1-2. (a) Jezú wadimuna o maxibulu me ku ihi? (b) Mukonda dyahi o maxibulu a Jezú a mulenge? (Tala we o jifoto.)

 “MU KIDI, o muthu wandala kubhanga o kima kyatokala, maji o mukutu-phe, wa bhwila.” a (Mat. 26:41b) Ni izwelu yiyi Jezú walondekesa kwila mwene wejidile kuma tu akwa ituxi. Maji mu izwelu ye mwexile we kidimwinu: Kitwatoka kubanza kwila twanda kala jinga ni nguzu yasoko phala kubhanga o ima yatokala. Kithangana ande dya Jezú kuzwela kiki o maxibulu me a mukanena kwila nuka eji ku muxisa. (Mat. 26:35) Ene amesenene kubhanga o kima kyatokala. Maji ene kejidile kwila se a ajijidika eji bhanga ima yayibha. Mukonda dya kiki Jezú wa adimuna: “Kolokotenu-phe mu kudilanga, sambenu jinga, phala ki mu dibhale mu jitendasá.”​—Mat. 26:41a.

² Maji o maxibulu a Jezú ka kolokota ni kudilanga. Kyoso kya kwata Jezú, o kwila ene axala ni Jezú inga akala ni woma, ya amulenge? Mukonda dya kiki ene abhange o kima azwelele kwila nuka eji ki bhanga, axisa Jezú.​—Mat. 26:56.

3. (a) Phala kukolokota fiyele kwa Jihova, mukonda dyahi kitutokala kubanza kwila twanda kala jinga ni nguzu? (b) Ihi itwanda dilonga mu milongi yiyi?

 ³ Kitutokala kubanza kwila twanda kala jinga ni nguzu phala kubhanga ima yatokala. Kidi kwila kitwamesena kuma kima kyoso-kyoso kitusondolola kwa Jihova. Maji tu akwa ituxi we, kyenyiki ki kitubhonzo kubhanga o ima yayibha. (Lom. 5:12; 7:21-23) Atena kututendala kubhanga o ima yayibha. Phala kusuluka mu kukala fiyele kwa Jihova ni kwa Mon’ê, twatokala kukumbidila o kitendelesu kya Jezú kya kukolokota mu kudilanga phala kitute kituxi. O milongi yiyi yanda tukwatekesa kubhanga kiki. Kyadyanga, twanda mona se twatokala kudilanga mu ima yebhi. Anga twanda mona se kyebhi kitwatokala kubhanga kiki, mu kusuka-ko twanda dilonga se kyebhi kitutena kukolokota mu kudilanga.

TWATOKALA KUDILANGA MU IMA YEBHI?

4-5. Mukonda dyahi twatokala kudilanga kate mwene ku ituxi yofele?

⁴ Kate mwene o ituxi yofele itena kuzozesa o ukamba wetu ni Jihova. Itena we kutubhangesa kuta ituxi ya makota.

⁵ Etu enyoso ene mututendala phala kuta kituxi. Etu we twala ni jihanji jitena kutubhangesa kuta kituxi. Mu kifika, nange sayi muthu wamubhânga ni hânji ya kuta undumbu. Amukwa abhânga ni jihânji ja kubhanga o ima yayibha kala o ku dixaxata o idyandu ya ujitu mba kutala o ufusa. Amukwá hanji akala ni woma wa athu, akwa njinda mba kima kyengi. Kyene kyambe Tiyaku “kala muthu a mu polovala ku jihânji jê jayibha, jimusunga anga jimubhomba.”​—Tiy. 1:14.

6. Twatokala kwijiya ihi?

⁶ Eye wejiya o jihânji jayibha? Kilwezu kyadikota kudidyelela ni kubanza kwila o jihânji jetu jayibha ki janda tubhangesa kuta kituxi. (1 Nz. 1:8) Phawulu wambe kwila kate mwene yó a “kulu mu nzumbi” atena kudibhala mu jitendasá se kadilange. (Nga. 6:1) Twatokala kwijiya o jihânji jetu jayibha ni kukamba kudidyelela. —2 Ko. 13:5.

