1-2. (a) Kyoso poxolo Phawulu kyasonekena o Jikidistá akexile ku Judeya, kyebhi kyexile o mwenyu wâ? (b) Mukonda dyahi o mukanda yú wakwatekesa kyavulu o Jikidistá atungile mu Judeya?

 KYOSO Jezu kyafu ku muvu wa 33, o Jikidistá adibhanene ni izukutisu yavulu. Mu kithangana kyenyokyo kyamoneka o kilunga kya dyanga kya jikidista, ene exile mwazukutisa kyavulu. (Ika. 8:1) Mu kubhita 20 a mivu ene exile mu bhita ni nzala ni wadyama. (Ika. 11:​27-30) Maji ku muvu wa 61 K.K., o Jikidistá kexile mwazukutisa dingi. Mu kithangana kyenyokyo Jihova watumu poxolo Phawulu phala kusoneka mukanda. O itendelesu yatambula yene o ima yabhindamene ene phala kukolokota mu izukutisu ejidibhana nayu ku hadya.

² O Jikidistá abhindamene o mukanda ku Jihebelewu mu kithangana kyenyokyo, mukonda o kutululuka kwexile naku mu kithangana kyenyokyo kikweji laleka. Phawulu wabhana itendelesu yambote yeji kwatekesa o Jikidistá kudibhana ni ibhidi ku hádya. Jezú wambele kwila Jeluzaleme eji ku ibwika. O kibwikilu kiki kyazukamene kya. (Luk. 21:20) Mu kidi, Phawulu ni Jikidistá mu Judeya kejidile se o kibwikilu kyeji bhita mu kithangana kuxi. Maji o kithangana kyokyo kyasubhukile o Jikidistá exile mudisokejeka mu kukolesa o kixikanu kyâ ni kukolokota kwâ.—Jih. 10:25; 12:​1, 2.

3. Mukonda dyahi o Jikidistá lelu atokala kudilonga o mukanda ku akwa Jihebelewu?

 ³ Twanda dibhana ni hadi ya dikota, o hadi yadibhele nayu o Jikidistá Jihebelewu ndenge. (Mat. 24:21; Dij. 16:​14, 16) Mu kiki twanda dilonga itendelesu yabhana Jihova phala kukwatekesa o Jikidistá jojo, yanda kutukwatekesa we.

“KUKULA MU NZUMBI”

4. Ibhidi yebhi yadibhele nayu o Jijudé akituka Jikidistá? (Tala we ofoto.)

⁴ O Jijudé akituka Jikidistá atokalele kulungulula ima yavulu. M’ukulu, o Jijudé exile o mundu wosole wa Jihova. Jeluzaleme yexile mbanza ya katunda. Kwene kwexile o inzo ya sobha yexile mutumina o mundu wa Nzambi. Athu andalele kubheza Jihova atokalele kuya mu Jeluzaleme. O Jijudé ja fiyele exile mubelesela o Kitumu kya Mozé ni ijila yexile mubhana o atwameni a jingeleja. O ijila yiyi yalungile ni kudya, kusaya ni kyebhi kyatokalele kutalatala athu akwa jixi jengi. Maji kyoso Jezú kyafu, Jihova kexile dingi muxikina o jisata mu tembulu. Mu kiki o Jikidistá exile Jijudé kya abhonzele phala kubhanga kiki, ejidile kya o Kijila kya Mozé. (Jih. 10:​1, 4, 10) Katé mwene yó exile ni kixikanu kya kolo kala poxolo Phetele, kya abhonzele kuxikina o maka yá. (Ika. 10:​9-14; Nga. 2:​11-14) Mukonda dya ijila yiyi ya ubhe, o Jikidistá amateka kwazukutisa ku atwameni a jingeleja ja Jijudé.

5. O Jikidistá atokalele kudilanga mu ihi?

⁵ O Jikidistá mu Judeya exile mwazukutisa ku ibuka iyadi ya athu. O atwameni a jingeleja ja Jijudé afikile kwila ene axisa jingeleja ja Jijudé. Athu amukwa mu kilunga exile muzwela kuma, o Jikidistá atokalele kusuluka mu kubelesela o Kitumu kya Mozé. (Nga. 6:12) Ihi yeji kwakwatekesa kukala jifiyele kwa Jihova?

