1. Ihi yabhange Jihova phala kukukwatekesa kwijiya o kidi?

KYEBHI kiwakituka Mbangi ya Jihova? Nange eye wevu o “Njimbu Yambote” muveji yadyanga bhukaxi ka jitata, jikoleka jê jasalu mba ja jikola, mba kyoso o Jimbangi ja Jihova kyayi muphupha o dibhitu dyé. (Mál. 13:10) Kyenyiki sayiku muthu wangastala kithangana, wabhange nguzu phala kukulonga o Bibidya. Mukithangana kiwayi ni kudilonga o Bibidya eye weza muzola Jihova, eye wadilongo kwila mwene wakuzolo. Jihova wakusungu mukidi, wakituka udixibulu dya Jezú Kidistu, eye wala ni kidyelelu kyakula kumwenyu kate kuhádya ni hádya. (Nzwá 6:44) Se phata eye wene musakidila kyavulu Jihova mukutuma muthu phala kukulonga o Bibidya, ni kukuxikina kala uselevende Yê.

2. Ihi itwandadilonga mumilongi yiyi?

² Kindala kiwejiya kyá o kidi eye wala ni ujitu wakukwatekesa akwenu kudibunda kumoxi munjila yambata kumwenyu. Nange kikitubhonzo kuboka nzo ni inzo maji nange tukala ni hele ya kumateka ni kusuluka kulonga o Bibidya kumuthu. O kwila kyene ki udivwa? Se kyene, nange wandasanga jindunge mumilongi yiyi jandakukwatekesa. Twandadilonga se ihi itubhangesa kukwatekesa akwetu kukituka maxibulu. Twandadilonga we kyebhi kitutena kutolola o ibhidi yakukala ni hele yakulonga o Bibidya. Kyadyanga twandadilonga se mukonda dyahi kitwatokala ngó kuboka, maji twatokala we kulonga o njimbu yambote.

3. Mukonda dyahi twene muboka?

³ Kyoso Jezú kyexile mu ixi mwene wabhana ikalakalu iyadi ku akayedyê. Kyadyanga mwene wa atangela kwila ene eji boka  o njimbu ya Utuminu, wa atangela we kyebhi kyeji bhanga o kikalakalu kiki. (Mat. 10:7; Luka 8:1) Mukifika, Jezú wa atangela yatokalele kubhanga kyoso o athu kyeji xikina o njimbu yambote ya Utuminu ni ihi yeji bhanga kyoso athu kyeji dituna. (Luka 9:2-5) Mwene na wajimbulula kumaxibulu mê kwila ene ejibokela dingi athu avulu, mu ididi yavulu, kyoso mwene kya ambela kwila, mwa ka “bhana umbangi ku akwa jixi joso.” (Mat. 24:14; Ika. 1:8) Kikale se o athu axikina mba adituna o njimbu yambote, o maxibulu a Jezú eji tangela ku athu yalungu ni Utuminu yú ni ihi yandabhanga.

4. Kala kilondekesa o divulu dya Matesu 28:18-20, ihi itwatokala o kubhanga mukuboka o njimbu yalungu ni Utuminu?

⁴ Kyebhi o kima kya kayadi kyatumu Jezú kubhanga? Mwene watangela o akayedi yê kulonga o maxibulu mâ kubelesela o ima yoso yatumu mwene. Sayi athu amba kwila o kitumu kya Jezú kyalungu ni kuboka ni kulonga, kyalungile ngó ni Jikidistá mu hama yadyanga. Maji o kwila kiki kidi mwene? Kana. Jezú wambe kwila o kikalakalu kiki kyejisuluka katé mu izuwa yetu, “katé ku dizubhilu dya mundu.” (Tanga Matesu 28:18-20.) Jezú nange wabhana o kitumu kiki kyoso kyatukumukina o 500 a maxibulu mê. (1 Kol. 15:6) Jezú wajingununa kwa Nzwá bhukaxi ka kisumwa kwila, o maxibulu mê eji kwatekesa akwa kwijiya o kidi kyalungu ni Jihova.—Dij. 22:17.

5. Kala kilondekesa o mukanda wa 1 Kolindu 3:6-9, kyebhi o poxolo Phawulu kyasokesa o kikalakalu kya kuboka ni kulonga?

⁵ Poxolo Phawulu wasokesa o kikalakalu kya kuboka ni kikalakalu kya kudima, walondekesa kwila kitwatokala ngó kukuna, twatokala we kubhanga dingi kima kyengi. Mwene walembalesa akwa Kolindu: “Eme nga kunu o mbutu, Apolo wa i tekela . . . enu’enu mwala mu dibhya di bhanga Nzambi o kikalakalu kyê.” (Tanga 1 Kolindu 3:6-9.) Kuma tu akalakadi ‘mu dibhya dya Nzambi,’ kitwatokala ngó kukuna maji twatokala we kutekela ithangana yoso phala o idima ni ikule. (Nzwá 4:35) Etu twejiya kwila Nzambi mwene ukudisa o idima, kifwa Nzambi mwene usunga o muthu mukilunga kyê.

