KYA KWALATA, mu kizuwa kya 18, kya mbeji ya Katatu ka muvu wa 2023, mu sayte jw.org mwamoneka ngolokela ya katunda. O ngolokela yambele kwila o jiphange Gage Fleegle ni Jeffrey Winder a asolo phala kusidivila mu Kibuka kya Utuminu kya Jimbangi ja Jihova. O jiphange jiyadi jiji ene musidivila kya Jihova ni ufiyele woso mu mivu yavulu.

Phange Fleegle a muvwala ku mbandu ifwila o dikumbi ku mbanza ya Pensilvânia, mu ixi ya Estados Unidos da América. O jitata je Jimbangi ja Jihova, ene amulongo o Bibidya tunde mu undenge. Kyoso kyexile mu kitala kya kikumbi, mwene ni mwiji we ayi mutunga mu sanzala yofele mwabhindamene dingi aboki. Ki kubhitile kithangana kyavulu, mwene amubatizala, mu kizuwa kya 20 kya mbeji ya Kamoxi, ka muvu wa 1988.

O jitata ja phange Fleegle exile mu muswinisa jinga kubokona mu sidivisu ya thembu yoso. Mu ithangana yavulu ene exile mutambula kubata dya, tufunga twa ilunga ni jiphange exile mukalakala ku Betele. Phange Fleegle wa tenene kumona kwila o jiphange jiji asangulukile kyavulu. Kyoso kya mubatizala ki kubhitile thembu yavulu, mwene wamateka kusidivila kala muboki wa thembu yoso, mu kizuwa kya 1 kya mbeji ya Katutu ka muvu wa 1989. Mivu iyadi ku pholo mwene watena kukumbidila o mbambe ya xindile kyoso kyexile ni 12 a mivu—o kusidivila ku Betele. Mwene wa mateka kusidivila ku Betele ya Brooklyn ku mbeji wa Kamusasadi ka muvu wa 1991.

Ku Betele, phange Fleegle wa kalakala dinake dya mivu mu kusokejeka madivulu. Mu kusuluka amusolo phala kukalakala mu Kibuka kya Sidivisu. Mu kithangana kenyokyo mwene wa sidivila tumivu mu kilunga kya dimi dya Rússia. Mu muvu wa 2006 mwene wa kazala ni muhatu we Nadia, yu wamateka kusidivila ne ku Betele. Kumoxi ene asidivila mu kilunga kya dimi dya Phutu, ya asidivila we kwinyi dya mivu ndenge mu kilunga kya dimi dya Espanhol. Mu kubhita mivu yavulu mu kukalakala mu Kibuka kya Sidivisu, phange Fleegle amusolo phala kukalakala mu Xikitodyo ya Kibuka kya Kulonga, anga ku pholo  dya kwenda wayi mukalakala mu Xikitodyo ya Kibuka kya Sidivisu. Mu mbeji ya Katanu ka muvu wa 2022 mwene amusolo phala kukala mukwatekexi wa Kibuka kya Sidivisu kya Kibuka kya Utuminu.

Phange Winder wakudila ku Murrieta, mbanza ya California, mu ixi ya Estados Unidos da América. Mwene amulongo o kidi kya Bibidya ku jitata je, amubatizala mu kizuwa kya 29, kya mbeji ya Katanu ka muvu wa 1986. Mu mbeji yakayela mwene wa solo kukituka muboki wa ithangana ni ithangana. Mwene wa ki wabhelele kyavulu, mu kiki, wamesenene kusuluka. Mu kubhita jimbeji javulu mu kusidivila kala muboki wa ithangana ni ithangana, mwene wa mateka kusidivila kala muboki wa thembu yoso, mu kizuwa kya 1 kya mbeji ya Kamusasadi, ka 1986.

Kyoso kyexile mu kitala kya kikumbi, phange Winder wayile mukunda o makota me ayadi a mala, exile mu sidivila ku Betele mu kithangana kyenyokyo. O kukunda o jiphange je, kwabandekesa o hanji ye ya kusidivila ku Betele kyoso kyeji kula. Mu mbeji ya Kasambwadi ka muvu wa 1990, mwene amwixana phala kusidivila ku Betele ya Wallkill.

Ku Betele, Phange Winder wakalakala mu ididi yavulu, kala mu Kididi kya Kuzelesa, ku Mabhya, ni mu Xikitodyo ya Betele. Ku muvu wa 1997, mwene wa kazala ni Angela, kiyadi kya ene musidivila ku Betele tende mu muvu wenyo. Ku muvu wa 2014 ene a atumikisa ku Warwick, kwenyokyo, phange Winder wa kwatekesa mu kikalakalu kya kutunga o mbonge yetu. Ku muvu wa 2016 ene a atumikisa ku Centro Educacional da Torre de Vigia, ku Patterson. Kwenyokyo phange Winder wakalakala ni kibuka kya kubhanga o jividyu ni milongi yongalavale. Mu kubhita mivu iwana ene avutuka ku Warwick, anga phange Winder a musolo phala kukalakala mu Xikitodyo ya Kibuka Kilanga o Ibhindamu ya akwa Betele. Mu mbeji ya Katanu ya muvu wa 2022 mwene amusolo phala kukala mukwatekexi wa Kibuka Kilanga o Ibhindamu ya akwa Betele ya Kibuka kya Utuminu

Twamusamba phala Jihova asuluke mu kubesowala o jiphange jetu jiji Kyoso kyaya ni kukalakala ni nguzu yoso phala kukwatekesa o Utuminu wa Nzambi.—Efe. 4:8.