1. Kwakambe ngo Jezú wanda bhanga ihi?

 TWATUNGU mu kithangana kitwanda mona izulukutu yavulu! Kwakambe ngo, Jezú wanda fundisa athu oso atungu mu ixi. Jezú wazwela yoso yeji bhita mu ixi ande dya kufundisa o athu. Mwene wabhana ku maxibulu mê o “kijimbwete kya kutukuluka kwé, ni kya dizubhilu dya mundu.” (Mat. 24:3) O kijimbwete kiki kyala mu divulu dya Matesu kibatulu 24 ni 25, mu divulu dya Máluku kibatulu 13 ni mu divulu dya Luka 21.

2. Ihi i twanda dilonga mu milongi yiyi ni mukonda dyahi o milongi yiyi yanda tukwatekesa?

² Jezú wate ifika itatu phala kutudimuna ni kwila tudisokejeke. O kifika kya jimbudi ni jihombo, kya kitanu kya ilumba yatobho ni kitanu kya ilumba yadimuka ni kifika kya jitalendu. O ifika yiyi itukwatekesa kutendela kwila Jezú wanda fundisa o athu oso bhukaxi ka ibhangelu yâ. Mu milongi yiyi twanda dilonga yalungu ni ifika yiyi. O kifika kya dyanga kyalungu ni jimbudi ni jihombo.

O JIMBUDI NI JIHOMBO

3. Thembu kuxi Jezú wanda fundisa o athu?

³ Mu kifika kya jimbudi ni jihombo, Jezú wambe kwila wanda fundisa o athu bhukaxi ka ukexilu watambula o njimbu yambote ni kwila se akwatekesa o Jikidistá ja a undu. (Mat. 25:​31-46) Mu “hadi yadikota” mwene wanda zwela se ananyi o jimbudi ni  ananyi o jihombo, ande dya Alumajedone. (Mat. 24:21) Kala kyoso o mubhidi kyasandula o jimbudi ku jihombo, Jezú wanda sandula yó akwatekesa ni ufiyele woso o Jikidistá ja a undu ku yó ka akwatekesa.

4. Kala kilondekesa Izaya 11:​3, 4, mukonda dyahi tutena kudyelela kwila Jezú wanda fundisa o athu ni kuyuka kwoso? (Tala we o foto yakapa.)

⁴ Jihova mwéne wasolo Jezú phala nakale mufundixi. O Bibidya yamba kwila Jezú wanda fundisa jinga o athu ni kuyuka kwoso. (Tanga Izaya 11:​3, 4.) Mwene umona mona yoso i bhanga o athu, ixinganeka ni yoso yanda zwela. (Mat. 12:​36, 37; 25:40) Jezú wanda kwijiya se ananyi akwatekesa o jiphange jé o Jikidistá ja undu ni ikalakalu yene mubhanga ene. a Ukexilu wabeta-kota wa kukwatekesa o jiphange ja Kidistu, o kuboka. Yó anda kwakwatekesa anda kwa mona kala “athu a yuka,” anda kala ni kidyelelu kya kutambula “o mwenyu wakalelaku.” (Mat. 25:46; Dij. 7:​16, 17) Didi dyanda kala dibesá dya dikota phala ene! Mu kukala fiyele mu hadi yadikota ni kupholo, o majina mâ anda kwasoneka “mu divulu dya mwenyu.”—Dij. 20:15.

5. Disá dyebhi ditutena kudilonga mu kifika kya jimbudi ni jihombo? Ananyi atena kukatula mbote ku kifika kiki?

⁵ Kala u muthu wafiyele. O kifika kya Jezú kya ni jimbudi ni jihombo kyalungu dingi ni yó ala ni kidyelelu kya kukala ni mwenyu wakalelaku mu ixi. Ene mulondekesa kuma amukwatekesa o jiphange ja Kidistu mu kuboka ni mu kubelesela o itendelesu ya kimbadi kya fiyele kya dimuka, kyasolo Jezú. (Mat. 24:45) Maji o yó ala ni kidyelelu kya kukala ku dyulu ene we atokala kudilanga ni kudimuka, ni kutumaka o madisá ala mu kifika kya jimbudi ni jihombo. Mukonda dyahi? Mukonda Jezú umona we o ima yoso yamubhanga, yamuxinganeka ni ima yene muzwela. Atokala we kukala jifiyele. Jezú wate ifika iyadi yalungu ni Jikidistá ja a undu, ya akwatekesa o kudilanga. O ifika yiyi yala mu divulu dya Matesu kibatulu 25. Kindala twanda dilonga o kifika kya ilumba yatobho ni ilumba yadimuka.

