1. Kyebhi kitumona o ujitu utwala nawu wa kusamba kwa Jihova?

 TWATAMBULA ujitu wa katunda wa kuzukama kwa Mubhangi wa dyulu ni ixi bhukaxi ka musambu. Xinganeka ngó: Tutena kuzwela kwa Jihova o ima yala ku muxima wetu mu kithangana ni mu madimi mosomoso, sé ku mubhinga o kithangana kyatokala ande dya kuzwelanê. Tutena kuzwelanê, né mwene se twala mu kididi kya kusaka mba mu kaleya, ni kudyelela kwila Tat’etu ya dyulu wandatwivwa. Tubhana valolo yavulu ku ujitu yú.

2. Kyebhi Sobha Davidi kyalondekesa kwila wexile mubhana valolo ku ujitu wa kusamba?

² Sobha Davidi wexile mubhana valolo yavulu ku ujitu wa kusamba. Mwene wembi kwa Jihova: “Musambu wami ubande ko kwé, kala wasu wa dizumba.” (Jisá. 141:1, 2) Mu izuwa ya Sobha Davidi, o wasu wa dizumba akexile mukalakala nawu mu ubhezelu wa kidi kwala o akunji, akexile mu ubhanga ni uhete woso. (Mak. 30:34, 35) Kala kyakexile mubhanga o wasu wa dizumba ni uhete woso, Sobha Davidi wexile we muxinganeka kyambote o ima yejizwela mu kusamba kwa Tata yê ya dyulu. Kiki kyene we kitwamesena kubhanga. Twandala kwila o misambu yetu isangulukisa Jihova.

3. Mu ukexilu webhi utwatokala kusamba kwa Jihova, ni mukonda dyahi?

³ Kyoso kitusamba kwa Jihova, twatokala kuzwela ni kuxila kwoso. Xinganeka mu isuma yatambula polofeta Izaya, Izekiyele, Daniyele ni poxolo Nzwá. O isuma yoyo kiyadifwile mudyâ,  maji kwexile kima kya difwanganene. Yene yoso yalondekesa kwila Jihova Sobha wala ni kutena kwadikota. Polofeta Izaya wamono “Jihova waxikama bhu kyandu kya lebha, kya dileka.” (Iza. 6:1-3) Polofeta Izekiyele wamono Jihova waxikama mu dikalu dyê, amukondoloka ku mukengeji wexile mubhenya “mukwâ ni ki kala o hongolo.” (Ize. 1:26-28) Daniyele wamono o “Mukulu-wa-Ndamba” wazwata izwatu yazele, ni milengu ya túbhya yakexile mutunda mu kyandu Kyê. (Dan. 7:9, 10) Poxolo Nzwá wamono Jihova waxikama ku kyandu, amukondoloka ku kima kyedile kala hongolo ya difwanganene ni ditadi dya ejimelada. (Dij. 4:2-4) Kyoso kituxinganeka mu fuma yonene ya Jihova, tutendela o ujitu wadikota utwala nawu wa ku muzukama bhukaxi ka musambu, tutendela we se mukonda dyahi twatokala kubhanga kiki ni kuxila kwoso. Majiphe ihi itwatokala kutumbula mu misambu yetu?

4. Ihi itwadilongo mu izwelu yadyanga itusanga mu musambu wa Matesu 6:9, 10?

⁴ Tanga Matesu 6:9, 10. Mu Diskulusu dyê dyabhange ku Mulundu, Jezú walongo o maxibulu mê kusamba mu ukexilu usangulukisa Nzambi. Kyoso Jezú kyazubha kuzwela, “mu kiki, mu kusamba, mu zwela kiki,” mwene watumbula ima yalungu ni vondadi ya Jihova: o kuzelesa o dijina dya Nzambi; o wijilu wa Utuminu wê, wandabwikisa o jinguma joso ja Nzambi; ni ima yambote yandabhanga Mwene phala o ixi ni athu alamu. Mu kutumbula o ima yiyi mu misambu yetu, twamulondekesa kwila o vondadi ya Nzambi yala ni valolo yavulu phala etu.

