Tat’etu ni mam’etu exile akwa Katólika. Exile muxikina mu ngeleja yiyi ni kuswina kwoso. Maji kyoso kyadilongo mu Bibidya kwila o dijina dya Nzambi Jihova, ene akituka Jimbangi ja Jihova. Tat’etu weha kubhanga o iteka ya Jezú. Kuma wexile musongi wambote wa mabaya, mwene wayudika mbandu ya inzo yetu ni itene kukala o Kididi kyadyanga kya Ubhezelu mu sanzala ya San Juan del Monte, mu mbanza ya Manila, mu ixi ya Filipinas.

Kyoso kyangivwala ku muvu wa 1952, o jitata jami angilongo yalungu ni Jihova kala kyabhangele ni sambwadi dya makota mami. Kyoso kingayi ni kukula, tat’etu wangiswinisa kutanga kibatulu kimoxi kya Bibidya izuwa yoso. Twadilongo we kumoxi madivulu avulu a kilunga kya Jihova. O jitata jami exile muzalela o tufunga twa ilunga ni ajitu a atumikisa kwala o filiyale. O misoso ya jiphange jiji yatusangulukisa kyavulu, yatuswinisa we kubhanga dingi mu sidivisu ya Jihova.

Ngadilongo kyavulu ni jitata jami, ene exile ni kixikanu kya kolo kwa Jihova. Kyoso mam’etu kyafu, eme ni tat’etu twakituka tu aboki athembu yoso ku muvu wa 1971. Ku muvu wa 1973 kyoso kingexile ni 20 a mivu, tat’etu wafu. O kufwa kwa jitata jami kwangibhangesa kudivwa ubheka. Maji o kixikanu “kyakolo” mu kikanenu kya Bibidya kyalungu ni difukunukinu kyangikwatekesa kyavulu, kyangizukamesa we kwa Jihova. (Jih. 6:19) Kyoso tat’etu kyafu mu kubhita tu ithangana, ngaxikina kuya mu kikolo kya Coron, mu mbanza ya Palawan, phala kukala muboki wa katunda.

Kyoso kingabhixila mu sanzala ya Coron, ngexile ni 21 a mivu. Kuma ngakudila ku mbanza yonene, ngadiwanene kyavulu kyoso ki ngabhixila mu sanzala ya Coron o mukengeji ni menya yexile muya ithangana yoso, kikwexile makalu avulu né tupapula twavulu. Mukikolo mwexile ngo aboki ofele, kuma eme ngo ngexile ngi muboki wa katunda sayi ithangana ngexile muboka ubheka  wami. Ku mbeji ya dyanga ngexile ni ngunzu ya mwiji wami ni ya makamba mami. Mu mausuku ngexile mutala ku jithethembwa anga ngexile mudila. Ngamesenene kweha o kikalakalu kya kuboka ni kuvutukami kubhata.

Kyoso kingexile mu divwa ubheka, ngexile musamba kwa Jihova ni kumutangela yoso yexile kumuxima wami. Ngexile mulembalala o ima ingexile mutanga ku madivulu metu ni mu Bibidya. Ngexile mu lembalala izwela o divulu dya Jisálamu 19:14. Ngamono kwila se ngeji xinganeka mu ikalakalu ni mu idifwa ya Jihova, mwene weji kala ‘Nguzu yami, Mubhuludi wami!’ O milongi ya Mulangidi ni dyambu “Nunca está sozinho” a ya ngikwatekesa kyavulu. Eme ngexile mutanga o milongi yiyi muveji javulu. Kyoso kingexile ubheka wami, eme ngexile mudivwa kwila Jihova wala nem’ê, eme-phe ngexile musamba, kudilonga ni kuxinganeka mu ima i ngexile mudilonga.

Kyoso ki ngabhixila ku Coron, ku pholo dya kwenda ngakituka kafunga. Kuma eme ngo ngexile kafunga, ngexile mubhanga o jimbandu joso ja yonge ya kaxi ka semana ni ya disukilu dya semana. Ngexile mubhanga o madiskulusu akatunda mu masukilu moso a semana. Ki ngexile dingi ni kithangana phala kukala ubheka!

