1. Mu ukexilu webhi o Jikidistá abhingi kukala kala o mixi? (Tala we ofoto.)

 SAYI athu amba kwila “o kitembwe ki kitena kutolola o muxi uya ni kuzendajala kyoso kya ulundula ku kitembwe.” O izwelu yiyi ilondekesa kwila sayi mixi phala itene kwimana kyoso kiza o kitembwe, yene ki yatokala kukola kyavulu. Kyene kimoxi we, phala tutene kusidivila Jihova ni kisangusangu, kyoso kitudibhana ni ibhidi, twatokala kutetuluka. Kyebhi? Phala kuditunda kyambote kyoso o ima kiyilunguluka ku mwenyu wetu ni kuxila o ibanzelu ya akwetu, twatokala kutetuluka.

2. Idifwa yebhi yanda tukwatekesa kyoso o ima ilunguluka ku mwenyu wetu, ni ihi itwandadilonga mu milongi yiyi?

² Kuma tu jiselevende ja Jihova twatokala kutetuluka. Twamesena kukala tu athu alenduka ni kulondekesa o henda. Mu milongi yiyi twandamona kyebhi o idifwa yiyi yakwatekesa o Jikidistá kuditunda kyambote mu kudibhana ibhidi. Twanda mona we kyebhi o idifwa yiyi itena kutukwatekesa. Maji kyadyanga tudilonge o phangu ya Jihova ni Jezú, alondekesa o idifwa yiyi ni kuyuka kwoso.

3. Kyebhi kitwejiya kwila Jihova muthu watetuluka?

³ Jihova amwixana “Tadi dya Mwenyu” mukonda wa swina katena kumulundula. (Mate. 32:4) Maji mwene we muthu watetuluka. O ima mu ngongo yamulunguluka, maji kuma Jihova muthu watetuluka wamubhanga yoso phala o vondadi ye idikumbidile. Jihova watubhange mu kidifwanganu kye, kyenyiki tutena kulungulula, kyoso o ima kumwenyu wetu kiyilunguka we. Mu Bibidya tusangamu itumu itukwatekesa kusola ni unjimu kabasa kibhidi kitudibhana nakyu. O phangu ya Jihova  ni itumu yatubhana mwene, itukwatekesa kumona kwila, sumbala “Tadi dya Mwenyu,” maji muthu watetuluka we.

4. Bhana phangu ilondekesa kwila Jihova muthu watetuluka. (Ijila 5:7, 11)

⁴ Jihova ubhanga yoso yayuka ni kutetuluka. Jihova ka dibhana ni athu ni undanda. Tala kyebhi mwene kyalondekekesa o kutetuluka ni akwa Izalayele. Mwene kexile mukingila kwila o ngadyama ubhana sata isokela ni ya mvwama. Sayi bhabha mwene wexile mukwehela o muthu kubhana kala sata, o kima kyexile nakyu.—Tanga Ijila 5:7, 11.

5. Bhana phangu ilondekesa o kulenduka ni henda ya Jihova.

⁵ O kulenduka ni henda ya Jihova imubhangesa kukala muthu watetuluka. Mu kifika, o kulenduka kwa Jihova kwa dimonekena kyoso kyamesenene kubhwika o athu ayibha mu mbanza ya Sodoma. Bhukaxi ka jianju je, Jihova wa tangela Lote phala kulengela ku milundu. Maji Lote wexile ni woma wa kulengela kwenyoko. Kyenyiki wabhingi phala kuya ni mwiji we ku mbanza yofele ya Zowale, sumbala Jihova wakanene kya kubhwika o mbanza yenyoyo. Jihova wejitena kujijidika Lote phala kubelesela o itendelesu ye. Muveji dya kiki, mwene waxikina kya mubhingi Lote, yu walungulula o kibanzelu kye kya kubhwika o mbanza ya Zowale. (Dim. 19:18-22) Mivu yavulu kupholo, Jihova walondekesa henda ku akwa Ninive. Mwene watumikisa polofeta Jona phala kubhana ngolokela ya kwila o athu ni mbanza eji kwabhwika mukonda dya kuyibha kwa. Kyoso o akwa Ninive kya dyela o ituxi ya, Jihova wa akwatela henda, ka bhwika dingi o mbanza yenyoyo.—Jona 3:1, 10; 4:10, 11.

