1-2. Nanyi wexile Zadoke? (1 Malunda 12:22, 26-28)

 XINGANEKA mu ima yamubhita. Mundu wavulu wasoko ni 340.000 ndenge wa mayala abhongoloka phala kutumbika Davidi kala sobha ya Izalayele. Mu izuwa itatu o mayala enyá axala ku milundu yazukama ku Hebolone. (1 Mal. 12:39) Mwaxaxi ka mundu mwexile munzangala amwixana Zadoke. Nange athu avulu kamumono. (Tanga 1 Malunda 12:22, 26-28.) Nanyi wexile Zadoke?

² Zadoke wexile mukunji, mwene wakalakala ni Mukunji Wadikota Abiyatale. Nzambi wabhana we kwa Zadoke unjimu wavulu ni kutena kwa kutonginina o vondadi yê. (2 Sam. 15:27) Kyoso kyabhindamene kikwatekesu, o athu exile mu kuya kwa Zadoke. Mwene we wexile diyala dya swina. Mu milongi yiyi twanda dilonga yalungu ni kuswina kwê.

3. (a) Mukonda dyahi o abhezi a Jihova atokala kuswina? (b) Ihi itwanda dilonga mu milongi yiyi?

³ Mu izuwa yiyi isukidila-ku, Satanaji wamuzukutisa dingi o abhezi a Jihova, m’ukulu ndenge. (1 Ph. 5:8) Twatokala kuswina kyoso kituya ni kukingila Jihova kubwika Satanaji ni  mundu wê. (Jisá. 31:24) Tumone maukexilu atatu mu tutena kukayela o kuswina kwa Zadoke.

ZOKELA O UTUMINU WA NZAMBI

4. Mukonda dyahi o jiselevende ja Jihova abhindamena o kuswina phala kuzokela o Utuminu wa Nzambi? (Tala we ofoto.)

⁴ Kuma tu jiselevende ja Jihova, tuzokela o Utuminu wa Nzambi ni muxima woso, maji mu ithangana yoso twabhindamena o kuswina phala kubhanga kiki. (Mat. 6:33) Mu kifika, mu ngongo yiyi yayibha, twabhindamena o kuswina phala kubelesela o itumu ya Jihova ni kuboka o njimbu yambote ya Utuminu wa Nzambi. (1 Te. 2:2) Athu mu ngongo ene mudita dingi mu maka a jinguvulu mu ukulu ndenge. Kyenyiki twabhindamena kuswina phala kukamba kudita-mu. (Nzw. 18:36) Jimbangi javulu ja Jihova kene mukala ni kitadi kya soko, ene mwabeta mba kwa ata mu kaleya mukonda kaxikina kudita mu maka a jinguvulu mba kaxikina kuya mu usoladi.

5. Mukonda dyahi Zadoke wabhindamene kuswina phala kuzokela Davidi?

⁵ Zadoke kayile ngó ku Hebolone phala kumona Davidi kumutumbika kala sobha. Mwene wayi-ku ni mata mê, wexile polondo phala kubhânga. (1 Mal. 12:38) Mwene wexile polondo phala kuya ni Davidi mu ita ni kuzokela Izalayele ku jinguma jâ. Nange Zadoke kexile hete mu kulwa ita, maji waswinine kyavulu.

6. Kyebhi Davidi kyabhana phangu ya kuswina kwa Zadoke? (Jisálamu 138:3)

⁶ Mukonda dyahi Zadoke waswinine kyavulu, se mwene wexile mukunji? Mwene wejidile mayala avulu exile ni nguzu yavulu, aswinine. Sé phata, mwene wadilongo kyavulu ni mayala yá. Mu kifika o kuswina kwa Davidi “mu ku twamenena Izalayele mu kutunda ni mu kubokona” mu ita, kwabhangesa oso mu Izalayele kumesena kwila mwene ukala sobha. (1 Mal. 11:1, 2) Mu ithangana yoso Davidi wadyelela kwila Jihova weji mukwatekesa kutolola o jinguma jê. (Jisá. 28:7;  tanga Jisálamu 138:3.) Zadoke wadilongo ni kuswina kwa mayala amukwá kala Joyada ni mon’ê Benaya, ni kwa 22 kya atwameni engi exile mu kwatekesa Davidi. (1 Mal. 11:22-25; 12:26-28) O mayala oso yá amesenene kwila Davidi ukituka sobha.