7. Twatokala kudilanga mu ihi? Bhana kifika.

⁷ Se twejiya kya o jihânji jetu jayibha, ihi itwatokala kubhanga? Bhanga nguzu phala kulenga o jitendasá jiji. Mu kifika, m’ukulu se o jinguma amesenene kutolola  mbanza imoxi, exile mubokona-mu bhukaxi ka mabhitu mukonda ki kyabhonzele kubokona-mu. Mukonda dya kiki ku mabhitu kwene kwexile alangidi avulu. Kyene we kimoxi, twatokala kubhânga ni jihanji jetu ni tutene kulenga o jitendasá.​—1 Ko. 9:27.

KYEBHI KITWATOKALA KUDILANGA?

8-9. Kyebhi o munzangala a mutumbula mu Jisabhu kibatulu 7 kyeji dilanga ni kukamba ku ta kituxi? (Jisabhu 7:8, 9, 13, 14, 21)

⁸ Kyebhi kitutena kudilanga? Tala se ihi itutena kudilonga mu munzangala a mutumbula mu Jisabhu kibatulu 7. Mwene wabhange undumbu ni muhatu kidyanzunga. Velesu 22 yamba kwila o munzangala uya kwamwene. Maji o jivelesu kudima jilondekesa kwila mwene wa bhange ima ya mukwa bhofele-bhofele yamubhangesa kuta kituxi.

⁹ Ihi ya bhange o munzangala ande dyakuta o kituxi? Kyadyanga, mu suku mwene wabhiti “mu nzunga” ya muhatu kidyanzunga. Anga, mwene uya munjila iya ku inzo ya muhatu. (Tanga Jisabhu 7:8, 9.) Mukusuluka, kyoso mwene kya mono o muhatu mwene kabembe o njila. Muveji dya kiki mwene wa xikina o muhatu kumubhana nzobole wa mwivu kuzwela kwila wa bhana jisata ja phaze, Nange mwene wa mesenene kumubhangesa kumbanza kwila mwene wexile muthu wambote. (Tanga Jisabhu 7:13, 14, 21.) Se mwene kabhangele o ima yiyi mwene kexi dibhala mu tendasa ni kuta kituxi.

10. Kyebhi o muthu kyatena kuta kituxi kala o munzangala a mutumbula ku Jisabhu 7?

¹⁰ O musoso yu ulondekesa se ihi itena kubhita ni jiselevende joso ja Jihova. Mwene utena kuta kituxi mu kusuluka utena kubanza kwila o ima yiyi ya bhiti mu kingoho. Maji se mwene u banza kyambote wanda mona kwila wa bhange ima ya mubhangesa kuta kituxi. O ima yiyi nange o kudilunga ni athu ki jimbangi ja Jihova, o kutonoka ni ima ya ibha nange ku internete mba kuya mu ididi kiyafwama phala o jikidista. Nange o muthu yu kene dingi mu samba, kutanga o Bibidya, kuya mu yonge, mba kuboka. Kala o munzangala a mutumbula ku Jisabhu nange mwene kate kituxi mu kingoho maji mukonda dya ima yavulu yabhange ande dya kuta kituxi.

11. Ihi itwatokala kubhanga phala kitute kituxi?

¹¹ Ihi itwadilongo? Twatokala kulenga o kituxi ni ima itubhangesa kuta kituxi. Yiyi yene yajimbulula Solomá kyoso kyazubha kuzwela yabhiti ni munzangala ni muhatu kidyanzunga. Mu kuzwela yalungu ni muhatu, Solomá wambe: “Ku kwate ku nyunganena mu tuhoka twa muhatu yó.” (Jisa. 7:25) Mwene wambe dingi yalungu ni muhatu yu: “Muhatu u kala kiki, eye mu sondoloke, e’kana ku bhixila bhu mwelu wa’nzu yê.” (Jisa. 5:3, 8) Tudilanga ku jitendasá mu kulenga o ima itena kutubhangesa kuta kituxi. b Kiki kilombolola kwila né mwene se twejiya kwila sayi kima ki kituxi phala o Jikidistá, maji twejiya kwila kyanda tubhangesa kuta kituxi, kitutokala ku kibhanga.​—Mat. 5:29, 30.