6. Phawulu waswinisa o Jikidistá kubhanga ihi? (Jihebelewu 5:14–6:1)

⁶ Mu mukanda ku akwa Jihebelewu, Phawulu waswinisa o Jikidistá kudilonga ni kuxinganeka mu Mak’â Nzambi. (Tanga Jihebelewu 5:14–6:1.) Phawulu watumbula o Mikanda ya  Hebalayiku, yu wajimbulula kwila o kidifwa kya Jikidistá kya kubheza Jihova kyabetele dingi kota, o kya Jijudé ndenge. a Phawulu waswinisa o Jikidistá kwijiya ni kutendela kyambote o kidi kya Mikanda Ikôla phala atene kutongolola o milongi ya makutu ni kudituna-yu.

7. Ibhidi yebhi itwamudibhana nayu lelu?

⁷ Kala kyabhiti ni Jikidistá Jihebelewu, lelu’idi tudisanga ni athu ene muzwela ima yayibha yalungu ni itendelesu ya Jihova. Sayi athu ene mutuzukutisa mukonda tubelesela o kitumu kya Bibidya kyalungu ni diyala kuzeka ni muhatu. O athu ku mundu kamesena kubelesela o itendelesu ya Jihova, mu ukulu ndenge. (Jisa. 17:15) Mu kiki kima kyambote kutongolola o ixinganeku yayibha ni kudituna-yu. Kitutokala kwehela o jinguma jetu kutuzozesa ni kutubhangesa kweha kusidivila Jihova.—Jih. 13:9.

8. Ihi itena kutukwatekesa kusuluka mu kukula mu nzumbi?

⁸ Phawulu wazwela ku Jikidistá Jihebelewu phala kusuluka mu kukula mu nzumbi, etu we twatokala kusuluka mu kubhanga kiki. Kiki kilombolola kwila twatokala kudilonga o Bibidya phala kwijiya kyambote Jihova ni itendelesu yê. Twatokala kusuluka mu kubhanga kiki, né mwene kyoso kyatubatizala. Ki kibhange kima o mivu itwamusidivila kya Jihova, etu enyoso twatokala kutanga ni kudilonga jinga o Mak’â Nzambi. (Jisá. 1:2) Kudilonga jinga o Bibidya kwanda bandekesa dingi o kixikanu kyetu. Phawulu wambe kwila o Jikidistá Jihebelewu abhingile kukala ni kidifwa kiki.—Jih. 11:​1, 6.

“KIXIKANU KYA KIDI KI TUBHEKELA O KUBHULUKA”

9. Mukonda dyahi o Jikidistá atokalele kukala ni kixikanu kya kolo?

⁹ O Jikidistá abhingile kukala ni kixikanu kya kolo mukonda kyeji kwakwatekesa kubhuluka kyoso o hadi yeji mateka ku Judeya. (Jih. 10:​37-39) Jezú wadimuna o akayedi’ê kwila kyoso kyeji mona o masoladi akondoloka o mbanza ya Jeluzaleme, ene atokalele kulengela ku milundu. O itendelesu ya Jezú yatokalele ku Jikidistá joso, kikale yó atungile mu Jeluzaleme kikale yó atungile mu Judeya yoso. (Luk. 21:​20-24) Kyoso o kifuxi kya masoladi kyexile mulwa ita, o athu atungile mu jisanzala exile mulengela mu mbanza mukonda dya ilumbu. Kulengela ku milundu mu veji dya kuxala mu mbanza ya Jeluzaleme, kyedile kala wowa, mu kiki ene abhingile kukala ni kixikanu kya kolo phala kubelesela Jezú.

10. O kixikanu kya kolo kyeji bhangesa o Jikidistá kubhanga ihi? (Jihebelewu 13:17)

¹⁰ O Jikidistá Jihebelewu atokalele kudyelela we yó a asolo kwa Jezú phala kwendesa o kilunga. Nange yó exile mukwendesa o kilunga abhana itendelesu yalungu ni kyebhi ni kithanganga kyebhi kyatokalele kulenga. (Tanga Jihebelewu 13:17.) Poxolo Phawulu wambela o jiphange phala ‘kubelesela yó a akexile kupholo.’ Mwene kexile muzwela kwila atokalele kwabelesela mukonda dya ungana wâ, maji atokalele kubhanga kiki mukonda adyelele ku tufunga. Kyenyiki o Jikidistá Jihebelewu abhingile kudyelela o tufunga ni kukayela o itendelesu yâ, ande dya hadi kumateka. Se o Jikidistá exile mubelesela o tufunga mu kithangana kya kutululuka, ki kyeji kwabhonza kubelesela o tufunga mu ithangana ya ibhidi.

