1-2. Mbote yebhi itukatula mukonda dya Jihova kutubhanga mu ukexilu wa kwila tusanguluka mu kubhana?

 JIHOVA wabhange o athu phala kusanguluka dingi mu kubhana, o kutambula ndenge. (Ika. 20:35) O kwila kiki kilombolola kuma kitusanguluka kyoso kitutambula kima? Kana! Etu enyoso tusanguluka kyoso kitutambula kima. Maji tusanguluka dingi kyoso kitubhana ku akwetu. Jihova watubhange kiki phala o mbote yetu. Mukonda dyahi?

² Kuma Jihova watubhange kiki, tutena kubandekesa o kusanguluka kwetu. Tusanguluka dingi kyoso kitusota kubhana kima ku akwetu. Tusanguluka kyavulu mu kumona kwila Jihova watubhange mu ukexilu yú.—Jisá. 139:14.

3. Mukonda dyahi Jihova atena kumujimbulula kala “Nzambi ya sanguluka”?

³ Kuma o Bibidya itutangela kwila o yo abhana akwá a sanguluka, kikitubhonza kutendela se mukonda dyahi Jihova “Nzambi ya sanguluka.” (1 Ti. 1:11) Mwene wa dyanga o kubhana akwá: Seku muthu utunda Jihova mukubhana. Jihova watubhana o mwenyu, mukonda dya mwene etu “twala ku mwenyu, twene mukwenda.” (Ika. 17:28) Mukidi, “maujitu moso mambote mayuka” matunda kwa Jihova.—Tiy. 1:17.

4. Ihi yanda tukwatekesa kubandekesa o kusanguluka kwetu?

⁴ Etwenyoso nange twamesenene kufikisa o kusanguluka  kwijila mukubhana. Tutena kubhanga kiki mukukayela o phangu ya Jihova ya kubhana. (Efe. 5:1) Mumilongi yiyi, twanda dilonga o phangu yê yambote ya kubhana twanda dilonga we se ihi itutena o kubhanga setumona kwila amoxi asanguluka ni ima itwabhangela mba kana. O ilembalesu yiyi yanda tukwatekesa kusuluka ni kubandekesa o kusanguluka kwetu kwijila mukubhana.

KAYELA O PHANGU YA JIHOVA YAKUBHANA

5. Ima yebhi muxitu yene mutubhana Jihova?

⁵ Yebhi o idifwa ya Jihova yalungu ni ukexilu wê wa kubhana? Tumone ifika. Jihova utubhana itwabhindamena. Nange kitwene mukala ni ima yafwama ithangana yoso maji avulu mudyetu ala ni ima yabhindamena. Mukifika mwene wene mubhanga yoso phala tukale ni kudya izwatu ni inzo. (Jisá. 4:8; Mat. 6:​31-33; 1 Ti. 6:​6-8) O kwila Jihova wene mutubhana itwabhindamena mukonda kyamutokala? Kana ngana! Mukonda dyahi Jihova ubhanga kiki kokwetu?

6. Ihi itwadilongo ni Matesu 6:​25, 26?

⁶ Jihova utubhana itwabhindamena mukonda wa tuzolo. Tutale o izwelu ya Jezú itusanga mu divulu dya Matesu 6:​25, 26. (Tanga.) Jezú wate o ifika ya ibhangelu. Jezú wate o kifika kya jinjila yu wambe: “Ki jene mu kuna jimbutu, ki jene mu bhongolola, mba ku ji tula mu ididi ya kubhaka o idima.” Talenu ya zwela mwene kupholo: “Tat’enu-phe wene ku dyulu u ji dikila.” Mukiki Jezú webhwidisa: “Kifwa enu ki mwa betakota, o jinjila ndenge?” Ihi yamesenene kutulonga? Jihova wa mbeta kota kuzola o jiselevende je jafiyele o yama ndenge. Se Jihova o dikila o yama, tutena kudyelela kwila mwene wanda tudikila wé! Kala o tata muxitu utonginina, Jihova udikila o mwiji wê mu henda.—Jisá. 145:16; Mat. 6:32.