5. O kwila twatokala kusamba yalungu ni ibhindamu yetu?

⁵ Mu mbandu ya mukwá ya musambu yú, Jezú walondekesa kwila tutena kusamba yalungu ni ibhindamu yetu. Tutena kubhinga kwa Jihova phala kutubhana o mbolo yetu ya kizuwa, phala kuloloka o ituxi yetu, phala ka twehele kudibhala mu jitendasá, ni kutubhulula we kwa kadyamphemba. (Mat. 6:11-13) Kyoso kitubhinga o ima yiyi kwa Jihova, twamulondekesa kwila twabhindamena o kikwatekesu kyê ni kwila twamesena kumusangulukisa.

6. O kwila mu misambu yetu, twatokala ngó kutumbula o ima yazwela Jezú mu musambu wala mu divulu dya Matesu? Jimbulula.

 ⁶ Jezú kamesenene kwila o akayedi’ê ejibhitulula ngó o izwelu yatumbula mwene mu musambu wê. Mu misambu yamukwá yabhange Jezú, mwene watumbula o ima yabhindamene mu kithangana kyenyókyo. (Mat. 26:39, 42; Nzw. 17:1-26) Kyene we kimoxi, tutena kusamba yalungu ni ima itutandanganyesa. Kyoso kitumesena kusola kima ku mwenyu wetu, tutena we kubhinga unjimu ni kutetuluka kwa Jihova. (Jisá. 119:33, 34) Kyoso kyatubhana kikalakalu kyabhonzo, ande dya ku kibhanga, tutena kubhinga kwa Jihova o kwijiya ni kilunji. (Jisa. 2:6) O jitata atena kusamba phala Jihova kukwatekesa o twana twâ, o twana atena kusamba phala Jihova kukwatekesa o jitata jâ. Tutena we kusambela o maxibulu metu a Bibidya ni yó utubokela. Maji mu kusamba, kitwatokala ngó kubhinga ima kwa Jihova.

7. Mukonda dyahi twabhingi kuximana Jihova mu misambu yetu?

⁷ Twabhingi we kulembalala o kuximana Jihova mu misambu yetu. Seku muthu twatokala kumuximana dingi o Nzambi yetu ndenge. Mwene “u lenguluka kuloloka.” Mwene we “Nzambi ya jihenda, wezala ni kyadi, wa kokoloka o kutema, . . . wa vula o kulenduka ni kidi.” (Jisá. 86:5, 15) Mu kidi, kwala ima yavulu itubhangesa kuximana Jihova, mukonda dya idifwa yala nayu ni ima yabhanga phala o mbote yetu.

8. Ima yahi itubhana Jihova itubhangesa ku musakidila? (Jisálamu 104:12-15, 24)

⁸ Katuku o kuximana Jihova mu misambu yetu, tutena we ku musakidila mukonda dya ima yambote yene mutubhana. Mu kifika, tutena ku musakidila mukonda dya jikolo javulu jitumona ku ithulu, ku nzungule ya makúdya awabha, ni ku makamba ambote atuswinisa. O Tat’etu yahenda, utubhana o ima yiyi ni yamukwá dingi, phala ngó ku tusangulukisa. (Tanga Jisálamu 104:12-15, 24.) O kyabeta dingi kota, tusakidila Jihova mukonda dya nzungule dya kudya mu nzumbi, kwene mutubhana ni kidyelelu kyalungu ni hádya.

9. Ihi itena kutukwatekesa kulembalala kusakidila Jihova? (1 Tesalonika 5:17, 18)

 ⁹ Ki kibhonzo kujimba kusakidila Jihova mu yoso ibhanga kokwetu. Ihi itena kutukwatekesa o kulembalala? Eye utena kusoneka mu papela o ima iwabhingi, mu kusuluka tala kyebhi Jihova kyatambwijila o misambu yê. Anga mu sakidila mu kukukwatekesa. (Tanga 1 Tesalonika 5:17, 18.) Xinganeka: Kyoso akwetu kyatusakidila, tusanguluka kyavulu anga tudivwa kwila atuzolo. Kyene we kimoxi, kyoso kitusakidila Jihova mu kutambwijila o misambu yetu, mwene usanguluka kyavulu. (Kol. 3:15) Kima kyahi dingi kitubhangesa kusakidila o Nzambi yetu?