7. (a) Mu izuwa yetu twala ni phangu ya nanyi ya kuswina? (b) Kala kitwamono mu vidyu, ihi itwadilongo ku phangu ya Phange Nsilu?

⁷ Kyoso kitubanza ku phangu ya yó alondekesa o kuswina phala kuzokela o Utuminu wa Jihova, tulondekesa we o kuswina. O Sobha yetu, Kidistu Jezú, kyoso kyexile mu ixi, waditunu kudita mu maka a jinguvulu ja mundu wa Satanaji. (Mat. 4:8-11; Nzw. 6:14, 15) Mwene wadyelele jinga mu kutena kwa Jihova. Mu izuwa yetu twala we ni phangu ya minzangala, adituna kuya mu usoladi mba kudita mu maka a jinguvulu. Twakudyondo, tanga o misoso yâ mu jw.org. a

KWATEKESA O JIPHANGE

8. Mu ithangana yebhi o tufunga atokala kuswina phala kukwatekesa o jiphange?

⁸ O jiselevende ja Jihova azolo kudikwatekesa. (2 Ko. 8:4) Maji sayi ithangana phala kubhanga kiki kwabhingi kuswina. Mu kifika, kyoso ki kwala ita, o tufunga amona kwila o jiphange abhingi kwaswinisa, abhindamena we Jibibidya, madivulu amukwá, kudya, izwatu ni kididi phala kukala-mu. Mukonda dya henda yâ ku jiphange, o tufunga ata o myenyu yâ mu kilwezu phala kwakwatekesa. (Nzw. 15:12, 13) Kyoso kyabhanga kiki, ene amukayela o phangu ya kuswina kwa Zadoke.

9. Kala kilondekesa o divulu dya 2 Samuwele 15:27-29, Davidi watumu Zadoke kubhanga ihi? (Tala we ofoto.)

⁹ Davidi wakexile mu kilwezu. Mon’ê Abisalone wexile polondo phala ku mujibha, n’akituke sobha bhu kididi kyê. (2 Sam. 15:12, 13) Ni lusolo lwoso Davidi walenge ku Jeluzaleme! Davidi watangela o jiselevende jê: “Ndoko tulengyenu, seku muthu wanda tena  kubhuluka bhu maku a Abisalone.” (2 Sam. 15:14) Kyoso o jiselevende jê exile mulenga, Davidi wamono kwila kwatokalele kukala muthu mu Jeluzaleme phala ku mutangela o jindunge ja Abisalone. Mu kiki Davidi watumikisa Zadoke ni akunji amukwá mu Jeluzaleme phala kukala alondi. (Tanga 2 Samuwele 15:27-29.) Ene atokalele kudilanga, mukonda o kima kya atumina Davidi, kyate o myenyu yâ mu kilwezu. Abisalone wexile kisweya, mukwa lwimbi, walungulukila tat’ê. Xinganeka se ihi yeji bhanga se wejidile kwila Zadoke ni akunji engi exile mu mulonda phala kukwatekesa Davidi!

10. Kyebhi Zadoke ni athu amukwa akexile-nê atenene kulanga Davidi?

¹⁰ Davidi wambe kwa Zadoke ni kamba dyê dyengi Husayi phala kubhanga kima. (2 Sam. 15:32-37) Husayi wadilondekesa kala kamba dya Abisalone, yu wamubhana ndunge yalungu ni kyebhi kyeji kwata Davidi. Kiki kyakwatekesa Davidi kudisokejeka. Mu kusuluka, Husayi wambe kwa Zadoke ni Abiyatale o ima yabhiti. (2 Sam. 17:8-16) Anga kiyadi kyâ abhange yoso ni yoso phala Davidi n’ejiye o ima yamesenene kubhanga Abisalone. (2 Sam. 17:17) Ni kikwatekesu kya Jihova, Zadoke ni akunji engi alange o mwenyu wa Davidi.​—2 Sam. 17:21, 22.

