1-2. Ihi isangulukisa o Jiselevende ja Nzambi? (Tiyaku 1:​22-25)

 JIHOVA ni moné wa kazola amesena kwila tusanguluka. O musoneki wa Jisálamu 119:2 wambe: “A lungu yó aluka o umbangi wê, a mu u sota mwene ni muxima woso.” Jezú wakanena: “Azediwa yó évwa o maka ma Nzambi, anga abelesela!”—Luk. 11:28.

² O abhezi a Jihova azediwa. Mukonda dyahi? O kya beta dingi kota mukonda tutanga o Mak’â Nzambi anga tuswina mu kwakumbidila.—Tanga Tiyaku 1:​22-25.

3. Mbote yahi itukatula kyoso ki tubelesela o maka ma Nzambi?

³ Kyoso ki tubelesela o maka ma Nzambi tukatula mbote mu maukexilu avulu. Mu kifika kyoso kitukumbidila itwamudilonga mu maka a Nzambi tu sangulukisa Jihova, ni kwila etu wetu tusanguluka. (Ndo. 12:13) Katuku kiki, kyoso kitukayela o itendelesu ya maka a Nzambi, o ukamba wetu ku mwiji ni mukilunga ukola dingi. Nange kiki kya kituka kidi ku mwenyu wé. Ku mbandu yamukwá, kitwene mu dibhana ni ibhidi yavulu ibhita nayu oso kene mubelesela o itumu ya Jihova. Kiki kya difu ni izwelu ya Sobha Davidi kyoso kya zubha kutumbula bhukaxi kamimbu o ngonge, o ijila ni mabatuilu a Jihova, mwene wa suku ni izwelu yiyi: “Kya kwata ku a aluka kubhanduluka kwê ku vula.”—Jisá. 19:​7-11.

4. Mukonda dyahi sayi ithangana kibonza kyavulu kukumbidila itwa mudilonga mu maka a Nzambi?

 ⁴ Mu kidi sayi ithangana kibonza kyavulu kukumbidila itwa mudilonga mu maka a Nzambi. Sumbala twala ni ima yavulu ya kubhanga, twatokala kusola kithangana phala kutanga ni kudilonga o Bibidya phala kutendela yamesena Jihova kwila tu ibhanga. Twanda mona jindunge janda tukwatekesa kutanga izuwa yoso. Twanda mona we ihi yanda tukwatekesa kuxinganeka mu ima itutanga ni kumona kyebhi kitutena kukumbidila i twa dilongo ku mwenyu wetu.

KATULA KITHANGANA PHALA KUTANGA O MAKA A NZAMBI

5. Ima yebhi itukatula dingi o kithangana?

⁵ O athu ala ni ikalakalu yavulu, angastala ithangana yavulu mu kubhanga o ima izwela o Bibidya kwila yabeta kota. Mu kifika, avulu mudyetu akalakala phala kudidikila ni kudikila o miji yâ. (1 Ti. 5:8) Jikidistá javulu ene mulanga o jindandu jâ jahaxila mba akuka. Katuku o ima yiyi twala we ni ikalakalu yavulu mu kilunga, kala o kuboka o njimbu yambote. Ni ima yoso yiyi i wala nayu kyebhi ki utena kusanga kithangana?

6. Kyebhi ki utena kulondekesa kwila o kutanga o Bibidya kima kyala ni valolo ku mwenyu we? (Tala we ofoto.)

⁶ O kutanga o Bibidya kyene ‘o kima kyabetakota’ phala etu tu Jikidistá, mukiki twatokala ku kibhanga sé kufula. (Fil. 1:10) Ya lungu ni diyala dya zediwa o Sálamu ya dyanga yamba: “O ngalasa yê u i sanga mu ngonge ya Jihova; o ngonge yê yene ya banza mu mwanya ni mu usuku.” (Jisá. 1:​1, 2) Kiki kilombolola kwila, twatokala kungastala kithangana mu kutanga o Bibidya. Kyebhi o kithangana kya fwama phala kutanga o Bibidya? O kitambwijilu, kikya difu kala muthu mudyetu mwene wa tokala kusola o kithangana kyê kyafwama phala kutanga o Bibidya. O kya beta dingi kota, o kusola kithangana kyanda tukwatekesa jinga kutanga o Bibidya. Phange Victor wambe: “Eme ngawabhela kutanga o Bibidya mu kamene. Nemwene kinga wabhela kubalumuka mu kamenemene, mukithangana  kiki seko kima kitena kungilandukisa. O kitongolwelu kyami kya zele ngitena kuxinganeka kyambote.” Nange phala eye kiki kidi. Dibhwidise: ‘Kyebhi o kithangana kya fwama phala eme kutanga o Bibidya?’