12. Kikutu kyebhi kyati Jobe ni kyebhi o kikutu kiki kwamukwatekesa phala kadibale mu tendasa? (Jobe 31:1)

¹² Twatokala kukala polondo phala kudilanga. Kyene kyabhange Jobe. Mwene wati kikutu ni mesu me phala kamone muhatu yoso-yoso ni jinhasu jayibha (Tanga Jobe 31:1.) kudikwatenena mu kikutu kiki kwamukwatekesa  kukamba kuta phanda. Twatokala we kukala polondo phala kulenga yoso itena kutubhangesa kudibhala mu tendasa.

13. Mukonda dyahi twatokala we kulanga o ixinganeku yetu? (Tala we o jifoto.)

¹³ Twatokala we kulanga o ixinganeku yetu. (Mak. 20:17) Amoxi axinganeka kwila ki kituxi kukala ni ixinganeku yayibha se kiwanda ibhanga. Maji ki kima kyambote kuxinganeka kiki. Kyoso muthu kyabanza kyavulu mu kima kyayibha, sé phata wanda kibhanga mwene. Se mwene ubhanga kiki, wanda kala ni tendasá wanda bhinga ku ilenga. Kidi kwila sayi bhabha twanda kala ni ixinganeku yayibha, maji kyoso ki imoneka mu ilunji yetu twatokala kubhanga yoso ni yoso phala ku ibhinganesa ni ixinganeku yambote. Kyoso kitubhanga kiki twanda dilanga ku kituxi kya dikota, mukonda kitwanda kwehela o ixinganeku yayibha kukituka jihânji jayibha.​—Fil. 4:8; Kol. 3:2; Tiy. 1:13-15.

14. Ihi dingi itutena kubhanga phala kudilanga ku jitendasá?

¹⁴ Ihi dingi itutena kubhanga phala kudilanga ku jitendasá? Twatokala kuxikina kwila twanda katula jinga mbote mu kubelesela o itumu ya Jihova. Sayi bhabha kwanda tubhonza kuxinganeka kala Jihova. Maji kyoso kitubhanga nguzu phala kumubelesela, twanda sanguluka mu kidi.

15. Kyebhi o kukala ni jihanji jambote janda tukwatekesa kulenga o jitendasá?

¹⁵ Twatokala kukala ni jihanji jambote. Se tu ‘zemba kubhanga kyayibha ni kuwabhela kubhanga mbote’ twanda kala polondo kubhanga o ima yayibha ni kulenga o ima itena kutubhangesa kuta ituxi. (Amo. 5:15) Kyoso kitukala ni jihanji jambote twanda tena kulenga o jitendasá né mwene se jimoneka mu kithangana kitwakifikile.

16. Kyebhi o ikalakalu mu nzumbi itukwatekesa kudilanga? (Tala we o jifoto.)

¹⁶ Kyebhi kitutena kukala ni jihanji jambote? Tubhanga kiki kyoso kitudikwatenena  mu ima ikolesa o ukamba wetu ni Jihova. Kyoso ki tuboka mba kyoso kitukala mu yonge, ki tukala ni ixinganeku yayibha, o kiki kikolesa dingi o vondadi yetu ya kusangulukisa Jihova. (Mat. 28:19, 20; Jih. 10:24, 25) Kyoso kitutanga o Bibidya ni kuxinganeka mu ima yala-mu, twanda kala polondo phala kubhanga o ima yambote ni kuzemba o ima yayibha. (Josu. 1:8; Jisá. 1:2, 3; 119:97, 101) Lembalala yazwela Jezú ku maxibulu mê: “Sambenu jinga, phala ki mu dibhale mu jitendasá.” (Mat. 26:41) Kyoso kitusamba kwa Tat’etu ya dyulu, mwene wanda tukwatekesa, twanda kala we polondo phala ku musangulukisa.​—Tiy. 4:8.