10. Kala kyosoneke mu 1 Phetele 2:21, mukonda dyahi twabhingi kusakidila Jihova mu kutumikisa Jezú mu ixi?

¹⁰ Tanga 1 Phetele 2:21. Twatokala kusakidila Jihova mu kutubhana Mon’ê wakazola phala kutulonga. Mu kutokwesa o phangu ya Jezú, tudilonga yalungu ni Jihova ni kyebhi kitutena kumusangulukisa. Se tukala ni kixikanu mu sata ya kukula ya Kidistu, tutena kukala ni ukamba wambote ni Jihova Nzambi, twandakala we ni paze ni Mwene.—Lom. 5:1.

11. Mukonda dyahi tusamba mu dijina dya Jezú?

¹¹ Tusakidila Jihova mukonda tutena kusamba kwa mwene bhukaxi ka Mon’ê. Jihova wasolo Jezú phala kutubhana yoso itumubhinga. Jihova wivwa ni kutambwijila o misambu itubhanga mu dijina dya Jezú. Jezú wajimbulula: “Ima yoso i mubhinga mu dijina dyami, eme nganda ibhanga, phala o Tata a mu jingise bhukaxi ka Mona.”—Nzw. 14:13, 14.

12. Kima kyahi dingi kitubhangesa kusakidila Jihova mu kutubhana Mon’ê wa kazola?

¹² Jihova uloloka o ituxi yetu mukonda dya sata ya kukula ya Jezú. O Mikanda Ikôla itutangela kwila Jezú mwéne o “mukunji wetu wabetakota waxikama ku kadilu ka kyandu kya Nzambi Muteni wa Yoso ku dyulu.” (Jih. 8:1) Jezú o ‘mukwatekexi wetu wayuka wala bhu mbandu ya Tata.’ (1 Nz. 2:1) Tusakidila kyavulu Jihova mu kutubhana o Mukunji Wabetakota utendela o ukexilu wetu wa ituxi, “wene mu tudyondela”! (Lom. 8:34; Jih. 4:15) Etu tu akwa ituxi, mu kiki sé o sata ya kukula ya Jezú kitwejitena kuzukama kwa Jihova bhukaxi ka musambu. Sé phata eye uxikina kwila, nuka twandatena kusakidila Jihova mu ukexilu watenena mu kutubhana o ujitu wakatunda, wa Mon’ê wa kazola!

13. M’usuku ande dya kufwa, kyebhi Jezú kyalondekesa kwila wazolele o maxibulu mê?

¹³ M’usuku ande dya kufwa, Jezú wasambe ola javulu phala o mbote ya maxibulu mê, wabhingi kwa Tat’ê “phala kwalanga mukonda dya kadya-phemba.” (Nzw. 17:15) Kiki kilondekesa kwila Jezú wa azolele kyavulu! Sumbala mwene wakijidile kwila kwa kambele ngó bhofele ejimutalesa hadi yavulu, watandanganyele hanji ni mbote ya jipoxolo jê.

14. Kyebhi kitutena kulondekesa kwila twazolo o jiphange jetu?

¹⁴ Mu kukayela o phangu ya Jezú, etu kitudikwatenena ngó mu ibhindamu yetu. Mu veji dya kiki, mu ithangana yoso tusamba phala o mbote ya jiphange jetu. Kyoso kitubhanga kiki, twamukayela o phangu ya Jezú yalungu ni kudizola mudyetu, tulondekesa we kwa Jihova kwila twazolo kyavulu o jiphange jetu. (Nzw. 13:34) Kusamba phala o mbote ya jiphange jetu, ki kilombolola kwila twamuzanga o kithangana kyetu, mukonda kwanda kwakwatekesa. O Mak’â Nzambi  atutangela kwila, “o musambu wa muthu wayuka wala ni kutena kwadikota.”—Tiy. 5:16.

