1. Milongi yebhi iweza mu kwijiya kyoso kiwamateka kudilonga o Bibidya?

 WA MULEMBALALA kyoso kiwamateka kudilonga o Bibidya? Nange eye ki wejidile kwila Nzambi wala ni dijina. Mba wadivu kyambote mu kwijiya kwila Nzambi kene mujokotesa o athu mu infernu. Mba phe nange eye wasangulukile mu kudilonga kwila wandatena kumona dingi o jindandu je jakazola jafu kya, ni kutunga nawu mu palayizu mu ixi.

2. Katuku o kudilonga o Bibidya, mu maukexilu ebhi dingi eye wakulu mu nzumbi? (Efezu 5:1, 2)

² Kyoso kiwayi ni kudilonga o maka a Nzambi, o henda ye kwa Jihova yayi we ni kudibandekesa. O henda yiyi yakuswinisa kukumbidila o ima iwexile mudilonga. Eye wamateka kusola ni kubatula kyambote o maka mu kukayela o itumu ya Bibidya. Walungulula o ukexilu ni wendelu we mukonda wamesenene kusangulukisa Nzambi. Kala o mona ukayela o phangu ya tat’e, eye mu kubhanga o ima yoso yiyi, wexile mu kayela o Tata ye ya dyulu.—Tanga Efezu 5:1, 2.

3. Ibhwidisu yebhi itutena kudibhanga?

³ Tutena kudibhwidisa: ‘O kwila kindala o henda yami kwa Jihova yakolo dingi, kyoso kingamateka kudilonga o Bibidya ndenge? O kwila tunde kyangibatizala o ukexilu wami wa kubanza ni wa kubhanga o ima wadifu dingi ni wa Jihova? Kyebhi kyala o henda yami ku jiphange?’ Se umona kwila o “henda iwexile nayu kudimatekenu” ya zoza, kana kuluwala. O Jikidistá ja dyanga adibhanene we ni maka enya. Jezú ka axisa kana, mwene kanda tuxisa we. (Dij. 2:4, 7) Mwene wejiya kwila tutena kuvutuka mu kukala dingi ni henda itwexile nayu  kyoso kitwamateka kudilonga o kidi kya Bibidya.

4. Ihi itwandamona mu milongi yiyi?

⁴ O milongi yiyi yandalondekesa kyebhi kitutena kusuluka mu kubandekesa o henda yetu kwa Jihova ni ku akwetu. Twandamona we o mabesá ututena kukala nawu kyoso kitukolesa o henda yetu kwa Jihova ni ku akwetu.

5-6. Ibhidi yebhi yadibhana nayu Phawulu mu ukunji we, maji ihi yamukwatekesa kusuluka mu kusidivila Jihova?

⁵ O poxolo Phawulu wasangulukile kyavulu mu kusidivila Jihova, maji sayi ithangana kyamubhonzele. Mwene wabhingile kwenda njila ja makanga, mu thembu yenyoyo, kiki kyexile kima kyabhonzele kyavulu. Mu kwenda mu jinjila jiji, sayi ithangana Phawulu wabhiti “mu ilwezu ya jingiji” ni “mu ilwezu ya miyi.” Sayi ithangana kate mwene o jinguma a mubhana kibetu. (2 Ko. 11:23-27) Sayi bhabha o jiphange kexile mulondekesa kisakidilu mu nguzu yoso yexile mubhanga Phawulu phala ku akwatekesa.—2 Ko. 10:10; Fil. 4:15.

⁶ hi yakwatekesa Phawulu kusuluka mu kusidivila Jihova? Mwene wadilongo kyavulu yalungu ni idifwa ya Jihova bhukaxi ka Bibidya ni bhukaxi ka ima yabhitile ku mwenyu we. Mwene waxikinine ni kidi kyoso kwila Jihova wamuzolele. (Lom. 8:38, 39; Efe. 2:4, 5) Kiki kyamubhangesa we kuzola kyavulu Jihova. Phawulu walondekesa o henda ye kwa Jihova ‘mu kukwatekesa o jiphange ni mu kukolokota mu ku akwatekesa jinga.’—Jih. 6:10.