SULUKA MU KUDILANGA

17. Hanji yebhi yexile mubhânga nayu Phetele?

¹⁷ Nange twanda tena kutolola o hanji yetu yayibha. Maji twatokala kusuluka mu kubhanga ni hanji yiyi. Mu kifika poxolo Phetele waditunu Jezú mu lutatu. (Mat. 26:69-75) Phetele watolola o woma yu, kyoso kyabhana umbangi ni kuswina kwoso mu inzo ya beta-kota ya kufundisa ya Jijudé. (Ika. 5:27-29) Maji, mivu ku pholo kuma “wakexile ni wôma wa Jijudé, yó a asaye,” Phetele kasuluka mu kudya ni Jikidistá kexile Jijudé. (Nga. 2:11, 12) Phetele woma wamukwatele dingi, nange mwene nuka watenene kutolola o hanji yiyi mu ukexilu watenena.

18. Ihi itena kubhita ni jihanji jayibha jitwatena kya kutolola?

¹⁸ Kala Phetele, sayi bhabha twatokala we kubhânga ni hânji i twafika kwila twa itolola kya. Mu kifika, sayi phange wambe: “Ngatolola o kifwa kyayibha kya kutala o ufusa mu dikwinyi dya mivu, ngejidile ni kidi kyoso kwila o kifwa kiki nga kitolwele kya. Maji sayi ithangana ngexile ni hanji ya kutala dingi.” Maji o phang’yetu katale dingi. Mwene wamono kwila izuwa yoso watokala kubhanga kima phala kutolola o hanji yiyi yayibha, nange wanda bhinga kubhanga kiki ku mwenyu wê woso mu ngongo yiyi ya Dyabhu. Ni kikwatekesu kya muhatu wê ni tufunga mu kilunga, wamutena kutolola o hanji yiyi.

19. Ihi itwatokala o kubhanga phala kitwehele o hanji kitwaytolola lwa kutubhangesa kuta kituxi?

 ¹⁹ Ihi itwatokala o kubhanga phala kitwehele o hanji kitwaytolola lwa kutubhangesa kuta kituxi? Mukubelesela ya zwela Jezú yalungu ni tendasa: “Kolokotenu-phe mu kudilanga.” Nemwene mwithangana udivwa kwila wa swina, kolokota mu kulenga o ima itena kukubhangesa kudiphala mu jitandasa. (1 Ko. 10:12) Suluka mukubhanga o ima yene mukukwatekesa kubhanga ni hanji yiyi ya ibha. “Bhangenu yoso” phala musuluke mu kudilanga mujitendasa.​—2 Ph. 3:14.

MABESA UTWANDA TAMBULA SE TUKOLOKOTA MU KUDILANGA

20-21. (a) Mabesa ebhi utwanda tambula se tukolokota mu kulenga o jitendasa? (b) Se tubhanga o mbandu yetu ihi yanda bhanga Jihova? (2 Kolindu 4:7)

²⁰ Tutena kudyelela kwila o kukolokota mukudilanga mu jitendasa kyene o kima kyabeta dingi kota. Kyoso kituta kituxi tusanguluka “ngó kathangana” maji kyoso kitubelesela o itumu ya Jihova tusanguluka mukidi. (Jih. 11:25; Jisá. 19:8) Kiki kibhita mukonda atubhange phala kubelesela o ijila ya Jihova. (Dim. 1:27) Mukubhanga kiki twanda kala ni kitongwelelu kya zele ni kutambula o mwenyu wa kalelaku ku hadya.​—1 Ti. 6:12; 2 Ti. 1:3; Jud. 20, 21.

²¹ Kidi kwila o ‘mukutu, wa bhwila.’ Maji kiki kikilombolola kwila kitwala ni kikwatekesu, Jihova wala polondo phala kutubhana o kutena kutwabhindamena. (Tanga 2 Kolindu 4:7.) Twamono kwila, Nzambi mwene ubhana o kutena kusomboka o kutena kwa athu. Maji kyadyanga twatokala kubhanga yoso itutena phala kulenga o jitendasa. Se tubhanga o mbandu yetu, tutena kudyelela kwila Jihova wanda tambwijila o misambu yetu ni ku tubhana o nguzu. (1 Ko. 10:13) Ni kikwatekesu kya Jihova, tutena kukolokota mu kulenga o jitendasa.