Phange Madiya ni mwadi wê manu Nzwá, a atungu mu ixi mwala athu avulu akwa Filipinas. O athu yá ayi-mu phala kukalakala. Ene awabhela kwabokela o njimbu yambote. Mu kithangana kya COVID-19, mana Madiya kexile ngó mulonga o Bibidya ku athu atungu mu ixi yê, maji wexile we mulonga o Bibidya ku athu atungu mu jixi jengi. Kyebhi kyexile mubhanga kiki?

O athu azolo kudilonga o Bibidya awabhela kutangela o jindandu jâ ni makamba mâ o ima yamudilonga, mu kiki mana Madiya wexile mubhanga o kibhwidisu kiki ku maxibulu mê: “Wejiya dingi muthu wamesena kudilonga o Bibidya?” Se o dixibulu utambwijila kyene, mwene wexile mu mwibhwidisa dingi: “O kwila utena kungikwatekesa kuzwela-nê?” Kyebhi o kubhanga o kibhwidisu kiki kya akwatekesa kyavulu?

Sayi dixibulu dya mana Madiya amwixana Katidi, wamulondekesa athu awana amesenene we kudilonga o Bibidya. Umoxi mudyâ, mana Kristina, wawabhela kudilonga o Bibidya, mukonda dya kiki wabhingi kwa mana Madiya phala kumulonga o Bibidya luyadi ku semana. Kyoso mana Madiya kyamwibhidisa se wejiya dingi muthu wamesena kudilonga o Bibidya, mana Kristina wamwambela: “Xe, nganda kulondekesa o makamba mami.” Jisemana kupholo, mana Kristina walondekesa kwa mana Madiya makamba mê awana amesenene kudilonga o Bibidya. Mukusuluka, mana Kristina walondekesa kwa mana Madiya, makamba amukwa amesenene kudilonga o Bibidya. Anga ene alondekesa kwa mana Madiya, o makamba engi.

Mana Kristina wamesenene kwila o mwiji wê ku Filipinas adilonga we o Bibidya. Mwene walondekesa mon’ê mana Andreia kwa mana Madiya. Kudimatekenu, mana Andreia wexile mubanza kiki: ‘O Jimbangi ja Jihova, akwa makutu. Ene kaxikina Jezú. Atanga ngó o madivulu ala mu Kikutu Kyokulu.’ Maji kyoso kyadilongo o Bibidya muveji ya dyanga, wamono kwila o yexile mubanza yalungu ni Jimbangi ja Jihova, kiyexile kidi. Kyoso kyexile mudilonga o Bibidya, wexile muzwela kiki: “Se yosoneke mu Bibidya, kidi mwene!”

Ku pholo dya kwenda, mana Andreia walondekesa dingi makamba mê ayadi, ni koleka yê yasalu kwa mana Madiya. Sekaji’a mana Andreia, amwixana Ângela, mwene kifofo. Kyoso mana Andreia kyexile mudilonga ni mana Madiya, mwene wexile mukwivwa. Mana Ângela wabhingi kwa mana Andreia phala kutangela mana Madiya se mwene utena we kudilonga o Bibidya. Mana Ângela wawabhelele o milongi ya Bibidya. Mu mbeji imoxi, mwene wejidile kya jivelusu javulu ja Bibidya, yu wamesenene kudilonga luwana ku semana! Ni  kikwatekesu kya mana Andreia, mana Ângela watenene kwivwa o yonge bhukaxi ka internete.

Kyoso mana Madiya kyevu kwila o mwadi wa mana Kristina, manu Jozuwé, wexile mukala ku mbandu ya mana Kristina, kyoso kyexile mudilonga o Bibidya, mana Madiya wamwibhwidisa se wamesenene kudilonga o Bibidya. Manu Jozuwé wambe: “Ngamesena ngó kwivwa, kana kungibhanga ibhwidisu, se ungibhanga ibhwidisu, ngandaya-mi.” Mu kubhita ngo ithangana itanu, mwene wabhangele dingi ibhwidisu, o mana Kristina ndenge, yu wamesenene kusuluka ni kudilonga o Bibidya.

Kibhwidisu kimoxi kyabhangele mana Madiya kyabhangesa athu avulu kudilonga o Bibidya. Kuma wexile ni maxibulu avulu, mwene wabhingi ku jiphange phala kulonga o maxibulu amukwá. Mana Madiya wamateka kulonga o Bibidya ku 28 dya athu, atungu mu jixi jiwana.

Mana Katidi, o dixibulu dya dyanga amutumbula ku musoso yu amubatizala ku mbeji ya Kasamanu wa 2021. Mana Kristina amubatizala ku mbeji ya Kasambwadi wa 2022 yu wavutuka ku Filipinas phala kukala ni jindandu jê. O maxibulu ayadi alondekesa mana Kristina kwa mana Madya a abatizala we. Mu kubhita tu mbeji mana Ângela amubatizala we, lelu wakituka muboki wa thembu yoso. O mwadi wa Mana Kristina manu Jozuwé ni mon’â, mana Andreia, ni maxibulu amukwa, amusuluka ni kudilonga o Bibidya ni kukula mu nzumbi.

Ku hama ya dyanga athu avulu atangele ku jindandu jâ ni makamba mâ yoso yadilongele yalungu ni Jezú. (Nzw. 1:​41, 42a; Ika. 10:​24, 27, 48; 16:​25-33) Bhanga o kibhwidisu kiki ku maxibulu mé ni kwa yo amesena kudilonga o Bibidya: “Wejiya dingi muthu wamesena kudilonga o Bibidya?” Se ubhanga we o kibhwidisu kiki eye wanda kwijiya athu avulu amesena kudilonga o Bibidya.