7. Webhi o ukexilu umoxi wa kukayela o phangu ya Jihova ya kubhana? (Tala we ofoto.)

⁷ Kala Jihova etu wetu tutena kubhana o ima ya bhindamena akwetu mukonda twazolo. Mukifika, o kwila eye wejiya phange ya diyala mba ya muhatu wabhindamena kudya mba izwatu? Jihova utena kukubhangesa kwila eye ubhana kima kwa yo wabhindama. O mundu wa Jihova a wejiya benge-benge mu ukexilu wa wakubhana mu kithangana kya mavuwa. Mukifika, mukitangana kya uhaxi wa COVID-19, jiphange ja mala ni jahatu abhana kudya ni izwatu ni ima yamukwa kwa  yo a ibhindamene. Avulu we asangela kitadi phala o kikalakalu kya mundu woso. Kiki kyakwatekesa o jiphange ku mundu woso abhidamene mukonda dya divuwa. O jiphange jiji akumbidila o izwelu itusanga mu Jihebelewu 13:16: “Ki mu jimbe we kubhanga o mbote ni kuwana ni akwenu o ima imwala nayu mukonda Nzambi usanguluka ni jisata jiji.”

8. Jihova utubhana nguzu phala kubhanga ihi? (Filipe 2:13)

⁸ Jihova ubhana kutena. O nguzu ya Jihova kiyene ni mbambe, ni kusanguluka kwoso mwene ubhana nguzu ku jiselevende jê. (Tanga Filipe 2:13.) Eye wa sambele kya mukubhinga nguzu phala kukolokota bhukaxi katendasa? Eye we nange wa sambele phala kubhinga nguzu phala kubhanga o sidivisu ya kizuwa ni kizuwa. Kyoso kyatambwijila o musambu we walungu ni kubhinga nguzu, eye utena kuxikina mu ima ya soneka poxolo Phawulu, wambe: “Mu ima yoso ngala ni nguzu, mukonda dya yó u ngibhana o kutena.”—Fil. 4:13.

9. Mu maukexilu ebhi ututena kukayela o phangu ya Jihova mu kukwatekesa akwetu ni nguzu yetu? (Tala we ofoto.)

⁹ O nguzu yetu ki ya difu ni ya Jihova, kitutena kubhana nguzu ku akwetu kala kyene mubhanga mwene, maji tutena kukayela o phangu ye mu kukwatekesa akwetu bhukaxi ka nguzu yetu. Mukifika, tutena kukwatekesa jiphange ja mala mba ja ahatu, akuka mba akate mu kulanga o jinzo jâ mba kuya mu diloja mba mu kitanda. Se kibhana tutena kudibhakula mu vondadi yetu mu kikalakalu kya kuzelesa ni kutungulula o ididi ya ubhezelu. Se tubhanga o ima yiyi ni nguzu yetu yoso twanda kwatekesa o jiphange mu ukexilu wambote.

10. Kyebhi kitutena kuswinisa akwetu bhukaxi ka izwelu yetu?

¹⁰ Kana kudijimba kwila o izwelu yala ni nguzu. O kwila eye utena kuxinganeka muthu weji katula mbote mu kumuximana? O kwila eye wejiya muthu wa bhindamena kiximbakatesu? Se kyene, bhanga yoso i utena phala o muthu yu ejiye kwila eye wamusuwu. Eye utena kuya kumukunda ku bhata dye mba kumuxinda. Kana kutandanganya kyavulu ni ima iwanda zwela. O twizwelu twa henda nange twene twabhindamena phangyé phala kukolokota mu ufiyele we mu kizuwa kyenyokyo mba kukala dingi ni nguzu.—Jisa. 12:25; Efe. 4:29.

11. Kyebhi Jihova kyabhana o kwijiya kwê kwa akwá?

¹¹ Jihova ubhana unjimu. O dixibulu Tiyaku wa soneka: “Se muthu wakambe unjimu akolokote mu ku ubhinga kwa Nzambi, mukonda mwene mukwa kubhana ku athu enyoso ni  ngalasa sé kwabazela.” (Tiy. 1:5) Mwene mukwa kubhana ku athu enyoso. Tiyaku wambe we kwila kyoso Jihova kyabhana unjimu mwene ukibhanga “sé kwabazela.” Mwene kakingila kwila tudivwa kya ibha kyoso kitumubhinga o kikwatekesu kyê.—Jisa. 2:​1-6.