7. Mu ukexilu webhi ututena kukolesa o henda yetu kwa Jihova?

⁷ Tutena kukolesa o henda yetu kwa Nzambi mu kudilonga o Maka me. Mu kutanga o Bibidya, sota kwijiya se o velesu mba mbandu iwatange ikulonga ihi yalungu ni Jihova. Dibhwidise: ‘Kyebhi o musoso yu ulondekesa kwila Jihova wangizolo? Kyebhi o musoso yu ubandekesa o henda yami kwa Jihova?’

8. Mu ukexilu webhi wamukwa ututena kukolesa o henda yetu kwa Jihova?

⁸ Ukexilu wamukwa wakukolesa o henda yetu kwa Jihova, o kujikula o muxima wetu kwa mwene bhukaxi ka musambu ithangana yoso. (Jisá. 25:4, 5) Jihova ubhanga o mbandu ye mu kutambwijila o misambu yetu. (1 Nz. 3:21, 22) Sayi phange ya muhatu mu ixi ya Ásia, amwixana Katidi, wambe: “Ku dimatekenu ngazolele Jihova mukonda dya ima ingadilongele yalungu ni mwene. Maji kyoso kingamono kwila mwene wexile mutambwijila o misambu yami, o henda yami yadibandekesa dingi. O kiki kyangiswinisa kubhanga o ima imusangulukisa.” b

9. Kyebhi kitwejiya kwila Timote wexile mu kolesa o henda ye ku jiphange?

⁹ Mu kubhita mivu kyoso kya kituka Kidistá, Phawulu weza mu kwijiya munzangala wa diyala wexile ni kilunji kyambote amwixanene Timote. Timote wazolele Jihova ni athu. Phawulu watangela akwa Filipe: “ki ngala ni muthu wala ni muxima wasokela ni wa [Timote] phala ku milanga ni henda yoso.” (Fil. 2:20) Phawulu bhabha kexile muzwela yalungu ni uhete wa Timote wa kusokejeka o ima mba wakubhanga madiskulusu ambote. Maji Phawulu wamonene kwila Timote wazolele kyavulu o jiphange. Se phata kwila o ilunga yexile mukunda Timote, exile mumukingila ni hanji yoso.—1 Ko. 4:17.

10. Kyebhi phange Anna ni mwadi we kyalondekesa henda ku jiphange?

¹⁰ Etu we tusota maukexilu a kukwatekesa o jiphange jetu. (Jih. 13:16) Tala o phangu ya  phange Anna, twamutumbula mu milongi yatundumu. Kyoso mu mbanza ya, mwabhiti kitembu kya dikota, mwene ni mwadi we ayi mukunda mwiji wa jiphange jetu, ya amono kwila o kitembu kyazangele o kizambelu kya inzo. Mukonda dya kiki o mwiji ki wexile ni izwatu yazele. Phange Anna wambe: “Twambata o izwatu ya, twayisukula, twayingomala, twayibunjika, etu twa abhanayu. Phala etu kyexile ngo kima kyofele, maji kiki kyakolesa o ukamba wetu kate lelu.” O kuzola kyavulu o jiphange kwene kwaswinisa Anna ni mwadi we ku akwatekesa.—1 Nz. 3:17, 18.

¹¹ Kyebhi kidivwa akwetu kyoso kitwalondekesa o henda? (b) Kala kyosoneke mu Jisabhu 19:17, ihi ibhanga Jihova kyoso kitulondekesa henda?