11. Kyebhi kitutena kukayela o phangu ya Zadoke kyoso kituya ni kukwatekesa o jiphange jetu?

¹¹ Kyebhi kitutena kuswina kala kyaswinine Zadoke, kyoso o jiphange jetu kyala mu kilwezu ni kwila twabhingi kwakwatekesa? (1) Belesela o itendelesu. Mu kithangana kya ilwezu, kima kyambote kukala ni muxima umoxi. Belesela o itendelesu ya filiyale mu ixi mu watungu. (Jih. 13:17) Mu ithangana yoso o tufunga atokala kutonginina o itendelesu yalungu ni kyebhi kitwatokala kudisokejeka phala kudibhana ni mavuwa. (1 Ko. 14:33, 40) (2) Swina, maji dilange we. (Jisa.  22:3) Ande dya kubhanga kima, xinganeka hanji. Kana kudita mu kilwezu, se wamono kwila kikwabhingi kubhanga kiki. (3) Dyelela kwa Jihova. Lembalala kwila Jihova wamesena kuma eye ni jiphange jengi mukala mu kididi kya kondama. Mwene utena ku kubhana nguzu, ni utene kukwatekesa o jiphange.

12-13. Ihi itudilonga ku musoso wa Viktor ni Vitalii? (Tala we ofoto.)

¹² Talesa yabhange tufunga tuyadi a exana Viktor ni Vitalii phala kukwatekesa o jiphange mu ixi ya Ucrânia. Viktor wambe: “Twasoto kudya mu ididi yavulu. Ku twazukamene, twevu o masoladi kudiloza. Sayi phange wasangela kudya kwexile mu kididi kyê kya kubhakela kudya. O kudya kuku kwakwatekesa aboki avulu kukala ni yabhindamene phala kukala ku mwenyu, mu kithangana kyenyokyo. Kyoso kitwexile muta o kudya mu dikalu, ku kididi ku twexile, bhu dikanga dya 20 a jimétulu kwabaze bomba. Mu kizuwa kya muvimba, ngexile musamba kwa Jihova phala ku ngibhana o kuswina ku ngabhindamene phala kusuluka mu kukwatekesa o aboki.”

¹³ Vitalii wambe: “Twabhindamene kuswina kyavulu. Mu veji ya dyanga, ngende 12 kya ji ola. Mu njila yoso ngasambe kwa Jihova.” Vitalii waswinine kyavulu, maji wadilange we. Mwene wambe dingi: “Ngabhingi kwa Jihova phala ku ngibhana unjimu, ni ku ngilondekesa kwila kingejidile yoso. Ngabhiti ngó mu jinjila ja tendelesa o jinguvulu kubhita-mu. O kixikanu kyami kyakolo dingi kyoso kingamono kyebhi o jiphange kya kexile mukalakala kumoxi. Ene akatula o ifidisu mu kikoka, exile mukatula mu dikalu o kudya, izwatu ni ima yamukwá. Mu njila yoso atubhana kudya ni ididi phala kunyohena-mu.”

KOLOKOTA MU UFIYELE WÉ KWA JIHOVA

14. Kyebhi kitudivwa se muthu twamuzolo, ubhana dikunda kwa Jihova?

¹⁴ Kyoso ndandu yetu mba kamba dyetu kya bhana dikunda kwa Jihova, tuluwala kyavulu. (Jisá. 78:40; Jisa. 24:10) Se wamuzolo kyavulu, kyanda ku xixima dingi. Se wamudibhana ni maka yá, o phangu ya ufiyele wa Zadoke itena ku kuswinisa!

15. Mukonda dyahi Zadoke wabhindamene kuswina phala kusuluka mu kukala fiyele kwa Jihova? (1 Jisobha 1:5-8)

¹⁵ Zadoke wakolokota kyoso kamba dyê Abiyatale wabhana dikunda kwa Jihova. Kiki kyabhiti ku disukilu dya usobha wa Davidi. Kyoso Davidi kyakukile, kya mukambele ngo phala kufwa, mon’ê Adoniya wamesenene kukala sobha, maji Jihova wakanene kwila Solomá mwene weji kala sobha. (1 Mal. 22:9, 10) Abiyatale wasolo kukala ku mbandu ya Adoniya. (Tanga 1 Jisobha 1:5-8.) Mu kubhanga kiki kalondekesa ufiyele kwa Davidi ni kwa Jihova! Xinganeka o kuluwala kwexile naku Zadoke! Mu 40 a mivu ndenge Zadoke ni Abiyatale akalakala kumoxi kala akunji. (2 Sam. 8:17) Ene ambatele kumoxi “o Álaka ya Nzambi ya kidi.” (2 Sam. 15:29) Kudimatekenu kiyadi kyâ azokela Davidi kala sobha, ya abhange dingi ima yengi mu sidivisu ya Jihova.​—2 Sam. 19:11-14.