6. Kyoso kitubokela o athu etu twatokala kwa akwatekesa kubhanga ihi?

⁶ Etu twamusota yó “a fwamena o mwenyu ki wabhwa.” (Ika. 13:48) Phala kukwatekesa o athu yâ kukituka maxibulu, etu twatokala kwa kwatekesa (1) kutendela, (2) kuxikana ni (3) kukumbidila o ima yamudilonga mu Bibidya. (Nzwá 17:3; Kol. 2:6, 7; 1 Tes. 2:13) O kilunga kyoso kitena kukwatekesa o dixibulu dya Bibidya bhukaxi ka phangu ni henda yâ, mukwasangesa kyoso ene kyaya muyônge. (Nzwá 13:35) O mulongexi wa Bibidya nange wabhingi kungastala kithangana ni nguzu phala kukwatekesa o dixibulu kulungulula mba kutolola “o imbaka” mba idifwa yayibha. (2 Kol. 10:4, 5) Phala kukwatekesa muthu kulungulula ima kumwenyu wê kubhinga jimbeji javulu katé kyakala polondo phala kudibatizala. Maji kulungulula o ima kumwenyu wê kyandamukwatekesa kyavulu.

7. Ihi itubhangesa kuboka ni kubhanga maxibulu?

⁷ Mukonda dyahi tubokela o athu, ni kwalonga phala na kituke maxibulu? Kyadyanga mukonda etu twazolo Jihova. Kyoso ki ubhanga yoso phala kukumbidila o kitumu kyakuboka ni kubhanga maxibulu eye wamulondekesa o henda yé kwa Jihova. (1 Nzwá 5:3) Xinganeka ngó: O henda yé kwa Jihova yandakukwatekesa kuboka nzo ni inzo. O kwila kyakubhonzele kubelesela o kitumu kiki? Nange kyene.  Kyoso kiwayi mukuboka nzo ni inzo o wôma wakukwatele? Nange kyene! Maji eye wejidile kwila kiki kyene o kikalakalu kyamesena Jezú kwila eye ukibhanga. Kyenyiki eye wabelesela. Nange mukubhita kithangana eye kiwexile dingi ni wôma wakubhanga o kikalakalu kiki kyakubokela o athu. Maji kyebhi ki udivwa yalungu ni kulonga o Bibidya ku muthu? O kwila o wôma ukukwata kyoso ki uxinganeka mu maka yâ? Nange kyene. Maji se usamba kwa Jihova ni kumubhinga o kikwatekesu phala ukale ni kuswina ni umateke kulonga o Bibidya mwene wandakukwatekesa kubhanga maxibulu.

8. Kala kilondekesa Máluku 6:34, ihi dingi itena kutubhangesa kulonga o athu?

⁸ Kayadi, o kuzola o athu kutubhangesa kulonga o kidi. Sayi kithangana Jezú ni maxibulu atohokele mukonda abokele kyavulu. Ene abhindamene kididi kyatululuka phala kunyohaku bhofele, maji kwamoneka mundu wavulu. O henda ku athu yabhangesa Jezú kwalonga “ima yavulu.” (Tanga Máluku 6:34.) Mwene wakalakala ni nguzu yoso né mwene kyoso kyatohokele. Mukonda dyahi? Mukonda Jezú wejidile kyebhi kyexile mudivwa o athu. Jezú wamesenene kwa akwatekesa mukonda wexile mumona o hadi yexile mutala ni kwila ene abhindamene kidyelelu. Lelu we kyene kimoxi. O athu lelu amutala hadi, abhindamena kidyelelu né mwene se amoneka kala asanguluka ni kwila azediwa kumwenyu. Edi kala jimbudi jatexika, jakambe mubhidi wa endesa. Poxolo Phawulu wazwela yalungu ni athu yâ, ene edi kala athu akambe Nzambi, akambe kidyelelu. (Efe. 2:12) Ene ala mu “njila yazanze iya ku’alunga”! (Mat. 7:13) Kyoso kituxinganeka mu athu mumbambe yetu o henda ni kyadi kitubhangesa kwa akwatekesa. O ukexilu wabetakota wa kwakwatekesa o kwalonga o Bibidya.