12. Kithangana kyebhi kitwala nakyu phala kutangela akwetu itwadilongo mu Bibidya?

¹² Abha etu? Kyebhi kitutena ku kayela o phangu ya Jihova ya kubhana o kwijiya kwetu? (Jisá. 32:8) O mundu wa Jihova wala ni ithangana ya kutangela akwá yadilongo. Mukifika, mu ithangana yavulu tukwatekesa o aboki a ubhe mu ukunji. O tufunga akwatekesa ni mwanyu woso o akwatekexi a tufunga ni jiphange a batizala kindala kudilonga kyebhi kyatena kukumbidila o jimbandu jâ mu kilunga. O yo ala ni uhete wa kutunga ni kutungulula alonga yo kala ni uhete wasoko phala kukalakala mu ididi ya ubhezelu.

13. Mukulonga akwetu kyebhi kitutena kukayela o phangu ya Jihova ya kulonga?

¹³ O yo oso alonga akwa anda ditunda kyambote se a kayela o phangu ya Jihova ya kubhana o unjimu wê. Lembalala kwila Jihova ubhana kwijiya ni ngalasa yoso. Mukiki twamesena we kutangela itwadilongo kwa yo amudilonga. Kitwehele kulonga akwetu mukonda twala ni woma wa kutubhingana mu kididi kyetu. Né kubhaka mu kilunji kyetu o kibanzelu kya kwila: “Seku muthu wa ngilongo! Mwehele na dilonge ubheka wê.” Seku muthu mu kilunga kya Jihova watokala kubanza kiki. Muveji dya kiki mukulonga akwetu tusanguluka mu kwatangela yoso itwejiya. (1 Te. 2:8) Twamesena kwila “ene ejiye kyebhi kyatena kulonga we akwâ.” (2 Ti. 2:​1, 2) Se tutangela akwetu yoso itwejiya etwenyoso twanda bandekesa o unjimu wetu, twanda sanguluka dingi.

IHI I TWATOKALA O KUBHANGA SE MUTHU UKAMBA KUTUSAKIDILA?

14. Ihi yene mubhanga o athu kyoso kitwabhangela mbote?

¹⁴ Kyoso kitubhana ni kisangusangu, benge-benge ku jiphange jetu, ene atusakidila mujiveji javulu. Ene atena kutusakidila mu kutututumikisa kamukanda mba kutusakidila mu ukexilu wengi. (Kol. 3:15) Kyoso ene kya tusakidila, tusanguluka kyavulu mukonda dya kwabhangela kima kyoso-kyoso kyambote.

15. Ihi itutena kulembalala kyoso amoxi kyakamba kutusakidila?

¹⁵ Maji sayi ithangana o athu kene mutusakidila. Nange tumona kwila akwetu kabhana valolo mu yoso itwabhangela phala kwakwatekesa, mba katendela o kithangana, o nguzu mba o kitadi kitwangastala mu kwakwatekesa. Se kiki kibhita kitwatokala kukala ni kikote mba njinda. Lembalala o izwelu ya kibatulu kwatundu o milongi yiyi, Ikalakalu 20:35. O kusanguluka kwetu kikwijila bhu ukexilu ututambwijila. Ne kiki tutena kusola o kubhana ni kusanguluka nemwene se akwetu katusakidila. Ihi itena kutukwatekesa? Tumone maukexilu atatu.

16. Ihi yanda tukwatekesa kwila tusuluka mu kubhana ni kusanguluka?

¹⁶ Dikwatenene mukukayela o phangu ya Jihova. Mwene ubhana ima yambote ku athu kikale se ene akiwabhela mba kana. (Mat. 5:​43-48) Jihova ukanena kwila se tubhana kima ‘sé kukinga ku tu vutwila kima, o futu yetu yanda kala yadikota.’ (Luk. 6:35) Nange o “kima kiki” o kutusakidila. Kikale se atusakidila mba kana, Jihova wanda suluka mu kutufuta mumbote itwene mubhanga ku akwetu.—Jisa. 19:17; 2 Ko. 9:7.

