MBANDU YAKUDILONGA 7
MWIMBU 15 Ximana o Mon’a Jihova!
Mabesá u Wala Nawu Mukonda Dya Jihova ku Kuloloka
‘Eye-phe, u Ngana, u mukwa kuloloka mu kidi.’—JISÁ. 130:4.
ITWANDADILONGA
Twanda mona ifika mu Bibidya ilondekesa kwila o muloloki wa Jihova wala ni valolo yadikota. O milongi yiyi yanda bandekesa dingi o kisakidilu kyetu ku muloloki wa Jihova.
1. Mukonda dyahi sayi bhabha kubhonza kutendela o muloloki wa athu?
“NGA KULOLOKA KYA!” Tudivwa kyambote kyoso muthu kyatutangela o izwelu yiyi, benge-benge se twejiya kwila twabhange mba twazwela kima kyamuluwalesa! Maji o izwelu yiyi “ngakuloloka kya” ilombolola ihi? Nange mwene wamesena kuzwela kwila enu mwala hanji mu makamba ambote. Mba o muthu kamesena dingi kwila musuluka mu kuzwela o maka enya, maji o ukamba wenu kiwene dingi umoxi. Sayi bhabha kubhonza kutendela o muloloki wa athu.
2. Kyebhi o Bibidya izwela ukexilu wa Jihova wa kuloloka? (Tala we kulwiji.)
2 O ukexilu wa Jihova wa kutuloloka etu tu akwa ituxi, kiwadifu ni ukexilu wetu wakudiloloka o ituxi. Seku muthu utena kuloloka kala kiloloka Jihova. O mukwa jisalamu wambe kiki yalungu ni Jihova: ‘Eye-phe, u Ngana, u mukwa kuloloka mu kidi, phala athu ende jinga ni ku ku xila.’ a (Jisá. 130:4) O muloloki wa Jihova wene o ‘muloloki wakidi’. Mwene ngo utena kulondekesa o muloloki wakidi. Sayi jivelusu mu Mikanda ya Hebalayiku, o asoneki a Bibidya atumbula kizwelu kyalungu ngo ni muloloki wa Jihova, kana o muloloki wa athu.
3. Mu ukexilu webhi o muloloki wa Jihova kiwadifu ni muloloki wetu? (Izaya 55:6, 7)
3 Kyoso Jihova kyaloloka o muthu, mwene ujima o kituxi kyê. Tutena kukala hanji ni ukamba wambote ni Jihova. Tusakidila kyavulu Jihova mu kutuloloka mu kidi mu ithangana yoso.—Tanga Izaya 55:6, 7.
4. Kyebhi Jihova kya tukwatekesa kutendela o muloloki wa kidi?
4 Se o muloloki wa Jihova kiwadifu ni muloloki wetu, kyebhi ki tutena kutendela se o muloloki wa kidi ihi? Bhukaxi ka ifika Jihova ulondekesa kyebhi kyene mutuloloka. Mu milongi yiyi twanda dilonga ifika ilondekesa kwila kyoso ki tudyela o ituxi yetu Jihova ujima o ituxi yiyi, anga utubhana ujitu wa kusuluka ni ukamba wambote ni mwene. Kyoso ki tuya ni kudilonga o ifika yiyi, twanda kolesa dingi o henda yetu ni kisakidilu kwa Tat’etu ya henda, utuloloka mu maukexilu avulu.
JIHOVA UKATULA O ITUXI YETU
5. Ihi ibhita kyoso Jihova kyaloloka o ituxi yetu?
5 Mu Bibidya o ituxi a isokesa mu veji javulu ni kimbamba kya neme. Sobha Davidi wasoneka kiki yalungu ni ituxi yê: “Mukonda ikuma yami ya ngi bhiti ku thandu, nga jikinina mwene; ya ngi xina ni yene kala kimbamba kya dikota.” (Jisá. 38:4) Maji Jihova uloloka o ituxi ya yo adyela ni muxima woso. (Jisá. 25:18; 32:5) Mu jivelusu jiji o kizwelu mu Hebalayiku kyolungulule kuloloka, kilombolola “kuzangula” mba “kwambata”. Kyoso Jihova kyaloloka o ituxi yetu mwene ukatula o kimbamba kyatunemena.
