Mukidi Jihova wamesena kwila athu ayadi akazala asanguluka kumwenyu akala ni ukamba wambote unangenena mudya. (Mat. 19:4-6) Se wamesena kukazala, kyebhi ki utena kusanga diyala mba muhatu wambote? Kuma Jihova mwéne o Mubhangi wetu, mwene wejiya se ihi itwabhingi kubhanga phala tutena kusanguluka mu ukaza. Mukiki, se ukayela o itendelesu itubhana mwene eye wandasanga o kusanguluka kwakidi. Tala o itendelesu i utena kukayela.

Kya dyanga, yalungu n’etu, watokala kutendela kwila: “O muxima wa muthu u bhomba kinéne, ima yoso ndenge, wa bhukumuka kyavulu.” (Jel. 17:9) Kyoso athu kiyadi kyamesena kukazala adisanga anga amateka kuditangesa, ene kalaleka kumateka kudiwabhela, o kyoso kiki kikibhita kya abhonza kusola ni unjimu. O kyoso o athu kyasola kukazala mukonda ngó dya ukexilu wamudivwa kumuxima, mukubhita kithangana ene atena kudiluwalesa. (Jisa. 28:26) Mukonda dya kiki, kikima kyambote athu ayadi amateka kuditangesa, kuditangela kyá kyebhi kya mu divuwa kumuxima mba kudibhanga kyá ikanenu ande dya kudijiya kyambote.

Jisabhu 22:3 yamba: “Njimu kilwezu u ki mwena mu kanga, anga u swam’é kyá; ilalu-phe a lundujuka ngó, katé ki a bonga divuwa.” Kilwezu kyebhi kyala mukuditangesa mu jisayite ja internete? Sayi athu abhanga ukamba ni athu akambe o kwijiya, mukusuluka amona kwila o muthu yú kafwama kukazala né, a anganala. O athu aphulu, ata jifoto ni majina a athu amukwa mujikonda jâ ja internete phala kunganala o athu ni kunyana o kitadi kyâ. Sayi ithangana, o athu yá akwa phulu atanga o makutu a kwila ene Jimbangi ja Jihova.

Tala o kilwezu kyengi. Sayi jisayite jilondekesa o athu amba kwila, afwama kukala neye bhukaxi ka jiprograma ja komputadolo. Maji seku kima kilondekesa kwila o jindunge jiji jikwatekesa mwene. O kwila unjimu kukayela o jiprograma ja komputadolo jabhange o muthu phala kuditunda kyambote mukima kyabetakota, o ukaza? O jiprograma ja komputadolo nuka jandatunda o itendelesu ya Bibidya.—Jisa. 1:7; 3:5-7.

Mudivulu dya Jisabhu 14:15, tusangamu o kitendelesu kyambe: “Kilalu maka oso a zwela kwala athu, mwene u a xikina.” Ande dyakusola muthu, se wandakala diyala dyambote mba muhatu  wambote mba kana watokala kumwijiya kyambote. Maji bhukaxi ka internete kitena kubhonza kubhanga kiki. O kwila eye utena kuzwela kuma wejiya kyambote o muthu yú? Sayi athu abanzele kwila asange kya o kazola kâ, adiwana isunji kyoso kyadisange pholo ni pholo ni muthu akexile muditangesa bhukaxi ka internete.

O mukwa jisálamu wambe: “Akwa makutu ki ngi xikama-nâ; ki ngi xikina ku di ta kumoxi ni akwa mangonya.” (Jisá. 26:4) Athu avulu abanza kwila kikima kyayibha kutanga makutu phala o athu na awabhela dingi. Avulu asweka o idifwa yâ yayibha kyoso kyadizwelasa ni athu mu internete. Né mwene o athu adilondekesa kala Jimbangi ja Jihova, o kwila ene a abatizala kyá? O kwila ene athu akulu mu nzumbi? Ala ni ukamba wambote ni Jihova? Mukilunga mwatokala o kwila ene a axila? O kwila ene athu asola o ima ni unjimu inga “athu ayibha” akudilunga nawu? (1 Kol. 15:33; 2 Tim. 2:20, 21) O kwila mwene wala ni ufolo wakukazala mwa Ngana? Eye watokala kwijiya o itambwijilu ya ibhwidisu yiyi, maji kyandakubhonza sé kudizwelesa ni jiphange amwijiya kyambote. (Jisa. 15:22) Mukidi, o selevende yafiyele ya Jihova kejibanza “ku di ta mu kikalakalu kimoxi” ni yó ki Mbangi ya Jihova.—2 Kol. 6:14; 1 Kol. 7:39.

Mukonda dya ilwezu mu internete, sayi ukexilu wambote wakusota ni kusanga muthu phala kukazala né. Kyebhi ki utena kusanga muthu utena kukala diyala mba muhatu wambote phala kukazala né? Kyoso kitwandatena kudyongeka dingi, o Mbangi ya Jihova utena kusota muthu phala kukazala né, muyônge ya semana, ya ilunga, yamakota ni mu itonokenu.

Mukonda dya uhaxi wa COVID-19, kindala twamudyongeka ngó bhukaxi kamitelembe. Muyônge yiyi tutena kudimona ni kudizwelesa ni jiphange jamukwa akudi. Eye utena kumona kyebhi ene kyamubhanga o jimbandu jâ ni kutambwijila muyônge. (1 Tim. 6:11, 12) Kudisukilu dya yônge, kiyadi kyenu mutena kudizwelesa mu sala yengi. Muyônge yiyi, bhukaxi kamutelembe bhutena kukala jiphange javulu, kiki kitena kukwatekesa kutonginina o muthu wamumuta o dyesu se kyebhi kyamudibhana ni akwa. Mu ukexilu yú wandatena kwijiya o idifwa yê yakidi. (1 Phe. 3:4) Mukubhita kithangana, wandatena kumona kwila o jimbambe jenu jadifu ni kwila mwandakala mumakaza ambote.

O kukayela o itendelesu ya Bibidya, kutena kukwatekesa o dikudi kusanga dikaza dyambote ni kusanguluka mu ukaza. Kala kyambe jisabhu: ‘Woso usanga muhatu wambote [mba diyala dyambote], wasange kima kya ujitu, muthu yó Ngana wamubhange favolo.’—Jisa. 18:22.