Phange Nicolas ni Céline adibhana ni kibhidi kyengi. O filiyale ya ixi ya França ya atumu kusidivila mu kilunga kyengi. Ene ambe: “Ku dimatekenu twasangulukile lwavulu, maji mu kubhita izuwa o ngunzu ya makamba metu ya tukwata. Kitwexile luwa ni ukamba wakolo ni jiphange akwa kilunga kyenyokyo.” a Kuma kubhanga kiki kubhonza, kyebhi ki utena kusanguluka kyoso ki uya mu sidivila mu kilunga kyengi? Ihi itena kubhanga akwenu phala ku kukwatekesa? Kyebhi ki utena kuswinisa o jiphange akwa kilunga kiki ni kyebhi ene kyatena ku kuswinisa?

ITENDELESU IWANA ITENA KU KUKWATEKESA KUDIBHANA NI KIBHIDI KIKI

1. Dyelela kwa Jihova. (Jisá. 37:5) Phange ya muhatu watungu mu ixi ya Japão amwixana Kazumi, watundu mu kilunga mwexile mu 20 a mivu, mukonda o jipatalá ja mwadi wê, amutumikisine kwengi. Kyebhi mwene ‘kyabhakula o njila yê kwa Jihova’? Mwene wambe: “Mu ithangana yoso ngexile muzwela kwa Jihova kyebhi ki ngexile mudivwa, o woma wami, o kudivwa ubheka ni hele yami. Kyoso kingexile mubhanga kiki, Jihova wexile mu ngibhana o nguzu i ngabhindamene.”

Kyebhi ki utena kubandekesa o kudyelela kwê kwa Jihova? Phala kukula, o mixi yabhindamena menya ni ima yamukwa itunda bhoxi, kyene we kimoxi o kixikanu kyetu phala kukula kibhindamena we ima yamukwa. Nicolas, twamutumbula kya, wamono kwila o kuxinganeka mu phango ya Mbalahamu, Jezú ni Phawulu, athu abhangele nguzu yavulu phala kusidivila Nzambi, kya mudyelelesa kwila Jihova wanda mukwatekesa. Se udilonga  o Bibidya izuwa yoso, kiki kyanda kukwatekesa kudibhana kabasa kibhidi ku mwenyu wê, wanda dilonga we ima yanda kukwatekesa kuswinisa akwenu mu kilunga kyé kya ubhe.

2. Kana kusokesa o kilunga kyé kyokulu ni kilunga kya ubhe. (Ndo. 7:10) Sayi phange ya diyala amwixana Jules watokalele kudilonga ijila ya ubhe, kyoso kya tundu ku Benin yu wayi ku Estados Unidos. Mwene wambe: “Ngadivwile kwila muthu woso-woso ngamwijidile ngatokalele ku mutangela yoso yalungu ni mwenyu wami.” Kuma kiki ki kifwa kya ixi yê, mwene wamateka kulenga o jiphange. Maji kyoso kyeza mu kwijiya kyambote o jiphange, wamateka kumona o ima mu ukexilu wengi. Mwene wambe: “Ngixikina kwila kabasa kididi bhu tukala mu ngongo mumu, o athu adifwe ngo. O ukexilu wâ wakuzwela ni wa kubhanga o ima, wene ki udifu. Twabhingi ngo kuxikina o athu mu ukexilu wâ.” Kyenyiki kana kusokesa o kilunga kyé kyokulu ni kilunga kya ubhe. Phangyetu ya muhatu muboki wa thembu yoso amwixana Anne-Lise wambe: “Ngeza mu kilunga kiki mukonda ngamesenene kudilonga ima ya ubhe, kana mukonda ngandalele kwila o ima yoso yeji kala kala mu kilunga mu ngatundu.”

O tufunga katokala we kusokesa o kilunga kyâ kyokulu ni kilunga kya ubhe. Ki kuyibha kubhanga o ima mu ukexilu wengi. Ande dya kubhana ndunge, sembele kwijiya o ima yene mudibhana nayu o jiphange kwenyoko. (Ndo. 3:​1, 7b) Kota o kubhana phangu yambote ku jiphange mu veji dya kwajijidika kuxikina o ibanzelu yetu.—2 Ko. 1:24.

3. Kalakala ni kuswina kwoso mu kilunga kyé kya ubhe. (Fil. 1:27) Sumbala o kuya mu kilunga kyengi kubhinga nguzu ni kithangana kyavulu, kima kyambote kyoso ki ubhixila uya kya mu kyonge, se kibhana mu kididi kya ubhezelu. O jiphange mu kilunga kyé kya ubhe abhingi ku kumona mu ithangana yavulu phala akale ni ukamba wambote n’eye ni kwila atene ku kukwatekesa. Phange ya muhatu amwixana Lucinda, kumoxi ni twana twê tuyadi twa ahatu ayi mutunga ku mbanza ya dikota ku África do Sul, wambe: “O makamba mami angitendelesa kudikwatenena mu kilunga kyami kya ubhe, mu kuboka ni jiphange ni mu kutambwijila mu yonge. Twatangela we o jiphange kwila o yonge ya sidivisu ya kuboka itena kubhita kubhata dyetu.”

