa Midi ya Mivu ku hádya? (Tala ofoto yakapa.)

²⁰ O kithangana kya Utuminu wa Midi ya Mivu kyandakala kithangana kya kisangusangu! Kwandabhita ima yavulu yambote, kyadyanga o kikalakalu kyadikota kya kulonga o athu yalungu ni Jihova. O kikalakalu kiki nuka kyabhitile mu ixi. Majiphe kyandakala o kithangana kya kutonginina o athu ayuka ni athu akambe o kuyuka ni kumona se ene andabelesela o ilongesu yiyi. (Iza. 26:9; Ika. 17:31) Maji kyebhi kyandakala o kikalakalu kiki kyakulonga? Mu milongi yakayela twandadilonga dingi yalungu ni kikalakalu kiki kya ubhe.