Eme ngawabhelele kyavulu kuboka ku Coron, sayi maxibulu mami a abatizala. Maji kwexile we ibhidi yengi. Phala kubhixila ku mbambe ngexile mukwenda kyavulu, sayi bhabha kingejidile se nganda zeka kwebhi. O kilunga kyetu kyatokalele we kuboka mu ikolo yamukwa yofele. Sumbala kingejidile kuzowa, phala kubhixila-ku, ngexile mukwenda mu ulungu, né mwene ni mabhuku avulu. Jihova wexile mungilanga ni kungikwatekesa mu ibhidi yoso yiyi. Kupholo dya kwenda ngamono kwila Jihova wexile mu ngilonga phala o ikalakalu i ngeji tambula kupholo.

Ku muvu wa 1978, angitumikisa mu ixi ya Papua Nova Guiné. Mu ixi yiyi mwala milundu yavulu. Ngadiwana mu kwijiya kwila o tuzunda tutatu twa athu atungu mu ixi yiyi, azwela 800 ja madimi ndenge. Avulu mudya azwela o dimi dya Tok Pisin.

Kyadyanga angitumikisa mu kilunga kya dimi dya Kingileji, mu mbanza ya Port Moresby. Anga angitumikisa mu kilunga kyexile muzwela o dimi dya Tok Pisin, ya exile mu ngilonga o dimi didi. Yoso yexile mungilonga, ngexile muzwela mu ukunji. Kiki kyangikwatekesa kudilonga o dimi ni lusolo. Mukithangana kyofele, ngexile kya mubhanga diskulusu mu dimi dya Tok Pisin. Ngadiwana kyavulu mu kwijiya kwila, mu muvu wakayela angisolo kala ngi kafunga ka ilunga phala kukunda o ilunga ya dimi dya Tok Pisin. Ngatokalele kukunda o ilunga mu jimbanza javulu.

Kuma o ilunga kiyexile mu mbambe imoxi, ngatokalele kwenda kyavulu ni kubhanga yonge yavulu ya ilunga. Kudimatekenu ngexile mudivwa ubheka mukonda ngexile mu ixi ya ubhe, o athu exile muzwela dimi dyengi, o ijila yâ kiyadifwile ni ijila ya ixi mungatundu. Ki ngexile mutena kwendela ku makalu mukonda dya milundu yavulu ni kwila o ikoka kiyayukile. Jisemana joso ngexile mukwenda njila bhukaxi ka kiphululu. Sayi bhabha eme ngo ni mwendexi twexile mukwendela mu kiphululu, kyene ki kyexile kyambote. O kwendela mu iphululu yiyi yexile mu ngibhekela hele yavulu, kala o hele i  ngexile nayu kyoso kingexile mukwendela mu ulungu!

Athu ofele ngo exile ni mitelembe ya kafwetele, mukiki ngexile mudizwelesa ni jiphange mu ilunga bhukaxi ka mikanda. Kuma o mikanda yexile mulaleka o kubhixila ku jiphange, eme ngexile mudyanga o kubhixila. Mukiki ngexile mu kwibhwidisa ku athu se kwebhi kwexile o jinzo ja jimbangi ja Jihova. Kyoso kingexile mu disanga ni jiphange ngexile musanguluka kyavulu mukonda dya nguzu i ngexile mubhanga. Ku mwenyu wami woso ngexile mumona kwila Jihova wexile mu ngikwatekesa kyavulu, kiki kyangizukamesa dingi kwa mwene.

Mu kyonge kyami kya dyanga mu kikolo kya Bougainville, dikaza asangulukile angizukama, ya angibhwidisa: “Watwijiya?” Ngalembalala kwila nga abhana umbangi kyoso ki nga bhixila muveji ya dyanga mu mbanza ya Port Moresby. Eme ngexile mwalonga o Bibidya, ku pholo dya kwenda ngabhingi kwa phange yengi phala kwalonga o Bibidya. Mu kithangana kyenyokyo kitwadisange, kiyadi kyâ a abatizalele kya! Didi dibesá dya ngibhana Jihova kyoso ki ngakexile mu ixi ya Papua Nova Guiné.