11. Mukonda dyahi o Jikidistá atokala kukala ni kixikanu kya kolo lelu?

 ¹¹ Kala o Jikidistá Jihebelewu, etu we twabhindamena kukala ni kixikanu. Twala mu kithangana kya kwila athu avulu kaxikina kwila o dizubhilu dya mundu yú dyazukama. Ene atuxongwena mukonda dya kuxikina mu maka yá. (2 Ph. 3:​3, 4) Sumbala o Bibidya izwela yalungu ni ima yanda bhita ku hadi ya dikota, maji kwala ima yavulu kitwa ijiya. Twabhingi kukala ni kixikanu kwila o dizubhilu dya mundu yú dyanda bhixila mu kithangana kyatokala ni kwila Jihova wanda tulanga.—Haba. 2:3.

12. Ihi yanda tukwatekesa kubhuluka mu kithangana kya hadi ya dikota?

¹² Twatokala kukolesa o kixikanu kyetu mu kwila Jihova wamukwendesa “o kimbadi kya fiyele kya dimuka.” (Mat. 24:45) Kyoso o hadi yadikota yanda mateka, nange twanda tambula itendelesu yanda bhulula o myenyu yetu, kala kyatambwile o Jikidistá Jihebelewu kyoso o masoladi akwa Loma kyakondolokele Jeluzaleme. Kindala twatokala kya kudyelela ku jiphange ala ku pholo mu kilunga kya Jihova. Se kitudyelela ni kukayela o itendelesu yâ mu kindala, kyanda tubhonza we kudyelela ni kubelesela o itendelesu yâ mu kithangana kya hadi ya dikota.

13. Mukonda dyahi o kitendelesu kya Jihebelewu 13:5 kyabetele-kota?

¹³ Kyoso kyexile mu kingila kijimbwete phala kulenga, o Jikidistá Jihebelewu katokalele ‘kuzola o kitadi’ maji atokalele kuta kupholo dya myenyu yâ o vondadi ya Jihova. (Tanga Jihebelewu 13:5.) Avulu mudyâ atale hadi mukonda dya nzala ni wadyama. (Jih. 10:​32-34) Sumbala axikinine kutala hadi mukonda dya njimbu yambote, nange amukwa amateka kumona kwila o umvwama weji kwafikidila ku wadyama ni nzala. Maji o kitadi kikyeji kwabhulula kyoso Jeluzaleme kyeji ku ibwikisa. (Tiy. 5:3) O athu azolele o kitadi, nange kya abhonzele kuxisa o jinzo jâ, o jimbote jâ ni kulenga.

14. Kyebhi o kixikanu kya kolo kyanda tukwatekesa kutala o jimbote mu ukexilu watokala?

¹⁴ Se tukala ni kixikanu kya kolo kwila kwakambe ngo Jihova wanda bwikisa o mundu yú, kitwanda banza kuma o kukala ni kitadi kyavulu kyene o kima kyabeta-kota. Mu kithangana kya hadi yadikota, o kitadi ki kyanda kala ni valolo. O Bibidya yamba kwila o athu mu hadi ya dikota, “o phalata yâ a kà i takwila ngó mu jinzunga” mukonda anda mona kwila “o phalata yâ, mba o ulu wâ, ki wa kà tena ku a bhulula bhu kizuwa kya njinda ya Jihova.” (Ize. 7:19) Mu veji dya kukala ni hanji ya kukala ni kitadi kyavulu, twatokala kubhanga o ima yanda tukwatekesa kulanga o ibhindamu yetu, ya miji yetu, maji twatokala kuta kupholo o sidivisu ya Jihova. Kiki kilombolola kwila kitwatokala kuta makongo kitwa abhindamena, mba kungastala kithangana kyavulu mu kulanga o jimbote jetu. Twatokala we kudilanga phala o jimbote jetu ki jikale o ima yabeta-kota ku mwenyu wetu. (Mat. 6:​19, 24) Mu kubhixila ku disukilu dya mundu yu, twanda sola se twanda dyelela kwa Jihova mba ku jimbote jetu.

