MBANDU YAKUDILONGA 8
MWIMBU 130 Tu Loloke Akwetu
Kyebhi ki Utena Kukayela o Phangu ya Jihova ya Kuloloka?
“Kala Jihova kya miloloka ni muxima woso, enu wenu mwatokala kudiloloka mudyenu.”—KOL. 3:13.
ITWANDADILONGA
Mu milongi yiyi twanda mona se ihi i twatokala kubhanga phala kuloloka yo atubhange kyayibha.
1-2. (a) Kithangana kyebhi kibhonza kyavulu kuloloka muthu? (b) Kyebhi mana Denize kyaloloka o muthu wamubhange kyayibha?
O KWILA ku kubhonza kuloloka akwenu? Avulu mudyetu kya abhonza kyavulu kuloloka benge-benge kyoso kya tubhanga kima kyayibha mba kyatutangela kima kituluwalesa kyavulu. Mu kiki sayi ima itutena kubhanga phala kulenga o njinda mba kudivwa kyayibha ni kuloloka akwetu. Mu kifika, tumone o phangu ya phange ya muhatu amwixana Denize, a mwene walondekesa o muloloki mu ukexilu utubhangesa kudiwana. Ku muvu wa 2017, Denize ni mwadi wê ni twana twâ ni kamba dyâ ayile mukunda o Mbonge ya Jimbangi ja Jihova. Kyoso kyakexile mu vutuka ku bhata, sayi mwendexi wa dikalu waphuphu ku dikalu dyâ. Phange Denize wakumbamene mukonda dya kilwezu kya dikalu. Kyaphaphumuka, amutangela kwila an’ê a akwamene kyavulu ni kwila mwadi wê, amwixana Brian wafu. Kyoso kyaxinganeka yalungu ni kithangana kyenyokyo, phange Denize wambe: “Kilunji kya ngitandanganyele kyavulu, ngexile we ni kikote ku muxima.” Ku pholo dya kwenda amutangela kwila o mwendexi kalandukile, mukonda dya kiki mwene wasambe kwa Jihova phala kavudise dingi o maka.
2 O mwendexi waphuphu ku dikalu dyâ, amukutu ya amufundisa mukonda dya kujibha mwadi wê. Se o mufundixi wamwene kwila o diyala wexile ni kikuma, eji muta mu kaleya. Maji, o mufundixi wambe kwa mana Denize kwila yoso yejizwela mwene mu inzo ya kufundisa, yene yeji bhangesa o mwendexi kumuta mu kaleya mba kana. Mana Denize wambe: “Ngadivu kala muthu wajikula o jifidila jami, yu wate-mu mongwa wavulu, mukonda ngeji zwela yalungu ni kithangana kyangibhonzele dingi ku mwenyu.” Jisemana ku pholo, mana Denize wayile mu inzo ya kufundisa mubhana umbangi ku pholo dya diyala wabheka hadi yavulu ku mwiji wê. Ihi yazwela mwene? Mana Denize wabhingi ku mufundixi phala kuloloka o mwendexi. b Kyoso kyazubha o kuzwela, o mufundixi wamateka kudila. Mwene wambe: “Mu 25 ya mivu i ngamukalakala kala mufundixi, nuka ngamonene kima kyadifu kiki. Nuka ngamwene o mwiji wa muthu amujibha kubhinga phala kuloloka yó wala ni kikuma. Nuka ngevwile izwelu ya henda ni ya kuloloka mu inzo ya kufundisa.”
3. Ihi yakwatekesa mana Denize kuloloka?
3 Ihi yakwatekesa mana Denize kuloloka? Mwene waxinganeka kyebhi Ngana Jihova kyene mutuloloka. (Mik. 7:18) Kyoso kitusakidila Jihova mu kutuloloka, kiki kyanda tukwatekesa we kuloloka akwetu.
4. Jihova wamesena kwila tubhanga ihi? (Efezu 4:32)
4 Jihova wamesena kwila tuloloka akwetu kala kyene mutuloloka. (Tanga Efezu 4:32.) Jihova wamesena kwila tukala polondo phala kuloloka yó atuluwalesa. (Jisá. 86:5; Luk. 17:4) Mu milongi yiyi twanda dilonga ima itatu yanda tukwatekesa kukala dingi ni ukexilu wa kuloloka.