6. Bhana phangu ilondekesa kyebhi Jezu kya kayela o kutetuluka kwa Jihova.

⁶ Jezú wakayela o phangu ya Jihova, yu wexile muthu watetuluka. Mwene amutumikisa mu ixi phala kubokela o “jimbudi ja jimbidila ja dibhata dya Izalayele.” Maji walondekesa o kutetuluka mu kubokela we athu amukwa. Sayi kizuwa kwamoneka muhatu ka tokalele ku Izalayele wamubhingi phala kusaka mon’e wamuhatu exile “mu mu zukutisa ku dimonyo.” Bhukaxi ka henda ye Jezú wabhange o kima kya mubhigi o muhatu, yu wasake mon’e. (Mat. 15:21-28) Tala o kifika kyamukwa. Kudimatekenu dya ukunji we, Jezú wambe: “woso ukamba ku ngi xikina. . . , eme wami ki nganda muxikina.” (Mat. 10:33) Sumbala Phetele waditunu Jezú muveji jitatu, maji Jezú wamixikina. Jezú wejidile kwila Phetele wadyela o ima yabhangele, ni kwila wexile muthu wa fiyele. Kyoso kyamufukununa, nange Jezú watukulukila Phetele yu wa mutangela kwila wa mu zolele ni kwila wamuloloka.—Luka 24:33, 34.

7. Kala kilondekesa Filipe 4:5, twamesena kwila akwetu atumona kyebhi?

⁷ Kate bhabha twadilongo kya kwila, Jihova ni Jezú athu atetuluka. Abha etu? Jihova  wamesena we kwila tukala tu athu atetuluka. (Tanga Filipe 4:5.) Tutena kudibhwidisa: ‘O kwila o athu angijiya kala ngimuthu watetuluka, ngalenduka, ngala polondo phala kulungulula? Inga angimona kala ngi muthu wajiji kyavulu? O kwila ngijijidika akwetu kubhanga o ima mu ukexilu ungifika kwila wene watokala? Inga ngene mu kwivwa we akwetu ni kulungulula o ibanzelu yami se kibhana?’ Tulondekesa kwila twamukayela o phangu ya Jihova ni Jezú, kyoso kitubandekesa o kutetuluka kwetu. Twandamona maukexilu ayadi alondekesa kyebhi kitukala tu athu atetuluka —kyoso o ima ilunguluka ku mwenyu wetu, ni kyoso o ukexilu wa akwetu wakusola ima ki wadifu ni wetu.

8. Ihi itena kutukwatekesa kukala tu athu atetuluka kyoso o ima ku mwenyu ilunguluka? (Tala we o nota.)

⁸ Kyoso o ima ku mwenyu wetu ilunguka, twabhingi kukala tu athu atetuluka. Kiki kitena ku tubhekela ibhidi ki twayifikile. Nange tutena kudibhana ni uhaxi wabhonzo. Tutena kudibhana ni ibhidi yalungu ni kitadi mba maka alungu ni jinguvulu, abhonzesa o mwenyu wetu. (Ndo. 9:11; 1 Ko. 7:31) Kate mwene kitena kutubhonza kukumbidila kikalakalu kitubhana o kilunga. Kabasa kibhidi ki tudibhana nakyu tutena kuditunda kyambote se tukumbidila o jindunge jiwana ja kayela: (1) Xikina kwila o ima yalunguluka, (2) xinganeka o ima ku hadya, (3) dikwatenene mu ima yambote iwalanayu ku mwenyu, ni (4) bhanga ima yambote phala akwenu. b Tumone misoso ilondekesa kyebhi o kukayela o jindunge jiji kitena kutukwatekesa.