‘Muloloki’ (Jisá. 32:5)
6. Kate bhebhi Jihova wambata o ituxi yetu?
6 O kifika kya mukwa kilondekesa kate bhebhi Jihova wambata o ituxi yetu, kyala mu Jisálamu 103:12: “Tunde kuthund’èlele katé ku mazanga, mukwâ ni dikanga dya texe o ikuma yetu.” O mbandu bhutundila o dikumbi, nuka yanda disanga ni mbandu bhufwila o dikumbi. Jihova wambata o ituxi yetu mu kididi ki twakifikile. Kiki kitudyelelesa kwila Jihova utuloloka ni kidi kyoso!
‘Tunde kutundila o dikumbi kate kufwila o dikumbi’ (Jisá. 103:12)
7. Kala kizwela o Bibidya, ihi ibhanga Jihova ni ituxi yetu? (Mikeya 7:18, 19)
7 Sumbala Jihova wambata o ituxi yetu dikanga, o kwila mwene usuluka mu kudikwatenena mu ituxi yetu? Kana. Sobha Ezekiya wambe kiki yalungu ni Jihova: “Kuma o ituxi yami yene yoso, eye Ngana, wa i takula ku dima dyé.” (Iza. 38:9, 17) Kiki kilombolola kwila Jihova utexi o ituxi ya yo adyela ni muxima woso anga mwene ka itonginina dingi. O kifika kya mukwa kyala mu divulu dya Mikeya 7:18, 19. (Tanga.) O jivelusu jiji jamba kwila Jihova utexi o ituxi yetu koxi a menya a kalunga. M’ukulu, se o kima kya lawukila koxi a menya a kalunga, keji tena dingi kukisanga.
“Eye Ngana, wa i takula ku dima dyé” (Iza. 38:17)
“O ituxi yetu yoso anga wa ká i texi mu’alunga mwa zongo” (Mik. 7:19)
8. Kyoso Jihova kyaloloka o ituxi yetu, mwene ubhanga ihi?
8 O Bibidya ilondekesa ni kidi kyoso kwila kyoso Jihova kyaloloka o ituxi yetu, mwene ujima o kituxi kyetu kyoso, ni kwila kitwabhingi dingi kuditatela. O izwelu ya Davidi, ya kidi. Mwene wambe: “Azediwa yó o ibhangelu yâ yayibha a ijimbi, o ituxi yâ yololoke. Wazediwa o muthu ituxi yê, Jihova kanda i lembalala.” (Lom. 4:7, 8) Yu wene o muloloki wa kidi!
JIHOVA UJIMA O ITUXI
9. Kyebhi o Bibidya itukwatekesa kumona kwila Jihova utuloloka mu kidi?
9 Bhukaxi ka sata ya kukula Jihova utena kujima o ituxi ya athu a dyela ni muxima woso. Mu Bibidya twatange kwila Jihova usukula o ituxi. Kiki kibhangesa kuzelesa o ituxi. (Jisá. 51:7; Iza. 4:4; Jel. 33:8) Jihova ujimbulula se ihi ibhita mu kubhanga kiki: “Né-mbé ituxi yenu ya kusuka kala husu, ya-ndu zela mukwâ ni neve (o kikulakaji); né-mbé yedi ngwí kala hundu, yila mwene phalatatá mukwâ ni kindemba kya mbudi izela.” (Iza. 1:18) Kubhonza kyavulu kusukula o maxaka a kusuka kala husu mba yedi ngwí kala hundu. Jihova wabhange o kifika kiki, phala kutukwatekesa kumona kwila, o ituxi yetu atena kwizelesa mu ukexilu watenena.
“Né-mbé ituxi yenu ya kusuka kala husu, ya-ndu zela mukwâ ni neve né-mbé yedi ngwí kala hundu, yila mwene phalatatá mukwâ ni kindemba kya mbudi izela” (Iza. 1:18)
10. Kyebhi o Bibidya ijimbulula o ukexilu wa Jihova kutuloloka?
10 Kala kitwadilongo mu milongi yatundu-mo, o ituxi a isokesa we ni “makongo.” (Mat. 6:12; Luk. 11:4) O makongo metu adibandekesa ithangana yoso. Kyoso kituta kituxi kyedi kala twamuta dikongo dya kitadi kyavulu! Maji kyoso Jihova kya tuloloka, kyedi kala waloloka o dikongo dyetu, mwene katujijidika dingi kufuta o dikongo di twatele. O kifika kiki kilondekesa kyambote kyebhi ki tudivwa kyoso Jihova kya tuloloka!