KANA KULONDEKESA KWILA YOSO YALA KYAMBOTE
5. Kala kilondekesa Jisabhu 12:18, kyebhi kitudivwa kyoso muthu kyatuluwalesa?
5 Tutena kuluwala kyavulu mukonda dya ima izwela mba itubhanga o muthu, benge-benge se muthu yú kamba dyetu dya kazola mba ndandu yetu. (Jisá. 55:12-14) Sayi bhabha, kituxixima kyavulu, tudivwa kala atuxuku ni phoko. (Tanga Jisabhu 12:18.) Nange tusota kulondekesa kwila twaletu kyambote. Maji kubhanga kiki kyedi kala atuxuku ni phoko, ya a ixisa bhenyobho. Kyene we kimoxi, se tulondekesa kwila seku maka, nange o kuxixima kwanda suluka.
6. Ihi itutena kubhanga kyoso o muthu kyatuxinga?
6 Kyoso muthu kyatuxinga, nange o kima kyadyanga kitubhanga o kukala ni njinda. O Bibidya yamba kwila tutena kukala ni njinda, maji yamba we kuma kitutokala kwehela o njinda kututolola. (Jisá. 4:4; Efe. 4:26) Mukonda dyahi? Mukonda o jihânji jetu jitufunyisa kubhanga kima kyoso-kyoso. O njinda ya muthu ki ibhekela kuyuka bhupholo ya Nzambi. (Tiy. 1:20) Kyoso kyatuxinga, kudimatekenu nange tukala ni njinda, maji ku pholo dya kwenda étu twatokala kusola se tusuluka mu kukala ni njinda mba kana.
Kyoso kyatuxinga, kudimatekenu nange tukala ni njinda, maji ku pholo dya kwenda étu twatokala kusola se tusuluka mu kukala ni njinda mba kana
7. Kyebhi dingi kitutena kudivwa kyoso muthu kyatubhanga kyayibha?
7 Kyoso muthu kyatutalatala kyayibha, tudivwa kyayibha. Mu kifika, sayi phange amwixana Ana wambe: “Kyoso kingexile ngi mona-ndenge, tat’etu wasenge mam’etu yu wakazala ni kiledi kyami. Ngadivu ubheka. Kyoso ene kyavwala o twana twâ, ngadivu kala angibhinganesa. Kingayi ni kukula, ngexile mudivwa kala kangizolo.” Phange ya mukwá amwixana Jorjina wambe kiki kyoso mwadi wê kyate phanda ni muhatu wengi: “Eme ni mwadi wami twexile tu makamba tunde undenge. Twexile tu aboki a thembu yoso! Kyangixixima kyavulu ku muxima.” Phange ya mukwá amwixana Nowemya wambe: “Nuka ngafikile kwila mwadi wami weji ngikwama kyavulu. Kyoso kyafisala kwila wexile mutala ufusa mu kaswekele, ngadivu kala wanginganala, kala wate phanda.”
8. (a) Mukonda dyahi twabhingi kuloloka akwetu? (b) Mbote yebhi itukatula kyoso ki tuloloka akwetu? (Tala o kaxa “ Ihi Itwatokala Kubhanga se Muthu Watubhange Kima Kyatuluwalesa Kyavulu?”)
8 Etu kitutena kulanga o ima i tutangela o athu mba o ima ya tu bhanga, maji tutena kulanga o ukexilu wetu wakutambwijila. Sayi bhabha o kitambwijilu kyafwama, o kuloloka. Mukonda dyahi? Mukonda twazolo Jihova, mwene wamesena kwila tuloloka. Se tu suluka ni njinda ni tukambe kuloloka, nange twanda bhanga ima yayibha, itukatesa. (Jisa. 14:17, 29, 30) Tala o phangu ya phange amwixana Kristina. Mwene wambe: “Kyoso ki ngikala ni njinda, kwolela kwami kutola. Ngidya dingi kudya kwakambe valolo. Ki ngitena kuzeka kyambote, ku ngibhonza we dingi kulanga o jihanji jami, mukonda dya kiki o ukexilu yu utena kufunyisa o ukamba wami ni mwadi wami, ni ukamba ni akwetu.”