17. Mukonda dyahi twamesena kubhana ima ku akwetu? (Luka 14:​12-14)

¹⁷ O kima kyakamukwa kitena kutukwatekesa kukayela o phangu ya Jihova, o izwelu  ya Jezú itusanga mudivulu dya Luka 14:​12-14. (Tanga.) Mukidi ki kituxi kulondekesa henda mba kwixana muthu utwejiya kwila wanda twixana we phala kudya. Maji ihi itwatokala kubhanga se tumona kwila twamubhana ngo ku muthu twamwijiya kwila wanda tubhana we? Se kiki kyamubhita twatokala kubhanga ya zwela Jezú. Twatokala kubhana ku athu utwejiya kwila ene kala ni kima phala kutuvutwila. Mukubhanga kiki twanda sanguluka mukonda twamukayela o phangu ya Jihova. O kubhana se kukingila kutuvutwila kima, kwanda tusangulukisa ne mwene se katusakidila.

18. Kitwatokala kubhanga ihi ni mukonda dyahi?

¹⁸ Kana kubanza kyayibha yalungu ni akwenu. (1 Ko. 13:7) Se akwetu kamutusakidila twatokala kudibhwidisa: ‘O kwila ene ala kya ni ukexilu yu mba adijimbi ngo?’ Mba sayi ima yengi yabhangesa kukamba kutusakidila. Sayi athu kya abhonza kusakidila. Kadivwa kyambote mukutambula, benge-benge se mukulu éne akexile mu kubhana akwá. Se tuzola o jiphange jetu ni kidi kyoso kitwanda banza kyayibha yalungu ni ene, twanda suluka mukubhana ni kusanguluka kwoso.—Efe. 4:2.

19-20. Ihi itena kutukwatekesa kukala ni mwanyu? (Tala we ofoto.)

¹⁹ Kala ni mwanyu. Sayi kizuwa Sobha Soloma wasoneka: “Takwila kudya kwé mu menya, kuma hádya ki bhita o izuwa u ku bong’ê dingi.” (Ndo. 11:1) O velesu yiyi ilondekesa kwila o athu atena kutusakidila mukubhita izuwa yavulu. Tumone yabhiti ni phangyetu ya muhatu.

²⁰ Mivu yavulu kudima o muhatu wa kafunga ka ilunga wasoneka mukanda phala phange a mubatizala, mu mukanda mwene wasoneka kwila kima kyambote kusuluka mu ufiyele wetu kwa Jihova. Mukubhita dinake dya mivo, o phange watambwijila: “Eye kiwejiya kyebhi o mukanda yu wa ngikwatekesa ku mivo yoso yiyi. Mu mukanda wé ngadivu kwila wangizolo kyavulu, nuka ngajimbile  o velusu iwasonekene.” a Kyoso kyasuku mukujimbulula o ibhidi yexile mudibhana nayu, mwene wasoneka kiki phala phangyetu: “Sayi ithangana ngamesenene kuxisa o kilunga kya Jihova. Mu ithangana yoso ngexile mulembalala o velesu iwasoneka, yene yangikwatekesa kyavulu. Mu dinake dya mivu, o yangikwatekesa dingi o mukanda wé ni velusu iwangisonekena. Xinganeka o kusanguluka kwa muhatu wa kafunga ka ilunga mukutambula o mukanda yu, kyoso kyabhitile izuwa yavulu.” Etu we atena kutusakidila mukubhita izuwa yavulu.

21. Mukonda dyahi twamesena kukayela o phangu ya Jihova yakubhana?

²¹ Kala kitwamono Jihova watubhange mu ukexilu wa kwila tusanguluka dingi mu kubhana, mu kutambula ndenge. Tudivwa kyambote kyoso kitukwatekesa o jiphange jetu ni kwila kyoso kyatusakidila. Né mwene se atusakidila mba kana, tusanguluka mukonda twabhange o kima kyatokala. Kabasa kima ki ubhana, “Jihova wala ni kyavulu kya ku ku bhana, o kiki ndenge.” (2 Mal. 25:9) O ima itubhana Jihova yabeta-kota, o ima itubhana ku akwetu ndenge! O futu ya Jihova yene o dibesá dyabeta-kota. Mu kiki, tukale polondo phala kusuluka mu kukayela o phangu ya Tat’etu ya dyulu.