¹¹ Kyoso kitubhanga o mbote ni kulondekesa henda ku akwetu, ene atena kumona kwila twamubhanga nguzu phala kukayela o phangu ya Jihova. Ene nange abhana valolo mu mbote itubhanga mu ukexilu ki tu ufikile. Phange Katidi, twamutumbula kudima, ulembalala ni henda yoso yo amukwatekesele. Mwene wambe: “Eme ngisakidila kyavulu o jiphange ja ahatu exile mu ngambata mu sidivisu ya kuboka. Ene exile mungitakana kubhata, exile mungixana phala kudya kama, ya exile mu ngambata dingi kubhata. Lelu ngimona kwila kiki kyexile kikalakalu kyavulu phala ene. Maji exile mu kibhanga ni henda.” Kidi kwila, ki athu oso anda tusakidila mu ima itubhanga phala ene. Yalungu ni athu amukwatekesa, Katidi wambe: “Eme ngamesena kuvutula o mbote yoso yangilondekesa, maji ki ngejiya se a tungila kwebhi. Maji Jihova wejiya, kyenyiki ngene musamba phala mwene ku avutula o mbote bhu kididi kyami.” Katidi walungwe. Jihova umona o mbote yoso itubhanga ku akwetu kate mwene mu ima yofele. Mwene ubhana valolo mu nguzu itubhanga  anga uyimona kala dikongo dyatokala kutufuta.—Tanga Jisabhu 19:17.

12. Kyebhi o jiphange ja mala kyatena kulondekesa o henda ya mu kilunga? (Tala we ojifoto.)

¹² Se eye u phange ya diyala, kyebhi ki utena kulondekesa henda ku akwenu ni ku akwatekesa? Sayi phange ya diyala amwixana Jordan webhwidisa ku kafunga kyebhi kyejitena kukwatekesa dingi mu kilunga. O kafunga wamuximana mu yoso yabhangele kya phala kukula mu nzumbi, yu wamubhana itendelesu yejimukwatekesa kukalakala dingi mu kilunga. Mu kifika, wamubhana o ndunge ya kubhixila selu mu Kididi kya Ubhezelu ni kumenekena o jiphange, kubhana itambwijilu mu yonge, kukalakala dingi mu ukunji, ni kusota maukexilu engi a kukwatekesa akwa. Phange Jordan wakayela o kitendelesu, kiki kyamukwatekesa kudilonga mauhete a ubhe ni kubandekesa o henda ye ku jiphange. Jordan wadilongo kwila kyoso phange kyakituka mukwatekexi wa tufunga, ka mateka ngo kukwatekesa akwa; muveji dya kiki, mwene usuluka mu kukibhanga.—1 Ti. 3:8-10, 13.

13. Kyebhi o henda ya swinisa phange amwixana Betu kuvutuka kukala dingi kafunga?

¹³ Abha se m’ukulu eye wexile kya umukwatekexi wa tufunga, mba kafunga? Jihova ulembalala o kikalakalu kyoso kiwabhange kya ni henda ya kuswinisa kukibhanga. (1 Ko. 15:58) Mwene we umona o henda iwamulondekesa kate kindala. Sayi phange amwixana Betu waluwalele kyavulu kyoso kyamukatula o ujitu wa kukala kafunga. Ne kiki, mwene wambe: “Ngasolo kubhanga yoso ingitena phala kusidivila Jihova ni henda yoso, kikale se ngexile ngikafunga mba kana.” Kupholo dya kwenda, mwene wakituka dingi kafunga. Phange Betu wambe: “Ngexile ni hele ya kusidivila dingi kala kafunga. Maji ngamono kwila se Jihova  mu henda ye wamesenene kwila ngikala dingi kafunga, kyene kingejibhanga mukonda dya henda yami kwa mwene ni ku jiphange.”

14. Ihi itutena kudilonga ku phangu ya phange Elena?

¹⁴ O jiselevende ja Jihova alondekesa we o henda kwa yo ki Jimbangi ja Jihova. (Mat. 22:37-39) Mu kifika, sayi phange ya muhatu mu ixi ya Geórgia, amwixana Elena, wambe: “Ku dimatekenu, o kyexile mungiswinisa kuboka o henda yami ngo kwa Jihova. Maji kyoso o henda yami kwa Jihova yayi ni kudibandekesa, o henda yami ku athu ya dibandekesa we. Eme ngexile muxinganeka mu ibhidi yexile mudibhana nayu ni mumilongi i ngeji sola yeji ku atula ku muxima. O kuxinganeka o athu mu ukexilu yu, kwexile mubandekesa o vondadi yami ya kwabokela.—Lom. 10:13-15.

