1. Mukonda dyahi kima kyambote kudipelepalala phala kudibhana ni mavwa?

 O KUDIPELEPALALA kubhulula o mwenyu. Mu kifika kyoso ki kubhita divwa, o athu adyanga kudipelepalala atena kuditunda dingi kyambote, ni kukwatekesa we akwa. Sayi kisangela kikwatekesa o athu abhita mu mavuwa ku Europa, kyambe: “O kudipelepalala kyambote kutena kubhulula o myenyu ya athu.”

2. Mukonda dyahi twatokala kudipelepalala phala o hadi yadikota? (Matesu 24:44)

² O “hadi yadikota” yanda mateka mu kithangana ki twakifikile. (Mat. 24:21) Maji o hadi ya dikota ki yanda difwa ni mavuwa amukwa, mukonda etu twejiya kwila yene yanda kwiza. Mu 2.000 a mivu kudima, Jezú wadimuna o maxibulu me kuma atokalele kukala polondo phala o kizuwa kyenyiki. (Tanga Matesu 24:44.) Se tudipelepalala, ki kyanda tubhonza kukolokota mu kithangana kiki, ni kukwatekesa we akwetu kuditunda kyambote.—Luke 21:36.

3. Kyebhi o kukolokota, o henda, ni kusuwa o ibhindamu ya akwetu, kyanda tukwatekesa kudipelepalala phala o hadi ya dikota?

³ Twandamona idifwa itatu itena kutukwatekesa kukala polondo phala o hadi ya dikota. Ihi itwandabhanga se tubhinga kuboka o njimbu ya kufundisa anga atuzukutisa? (Dij. 16:21) Twanda bhinga kukolokota phala kubelesela Jihova, ni kudyelela kwila mwene wanda tulanga. Ihi itwandabhanga se o jimbote ja jiphange jetu jidibota? (Haba. 3:17, 18) Twandabhinga kusuwa o ibhindamu ya, phala ku abhana o kikwatekesu kyabhindamena. Ihi itwandabhanga se o kizukutisu kya kifuxi kya jixi, kitubhangesa kutunga kumoxi ni jiphange javulu mu kididi kyofele? (Ize. 38:10-12) Twandabhinga kukala ni henda yadikota ku jiphange jetu phala tutene kudibhana kyambote ni kithangana kiki kyabhonzo.

4. Kyebhi o Bibidya ilondekesa kwila twatokala kukala ni idifwa ya kukolokota, kusuwa o ibhindamu ya akwetu, ni henda?

⁴ O Mak’a Nzambi atuswinisa kusuluka mu kusuwa o ibhindamu ya akwetu, kukolokota, ni kulondekesa o henda. Luka 21:19 yamba:  “Mu kukolokota kwenu, mwanda bhulula o myenyu yenu. Kolose 3:12 izwela: “Kalenu ni henda.” O divulu dya 1 Tesalonika 4:9, 10 dyamba: “Nzambi wa milongo kya kudizola mudyenu. . . . Maji jiphange twamesena ku mitendelesa kwila, sotenu kuya ni kubhanga dingi o ima yiyi.” O izwelu yiyi a isoneka phala o Jikidistá exile kya mulondekesa o idifwa yiyi, o kukolokota, o kusuwa o ibhindamu ya akwa, ni henda. Ne kiki, ene atokalele kusuluka mukulondekesa o idifwa yiyi. Kyene we kitwatokala o kubhanga. Phala kutukwatekesa, twandamona kyebhi o Jikidistá ja dyanga kyalondekesa o idifwa yiyi. Mu kusuluka twanda mona kyebhi kitutena kukayela o phangu ya maxibulu enyo, ni kulondekesa kwila twala polondo phala o hadi ya dikota.