9. Mukonda dyahi twatokala kweha o njinda?
9 Ne mwene se o muthu watubhange kyayibha katubhingi muloloki, tutena kusosolola o ndolo yatubheka mwene. Kyebhi? Mana Jorjina twamutumbula kya kudima wambe: “Kwabhiti kya kithangana, maji ngeha kukwatela njinda ku muthu wexile diyala dyami. Mukonda dya kiki ngevu kutululuka kwa dikota.” Kyoso ki tweha o njinda, twanda talatala kyambote akwetu. Kyoso ki tweha kubanza mu ima yayibha ya tubhange, kiki kitubhanga kyambote, twanda sanguluka ku mwenyu. (Jisa. 11:17) Maji ihi i watokala kubhanga se umona kwila kiwamutena hanji kuloloka o muthu wakubhange kyayibha?
KYEBHI KITUTENA KWEHA KUKALA NI NJINDA?
10. Mukonda dyahi kwabhingi kithangana se twamesena kuloloka akwetu? (Tala we o jifoto.)
10 Kyebhi kitutena kweha kukala ni njinda? Ukexilu umoxi, o kubhana kithangana. Kyoso o muthu kyahaxila, wabhingi kithangana phala kudisanza. Kyene we kimoxi, kwabhingi kithangana phala tutene kukala polondo phala kuloloka.—Ndo. 3:3; 1 Ph. 1:22.
Kyoso o muthu kyahaxila, wabhingi kithangana phala kudisanza. Kyene we kimoxi, kwabhingi kithangana phala tutene kukala polondo phala kuloloka (Tala okaxi 10)
11. Kyebhi o musambu utena ku kukwatekesa kukala polondo phala kuloloka?
11 Samba kwa Jihova phala nakukwatekese kuloloka. c Mana Ana twamutumbula kya wazwela kyebhi o musambu wamukwatekesa. Mwene wambe: “Ngabhingi kwa Jihova phala kuloloka etu enyoso ku mwiji mukonda dya ima yayibha itwazwela mba itwabhange. Mu kusuluka ngasoneka mukanda phala tat’etu ni muhatu wê, nga atangela kwila nga aloloka.” Mana Ana wazwela kwila kyamubhonzele kubhanga kiki. Maji mwene wambe dingi: “Ngamesena kwila mu kukayela o phangu ya Jihova yakuloloka, tat’etu ni muhatu wê atene kudilonga yalungu ni Jihova.”
12. Mukonda dyahi twatokala kudyelela kwa Jihova, mu veji dya kudyelela ku jihanji jetu? (Jisabhu 3:5, 6)
12 Dyelela kwa Jihova, kana kudyelela ku jihanji jé. (Tanga Jisabhu 3:5, 6.) Jihova wejiya jinga o ima yabeta-kota phal’etu. (Iza. 55:8, 9) Mwene nuka wanda tubhinga phala kubhanga kima kyanda tubhanga kyayibha. Kyoso kyatubhinga phala kuloloka akwetu, tutena kudyelela kwila kiki kyanda tubhanga kyambote. (Jisá. 40:4; Iza. 48:17, 18) Maji se tudikwatenena ku jihanji jetu, nange nuka twanda tena kuloloka mukwetu watubhange kyayibha. (Jisa. 14:12; Jel. 17:9) Mana Nowemya twamutumbula kya, wambe: “Kudimatekenu ngaxikinine kwila kingatokalele kuloloka mwadi wami mukonda dya kutala ufusa. Ngexile ni woma wa kwila weji ngiluwalesa dingi, mba woma wa kujimba o ndolo yangibhekela. Ngafikile kwila Jihova wexile mutendela o ibanzelu yami. Maji ngamono kwila mukonda dya Jihova kutendela o jihanji jami, ki kilombolola kwila mwene wajixikina. Wejiya kyebhi kingamudivwa, wejiya we kwila kubhinga kithangana phala o ndolo kubhita, maji wamesena kuma ngiloloka mukwetu.” d
KALA NI IXINGANEKU YAMBOTE
13. Kala kilondekesa Loma 12:18-21, ihi itwatokala kubhanga?
13 Kyoso kituloloka muthu watuluwalesa kyavulu, kitwatokala kuzwela o kima kyabhiti. Se o muthu watuluwalesa, phang’yetu, twatokala we kubhanga-nê paze. (Mat. 5:23, 24) Mu veji dya kukala ni njinda, tuloloka o muthu, tumukwatela we henda. (Tanga Loma 12:18-21; 1 Ph. 3:9) Ihi itena kutukwatekesa kubhanga kiki?
