KALA kitwejiya o athu mu izuwa ya lelu amesena kwila a atalatala mu ukexilu wakatunda mba adimona kwila afwama kutambula maujitu. Ne mwene kyoso kya atalatala kya mu ukexilu yu, ene amesena dingi. O athu ala ni ukexilu yu akwa ukumbu, kalondekesa kisakidilu mu ima yala nayu. O Bibidya yamba kwila o ukexilu yu weji dibandekesa dingi mu izuwa isukidilaku.—2 Ti. 3:2.

O ukexilu wa kudizola ni kukala ni ukumbu, ki kima kya lelu ngó kana. Mukifika Adá ni Eva amesenene kusola mudya kyawabha ni kyayibha, mukonda dya kiki etu enyoso twene mutala hadi. Mu kubhita mivu, Sobha Uziya mukwa Judá wafikile kwila wexile ni ujitu wa kwoha o wasu wadizumba mu tembulu, maji mwene kexile ni ujitu yu. (2 Mal. 26:​18, 19) O Jifalizewu ni Jisadusewu afikile kwila phala Nzambi, ene abetele dingi kota mukonda exile mbutu ya Mbalahamu.—Mat. 3:9.

Etu atukondoloka ku athu akwa lwimbi ni akwa ukumbu, o ukexilu yu utena kutufunyisa. (Nga. 5:26) Tutena kumateka kubanza kwila etu twafwama kutambula maujitu ni kututalatala mu ukexilu wakatunda. Ihi itwatokala kubhanga phala katufwinyise mu ibanzelu yiyi? Kyadyanga twatokala kwijiya ihi ibanza Jihova yalungu ni maka enya. Mukusuluka twanda mona itumu iyadi ya Bibidya itena kutukwatekesa.

 Jihova mwene usola o ima itwatokala kutambula. Tumone ifika.

• Jihova wasolo kwila ku mwiji, o muhatu watokala kuxila o munumi’ê ni muxima woso, o munumi watokala kuzola o muhatu wê kala kya dizolo mwene. (Efe. 5:33) O diyala wakazala watokala kubhana kwa muhatu wê yamutokala, o muhatu-phe abhane we kwa mwadi wê yamutokala. (1 Ko. 7:3) O jitata atena kukingila kwila o twana twâ a abelesela, o twana afwama kutambula o henda ni kikwatekesu kya jitata jâ.—2 Ko. 12:14; Efe. 6:2.

• Jihova wambe kwila o tufunga mu ilunga atokala kwaxila mukonda akalakala kyavulu. (1 Te. 5:12) Maji kiki ki kilombolola kwila ene ala jingana ja kixikanu kya jiphange mu kilunga.—1 Ph. 5:​2, 3.

• Jihova wabhana o ungana ku jinguvulu wa kubhinga ku athu o lubhaku ni kutambula kijingu.—Lom. 13:​1, 6, 7.

Mu henda ye, Jihova utubhana o ima yoso itwa bhindamena. Kuma twakwa ituxi, o futu yetu o kufwa. (Lom. 6:23) Ne kiki Jihova utubhana mabesa avulu mukonda dya henda ye. (Jisá. 103:​10, 11) Mukonda dya ngalasa ye, Jihova utubhana maujitu ya.—Lom. 12:​6-8; Efe. 2:8.

Dilange phala ki ubanze kala o athu ku mundu wa Satanaji. Se kitudilange tutena kumateka kubanza kwila etu twafwama dingi kutambula ima, akwetu ndenge. Sayi kizuwa, Jezú wate kifika kyalondekesa kwila tutena kumateka kukala ni kixinganeku kiki. Mukifika kiki, mwene wa zwela yalungu ni akalakadi axikina kukalakala o kizuwa kya muvimba ni kutambula o kitadi kyâ. Mukusuluka o ngana ya kudisukilu dya kizuwa wasoto dingi akalakadi engi. Kudisukilu dya kizuwa enyoso o kitadi kya tambwile kya sokele ngo, kikale yo akalakala o kizuwa kyamuvimba ni yo akalakala ngo ola imoxi. Maji o akalakadi akalakala o kizuwa kyamuvimba amesenene kutambula dingi akwa ndenge, mukonda ene akalakala o kizuwa kyoso ni mwanya watu. (Mat. 20:​1-16) Mukifika kiki, Jezú walondekesa kwila o akayedi’e atokala kusanguluka ni ima ya abhana Jihova ni henda yoso.

Kala u mukwa kusakidila, kana kukala u mukwa kujijidika. (1 Te. 5:18) Kayela o phangu ya Poxolo Phawulu, kexile mu bhinga kitadi kujiphange mu kilunga kya Kolindu, sumbala mwene  weji tena kubhanga kiki. (1 Ko. 9:​11-14) Kitwatokala kujijidika akwetu phala kutubhana o ima ya, maji kyabeta kota o kwasakidila mu ima yatubhana.

Kala u muthu walenduka. Kyoso o muthu kyadimona kwila mwene wabeta kota akwa ndenge, mwene ubanza kwila o ima yala nayu yatolo. Phala katufwinyise ku ixinganeku yiyi twatokala kulenduka.

Polofeta Daniyele phangu yambote ya muthu walenduka. Mwene watokalele ku mwiji wa katunda, wa fwamene o pholo, wexile njimu, wakexile we ni mauhete avulu. Mukonda dya kiki mwene weji banza kwila atokalele kumutalatala mu ukexilu wa katunda ni kwila o maujitu atambwile amutokalele mwene. (Dan. 1:​3, 4, 19, 20) Maji Daniyele wasuluka mukukala muthu walenduka. O kulenduka kwe kwabhangesa Jihova kumuzola kyavulu.—Dan. 2:30; 10:​11, 12.

Twatokala kudilanga ni ukexilu wa mundu yu wa kudizola ngo mudyetu. Muveji dya kiki, twatokala kusanguluka ni mabesa utubhana Jihova mukonda dya henda ye.