5. Kyebhi o Jikidistá ja dyanga kya kolokota mu ibhidi ya?

⁵ O Jikidistá ja dyanga abhingile kukolokota. (Jih. 10:36) Kala o athu amukwa mu thembu yenyoyo, o Jikidistá exile mudibhana we ibhidi. Maji mukonda dya kukala Jikidistá, ene exile ni ibhidi yamukwa dingi. Avulu mudya a azukutisile kana ngo ku atwameni a jingeleja ja Jijudé ni ku jinguvulu ja Loma, maji we ni ku jindandu ja. (Mat. 10:21) Mu kilunga we sayi ithangana ene abhingile nguzu yavulu, phala ka afwinyise ku ilongesu ya makutu ya akwa kulungulukila o kidi exile musota kuwanuna o kilunga. (Ika. 20:29, 30) Ne kiki o Jikidistá jojo akolokota mwene. (Dij. 2:3) Kyebhi kyatena kubhanga kiki? Ene exile muxinganeka mu phangu ya athu akolokotele a atumbula mu Bibidya, kala Jobe. (Tiy. 5:10, 11) Ene a sambe mu kubhinga nguzu. (Ika. 4:29-31) Ene we adikwatenena mu mabesá ejitambula mukonda dya kukolokota kwa.—Ika. 5:41.

6. Ihi iwadilongo mu ima yabhange phange Merita phala kukolokota mu ibhidi?

⁶ Etu we tutena kukolokota se tudilonga o phangu ya athu a atumbula mu Bibidya ni kuxinganeka mu misoso itusanga mu madivulu metu. Kiki kyene kyabhiti ni phange ya muhatu amwixana Merita, watungu mu ixi ya Albânia wakolokotele kyoso o mwiji we exile mumuzukutisa. Mwene wambe: “O kudilonga o phangu ya Jobe itusanga mu Bibidya, yangitula ku muxima. Mwene watale hadi yavulu, sumbala kejidile se nanyi wexile mumubhekela o ibhidi yenyoyo, maji ne kiki mwene wambe: “Katé bhu nga kà fwila, nuka ngi di sandula mu kidi kyami!” (Jobe 27:5) Eme ngaxinganeka kwila o ibhidi ya Jobe yabhonzele dingi o yami ndenge. Ku mbandu yamukwa, mwene kejidele se nanyi wexile mumubhekelayu, maji eme ngejidile kyambote nanyi wexile mungibhekela o ibhidi yami.”

7. Ne mwene se ki twamudibhana luwa ni ibhidi yabhonzo kyavulu, ihi itwatokala kubhanga?

⁷ Tutena we kukolesa o kukolokota kwetu mu kusamba jinga kwa Jihova ni kumutangela o ima yoso yatukala ku muxima ya mututandanganyesa. (Fil. 4:6; 1 Te. 5:17) Nange mu kithangana kiki eye ki wamudibhana luwa ni ibhidi yabhonzo kyavulu. Maji o kwila wene mu samba kwa Jihova mu kumubhinga kikwatekesa kabasa kithangana ki uluwala, utandanganya, mba kyoso ki ukamba kwijiya iwatokala o kubhanga? Se mu kithangana kiki eye wala kya ni kifwa kya kubhinga kikwatekesu kwa Nzambi mu kudibhana ni ibhidi ya kizuwa ni kizuwa, ki kyanda kubhonza ku mubhinga we kikwatekesu kyoso kiwandadibhana ni ibhidi yabhonzo dingi ku hadya. Eye wanda xikina ni kidi kyoso kwila, Jihova wejiya kyambote kyebhi kyatokala kukukwatekesa.—Jisá. 27:1, 3.

8. Kyebhi o phangu ya phange Mira ilondekesa kwila o kukolokota mu ibhidi kindala, kitena kutukwatekesa ku hadya? (Tiyaku 1:2-4) (Tala we ofoto.)

⁸ Se tukolokota mu kudibhana ni ibhidi kindala, ki kyanda tubhonza we kudibhana ni ibhidi ku hadya. (Lom. 5:3) Mukonda dyahi tutena kuzwela kiki? Jiphange javulu amona kwila kyoso kya kolokota mukudibhana ni kibhidi akala dingi ni nguzu phala kudibhana ni ibhidi  yamukwa. Kyoso kyakolokota mu ibhidi ni kikwatekesu kya Jihova, o kixikanu kya, kya kwila Jihova wala polondo phala ku akwatekesa kidibandekesa dingi. O kixikanu kiki kya akwatekesa kudibhana ni ibhidi yanda kwiza ku pholo. (Tanga Tiyaku 1:2-4.) Kiki kyene kyabhiti ni phang’yetu ya muhatu Mira muboki wa thembu yoso mu ixi ya Albânia, mwene wamono kwila o kukolokota kwe mu ibhidi yadibhana nayu kwamukwatekesa kusuluka mukulondekesa o kidifwa kiki mu ibhidi yamudibhana nayu kindala. Mwene wambe we kwila, sayi ithangana wexile mudivwa kwila mwene ngo wamudibhana ni ibhidi yavulu. Maji mukusuluka wexile mulembalala yoso yamubhangela kya Jihova mu 20 a mivu abhiti, mu kiki mwene wexile muzwela: ‘Kolokota fiyele. Kana kwehela kwila o mivu yoso yiyi ni ibhidi yoso iwatena kutolola ni kikwatekesu kya Jihova, ikala ya kingoho.’ Eye we utena kuxinganeka kyebhi Jihova kyakukwatekesa kya kukolokota. Dyelela kwila Jihova wene mumona o ithangana yoso iwene mukolokota ni kwila wanda kubesowala. (Mat. 5:10-12) Kyoso kyanda mateka o hadi ya dikota eye ki wanda bhinga dingi kudilonga o kukolokota, ni kwila wanda kala polondo phala kusuluka mu kukolokota.