15. Mukonda dyahi o jiphange jetu abhindamena o misambu yetu?

¹⁵ O jiphange jetu twabhingi kwatumbula mu misambu mukonda ene abhita mu ibhidi yavulu. Tutena kubhinga kwa Jihova phala kwakwatekesa kukolokota mu uhaxi, kyoso kyabhita mu mavuwa, mu ita, mu izukutisu mba mu ibhidi yengi. Tutena we kusamba phala o jiphange jetu ene mukalakala ni nguzu yoso phala kukwatekesa yó abhindama. Nange eye wejiya jiphange ene mubhita ni ibhidi yiyi. O kwila utena kutumbula o majina mâ mu misambu yé? Kyoso kitubhinga kwa Jihova phala kwakwatekesa kukolokota, twamulondekesa kwila twa azolo mu kidi.

16. Mukonda dyahi twatokala kusamba phala o jiphange jetu ala kupholo?

¹⁶ O yó ala kupholo mu kilunga, asakidila kyavulu kyoso ki twa atumbula mu misambu yetu. O misambu yiyi ya akwatekesa kyavulu. O poxolo Phawulu wakijidile kwila kiki kidi. Mwene wasoneka: “Eme wami mu ngi dyondela, phala kyoso ki ngijikula o dikanu, Nzambi a ngibhane o izwelu yatokala, phala ngitene kuzwela ni kuswina kwoso mu kwijidisa o ikutu ikôla ya njimbu yambote.” (Efe. 6:19) Lelu twala we ni jiphange javulu, atukala kupholo akalakala ni nguzu yoso. Tulondekesa o henda kwa ene mukubhinga kwa Jihova phala kubesowala o kikalakalu kyoso kyene mubhanga.

17-18. Ithangana yebhi atena kutubhinga phala kusamba, ni ihi itwatokala o kuxinganeka?

¹⁷ Sayi bhabha atubhinga phala kubhanga musambu. Mu kifika, phange ya muhatu wamulonga o Bibidya ku dixibulu dyê, ubhinga kwa phange yengi yamuhatu watundunê phala kubhanga o musambu. Nange o phange watundunê kejiya kyambote o ibhindamu ya dixibulu, kota se mwene ubhanga o musambu wasukinaku. Mu kiki, mwene utena kutumbula o ima yalungu ni ibhindamu ya dixibulu.

¹⁸ Phange imoxi atena kumubhinga phala kubhanga musambu mu kyônge kya sidivisu ya kuboka mba mu kilunga. O jiphange ala ni ujitu yú atokala kuxinganeka o ima yandazwela,  mba yazwela kyá mu kyônge. Etu kitutokala kubazela o jiphange, kwalonga mba kubhana jingolokela mu misambu. Mu yônge mu kilunga, abhana ithangana itanu phala o mwimbu ni musambu. Kyenyikiphe o phange wandabhanga o musambu, kabhingi “kuzwela kyavulu,” bengebenge ku dimatekenu dya kyônge.—Mat. 6:7.

19. Ihi yandatukwatekesa kukala polondo phala o kizuwa kya kifundisu kya Nzambi?

¹⁹ Kyoso kitumona o kizuwa kya kifundisu kya Nzambi kyazukama, twatokala kuta dingi kupholo ku mwenyu wetu, o misambu. Yalungu ni maka enyá, Jezú wambe: “Mu kiki-phe, kolokotenu mu kudilanga. Dyondelenu jinga Nzambi, phala mutene kulenga o ima yoso yiyi yatokala kubhita.” (Luk. 21:36) Kyene, se tusuluka ni kusamba, o kixikanu kyetu kyandakola dingi, twandakala polondo phala kudibhana ni kizuwa kya kifundisu kya Nzambi.

20. Kyebhi o misambu yetu itena kukala kala wasu wa dizumba?

²⁰ Ihi itwadilongo? Twadilongo kwila, tubhana valolo yavulu mu ujitu wa kusamba. O ima yabetakota itwatokala kutumbula mu misambu yetu, o ima yalungu ni vondadi ya Jihova. Etu we tusakidila o Mon’â Nzambi, o Utuminu wê ni jiphange jetu. Tusamba we yalungu ni ibhindamu yetu mu xitu ni mu nzumbi. Kyoso kituxinganeka kyambote mu ima itwandazwela mu misambu yetu, tulondekesa kwila tubhana valolo yavulu mu ujitu yú wakatunda. O izwelu yetu kwa Jihova yandakala kala wasu wa dizumba, i “muwabhela mwene.”—Jisa. 15:8.