9. Kala kilondekesa Filipe 2:13, kyebhi Jihova kyatena kukukwatekesa?

⁹ Nange eye ukala ni hele yakumateka kulonga o Bibidya mukonda eye wejiya kwila wandabhinga kithangana kyasoko phala kudipelepalala ni kulonga o Bibidya. Se kyene kiwamudivwa jikula o muxima wé kwa Jihova. Mubhinge kikwatekesu phala utena kusanga muthu ni kukala ni vondadi yakumulonga o Bibidya. (Tanga Filipe 2:13.) Poxolo Phawulu watudyelesa kwila Nzambi wandatambwijila o misambu yetu yoso yalungu ni vondadi Yê. (1 Nzwá 5:14, 15) Kyenyiki eye utena kudyelela ni kidi kyoso kwila Jihova wandakukwatekesa kukala ni vondadi ya kubhanga maxibulu.

10-11. Mukonda dyahi sayi bhabha tukala ni wôma wakulonga o Bibidya?

¹⁰ Etu twejiya kwila o kikalakalu kya kuboka kikalakalu kyakatunda, maji nange kutubhonza kubhanga dingi mu kikalakalu kiki kala kitwamesene. Twandadilonga se ibhidi yebhi itutena kudibhana nayu ni kyebhi kitutena ku itolola.

¹¹ Nange kitwamutena kubhanga dingi o ikalakalu yoso itwamesenene kubhanga. Mukifika sayi jiphange ahaxila mba akuka kyá. O kwila eye wamudibhana we ni maka enya? Se kyene tala o ima itwadilongo mukithangana kiki kya COVID-19. Etu twadilongo kwila etu tutena kulonga o Bibidya bhukaxi kamutelembe wa kafwetele mba bhukaxi ka jitekinolojya jengi! Kyenyiki eye utena kulonga o Bibidya tunde kubhata dyé. Sayi dingi kima kyengi. Mukonda sayi athu amesena mwene kudilonga o Bibidya maji ene kene mukala kubhata kyoso o jiphange jetu kyaya muboka. Maji nange ene ala ni kithangana mukamene mba m’usuku. Eye utena kudilonga o Bibidya ni muthu  mukithangana kiki? Jezú wazwelele ni Nikodemu m’usuku, mukonda kyene o kithangana kyexile nakyu Nikodemu.—Nzwá 3:1, 2.

12. Ima yahi itena kutudyelelesa kwila etu tutena kulonga o Bibidya?

¹² Etu nange tutena kuxinganeka kwila kitwala ni uhete wakulonga o Bibidya. Nange tudivwa kwila twabhingi dingi kubandekesa o kwijiya kwetu mba o uhete wakulonga ande dya kulonga o Bibidya ku muthu. Se kyene ki udivwa, tala ima itatu yandakukwatekesa kuxikina kwila eye utena kulonga o Bibidya ku muthu. Kyadyanga Jihova ubhana valolo mu uhete wé wakulonga akwenu. (2 Kol. 3:5) Kayadi, Jezú watambula o ‘kutena kwoso . . . mu dyulu, ni mu ngongo,’ mwéne wakutumina kuya mulonga. (Mat. 28:18) Katatu eye utena kudyelela kwila o jiphange jê jandakukwatekesa. Jezú wadyelele mu ima yamulongo Tatê phala kuzwela, eye we utena. (Nzwá 8:28; 12:49) Kumbandu yengi eye utena kubhinga kikwatekesu kukafunga wala kupholo dya kibuka kyenu kya kuboka, muboki wathembu yoso, mba muboki wengi wala ni uhete phala kukukwatekesa kumateka kulonga o Bibidya. O ukexilu umoxi wakukala ni uhete wakulonga, o kuxinjikila o aboki engi kyoso ene kyamulonga o Bibidya.

13. Mukonda dyahi twabhingi kwijidila o ukexilu wa ubhe wakuboka?

¹³ Kitena kutubhonza kwijidila o ukexilu wa ubhe wakuboka ni kukalakala ni jifalamenda ja ubhe. O ukexilu wetu wakulonga o Bibidya kindala walunguluka. Sanguluka Katé Kuhádya ni Hádya!, dyene o divulu dya kulonga nadyu kindala. Twabhingi kudipelepalala phala kulonga o Bibidya mu ukexilu wa ubhe kiwadifu ni ukexilu utwexile mulonga o Bibidya mukulu. Kikwala dingi jikaxi javulu phala kujitanga maji kwebhingi we kudizwelesa kyavulu ni dixibulu. Kyoso kitulonga o Bibidya etu tulondekesa o vidyu ni jifalamenda jetu kala JW Library^®. Se kiwala ni uhete wakukalakala ni jifalamenda jiji, zwela ni muthu phala na kulonge kukalakala naju. O athu ala ni kifwa kyakwijidila kya o ima yene mubhanga tundé ukulu. Kyenyiki kitena kutubhonza kwijidila o ukexilu wa ubhe wakubhanga o ima. Maji ni kikwatekesu kya Jihova ni kya jiphange jê eye wandakwijidila o ukexilu wa ubhe, katé wandasanguluka mukulonga o Bibidya ku athu. Sayi muboki wambe kwila o ukexilu yú wa ubhe wakulonga o Bibidya “usangulukisa kikale wamulonga ni yó amumulonga.”