9. Kyebhi o kilunga kya Andiyokya ya Sídya kya suwu o ibhindamu ya jiphange?

⁹ Tala ihi yabhiti ni Jikidistá mu mbanza ya Judeya exile mutala hadi mukonda dya nzala. Kyoso o jiphange mu kilunga kya Andiyokya ya Sídya, kyevu kwila o jiphange ku Judeya exile mutala hadi mukonda dya nzala, se phata ene amesenene kyavulu kwakwatekesa. Maji ene kexile ngo ni vondadi ya kukwatekesa, a ilondekesa bhukaxi ka ibhangelu. Ene “asolo kutumikisa ima phala kukwatekesa o jiphange mu Judeya, kala muthu wa bhana kyoso kyakexile nakyu.” (Ika. 11:27-30) Sumbala o jiphange abhindamene mukonda dya nzala exile dikanga, ne kiki o jiphange ku Andiyokya exile polondo phala kwakwatekesa.—1 Nz. 3:17, 18.

10. Mu maukexilu ebhi utulondekesa kwila twamusuwa o jiphange jetu kyoso kyabhita mu mavuwa? (Tala we ofoto.)

¹⁰ Lelu tutena we kulondekesa kwila twamusuwa o ibhindamu ya akwetu kyoso kitwivwa kwila o jiphange jetu amutala hadi mukonda dya mavuwa mba ibhidi ya mukwa. Etu ki tulaleka phala kukwatekesa —tutena kuzwela ni tufunga phala kukwatekesa kabasa kikalakalu, kusangela kitadi, mba kusambela o jiphange abhiti mu mavuwa. b (Jisa. 17:17) Mu kifika ku muvu wa 2020, ku mundu woso asokejekaku 950 ndenge a Ibuka Ikwatekesa o Athu Abhiti mu Mavuwa, phala kukwatekesa yo abhindamene mu kithangana kya uhaxi wa COVID-19. Tusakidila kyavulu o jiphange jetu jamala ni ja ahatu adibhakula phala kukalakala mu ibuka yiyi. O kusuwa o ibhindamu ya akwa, kwene kubhangesa jiphange jiji kudibhakula phala kukwatekesa, ene a wanena o imbamba ku jiphange, a akwatekesa mu nzumbi, sayi ithangana kate mwene atungulula o jinzo ni ididi ya ubhezelu.—Sokesa ni 2 Kolindu 8:1-4.

11. Kyebhi o kusuwa o ibhindamu ya Jiphange jetu kibhana kijingu kwa Tata yetu ya dyulu?

¹¹ Kyoso kitusuwa o ibhindamu ya jiphange jetu mu kithangana kya mavuwa, o athu amukwa atena kumona o nguzu yoso itubhanga. Mu kifika ku muvu wa 2019, o Kitembu Kya Nguzu akixana Dorian kya bhwika Kididi kya Ubhezelu ku ixi ya Bahamas. O jiphange exile mutungulula o Kididi kya Ubhezelu, ebhwidisa ku diyala wexile ni ditenda dya kutunga maji kexile Mbangi ya Jihova, se kikuxi kyeji kwabhinga phala kwabhana o ima ya bhindamenene, phala kusuluka ni kutunga. O diyala dyodyo watambwijila: “Enu ki mubhingi kubhana kima . . . eme nganda mibhana o jifalamenda, o  athu anda mikwatekesa ni yoso imwabhindamena. . . . Eme ngamesena kubhanga kiki mukonda dya kisangela kyenu. Nga diwana kyavulu o ukexilu umwalanawu wa kukwatekesa o makamba menu.” Athu avulu ku mundu kejiya Jihova. Maji avulu ene mumona o Jimbangi ja Jihova. Etu twasanguluka kyavulu mu kwijiya kwila o ukexilu wa kusuwa o ibhindamu ya jiphange jetu, utena kubhangesa o athu amukwa kumesena kwijiya dingi yalungu ni Jihova, o Nzambi ‘mukwa henda!’—Efe. 2:4.