XINGANEKA MU IMA I WAMUTANGA

7-8. Ihi itena kutufidisa kukatula mbote mu ima itutanga? Bhana kifika.

⁷ Se uxinda kithangana phala kutanga o Bibidya, sayi dingi kima ki watokala kudilanga nakyu. Eye wa tangele kya kima mukusuluka ki utena kukilembalala? Etwenyoso kya tubhitile kya. Kiki, kitena kubhita mukitangelu kyetu kya Bibidya. Mukifika tutena kusola kutanga ibatulu ya Bibidya. Kiki kima kyambote. Twatokala kusuwa jimbambe ni kubhanga nguzu phala kujikumbidila. (1 Ko. 9:26) Se twamesena kukatula mbote mu kitangelu kya Bibidya twatokala kubhanga dingi kima kyengi.

⁸ Tuxinganeke: o idima ibhindamena o menya amvula phala kukula. Maji se o mvula ivula o idima itena kuboba. Kyoso kikunoka kyavulu o menya kandaya koxi’a mavu, anga o idima-phe ki yanda kala kyambote. Kima kyambote kyoso o mvula kiya ni kusonoka kamwanyu-kamwanyu, mukonda dya kiki o menya andaya koxi’a mavu kiki kikwatekesa o idima kukula kyambote. Kyene we kimoxi, kitutokala kutanga o Bibidya ni lusolo-lwoso, o lusolo lu tufidisa kutendela, kulembalala ni kukumbidila o ima i twatange.—Tiy. 1:24.

9. Ihi i twatokala kubhanga se tumona kwila twamutanga o Bibidya ni lusolo lwoso?

⁹ O kwila sayi kizuwa watangele kya o Bibidya ni lusolo lwoso? Ihi iwatokala kubhanga? Tanga kamwanyu-kamwanyu phala ni utene kuxinganeka mu ima i watange mba iwamutanga kindala. Ki kubhonza kubhanga kiki. Eye utena kusola kubandekesa o kithangana kya kudilonga phala utene kuxinganeka dingi. Mba eye utena kusola kutanga jivelusu jofele ni kuxinganeka dingi mu ima iwatange kyá. Phange Victor amutumbula kya kudima wambe: “Mu kitangelu kyami kya Bibidya ngene mutanga jivelesu jofele, nange kibatulu kimoxi  ngo. Kuma ngene mutanga mukamene, ngitena kuxinganeka kizuwa kyoso o ima ingatange.” Eye utena kusola o kithangana kiwanda bhanga mu kutanga, maji kyabeta kota o kutanga kamwanyu-kamwanyu phala ni utene kuxinganeka mu ima iwatange.—Jisá. 119:97; Tala o kaxa “ Xinganeka mu ibhwidisu yiyi.”

10. Bhana kifika kilondekesa se kyebhi ki utena kukumbidila o milongi i wadilongo. (1 Tesalonika 5:​17, 18)

¹⁰ Kyoso ki utanga o Bibidya ni kuxinganeka mu ima i watange, sota we kukumbidila iwamutanga. Kyoso ki uya ni kutanga mbandu ya maka a Nzambi, dibhwidise: ‘Kyebhi ki ngitena kukumbidila o maka yá lelu mba ku hadya?’ Mu kifika xinganeka kwila wamutanga o mukanda wa 1 Tesalonika 5:​17, 18. (Tanga.) Kyoso ki uzubha kutanga o jivelusu jiji, xinganeka lukuxi lu wene mu samba, mba se wene mu samba ni muxima woso. Utena we kuxinganeka mu ima i wamesena kusakidila. Utena kubanza mu ima itatu i wamesena kusakidila Jihova. Né mwene se tungastala kithangana kyofele mu kuxinganeka, twanda tendela o maka a Nzambi ni kubhanga o ima yalamu. Se ubhanga kiki, wanda bandekesa o ukamba wé ni Jihova! Maji ihi iwatokala kubhanga se wala ni ikalakalu yavulu?