14. Twatokala kubhanga nguzu phala kubhanga ihi ni mukonda dyahi?
14 Jihova umona o idifwa yambote ku athu, kyenyiki twatokala kubhanga nguzu phala kumona o muthu watuxingi kala kyamumona Jihova. (2 Mal. 16:9; Jisá. 130:3) Se tusota ku athu idifwa yayibha twanda ku isanga, maji se tusota we kwa ene idifwa yambote, twanda ku isanga we. Kyoso kitusota idifwa yambote ku athu ki kyanda tubhonza kwaloloka. Mu kifika, sayi phange amwixana Zuze wambe: “Kyoso kingibanza mu ima yambote yala nayu phange mu veji dya kudikwatenena mu kitondalu kyê, kiki kingikwatekesa kumuloloka.”
15. Mukonda dyahi kima kyambote kutangela ku muthu kwila twamuloloka?
15 Kima kyamukwa o kutangela ku muthu kwila twamuloloka. Mukonda dyahi? Mana Nowemya twamutumbula kya wambe: “Mwadi wami wangibhwidisa: ‘Wangiloloka kya?’ Ngamesenene kumutangela, maji kingatena. Mu kiki ngamono kwila kingamulolokele ni muxima woso. Ku pholo dya kwenda, ngatena kumutangela o izwelu yiyi yala ni nguzu yavulu kwila, ‘Ngakuloloka ni nguzu yoso.’ Kyoso kingamuloloka, mwene wadidi. Ngadiwana mu kumona kwila kiki kyatubhangesa kudivwa kyambote. Kyenyiki, ngamateka kumudyelela dingi, anga twakituka tu makamba ambote.”
16. Ihi itwadilongo yalungu ni kuloloka?
16 Jihova wamesena kwila tukala tu akwa kuloloka. (Kol. 3:13) Né kiki sayi bhabha kutubhonza kuloloka akwetu. Maji twanda tena kubhanga kiki, se tubhanga nguzu phala kweha o njinda.—Tala o kaxa “ Ima Itatu Yanda Tukwatekesa Kuloloka Akwetu.”
XINGANEKA O MBOTE IJILA MU KULOLOKA
17. Ima yebhi itubhangesa kuloloka akwetu?
17 Twala ni ima yavulu itubhangesa kuloloka. Kyadyanga, tukayela o phangu ya Tat’etu Jihova ni kumusangulukisa. (Luk. 6:36) Kya kayadi, tulondekesa kwila tusakidila Jihova mu kutuloloka. (Mat. 6:12) Kya katatu, twanda kala ni sawidi yambote ni makamba ambote.
18-19. Ihi itena kubhita kyoso kituloloka ni muxima woso?
18 Kyoso kituloloka akwetu, twanda tambula mabesá kitwakifikile. Tala yabhiti ni mana Denize, twamutumbula kudimatekenu. Mana Denize kejidile kwila o diyala wajibhile mwadi wê wamesenene kudijibha kyoso kyeji mufundisa. Maji o muloloki wê wamutula ku muxima mukonda dya kiki wamateka kudilonga o Bibidya ni Jimbangi ja Jihova.
19 Nange twanda fika kwila kuloloka o muthu kyene o kima kyabhonzo dingi kukibhanga, maji kitena we kukala dibesá dya dikota. (Mat. 5:7) Mu kiki, tubhangyenu yoso ni yoso phala kukayela o phangu ya Jihova ya kuloloka.
MWIMBU 125 “A Zediwa Akwa Henda!”
a Sayi majina a alungulula.
b Mu maka yá kala Kidistá watokala kusola yanda bhanga.
c Tala o jividyu “Perdoem uns aos outros,” “Me ajuda a perdoar,” ni “O que passou ficou pra trás” mu jw.org.
d Sumbala o kutala ufusa kituxi ni kwila kiluwalesa kyavulu kaza dyetu, maji ki kibhangesa o dikaza atumaka o itendelesu ya Bibidya, kubatula o ukaza.