9. Kyebhi o dikaza exile akunji a jixi jengi atena kudibhana ni ibhidi ka ifikile?

⁹ Xikina kwila o ima yalunguluka. Phange Emanuele ni muhatu we Francesca, a atumikisa kala akunji mu ixi yengi. Kyoso ene kyamateka kudilonga o dimi dya ubhe, ni kwijiya kyambote o jiphange, o uhaxi wa COVID-19 wamateka, mu kiki ene a tokalele kudisandula ku jiphange. Ki kulaleka, o man’ya phange Francesca wafu. Mwene wamesenene kyavulu kukala ni mwiji we, maji mukonda dya dibhebhu dya COVID-19, katena kukala nawu. Ihi ya kwatekesa phange Francesca kudibhana ni kibhidi kiki? Kyadyanga mwene ni mwadi we Emanuele, exile musamba mu kubhinga unjimu phala ka kale ni hele yavulu. Jihova watambwijila o misambu ya, mu kwabhana o kudya mu nzumbi mu kithangana kyatokala. Mu kifika, o itambwijilu yabhana phange amwibhwidisa mu vidyu, ya a swinisa: “Kyoso kituxikina ni lusolo lwoso kwila o ima yalunguluka, ki kwanda laleka phala tukale ni kisangusangu. Mukusuluka tubhanga yoso itutena phala kukatula mbote mu ima itwalanayu.” c Kayadi, ene asolo kubandekesa o uhete wa wakubhana umbangi bhukaxi ka mutelembe wa kafwetele kate mwene amateka kulonga o Bibidya ku muthu umoxi. Katatu, ene axikina o kikwatekesu ni kiswinisu kya abhana o jiphange, ya asakidila we o henda ya alondekesa. Mu kifika, sayi phange yamuhatu wexile mwatumikisa njimbu ni velusu ya Bibidya izuwa yoso, mwene wabhange kiki mu muvu wa muvimba. Kyoso we kituxikina kwila, o ima yalunguluka ku mwenyu wetu, twandatena kusanguluka ni ima itutena o kubhanga.

10. Kyebhi o phange ya muhatu ka dikwatenena mu ima yalunguluka ku mwenyu we?

 ¹⁰ Xinganeka ku hadya, dikwatenene mu ima yambote. Phange Christina, mukwa Romênia watungu mu ixi ya Japão, waluwalele kyavulu kyoso o kilunga kya dimi dya Kingileji mwatokalele akijika. Maji, mwene ka dikwatenena mu kuxinganeka mu ima yabhiti. Muveji dya kiki, wayi mu kilunga kya dimi dya Japonês yu wabhange yoso yatenene mu ukunji we. Mwene wabhingi kwa muhatu m’ukulu wexile koleka ye ya salu, phala kumulonga kuzwela kyambote o dimi dya Japonês. Phange Christina wabhingi kwa koleka ye phala kumulonga o dimi bhukaxi ka Bibidya ni kadivulu Sanguluka Katé Kuhádya ni Hádya! yu waxikina. Kyenyiki phange Christina wadilongo kuzwela kyambote o dimi dya Japonês, maji o kyabeta dingi kota o koleka ye wamesenene kwijiya dingi yalungu ni Bibidya. Kyoso ki tukamba kudikwatenena mu ima yokulu, anga tuxinganeka mu ima yambote, o ima yalunguluka ku mwenyu wetu itena kutubhekela mabesá ki twafikile.

11. Ihi ya kwatekesa dikaza exile mudibhana ni kibhidi kya kukamba kitadi?

¹¹ Bhanga ima yambote phala akwenu. Sayi dikaza atungile mu ixi mwafidisa o kikalakalu kyetu, exile mudibhana ni ibhidi yalungu ni kitadi. Kiki kyexile mubhita mukonda mu ixi yenyoyo mwexile maka a kukamba o kitadi. Ihi yabhange o dikaza? Kyadyanga, ene asosolola o ima ku mwenyu wa. Mu kusuluka, muveji dya kudikwatenena ngo mu ibhidi ya, ene asolo kukwatekesa akwa mu ku abokela o njimbu yambote ni kuswina kwoso. (Ika. 20:35) O diyala wambe: “O kudikwatenena mu kikalakalu kya kuboka kyatukwatekesa kuxinganeka dingi yebhi o vondadi ya Nzambi muveji dya kuxinganeka mu ibhidi yetu.” Kyoso o ima ilunguluka kumwenyu wetu, twatokala kulembalala kwila kima kyambote kukwatekesa akwetu bengebenge mu kikalakalu kya kuboka.