14. O mukanda 1 Kolindu 3:6, 7 utuswinisa kyebhi kyoso kitwamuboka mumbambe mwala o athu kamesena kwivwa?

¹⁴ Nange twatungu mumbambe mwabhonzo kumateka kulonga o Bibidya ku athu. Sayi athu kamesena kwivwa o njimbu yetu mba atuzukutisa mwene. Ihi itena kutukwatekesa kudyelela kwila kuhádya andatena kwívwa o njimbu yetu ya Bibidya? Lembalala kwila o mundu yú ulunguluka mukithangana ni mbandu, o yó aditunine atena kutonginina kwila abhindamena Nzambi ku mwenyu wâ. (Mat. 5:3) Sayi athu mukulu aditunine kuxikina o madivulu metu maji kupholo axikina kudilonga o Bibidya. Etu twejiya kwila Jihova mwene Wavu o mabhya. (Mat. 9:38) Mwene wamesena kwila etu tusuluka ni kukuna ni kutekela, maji Mwéne wala ni kikalakalu kya kukudisa. (1 Kol. 3:6, 7) Kiki kituswinisa kulembalala kwila né mwene se kitwamutena kulonga o Bibidya kindala, Jihova wandabesowala o nguzu itubhanga né mwene se athu atwivwa mba kana! *

15. Kyebhi Jihova kyadivwa kyoso muthu kyaxikina kudilonga o Bibidya anga ukumbidila o ima yamudilonga?

¹⁵ Jihova usanguluka kyoso o muthu kyaxikina o kidi kya Bibidya anga mwene utangela ku akwa o ima yamudilonga. (Jisa. 23:15, 16) Jihova usanguluka kyoso kyamona o jiselevende jê aswina mukuboka ni kulonga! Mukifika, mumuvu 2020 sumbala ni uhaxi wa COVID-19, twalongo o Bibidya ku 7.705.765 a athu, twakwatekesaku 241.994 athu kubhakula o myenyu yâ kwa Jihova ya adibatizala. O maxibulu yâ a ubhe andalonga o Bibidya ni kubhanga we maxibulu. (Luka 6:40) Etu tutena kuxikina ni kidi kyoso kwila Jihova usanguluka kyoso kitulonga akwetu kate kyakituka maxibulu.

16. Mbambe yebhi itutena kuxinda?

¹⁶ Kubhinga nguzu yavulu phala kubhanga maxibulu, maji ni kikwatekesu kya Jihova tutena kulonga akwetu kuzola o Tata yetu ya henda. O kwila tutena kuxinda o mbambe ya kumateka kulonga o Bibidya, né mwene ku muthu umoxi ngó? Tutena kudiwana ni ima yandabhita, se tusota kuzwela ni athu mukithangana kyatokala kyoso kitwasanga, ene andadilonga o Bibidya. Etu tena kuxikina ni kidi kyoso kwila Jihova wandabesowala o nguzu yetu.

17. Kyebhi kitwandadivwa se tulonga o Bibidya ku athu?

¹⁷ O kuboka ni kulonga o kidi ku akwetu ujitu wadikota! O kikalakalu kiki kitusangulukisa kyavulu. O kiki kyene kyabhangesa poxolo Phawulu kukwatekesa akwa Tesalonika kyoso kyambe: “Kuma kudyelela kwetu kwahi kwene, mba ngalasa yetu yebhi, mba dibete dyoso di tu ta bhu pholo ya Ngana Jezú, bhwoso hinu bhwa kà tukulukila, manyi ki en’wenu ngó? Kuma ni kidi kyene, enu mwala mu fuma yetu! En’wenu mu ngalasa yetu!” (1 Tes. 2:19, 20; Ika. 17:1-4) Lelu avulu adivwa wa mu ukexilu yú. Phange amwixana Stéphanie kumoxi ni mwadiwe ene mukwatekesa athu avulu kubhixila katé kubatizu wambe: “Séku kusanguluka kutunda o kusanguluka kwakukwatekesa muthu kudibhakula kwa Jihova.”