16. Ihi yakwatekesa Zadoke kusuluka mu kukala fiyele kwa Jihova?

¹⁶ Zadoke wasuluka mu kukala fiyele kwa Jihova, sumbala ni ima yabhange Abiyatale. Davidi wejidile kwila weji tena kudyelela jinga kwa Zadoke. Kyoso kya tungununa o kima kyabhange Adoniya, Davidi wasolo Zadoke, Natane ni Benaya phala ku unda Solomá kala sobha. (1 Jis. 1:32-34) Kukala kumoxi ni jiselevende jengi ja Jihova, kala Natane ni amukwá exile ku mbandu ya Sobha Davidi,  kwaswinisa, kwakwatekesa we Zadoke. (1 Jis. 1:38, 39) Kyoso Solomá kya kituka sobha, mwene wasolo o mukunji Zadoke phala kubhingana Abiyatale.​—1 Jis. 2:35.

17. Kyebhi ki utena kukayela o phangu ya Zadoke se muthu wamuzolo ubhana dikunda kwa Jihova?

¹⁷ Kyebhi ki utena kukayela o phangu ya Zadoke? Se muthu wamuzolo kyavulu ubhana dikunda kwa Jihova, londekesa kwa Jihova kuma wamesena kukala fiyele kwa mwene. (Josu. 24:15) Jihova wanda kubhana o nguzu ni kuswina ku wabhindamena. Samba kwa Jihova, dikwatenene ku makamba mé ala fiyele kwa mwene. Jihova ubhana valolo ku ufiyele wé, mukonda dya kiki mwene wanda kubesowala.​—2 Sam. 22:26.

18. Ihi iwadilongo ku musoso wa Máluku ni Sidse?

¹⁸ Xinganeka mu phangu ya Máluku ni muhatu wê, amwixana Sidse, ala ni ana ayadi a ahatu abhana dikunda kwa Jihova. Máluku wambe: “Tunde o kithangana an’é kya avwala, eye ukwata kwazola kyavulu. Eye ubhanga yoso phala kwalanga kabasa kilwezu. Kyoso ene kyasola kubhana dikunda kwa Jihova, kiki kixixima kyavulu. Maji Jihova wene mu tukwatekesa kukolokota. Mwene wene mubhangesa phala tutene kudiswinisa, mukonda kyoso kingizoza, muhatu wami ukala ni nguzu, kyoso mwene kyazoza, eme ngikala ni nguzu.” Sidse wambe: “Kitweji tena kuswina se Jihova katubhele o nguzu itwabhindamene. Ngaluwalele kyavulu, ngexile mubanza kwila kyexile kikuma kyami. Kyenyiki ngatangela kwa Jihova kyebhi kingexile mudiwa. Mu kubhita ka kithangana, kwamoneka phange ya muhatu, nuka dingi ngamumwene, wa ngikwata bhu isuxi, wangitale ku mesu, yu wa ng’ambela: ‘Mana Sidse ejiya kwila kiki ki kikuma kyé!’ Ni kikwatekesu kya Jihova, ngatena kusanguluka mu sidivisu yami kwa Jihova.”

19. Wala polondo phala kubhanga ihi?

¹⁹ Jihova wamesena kwila o abhezi’ê oso aswina kala kyaswinine Zadoke. (2 Ti. 1:7) Maji mwene kamesena kwila tudyelela mu nguzu yetu, wamesena kuma tu mudyelela. Kyoso ki ukala mu ibhidi, samba kwa Jihova phala ku kubhana o kuswina. Dyelela kwila mwene wanda kukwatekesa kuswina kala kyaswinine Zadoke!​—1 Ph. 5:10.