‘Tu loloke o makongo metu’ (Mat. 6:12)
11. O kujima o ituxi yetu kulombolola ihi? (Ikalakalu 3:19)
11 Jihova kaloloka ngo o makongo metu mba o ituxi yetu, maji u ijima we. (Tanga Ikalakalu 3:19.) Mu kifika xinganeka kwila o dikongo dye adisoneka kuphaphela anga kumoneka muthu uta mixinda ku dyalwilu dya dikongo di wate. Sumbala, kwala mixinda ku dyalwilu, maji o athu atena hanji kutala o dikongo. Maji o kujima kima, kya difu kyengi. Phala kutendela o kifika kiki twatokala kulembalala kwila o tinda yexile musoneka nayu mukulu ki yabhonzele ku ijima ni menya. O muthu weji tena kukwata kima kya bete ni kujima o isoneku yoso. Kyoso o dikongo akexile mu difuta, o athu kexile mutena kumona dingi kima. Mu kiki kyoso kyexile “mufuta” o dikongo dyene dyexile mujimuka. Kyedi kala o dikongo nuka aditele. Tusakidila kyavulu Jihova mu kwijiya kwila kyoso kyaloloka o ituxi yetu, kyedi kala nuka twakitele!—Jisá. 51:9.
“Phala o ituxi yenu a mi jimune-yu” (Ika. 3:19)
12. Ihi i twadilongo yalungu ni kifika kya mbundu?
12 Jihova ujimbulula ukexilu wengi wa kuloloka o ituxi yetu. Mwene wambe: “Ikuma yé ngi i jimuna kala mbundu, o ituxi yé ngi i bhwisa-ku kala dituta.” (Iza. 44:22) Kyoso Jihova kyaloloka o ituxi yetu kyedi kala wakwata dituta phala kusweka o ituxi yetu. Kikale mwene mba etu, seku muthu utena ku imona dingi.
“Ikuma yé ngi i jimuna kala mbundu” (Iza. 44:22)
13. Kyebhi ki tudivwa kyoso Jihova kyaloloka o ituxi yetu?
13 O ifika yiyi itulonga ihi? Kyoso Jihova kyaloloka o ituxi yetu, kikubhingi dingi kuditatela ku mwenyu wetu woso. Bhukaxi ka manyinga a Jezú Kidistu, o makongo metu oso a ajimi kyá. Kyoso Jihova kyaloloka o ituxi yetu kyedi kala nuka twa kitele. Yu wene o muloloki wa kidi utunda kwa Jihova kyoso ki tudyela o ituxi yetu ni muxima woso.
JIHOVA UTUXIKINA LWAMUKWA DINGI KALA TU MAKAMBA MÊ
O muloloki wa Tat’etu ya dyulu utwehela kukala ni ukamba wambote ni mwene (Tala okaxi 14)
14. Mukonda dyahi tutena kudyelela mu muloloki wa Jihova? (Tala we o jifoto.)
14 Kyoso Jihova kyaloloka o ituxi yetu, tutena kudyelela ni kidi kyoso kwila, lwamukwa dingi mwene kamba dyetu. Kuma o muloloki wa Jihova wa kidi, kitwatokala kusuluka ni kuditatela. Kitwatokala kukala ni woma wa kwila Jihova watukwatela hanji njinda ni kwila wa musota maukexilu phala kutukastikala. Mwene nuka wanda bhanga kiki. Kyoso Jihova kyamba kwila watuloloka, o kwila tutena ku mu dyelela? Jihova wambe kwa polofeta Jelemiya: “Mukonda nganda kuloloka o ikuma yâ, o ituxi yâ kinga kà ixinganeka dingi.” (Jel. 31:34) Poxolo Phawulu watumbula o izwelu yiyi kyoso kyambe: “Kinganda lembalala dingi o ituxi yâ.” (Jih. 8:12) O izwelu yiyi ilombolola ihi?