12. Mukonda dyahi o kusuwa o ibhindamu ya akwetu kindala kutukwatekesa kudipelepalala phala o hadi ya dikota? (Dijingunwinu 13:16, 17)

¹² Mukonda dyahi twandabhinga kusuwa o ibhindamu ya akwetu mu kithangana kya hadi ya dikota? O Bibidya ilondekesa kwila o yo kene mudita mu maka a jinguvulu anda dibhana ni ibhidi yavulu, kikale mu kithangana kiki mba mu kithangana kya hadi ya dikota. (Tanga Dijingunwinu 13:16, 17.) O jiphange jetu nange andabhinga kikwatekesu phala kulanga o ibhindamu ya. Kyoso o Sobha yetu Jezú Kidistu kyanda kwiza phala kufundisa o mundu yu, twamesena kwila mwene utusanga twamusuwa o ibhindamu ya jiphange jetu anga utubhana o ujitu wa ku “lundula o Utuminu.”—Mat. 25:34-40.

13. Kala kilondekesa Loma 15:7, kyebhi Jikidistá ja dyanga kya kolesa o henda mudya?

¹³ O henda yene yexile mulondekesa se ananyi exile o Jikidistá. Maji o kwila ki kya abhonzele kulondekesa o henda? Tala kyebhi o jiphange mu kilunga kya Loma ka difwile mudya. Amoxi exile Jijudé a alongele kukayela o Kitumu kya Mozé, amukwa atokalele ku jixi jengi adilongele ijila ya mukwa. Sayi Jikidistá exile abhika amukwa kana —kate mwene amoxi mudya exile ni abhika. Kyebhi o Jikidistá jenyojo kyatena kusuluka mu kudilondekesa o henda mudya sumbala ka difwile? Poxolo Phawulu watendelesa o Jikidistá: “di tambululyenu mudyenu.” (Tanga Loma 15:7.) Ihi yamesenene kuzwela mwene? O kizwelu kyolungulule ‘kuditambulula,’ kilombolola kusangesa muthu ni kumubhanga mbote mba kumuzalela, kala kyoso kitusangesa muthu ku bhata dyetu mba tumutambulula kala dikamba. Mu kifika Phawulu watendelesa Filimone kyebhi kyeji tambululula Onézimu: “mutambulule ni henda yoso.” (Filim. 17) Akila ni Pidisila asangesa we Apolo, ene amwixana bhu mbandu ya amujimbulwila kyambote, o ‘mikanda ikola.’ (Ika. 18:26) Mu jevi dya kwehela kwila o ijila ya, ya amwangununa, o Jikidistá jojo atolola o ukexilu yu, ya atena kuditambulula mudya.

14. Kyebhi phange Anna ni mwadi we kyalondekesa henda?

¹⁴ Etu we tutena kulondekesa henda ku jiphange jetu mu kubhanga ukamba ni ene ni kubhita nawu kithangana. O kiki kitena kwabhangesa kutulondekesa o henda ya. (2 Ko. 6:11-13) Tala o musoso wa phange Anna ni mwadi we. Ki kubhitile thembu yavulu kyoso kyatambula o ujitu wa ubhe wa kukala akunji a jixi jengi ku mbandu ifwila dikumbi ya África, o uhaxi wa COVID-19 wamateka. Mukonda dya kiki ene katenene kudisanga ni jiphange pholo ni pholo, kyabhonzele we kwa ejiya kyambote. Kyenyiki kyebhi o dikaza kyejitena kulondekesa o henda ya ku jiphange? Ene amateka kudizwelesa nawu bhukaxi ka mitelembe, ni kwatangela kwila a mesenene kyavulu kudisanga nawu phala kwa ejiya kyambote. O jiphange mu kumona o henda yexile mwa londekesa o dikaza, ene amateka kwaxinda ni kwatumikisa jinjimbu. Mukonda dyahi o dikaza abhange nguzu yavulu phala kwijiya o jiphange? Phange Anna wambe: “Eme nuka nganda jimba o henda yalondekesa ko kwami ni ku mwiji wetu kikale mu ithangana yambote ni yayibha, kiki kyangitula kumuxima, kyangibhangesa we kulondekesa o henda yami ku akwetu.”