O ‘kukwata nguzu’ mu kubhanga o ikalakalu mu nzumbi kumoxi ni jiphange ja kilunga kyé, kwanda kukwatekesa ni kukwatekesa we akwenu. Phange Anne-Lise, twamutumbula kya, o tufunga twê amuswinisa o kuboka ni jiphange joso mu kilunga. Ihi yabhiti? Mwene wazwela: “Ni lusolo ngamono kwila yu ukexilu wambote wa kudivwa kwila ngibhanga mbandu ku kilunga.” Kyoso ki udibhakula we mu ikalakalu kala o kuzelesa ni kuyudika o Kididi Kya Ubhezelu, wanda londekesa ku jiphange kwila wamumona kwila o kilunga kyé kyenyiki. Se ukalakala ni jiphange mu kilunga, wanda mona kwila yu wene o mwiji wé kindala.

4. Bhanga makamba a ubhe. (2 Ko. 6:​11-13) Se o athu ejiya kwila wa azolo, ene anda kituka  makamba mé. Kyenyiki bhixila selu bhu kididi kya ubhezelu ande dya kyonge kumateka, kyoso o kyonge kibhwa xala bhofele ni utene kudizwelesa ni jiphange phala kwa ejiya kyambote. Bhanga nguzu phala kwijiya o majina mâ. Kyoso ki ulembalala o majina a jiphange anga uzwela nawu, ene anda mesena ku kwijiya, mwanda kala mu makamba ambote.

Mu veji dya kukala u mukwa mangonya phala akwenu axikine ngo kukala makamba mé, londekesa-u se eye u muthu wa kidifwa kyebhi. Bhanga kala kyabhangele phange Lucinda, mwene wambe: “Kindala twala ni makamba a kidi, mukonda twexile mu kwixana o athu phala kwiza ku bhata dyetu.”

“DI TAMBULULYENU MUDYENU”

Kubokona mu Kididi kya Ubhezelu mwala athu avulu akwa jixi jengi, kutena kubhangesa o muthu kukala ni hele. Ihi i utena kubhanga phala kukwatekesa o jiphange eza mu kilunga kyé kudivwa kyambote? Poxolo Phawulu wambe: “Di tambululyenu mudyenu, kala Kidistu kya mi tambulula. Kiki kibhana kijingu kwa Nzambi.” (Lom. 15:7) Mu kukayela o phangu ya Kidistu, o tufunga atena kukwatekesa o jiphange abhixila kindala mu kilunga kudivwa kyambote. (Tala o kaxa “ Ihi Yanda Kwatekesa ku Kutambulula Kyambote mu Kilunga Kya Ubhe?”) Maji athu oso mu kilunga, kate mwene o ana-ndenge, atena kukwatekesa o jiphange abhixila kindala mu kilunga kudivwa kyambote.

Kutambulula o jiphange kyalungu ni kwa exana ku mabhata metu ni kwa bhana kikwatekesu kya mukwá. Mu kifika sayi phange ya muhatu wakwatekesa o phange ya mukwa ya muhatu wayi mu sidivila mu kilunga kyê. Mwene wamwijidisa o mbanza ni ididi bhwene mu kwimana o maximba. O kyabhange o phange yu, kyakwatekesa mukwâ o kusanguluka ni kudivwa kyambote mu kilunga kya ubhe.

KITHANGANA PHALA KUKULA

O dihoho kyoso ki diya ni kukula, dilungulula o kibha kyê ande dya kumateka kutuka. Kyene we  kimoxi, kyoso kituya mu kilunga kya ubhe, twabhingi kuxisa o kama koso-koso katena kutufidisa kukula mu nzumbi. Phange Nicolas ni Céline ambe: “Tudilonga ima yavulu kyoso kituya mu kilunga kyengi. Phala kudibhana kyambote ni athu a ubhe ni ididi ya ubhe, kubhinga kukala ni idifwa ya ubhe.” Phange Jean-Charles, twamutumbula kudima, wambe kwila o mwiji wê wakatula mbote yavulu, mwene wambe: “O twana twetu twamukula kyambote mu nzumbi mu kilunga kya ubhe. Mu kubhita jimbeji, o mon’etu wa muhatu wamateka mu kubhanga mbandu mu yonge. Mon’etu wa diyala wakituka muboki.”

Ihi i utena kubhanga se o kithangana kyé ki kukwehela kuya bhu kididi bhwa bhindamena dingi aboki? Utena kubhangesa o kilunga mu wala kukala kala kilunga kya ubhe mu kukayela o jindunge jala mu milongi yiyi. Dyelela kwa Jihova, kalakala ni kuswina kwoso mu kilunga kyé kya ubhe mu kuboka ni jiphange, bhanga makamba a ubhe, kolesa o ukamba ni Jihova. Nange utena kukwatekesa o athu a ubhe mu kilunga ni kukwatekesa yó abhindama. Kuma o henda kyene o kidifwa kilondekesa o Jikidistá ja kidi, kukwatekesa akwetu kwanda tubhangesa kukula mu nzumbi. (Nzw. 13:35) Ejiya-kyu kuma “Nzambi usanguluka ni jisata jiji.”—Jih. 13:16.

Sumbala ni ibhidi, jiphange javulu asanguluka kyavulu kyoso kyayile mu kilunga kya ubhe, eye we utena kusanguluka! Phange Anne-Lise wambe: “Kuya mu kilunga kyengi kwa ngikwatekesa kujikula o muxima wami.” Kindala phange Kazumi waxikina kwila, o kuya mu kilunga kyengi “utena kumona o kikwatekesu kya Jihova mu ukexilu, nuka wa umwene.” Phange Jules wambe kiki: “O makamba u ngala nawu kindala angikwatekesa kudivwa kala ngala mwene ku bhata. Kindala ngidivwa kyambote mu kilunga kiki ni kwila ku ngibhonza kutunda-mu dingi.”