O ILUMBA YATOBHO NI ILUMBA YADIMUKA

6. Kyebhi o kitanu kya ilumba kyalondekesa kwila adimuka? (Matesu 25:​6-10)

⁶ Mu kifika kya ilumba, Jezú wazwela yalungu ni dikwinyi dya ilumba atundu phala kudisanga ni ngayala. (Mat. 25:​1-4) Ene atokalele kuya kumoxi ni ngayala ku fesa yê ya ukaza. Jezú wixi kitanu ‘kyadimukine’, o kitanu kya mukwá ‘kyatobhele.’ O ilumba yadimuka adisokejeka, akexile we ku mesu azele. Ene akexile polondo phala kukinga o ngayala, né mwene se o ngayala weji laleka ni kubhixila mukaxi ka usuku. Ene ambata máji mu jingalafa jâ, kumoxi ni tundeya twâ phala kumwika mwavundile. Kuma adisokejeka kyambote, ambata máji avulu phala o tundeya twâ kitujime. (Tanga Matesu 25:​6-10.) Kyoso o ngayala kyabhixila, o ilumba yadimuka ayi-nê ku fesa ya ukaza. Kyene kimoxi, o Jikidistá ja a undu kyanda kala fiyele ni kukala ku mesu azele katé kya kwiza Kidistu, anda tena kukala kumoxi ni Ngayala, Jezú, mu Utuminu wa dyulu. b (Dij. 7:​1-3) Ihi yabhiti ni kitanu kyatobho?

7. Ihi yabhiti ni kitanu kya ilumba yatobho? Mukonda dyahi?

⁷ O kitanu kya ilumba yatobho, kexile polondo kyoso o ngayala kyabhixila. Kwakambele ngo bhofele phala o tundeya twâ tujima, ene kambatele dingi máji. Kyoso kyevu kwila  o ngayala yu wiza, ene ayi musumba máji. Kyoso o ngayala kyabhixila, ene keze luwa. Mu kithangana kyenyokyo, “o ngayala wabhixila. O ilumba yakexile polondo, abokona ni mwene mu fesa ya ukaza. Anga o dibhitu, adijika.” (Mat. 25:10) Mukusuluka, kyoso o ilumba yatobho kyabhixila, kyamesenene kubokona, o ngayala wa ambela wixi: “Ki ngi m’ijiya.” (Mat. 25:​11, 12) O ilumba yatobho kexile polondo phala kukinga o ngayala. O Jikidistá ja a undu adilonga ihi?

8-9. Ihi itena kudilonga o Jikidistá a a undu ku kifika kya ilumba? (Tala we ofoto.)

⁸ Disokejeke, kala ku mesu azele. Jezú kexile muzwela kweji kala ibuka iyadi ya Jikidistá ja a undu, kibuka kimoxi kyeji kala polondo phala kukinga o dizubhilu dya mundu, kibuka kya mukwa ki kyeji kala polondo. Mu veji dya kiki, mwene wexile mujimbulula yeji bhita ni Jikidistá ja a undu se kexile polondo phala kukolokota katé ku dizubhilu dya mundu. Se ene kadilange, kanda tambula o kikowe kyâ. (Nzw. 14:​3, 4) Kiki kima kyadikota! Kikale se o kidyelelu kyetu o kutunga ku dyulu mba mu ixi, etu enyoso twatokala kudilonga ku kifika kiki. Twatokala kukala ku mesu azele, kudisokejeka ni kukala polondo phala kukolokota katé ku disukilu.—Mat. 24:13.

⁹ O kifika kya dikwinyi dya ilumba kilondekesa kwila twatokala kukala ku mesu azele ni kudilanga. Kyazubha kuta o kifika kiki, Jezú wate o kifika kya jitalendu. O kifika kiki kilondekesa kwila twatokala kukala tu akalakadi aswina.

