O kwila wabatwile kya maka ubheka we mukonda kikwexile muthu phala kukukwatekesa? Twala mu ‘ithangana yabhonzo kudibhana nayu.’ Kiki kitena kutubhangesa kuluwala ni kudivwa ubheka. (2 Ti. 3:1) Maji kyoso kitwamudibana ni maka tutena kubhinga kikwatekesu ku akwetu, mukonda o Bibidya yamba kwila o makamba a kidi atukwatekesa “mu jiphaxi”.—Jisa. 17:17.

Poxolo Phawulu watambula ikwatekesu yavulu ya makamba mê. (Kol. 4:​7-11) Kyoso Phawulu kyexile mu Loma mu kaleya o makamba mê amukwatekesa mu ima kejitena ku ibhanga ubheka. Mu kifika, Epafoloditu wambatele o ima yatumikisa o jiphange ja mbanza ya Filipu. (Fil. 4:18) Tikiku wabhixidisa ku ilunga yavulu o mikanda yasoneka Phawulu. (Kol. 4:7) Ni kikwatekesu kya makamba mê mwene watenene kubhanga o kikalakalu kya kuboka, ne mwene kyoso kyexile mu kaleya kubhata, ni kyoso kyexile ubheka we mu kaleya. Lelu, kyebhi ki utena kukala u dikamba dya kidi?

Mu izuwa yetu jiphange javulu ene mulondekesa kwila o makamba atena kudikwatekesa mudya. Tala o kifika kya phange yetu yamuhatu wexile dikamba dya kidi dya muboki wathembu yoso mu ixi ya Espanha, amwixana Elizabete. Kyoso o manya ya Elizabete kyexile ni uhaxi kiwivu milongo, o phange yiyi yamuhatu wexile mu mutumikisa jinjimbu ja muswinisa, jalungu ni jivelesu ja Bibidya. Mana Elizabete wambe: “Kyoso ki ngexile mumona o jinjimbu jiji ja ngiswinisa, eme ngasangulukile kyavulu mu kwijiya kwila sayi muthu wexile mu ngibanza, kiki kyexile mungibhana nguzu phala kukolokota mu kizuwa ni kizuwa.”—Jisa. 18:24.

Tutena kukolesa o ukamba ni jiphange jetu mu kwa akwatekesa kuya mu yonge ni kuboka nawu kumoxi. Mukifika o kwila utena kwambata mu dikalu dyê o jiphange akuka kya mu yonge ni mu ukunji? Kiki kithangana kyambote phala kudiswinisa mudyetu. (Lom. 1:12) Maji sayi jiphange kene mutena kutunda kubhata. Kyebhi kitutena kukwatekesa o jiphange jiji?

Sayi jiphange kene mutena kutala o yonge pholo ni pholo mukonda akate mba mukonda dya ibhidi yengi. Tala o kifika kya phange Davidi, mwene wexile ni uhaxi kiwivu milongo. Kyoso kyayi ni kutambula milongo phala kusosolola o ndolo, manu Davidi ni muhatu’ê mana Lidya akexile mutala o yonge kubhata.

Kyebhi o jiphange mu kilunga kyakwatekesa o dikaza didi? Kyoso kyexile mu zubha o yonge, sayi jiphange exile mu kididi kya ubhezelu, exile muxindila kwa manu Davidi ni mana Lidya phala kudizwelesa nawu. Ku mbandu yamukwa kyoso manu  Davidi ni mana Lidya kyexile mutambwijila mu yonge, o jiphange exile mwatumikisa jinjimbu phala kwaswinisa kudisukilu dya yonge. Kyebhi o ima yiyi kyakwatekesa manu Davidi ni mana Lidya? Ene amonene kwila a azolele kyavulu kiki kya abhangesa kuzukama dingi ku jiphange.

O kwila utena kusuwa o mbambe ya kuboka ni jiphange kene dingi mutunda kubhata? Nange eye wanda bhinga kulungulula o ukexilu wê wa kuboka phala kuboka nawu. Kiki kyanda abhangesa kumona kwila ka ajimbi ni kwila ala hanji ni valolo. (Jisa. 3:27) Nange utena kukatula kakithangana phala kusoneka nawu tumikanda mba kuboka nawu bhukaxi ka mutelembe. O tufunga atena kusokejeka o yonge ya sidivisu ya kuboka phala ibhite we bhukaxi ka mutelembe. Kyoso o kilunga kya manu Davidi ni mana Lidya kyasolo kubhanga kiki, ene asangulukile kyavulu. Manu Davidi wajimbulula: “Kyoso kitwexile mu xinda ku kibuka kyetu kya sidivisu ya kuboka, o kwivwa ngo mwene o musambu, kyexile kya mu tusangulukisa kyavulu.” Ku mbandu yengi se kibhana utena kwambata o dixibulu dyê kubhata dya phange kene kutunda ku bhata.

Kyoso kitukalakala ni jiphange jiji, twandatena kumona idifwa yambote yala nayu ni kukolesa dingi o ukamba wetu ni ene. Kyoso ki wanda boka nawu ni kumona o uhete wa wakulonga o Bibidya, wanda kwazola dingi. Kyoso ki ukwatekesa o jiphange mu kuboka nawu, wanda kala ni makamba a ubhe.—2 Ko. 6:13.

Kyoso Phawulu kya dibhanene ni ibhidi, kamba dyê Titu wayile kate kwexile mwene kiki kyakwatekesa Phawulu kudivwa kyambote. (2 Ko. 7:​5-7) Kima kyambote kuswinisa o jiphange bhukaxi ka izwelu yetu. O phangu ya Titu ilondekesa kwila tutena we kuswinisa o jiphange mukubhita nawu kithangana ni kubhanga ima phala kwakwatekesa.—1 Nz. 3:18.

O jiphange ku Russia ene mudikwatekesa mudya mu ithangana ya izukutisu. Tala yabhiti ni phange Sergey ni muhatu wê Tatyana. O axiku dya ngoji abokona mu inzo ya phala kutokwesa, anga a ambata phala kwabhanga ibhwidisu. Phange Tatyana mwene adyangele kumujituna anga wavutuka kubhata. Phange Sergey wambe: “Kyoso mana Tatyana kyabhixila kubhata, phange ya muhatu ni kuswina kwoso wayi mu mukunda ku bhata dyetu. Jiphange jamukwa ayi we mu mukwatekesa kuzelesa o inzo yetu.”

Phange Sergey wambe: “Eme nga wabhela kyavulu o divulu dya Jisabhu 17:​17, dyamba: ‘Dikamba u zola mu thembu joso; o ndandu u di monekena mu jiphaxi.’ O izwelu yiyi yadikumbidila ku mwenyu wami mukithangana kiki kya izukutisu, mukonda kingeji tena kudibhana ni ibhidi yoso yiyi ubheka wami. Jihova wangibhana makamba kala ni woma wa kukala kumbandu yami.” a

Kala kizuwa kibhita o ibhidi yanda dibandekesa dingi. Mukiki, twanda bhindamena makamba ututena kwa dyelela. Mu hadi ya dikota twanda bhindamena dingi o makamba ya, kindala ndenge. Kiki kyene o kithangana kya kubhanga nguzu phala kukala ni makamba a kidi!—1 Ph. 4:​7, 8.