Tutale o itambwijilu ya ibhwidisu yiyi mu Bibidya.

O kitambwijilu kya Bibidya kya ibhwidisu yiyi yala mu divulu dya Ikalakalu 24:15 yamba kuma, “kwanda kala difukunukinu dya athu ayuka ni athu akambe o kuyuka.” O athu ayuka yó asidivila Jihova ande dya kufwa, o majina mâ osoneke mu divulu dya mwenyu. (Mal. 3:16) O athu akambe o kuyuka, yó kasidivila Jihova ande dya kufwa, o majina mâ ko osoneke mu divulu dya mwenyu.

O milongi yala mu divulu dya Ikalakalu 24:15, yene yazwela Ngana Jezú mu divulu dya Nzwá 5:28, 29. Mwene wambe kuma o athu “anda kwa fukununa phala kutambula o mwenyu,” mukonda ene abelesela Jihova ande dya kufwa. Mukonda dya kiki o Bibidya yamba kuma o majina mâ osoneke kya mu divulu dya mwenyu. Majiphe o athu akambe o kuyuka “anda kwa fukununa phala kwa fundisa.” Kiki kilombolola kwila ene andakala ni kithangana kya kudilonga yalungu ni Jihova phala o majina mâ atene kwasoneka mu divulu dya mwenyu.

O Bibidya mu divulu dya Dijingunwinu 20:12, 13 ilondekesa kuma athu oso anda kwafukununa atokala kubelesela o “ima yosoneke mu mikanda.” O ima yiyi ilombola o ijila ya ubhe yandabhana Nzambi ku mundu wa ubhe. O yó kabelesela o ijila ya Nzambi anda kwabwika.—Iza. 65:20.

Daniyele 12:2 ilondekesa kwila sayi athu “a kà fukunuka” phala kutambula o “mwenyu ki wábhwa, amukwá a k’àya ku kididi kya phaxi, kwà kala o sonyi ni lusebu lu nangenena.” O izwelu yiyi yamulondekesa kwila kudisukilu dya midi ya mivu, amoxi andatambula o mwenyu akalelaku, amukwa andafwa kó kyá mwene, kandavutuka dingi ku mwenyu.—Dij. 20:15; 21:3, 4.

Phala kutendela o maka enyá tumone o kifika kiki: O athu kyoso kyamesena kukalakala, kukunda ixi yengi mba kutungamu, ene atokala kutambula mukanda mba disesa. Se ene amesena kutunga mba kukalakala mu ixi mwandaya, atambula mukanda u abhana ufolo wa kubhanga ima yavulu ni kutungamu mivu yavulu. Maji o athu ayamu ngó phala kubhita tu izuwa mba tu mbeji, atambula mukanda wengi. O athu yá phala kunangenena mu ixi yenyoyo, atokala kukala ni wendelu wambote. Kikale se ku dimatekenu atambula mukanda phala kukala tu izuwa mba tu mbeji, se ene akala ni wendelu wambote atena kukala kyá akwa ixi yenyoyo. O athu adyanga yó atambula o mukanda u abhana ufolo wa kubhanga ima yavulu, éne o athu ayuka. O athu atambula mukanda phala kukala thembu yofele mu ixi yengi, éne o athu akambe o kuyuka. Kifwaphe ene andabhinga kukala ni kixikanu kyakolo, kubelesela o itumu ya Jihova ni kukala ni wendelu wambote phala kunangenena mu Palayizu.

Jihova Nzambi ya henda, maji we mukwa kubhanga o ima ni kuyuka kwoso. (Mate. 32:4; Jisá. 33:5) O henda ya Nzambi yanda dilondekesa dingi kyoso mwene kyand fukununa o athu ayuka ni athu akambe o kuyuka. Mwene wandamesena kuma o athu oso akumbidile o itumu yê ya Bibidya. O athu oso andabelesela o itumu ya Jihova andatunga mu ixi katé ku hádya ni hádya.