15-16. Kala kyolondekese mu jifoto, mabesá ebhi ejila mu kulondekesa henda ku akwetu?

¹⁵ Kyoso kitulondekesa henda ku jiphange jetu, athu amukwa akatula we mbote. Kyoso kyamateka o uhaxi wa COVID-19, sayi phange amwixana Hebu ni muhatu we akwatekesa jiphange javulu ja ahatu adyakime, kwijiya kukalakala ni mitelembe phala kuboka. Sayi phange ya muhatu kudimatekenu kyamubhonzele kukalakala ni mutelembe, maji mu kusuluka wadilongo. Mukonda dya kiki watena kwixana o jindandu je phala o lembalasa. 60  a jindandu ja phang’yetu a tale o lembalasa bhukaxi ka mutelembe! Mukonda dya nguzu yabhange phange Hebu ni muhatu we, kikale o phange ya muhatu mba o jindandu je, atena kukatula mbote mu lembalasa. Kupholo, o phange ya muhatu wasonekena phange Hebu, wixi: “Sakisaki mu kukwatekesa o adyakime mu kilunga. Eme nuka ngandajimba o henda ya Jihova kokwetu ni nguzu yoso imwabhange.”

¹⁶ Misoso kala yiyi, yalongo disá dya katunda kwa phange Hebu. Mwene wadilongo kwila o henda yala dingi ni valolo o uhete ndenge. Mwene wambe: “Eme ngexile kafunga ka ilunga. Lelu ngene mumona kwila, sumbala o aboki nange ka dilembalala dingi o madiskulusu mami, maji kajimbi o ima ingabhange phala ku akwatekesa.”

17. Nanyi we dingi wanda katula mbote kyoso kitulondekesa o henda?

¹⁷ Kyoso kitulondekesa o henda ku akwetu, tukatula we mbote mu maukexilu ki twafikile. Phange Jonata, watungu ku Nova Zelândia wejiya kyambote o kidi kiki. Sayi kizuwa kya Sabhalu mu ngoloxi, kwexile mubhanga mwanya wavulu, wamono muboki wa thembu yoso wexile muboka ubheka. Phange Jonata waxindi o mbambe ya kuboka ni muboki yu, mu ji Sabhalu, mu ngoloxi. Mwene kejidile o mbote yeji kwijila mu kubhanga kiki. Mwene wambe: “Mu thembu yenyoyo, eme ki ngawabhelele kyavulu kuboka. Maji kyoso kingamono o uhete wa kulonga wa muboki wa thembu yoso, ni mbote yexile mukatula mu kikalakalu kye, ngamateka kuwabhela o sidivisu ya kuboka. O phange we wakituka kamba dyami, wangikwatekesa kukula mu nzumbi, kuwabhela o kuboka ni kukolesa o ukamba wami ni Jihova.”

18. Jihova wamesena kwila tubhanga ihi?

¹⁸ Jihova wamesena kwila etwenyoso tubandekesa o henda yetu kwa mwene ni ku akwetu. Kala kitwamono mu milongi yiyi, tutena kukolesa o henda yetu kwa Jihova mu kutanga o Maka me, kuxinganeka mu ima itutanga ni kusamba kwa mwene ithangana yoso. Tutena kukolesa o henda yetu ku jiphange mu kubhanga yoso phala ku akwatekesa. Kyoso o henda yetu idibandekesa, tuzukama dingi kwa Jihova ni ku mwiji wetu mu nzumbi. O henda yetu kwa Jihova ni ku jiphange yanda nangenena kate ku hadya ni hadya!