SUWA JIMBAMBE JI UTENA KUKUMBIDILA

11. Mu kutanga o Bibidya, mukondya dyahi sayi bhabha utena kuluwala bhofele? Bhana phangu.

¹¹ Kyoso ki utanga o Bibidya, sayi bhabha uluwala bhofele mukonda umona kwila sayi hanji ima yavulu iwatokala kulungulula ku mwenyu wé. Mu kifika, xinganeka kwila mu kitangelu kyé kya Bibidya wamutanga yalungu ni katungu. (Tiy. 2:​1-8) Umona kwila watokala kutalatala kyambote o athu, eye usola kukibhanga. Mu kizuwa kya kayela, utanga jivelusu jilondekesa kwila watokala kulanga o ima i uzwela. (Tiy. 3:​1-12) Eye umona kwila sayi ithangana wene muzwela ima yayibha, iluwalesa akwenu. Usola kuzwela ima yanda swinisa akwenu. Mu kizuwa kya kayela utanga kwila kiwatokala kukala ni ukamba ni mundu yú. (Tiy. 4:​4-12) Umona kwila watokala kudilanga ni ima i wene mutanga, kutala mu mutelembe wa izuzumbya ni mimbu i wene mukwivwa. Mu kizuwa kya mukwa, nange umona kwila kubhonza bhofele kulungulula o ima yoso yiyi.

12. Mukonda dyahi kiwatokala kuluwala se umona kwila wabhingi kulungulula ima yavulu? (Tala we kulwiji.)

¹² Kana kuluwala se umona kwila wabhingi kulungulula ima yavulu. Kiki kilombolola kwila eye u muthu walenduka, wala ni muxima wambote. O muthu walenduka, mu kutanga o Bibidya usota we o ukexilu watokala  kulungulula. a Lembalala kwila twanda suluka mu kuzwata “o ukexilu wa ubhe.” (Kol. 3:10) Ihi yanda kukwatekesa kusuluka mu kukala u mukwa kukumbidila o Mak’â Nzambi?

13. Webhi o ukexilu wambote phala utene kukumbidila o ima i watange? (Tala we ofoto.)

¹³ Mu veji dya kukumbidila o ima yoso mu kithangana kimoxi, utena kusuwa o mbambe ya kukumbidila kima kimoxi mba ima iyadi. (Jisa. 11:2) Utena kusota kubhanga o ndunge yiyi: Soneka mu phaphela o ima i wamesena kulungulula, anga sola kima kimoxi mba ima iyadi iwamesena kulungulula, o ima yamukwa utena ku ibhanga ku pholo dya kwenda. Watokala kumateka kwebhi?

14. Mbambe yebhi i utena kumateka kusuwa?

¹⁴ Utena kusola kumateka mu kubhanga o kima ki kyakubhonzo. Mba utena kusola kulondekesa o kidifwa ki wamesena kukala nakyu. Kyoso ki wanda sola o kima kiki, tokwesa mu madivulu metu kala o Índice das Publicações da Torre de Vigia mba o Kadivulu ka Kutokwesa Phala o Jimbangi ja Jihova. Samba kwa Jihova, mubhinge phala kukubhana “o hânji ni kutena kwa kubhanga o vondadi yê.” (Fil. 2:13) Sota kukumbidila iwadilongo. Kyoso ki umona kwila watena kulungulula o idifwa yayibha, ni kukala ni idifwa yambote, wanda mona kwila ki kubhonzo kuxisa o idifwa yamukwa yayibha.

EHELA O MAK’Â NZAMBI ‘KUKWENDESA’

15. Kyebhi o mundu wa Jihova kadifu ni athu avulu ene mutanga o Bibidya? (1 Tesalonika 2:13)

¹⁵ Sayi athu amba kwila atange kya lwavulu o Bibidya. Maji o kwila ene axikina mu Bibidya? O kwila asoto kukumbidila o milongi ya Bibidya ni ku ikayela ku myenyu yâ? Kana.  Avulu mudyâ kene mubhanga kiki. Maji o mundu wa Jihova kadifu ni athu yá! Kala o Jikidistá ku hama ya dyanga, etu tuxikina o Bibidya “kala o mak’â Nzambi.” Tubhanga we yoso phala kukumbidila o itendelesu yê.—Tanga 1 Tesalonika 2:13.

16. Ihi yanda tukwatekesa kukala akwa kukumbidila o maka?

¹⁶ Sayi bhabha kubhonza kutanga o Bibidya ni kukayela o itendelesu yê, kubhonza we kusanga kithangana phala ku itanga. Mba tutena ku itanga ni lusolo lwoso, mu kiki kitwanda tena kuxinganeka mu ima itwatange. Mba tutena kutandanganya mukonda dya ima itwatokala kulungulula. Kabasa kibhidi kiwamudibhana nakyu, ni kikwatekesu kya Jihova, eye utena ku kitolola. Tukalyenu polondo phala kuxikina o kikwatekesu kiki ni tukale akwa kukumbidila o maka, kana yó evu o maka anga ajimba ni lusolo yoso yevu. Sé phata, se tutanga kyavulu o Mak’â Nzambi ni tukumbidile o itendelesu yê ku mwenyu wetu, twanda sanguluka dingi.—Tiy. 1:25.