12. Kyebhi o phangu ya poxolo Phawulu itukwatekesa kusota jindunge ja kubokela o athu?

¹² Mu ukunji wetu twatokala kusota jindunge phala kubokela kabasa muthu. O athu utwene mwabokela kala ni ibanzelu imoxi yalungu ni Nzambi ni kwila ene atokala mu ididi yavulu, ala we ni ijila ki idifu. Poxolo Phawulu wa soto jindunge phala kubokela o athu, etu tutena kudilonga ni phangu ye. Jezú wasolo Phawulu kala “poxolo phala o athu akwa jixi jengi.” (Lom. 11:13) Mu kyenyiki, poxolo Phawulu wa bokela o Jijudé, Jingeleku, athu adilongele kyavulu ni yo ka dilonge kyavulu, ni jinguvulu. Phala kubhixidisa o njimbu ku mixima ya athu avulu, Phawulu wabhange “yoso phala kukwatekesa athu a idifwa yoso.” (1 Ko. 9:19-23) Mu kuboka, Phawulu wexile mutonginina o idifwa ya athu, o ima ya akondolokele ni ima ya kexile muxikina. Etu we tutena kubandekesa o uhete wetu wa kuboka, se tu tetuluka ni kusota o ukexilu wabetakota wa kukwatekesa muthu ni muthu.

13. Kilwezu kyahi kyojimbulule mu mukanda wa 1 Kolindu 8:9, kitwanda lenga se tuxila o ibanzelu ya akwetu?

¹³ O kukala tu athu atetuluka, kitena kutukwatekesa kuxila o ima izwela akwetu. Mu kifika, sayi jiphange ja ahatu awabhela kyavulu kudipindala maji amukwa kana. Sayi Jikidistá awabhela kunwa bhofele o uholwa, maji amukwa ka xikina ne ngo bhofele. Jikidistá joso amesena kukala ni sawidi yambote, maji asota maukexilu ka difu phala kulanga o sawidi ya. Mu ithangana yoso se tuxinganeka kwila, o ibanzelu yetu yene yafwama ni  kujijidika akwetu kuyixikina, tutena kutondalesa akwetu ni kuwana o jiphange mu kilunga. Mu kidi etu ki twamesena kwila kiki kibhita! (Tanga 1 Kolindu 8:9; 10:23, 24) Twanda dilonga ifika iyadi yanda londekesa kyebhi, o kukumbidila o itendelesu ya Bibidya itena kutukwatekesa kukala tu athu atetuluka ni kukala tu akwa paze.

14. Ihi itwatokala kuxinganeka kyoso kitusola o izwatu yetu mba o ukexilu wa kuyudika o ndemba?

¹⁴ Izwatu ni ukexilu wa kuyudika o ndemba. Jihova ka tutangela se izwatu yebhi itwatokala kuzwata, maji watubhana itumu itwatokala kukayela. Twatokala kuzwata mu ukexilu ulondekesa kwila twa akunji a Nzambi, mu kuzwata kyambote, ni kuxila kwoso “ni kilunji.” (1 Ti. 2:9, 10; 1 Ph. 3:3) Etu ki twamesena kwila akwetu atutonginina kyavulu mukonda dya ukexilu wetu wa kuzwata. O itendelesu ya Bibidya itena kukwatekesa we o tufunga phala ka bhane itumu ya, yalungu ni kuzwata ni kuyudika o ndemba. Mu kifika, sayi kilunga o tufunga amesenene kukwatekesa jiphange ja mala mizangala, exile mukayela o ukexilu wa kubatula o ndemba wa athu a akondolokele. Ene exile mu ibatula mu ukexilu wabutu, maji o ndemba isandujuka. Kyebhi o tufunga kyeji kwakwatekesa se kutaku o itumu ya? O kafunga ka ilunga, watendelesa o tufunga kutangela o minzangala: “Se wamulonga kuditala, anga o jingivwidi abetakota mu kukutalela muveji dyakubhana matwi mu milongi i wamuzwela, kiki kilondekesa kwila sayi ko maka mu ukexilu we wa kuzwata ni wa kudiyudika.” O kifika kiki kyakwatekesa o minzangala kutendela ihi yatokalele kubhanga ni ihi o tufunga ka tokalele kuyibhanga. d