“ENU MWABHINGI KUSWINA”

15. Mukonda dyahi o Jikidistá Jihebelewu atokalele kuswina?

¹⁵ O Jikidistá Jihebelewu atokalele kuswina mukonda o maka eji mateka. (Jih. 10:36) Sumbala amoxi mudyâ adibhele ni izukutisu mu ukulu, maji avulu mudyâ kana. Phawulu wa alembalesa kwila ene atokalele kudisokejeka phala kwazukutisa, ni kukala polondo phala kukala jifiyele katé mu ufwilu wâ, kala Jezú. (Jih. 12:4) Jijudé javulu exile ni njinda yavulu  mukonda o Jikidistá jexile mudibandekesa. Mivu kudima, athu exile ni njinda abeta Phawulu kyoso mwene kyexile muboka mu Jeluzaleme. Makwinyi awana a Jijudé ndenge atele “kikutu ni kuloka kwila, keji dya ni kunwa katé kya jibha Phawulu.” (Ika. 22:22; 23:​12-14) Sumbala eji kwazemba ni kwazukutisa, o Jikidistá abhingile kusuluka ni kudyongeka phala kubheza Jihova, kuboka o njimbu yambote ni kukolesa o kixikanu kyâ.

16. Kyebhi o mukanda ku akwa Jihebelewu utena kutukwatekesa kumona o izukutisu mu ukexilu watokala? (Jihebelewu 12:7)

¹⁶ Ihi yeji kwatekesa o Jikidistá Jihebelewu kukolokota mu izukutisu? Phawulu wakwatekesa o Jikidistá kumona o mbote ijila mu kukolokota mu izukutisu. Mwene wajimbulula kwila kyoso o Kidistá kyamuzukutisa, kiki kimukwatekesa. (Tanga Jihebelewu 12:7.) Ene atena kukala ni idifwa isangulukisa Jihova, mu kubanza mu ima yambote yeji bhita mukonda dya kwazukutisa, kiki kyeji kwakwatekesa kukolokota.—Jih. 12:11.

17. Mukonda dyahi Phawulu wejidile kyambote se ihi yabhingile phala kukolokota?

¹⁷ Phawulu wambela o Jikidistá phala kuswina, ni kwila katokalele kubhwila mu izukutisu. Mwene wejidile kyambote se ihi yabhingile phala kukolokota, mukonda ande dya kukala Kidistá, mwene wexile mwazukutisa, wamono o ibhidi yexile mudibhana nayu. O kyamukwa, kyoso kyakituka Kidistá, amuzutisa kyavulu. (2 Ko. 11:​23-25) Mwene walembalesa o Jikidistá kwila, katokalele kudyelela mu nguzu yâ, maji kwa Jihova, ni kulembalala o izwelu yiyi: “Jihova mwene o mukwatekexi wami, kinganda kala ni wôma.”—Jih. 13:6.

18. Ihi yanda bhita ku hádya? O kwijiya o maka yá kutukwatekesa kyebhi kukolokota mu izukutisu?

¹⁸ Sayi jiphange mu kithangana kiki amukolokota mu izukutisu. Tutena kwakwatekesa mu kwatumbula mu misambu yetu mba mu kwabhana kima kyabhindamena. (Jih. 10:33) Maji o Bibidya yamba kwila “oso adibhakula  mu kusidivila Nzambi mu ukamba ni Kidistu Jezú, anda kwa zukutisa we.” (2 Ti. 3:12) Mu kiki-phe, etu enyoso twatokala kudisokejeka ku ima yanda bhita ku hádya. Tusulukyenu mu kudyelela kwa Jihova, mu kwijiya kwila mwene wanda tukwatekesa kukolokota mu kibhidi kyoso-kyoso kyanda kwiza ku pholo. Mu kithangana kyatokala, mwene wanda bhulula o jiselevende jê joso ja fiyele.—2 Te. 1:​7, 8.

19. Ihi itena kutukwatekesa kudisokejeka phala o hadi ya dikota? (Tala we ofoto.)

¹⁹ Sé phata o mukanda wa poxolo Phawulu ku akwa Jihebelewu wakwatekesa o Jikidistá ku hama yadyanga kudisokejeka ku izukutisu yeji dibhana nayu ku pholo. Phawulu watendelesa o jiphange phala kudilonga o Mak’â Nzambi ni kwatendela. Kubhanga kiki kweji kwakwatekesa kwijiya o milongi ya makutu ni kudituna-yu mukonda yene yeji zozesa o kixikanu kyâ. Mwene wa ambela phala kuswinisa o kixikanu kyâ phala ni lusolo atene kukayela o itendelesu ya Jezú ni ya jiphange exile mu kwendesa o kilunga. Mwene wakwatekesa o Jikidistá kuswina mu kumona o izukutisu mu ukexilu wambote, mu kubanza kwila yene ilondekesa kwila o Tat’etu ya kazola wamutulonga. Etu we twabhingi kukayela o itendelesu yiyi ya Bibidya ku mwenyu wetu. Se tubhanga kiki twanda tena kukolokota mu ufiyele wetu kwa Jihova katé ku dizubhilu.—Jih. 3:14.