“O ituxi yâ kinga kà ixinganeka dingi” (Jel. 31:34)
15. Kyoso Jihova kyamba kwila kalembalala dingi o ituxi yetu, kiki kilombolola ihi?
15 Mu Bibidya o kizwelu ‘ngilembalale,’ mu ithangana yavulu ki yene mulombolola muthu ulembalala mba kuxinganeka mu kima. Mu veji dya kiki, itena kulombolola muthu wamubhanga kima. O kifumbe amuphaphele ku taka ku mbandu ya Jezú wabhingi: “Ngi lembalale kyoso kiwanda bokona mu Utuminu wé.” (Luk. 23:42, 43) Mwene wakexile mubhinga kwa Jezú phala kubhanga kima mu kithangana kyenyokyo. Jezú wambe ku diyala kwila weji kumufukununa. Mu kiki kyoso Jihova kyamba kwila kalembalala dingi o ituxi yetu, kiki kilombolola kwila mwene watuloloka o ituxi yetu ni kwila ku hadya kanda tufundisa dingi mukonda dya ituxi yetu.
16. O Bibidya yamba ihi yalungu n’etu?
16 Kyoso Jihova kya tuloloka, tudivwa kyambote. O Bibidya ibhana kifika kyengi phala kutukwatekesa kutendela o maka enya. O Bibidya yamba kwila tu “abhika a kituxi” kyetu. Maji kyoso Jihova kya tuloloka, tukala kala abhika ‘ajituka kyá ku ituxi.’ (Lom. 6:17, 18; Dij. 1:5) Kyoso kitwejiya kwila Jihova watuloloka kya, tusanguluka kyavulu kala kisanguluka o mubhika amujituna.
“Mwakituka mu abhika a kuyuka” (Lom. 6:18)
17. O muloloki utubhangesa kukala dingi ni ihi? (Izaya 53:5)
17 Tanga Izaya 53:5. Kuma twakwa ituxi o Bibidya yamba kwila, twadifu ni athu ala ni uhaxi wabhonzo. Jihova watusake bhukaxi ka sata ya Mon’ê, Jezú. (1 Ph. 2:24) Kyoso ki tuta kituxi tuzanga o ukamba wetu ni Jihova, maji bhukaxi ka kukula, mwene utuloloka o ituxi yetu ni kwila tutena dingi kukala ni ukamba wambote ni mwene. O muthu amusake ku uhaxi wabhonzo, usanguluka kyavulu. Kyene we kibhita n’etu kyoso Jihova kya tusaka ku uhaxi mu nzumbi, ni kutuxikina dingi.
“O italakanya yê yene ya tu sake” (Iza. 53:5)
IHI ILOMBOLOLA O MULOLOKI WA JIHOVA PHALA ETU?
18. Ihi i twadilongo mu ifika yiyi izwela yalungu ni muloloki wa Jihova? (Tala we o kaxa “Kyebhi Jihova Kyatuloloka?”)
18 Ihi i twadilongo mu ifika yiyi izwela yalungu ni muloloki wa Jihova? Kyoso Jihova kya tuloloka, mwene ujima o ituxi yetu. Kiki kitukwatekesa kukala ni ukamba wambote ni mwene. Tulembalala we kwila o muloloki ujitu wa tubhana Jihova mukonda watuzolo ni kwila mwene mukwa kubhana, ki mukonda twafwama ku utambula.—Lom. 3:24.
19. (a) Ihi i twatokala o kusakidila? (Loma 4:8) (b) Ihi i twanda dilonga mu milongi yakayela?
19 Tanga Loma 4:8. Tusakidila kyavulu Jihova mu kukala Nzambi ‘uloloka mu kidi!’ (Jis 130:4) Maji se twamesena kwila Jihova utuloloka, twatokala kubhanga yazwela Jezú: “Se mu kamba kuloloka o ituxi ya athu, Tat’enu kanda mi loloka o ituxi yenu.” (Mat. 6:14, 15) Kyenyiki twatokala kukayela o phangu ya Jihova ni kuloloka akwetu. O milongi yakayela yanda londekesa se kyebhi kitutena kubhanga kiki.
MWIMBU 46 Twa Sakidila, Jihova
a Mu mikanda yokulu ya Hebalayiku mu velusu yiyi mwala o kizwelu “o muloloki,” kiki kilombolola kwila sumbala sayi maukexilu a mukwa a kuloloka, maji yu wene ngo o muloloki wa kidi. Jibibidya javulu kijitumbula o kizwelu kiki mu Jisálamu 130:4.