15. Ihi itwadilongo mu phangu ya phange Vanessa yalungu ni kulondekesa o henda ku jiphange jetu? (Tala we ofoto.)

¹⁵ Avulu mudyetu ala mu ilunga mwala jiphange  javulu a asase mu ukexilu wengi mba ala ni idifwa ki yadifu ni yetu. Tutena kukolesa o henda yetu kwa ene mu kudikwatenena mu idifwa yambote yala nayu. Sayi phange ya muhatu, mu ixi ya Nova Zelândia, amwixana Vanessa, kyamubhonzele kukala ni ukamba wambote ni amoxi mu kilunga. Maji muveji dya kudisondolola ku jiphange jojo exile ni idifwa yamubhonzele kyavulu, wasolo kubhita nawu dingi kithangana. O kubhanga kiki kya mukwatekesa kwamona kala kyamwamona Jihova. Mwene wambe: “Tunde mwadi wami kyakituka kafunga ka ilunga, twene mudilunga ni jiphange javulu ala ni idifwa ki idifu. Ki kyene mu ngibhonza dingi kudibhana ni jiphange jiji. Eme nga wabhela kyavulu kumona kwila o jiphange jami ka difu. Mu kidi Jihova wawabhela kyavulu o ukexilu yu, mukonda o athu a ehela mwene ku mu bheza, enyoso kala ni idifwa ya sokela.” Kyoso kitumona akwetu kala Jihova, tulondekesa kwila twa azolo we.—2 Ko. 8:24.

16. Mukonda dyahi twanda bhinga kulondekesa henda ku jiphange jetu mu kithangana kya hadi yadikota? (Tala we ofoto.)

¹⁶ Twanda bhindamena o henda mu kithangana kya hadi yadikota. Xinganeka ngo. Kyoso kyanda mateka o hadi yadikota, kyebhi Jihova kyanda tulanga? Tala ya tendelesele Jihova ku mundu we, yeji bhanga kyoso kyeji kwalungulukila ku akwa Babilonya: “Enu mu mundu wami, ndenu, mu bokone mu jinzo jenu, mu dijikile momo, mu swame ngó kathangana, katé ki somboka o njinda.” (Iza. 26:20) O izwelu yiyi nange yanda dikumbidila we kokwetu mu kithangana kya hadi yadikota. O “jinzo” jotumbule bhabha nange jitena kulombolola o ilunga yetu. Mu kithangana kya hadi yadikota, twanda sanga o dilengelu dyatukanena Jihova mu kukala kumoxi ni jiphange jetu. Maji phe twatokala kya kubhanga nguzu yavulu kindala, phala kuzola o jiphange jetu ni muxima woso. Twanda bhuluka ngo se tubhanga kyenyiki!

17. Ihi itwandatena kubhanga mu kithangana kya hadi yadikota se tu dipelepalala kindala?

¹⁷ O “Kizuwa kyonene kya Jihova” kyandakala kithangana kyabhonzo kyavulu phala athu oso. (Sof. 1:14, 15) O mundu wa Jihova wandatala we hadi. Maji se tudipelepalala kindala, twandatena kutululuka ni kukwatekesa we akwetu. Kabasa kibhidi kimoneka, twanda dibhana nakyu ni kukolokota. Kyoso o jiphange jetu kyakala mutala hadi, twanda suwa o ibhindamu ya, mukubhanga yoso itutena phala kwakwatekesa ni kwabhana o ima yabhindamena. Twanda suluka jinga mu kulondekesa o henda yetu ku jiphange mu kukala ku mbandu ya. Jihova wanda tu besowala ni mwenyu wa kalelaku ku mundu wa ubhe, kwenyoko o mavuwa moso ni ibhidi ki yandakalaku dingi.—Iza. 65:17.