O JITALENDU

10. Kyebhi o abhika ayadi kyalondekesa kwila exile jifiyele? (Matesu 25:​19-23)

¹⁰ Mu kifika kya jitalendu, Jezú wazwela yalungu ni abhika atatu. Abhika ayadi exile jifiyele kwa ngana yâ, o wamukwa kexile fiyele. (Mat. 25:​14-18) Abhika ayadi alondekesa kwila exile jifiyele mu kukalakala ni nguzu yoso phala kunganyala dingi kitadi phala o ngana yâ. Ande dya kuya mu ixi yengi, wabhana jitalendu ku abhik’ê, o jitalendu jexile kitadi kyavulu.  O abhika ayadi exile akalakadi a nguzu, akalakala kyambote ni kitadi kyatambula. Ihi yabhiti ni ene? Kuma ene akalakala ni nguzu yoso, atena kunganyala mu luyadi o kitadi kyatambula kwa ngana yâ. O ngana kyoso kyabhixila, wa aximana anga a “sanguluka kumoxi ni ngana” yâ. (Tanga Matesu 25:​19-23.) Maji ihi yabhiti ni mubhika wa katatu? Ihi yabhange ni kitadi kyatambula?

11. Ihi yabhiti ni mubhika wexile “kimonya” ni mukonda dyahi?

¹¹ O mubhika wakatatu watambula talendu imoxi maji wexile “kimonya.” O ngana yê wamesenene kwila mwene ukalakala kyambote ni kitadi kyatambula. Mu veji dya kiki wasweka o kitadi bhoxi. Kyoso o ngana yê kyavutuka, o mubhika kabhange kima ni kitadi kyatambula. O mubhika kalendukile. Mu veji dya kubhinga muloloki mukonda dya umonya wê, mwene wambe kwila o ngana yê wexile “muthu wabhonzo.” O mubhika yu kamuximana, o talendu yamubhana amutambula nayu, anga amukaye mu inzo ya ngana yê.—Mat. 25:​24, 26-30.

12. O abhika ayadi afiyele alombolola ananyi?

¹² O abhika ayadi afiyele alombolola o Jikidistá jafiyele a a undu. O Ngana, Jezú u a exana phala ku “sanguluka kumoxi ni ngana” yâ. (Mat. 25:​21, 23; Dij. 20:5b) Maji o mubhika wexile kimonya ulonga kima kya dikota ku Jikidistá a a undu. Kima kyahi?

13-14. Ihi itena kudilonga o Jikidistá a a undu ku kifika kya jitalendu? (Tala we ofoto.)

¹³ Kala umukalakadi waswina. Kikale mu kifika kya jitalendu ni mu kifika kya ilumba, Jezú kexile muzwela kwila o Jikidistá a a undu eji kituka imonya. Maji wexile mujimbulula ihi yeji bhita se ene eji zoza. Ene keji tena kuswina “mu ku dikwatenena mu kixanu” kyâ, kuma a asolo kwa Nzambi ni kwila keji tena kubokona mu Utuminu wa dyulu.—2 Ph. 1:10.

¹⁴ O ifika ya Jezú yalungu ni ilumba ni jitalendu ilondekesa kwila o Jikidistá joso a a undu atokala kudilanga, kudisokejeka ni kukalakala ni kuswina kwoso. O kwila Jezú wazwela dingi kima phala kudimuna o Jikidistá  a a undu? Kyene! O izwelu yê yala mu divulu dya Matesu 24:​40, 41 yalungu we ni kifundisu kya Jikidistá a a undu.

NANYI “ANDA MWAMBATA”?

15-16. Kyebhi o divulu dya Matesu 24:​40, 41 dikwatekesa o Jikidistá a a undu kukolokota mu kudilanga?

¹⁵ Ande dya kuzwela o disá dya ifika itatu, Jezú wazwela yalungu ni kufundisa kwa sukina-ku kweji londekesa se a axikina mba kana. Mwene wazwela yalungu ni kiyadi kya mala amukalakala ku dibhya ni kiyadi kya ahatu amuhuha bhu ditadi. O kikalakalu kyamubhanga o mayala kyadifu, o kya ahatu kyene we kimoxi, maji Jezú wambe kwila “umoxi anda mwambata, o mukwá anda mu xisa.” (Tanga Matesu 24:​40, 41.) Anga wadimuna o maxibulu mê: “Mu kiki, kolokotenu mu kudilanga, mukonda o kizuwa kyanda kwiza Ngana yenu, ki mwa kijiya.” (Mat. 24:42) Kyene we kyabhange, kyoso kyazubha kuta o kifika kya ilumba. (Mat. 25:13) O yazwela mu jimbandu jiyadi, ilondekesa kwila o Jikidistá ngó a a undu mu kidi, jifiyele, anda tena ‘kwa ambata,’ kukala kumoxi ni Jezú mu Utuminu wa dyulu.—Nzw. 14:3.