15. Itumu ni ijila yebhi ya Bibidya itena kutukwatekesa kyoso kitusola o ukexilu wa kutusaka? (Loma 14:5)

¹⁵ Kulanga o sawidi. Kala Kidistá watokala  kusola kyebhi kyatokala kulanga o sawidi ye. (Nga. 6:5) Kyoso o Jikidistá kya sola o ukexilu wa kwasaka, atokala kubelesela o itumu ya Bibidya yalungu ni manyinga, ni maka alungu ni wanga. (Ika. 15:20; Nga. 5:19, 20) Katuku o maukexilu ayadi ya, kala Kidistá watokala kusola o ukexilu we wa kumusaka. Sayi ya asola kwasaka ni milongo ya phutu, amukwa asola kwasaka ni milongo ya kimbundu. Etu twatokala kuxila kabasa ukexilu u sola akwetu walungu ni kwasaka, ne mwene se twakiwabhela mba kana. Mu kyenyiki twatokala kulembalala o jipondo jiwana jiji: (1) O Utuminu wa Nzambi wene ngo wanda zubha o mauhaxi moso. (Iza. 33:24) (2) Kala Kidistá watokala kwijiya kyebhi o kima kyabeta kota phala mwene. (Tanga Loma 14:5.) (3) Ki twatokala kufundisa akwetu mba kubhanga kima kyeji kwabhangesa kudibhala. (Lom. 14:13) (4) O Jikidistá alondekesa o henda, ene ejiya kwila o kukala ni muxima umoxi mu kilunga kwabeta dingi kota o ibanzelu ya, ndenge. (Lom. 14:15, 19, 20) Se tu lembalala jinga o jipondo jiji, twandakala ni ukamba wambote ni jiphange jetu ni kubhangesa kwila mu kilunga mukala kutululuka.

16. Kyebhi o tufunga kyatena kulondekesa kwila athu atetuluka kyoso kya dibhana ni tufunga ni akwa? (Tala we ofoto.)

¹⁶ O tufunga atokala kukala phangu yambote ya kutetuluka. (1 Ti. 3:2, 3) Mu kifika, o kafunga ka tokala kukingila kwila akwa axikina mu ibanzelu ye ithangana yoso, mukonda mwene mwadyakime. Mwene wejiya kwila o nzumbi ikola ya Jihova itena kubhangesa kafunga kosokoso kubatula o maka mu ukexilu wa unjimu. Se kafunga ka xikina mu kixinganeku kya tufunga twamukwa, maji ene ka mubhukumukina kitumu kya Bibidya, mwene ulondekesa o kutetuluka mu kwakwatekesa.

17. Mbote yahi ibhekela o kutetuluka?

¹⁷ O Jikidistá atetuluka atambula mabesá avulu. Mu kifika, tukala ni ukamba wambote ni jiphange jetu, o kiki kibhekela paze mu kilunga. Twala ni kisangusangu kya kwijiya athu a maukexilu ni ijila ya jixi ki idifu. Kima kyambote kwijiya kwila sumbala ki tudifu, maji twala tu mwiji ubheza Jihova ni muxima umoxi. O kyabeta dingi kota, o kwijiya kwila twamukayela o phangu ya Jihova, o muthu watetuluka.