¹⁶ Kolokota mu kudilanga. Kidistá woso-woso amu undu kakolokota mu kudilanga kanda dibunda ni “athu ósole.” (Mat. 24:31) O kya mukwá, o jiselevende joso ja Nzambi, kikale yó andaya ku dyulu mba yó anda tunga mu ixi, atokala kukolokota mu kudilanga ni kukala fiiyele.

17. Mukonda dyahi kitutokala kuthandanganya se Jihova u unda muthu mu izuwa yetu?

¹⁷ Etu twejiya kyambote Jihova, yoso ibhanga mwene yayuka. Kituthandanganya se Jihova u unda Jikidistá mu izuwa yetu. c Tulembalala yazwela Jezú ni akalakaladi a exana mu ola ya kwinyi ni kamoxi mu kifika kyê kyalungu dibhya dya mividi. (Mat. 20:​1-16) O athu a exana phala kukalakala mu ngoloxi ni athu a exana mu kamene, o futu yâ yene imoxi. Kyene we kimoxi, kabasa kithangana Jihova u unda selevende yê, enyoso anda tambula o mwenyu wakalela-ku ku dyulu sé akala fiyele.

DIMUKA

18-19. Ihi i twadilongo mu ifika yate Jezú?

¹⁸ Ihi i twadilongo? O yó ala ni kidyelelu kya kutunga mu ixi, o kifika kya jimbudi ni jihombo, kya alondekesa kwila atokala kukala fiyele kwa Jihova, kikale kindala ni mu hadi ya dikota. Mu kithangana kyenyokyo, Jezú wanda mona kwila o athu afiyele afwama ku “tambula o mwenyu wakalelaku.”—Mat. 25:46.

¹⁹ Twadilongo we ifika iyadi ikwatekesa o Jikidistá a a undu. Mu kifika kya ilumba yadimuka ni ilumba yatobho, kitanu kyadimuka. Ene adisokejekele, exile we polondo phala kukingila o ngayala. Maji o ilumba ya mukwa yatobhele. Mu kiki o ngayala ka ehela kubokona mu fesa yê ya ukaza. Etu we twatokala kukingila Jezú kubhwisa o mundu yú, né mwene se tumona kwila o kithangana kyamulaleka. Mu kifika kya jitalendu, twadilongo yalungu ni abhika ayadi, exile akalakadi aswina. Ene abhange kiki phala o mbote ya ngana yâ, mu kiki o ngana yâ wa aximana kyavulu. Maji o ngana waditunu o mubhika wexile kimonya. Ihi i twadilongo? Twatokala kukalakala ni kuswina kwoso mu kilunga kya Jihova, katé ku disukilu. Mu kusuka-ko, twamono se mukonda dyahi o Jikidistá a a undu atokala kukolokota mu kudilanga, phala Jezú ‘kwa ambata’ ku dyulu. Ene amukingila ni hanji yoso o kithangana kyanda kala kumoxi ni Jezú ku dyulu. Kyanda bhita o Alumajedone, ene anda  kala o dibhanga dya Jezú, o Kambudi, mu ukaza wê.—2 Te. 2:1; Dij. 19:9.

20. Ihi yanda bhanga Jihova kwa yo adimuka?

²⁰ O kithangana kya Jezú kufundisa o athu kyazukama kyá, maji kitubhingi kukala ni wôma. Se tukolokota fiyele, o Tat’etu ya dyulu wanda tubhana “o kutena kusomboka o kutena kwa athu” phala ‘tutene kwimana bhu pholo ya Mon’a muthu.’ (2 Ko. 4:7; Luk. 21:36) Kikale se o kidyelelu kyetu o kutunga ku dyulu mba mu ixi, twanda sangulukisa Tat’etu se tusuluka mu kukumbidila yazwela Jezú mu ifika yê. Kuma Jihova watuzolo kyavulu, o majina metu anda kala “mu divulu dya mwenyu.”—Dan. 12:1; Dij. 3:5.