Ande dya kutunda mu mbanza ya Coron mu muvu wa 1978, ngejidile phange ya muhatu wafwamene o pholo dijina dyê Adel. Mwene wexile muboki wa thembu yoso, wexile musasa twana tuyadi, manu Samuel ni Shirley. Yu wexile we mulanga many’â wakukile kya. Mu mbeji ya Kasambwadi wa 1981, ngavutuka ku Filipinas phala kukazala ni mana Adel. Kyoso ki twakazala, eme ni mana Adel twexile aboki a thembu yoso, twexile we mulanga o mwiji wetu.

Ne mwene ni mwiji wami, ngatambula dingi o ujitu wa kukalakala kala muboki wa katunda mu muvu wa 1983. Angitumikisa mu kikolo kya Linapacan, mu mbanza ya Palawan. Etu enyoso twayi mu kididi kimwexile Jimbangi ja Jihova. Muvu umoxi kupholo o many’â mana Adel wafu. Ne kiki twasuluka mu kuboka. Kiki kya tukwatekesa kudibhana ni ndolo ya kufunda ndandu ya kazola. Twamateka kulonga o Bibidya ku athu avulu amesenene kuya mu yonge, mukonda dya kiki kwabhingile kididi kya ubhezelu. Mu kiki twatungu kididi kya ubhezelu. Kyoso ki twabhixila-ku, mu kubhita mivu itatu, twasangulukile kyavulu mu kumona 110 dya athu ku Lembalasa ya kufwa kwa Jezú. Ku pholo dya kwenda avulu mudya a abatizala.

Ku muvu wa 1986, angitumikisa mu kikolo kya Culion, mwexile athu avulu akatele o uhaxi wa dibhute. Mukusuluka, mana Adel amubhana we o kikalakalu kya kukala muboki wa katunda. Kudimatekenu twexile ni hele ya kubokela o athu exile ni uhaxi yú. Maji o aboki a dyembu didi atutangela kwila o jihaxi exile mwatalatala mu ukexilu weji fidisa kutusambukisa o uhaxi yu. Sayi jihaxi exile muya mu yonge mu dibhata dya phange imoxi ya muhatu. Mu kubhita kithangana, twejidila kuboka mu dyembu didi ni kubokela o athu exile mubanza kwila Nzambi ka azolo, ni kwila akwa exile mwasebhulula. Kyexile mutusangulukisa kyavulu kumona o athu akatele lwavulu kwijiya kwila ku hádya anda kwasaka.—Luk. 5:​12, 13.

 Ihi i twabhange phala o kukwatekesa o twana twetu kwijidila kukala mu kikolo kya Culion? Twexana phange jiyaji ja ahatu, minzangala, atundu mu mbanza ya Coron phala kutunga netu. Manu Samuel, ni mana Shirley, ni ilumba iyadi yiyi, awabhelele kyavulu kuboka. Ene exile mudilonga o Bibidya ni nzungule dya ana-ndenge, eme ni mana Adel, twexile mudilonga ni jitata ja ana yá. Twexile mulonga o Bibidya ku 11 dya miji. Mu kubhita ka kithangana, o maxibulu metu exile mukula mu nzumbi. Mukonda dya kiki kwamoneka kilunga kya ubhe.

Kudimatekenu, eme ngó ngexile ngi kafunga. O jiphange ku filiyale angixindi phala kungibhwidisa se ngeji tena kwendesa o yonge ya kaxi ka semana mu kikolo kya Culion, mwexile dinake dya aboki, ni kubhanga we kiki mu sanzala ya Marily mwexile divwa dya aboki. Phala kutunda ku Culion ni kubhixila ku Marily, kwabhingile kwenda ola jitatu mu ulungu. Kyoso o yonge yexile mubhwa, twexile mu kwenda bhoxi ji ola javulu bhu milundu, phala kubhixila mu sanzala ya Halsey, ni tutene kulonga o Bibidya ku athu.

Mu jisanzala jiyadi jiji, athu avulu akituka Jimbangi ja Jihova, kyenyiki atungu-mu ididi iyadi ya Ubhezelu. Kala kyabhiti mu mbanza ya Linapacan, o jiphange ni maxibulu a Bibidya, abhana imbamba yavulu, akalakala we kyavulu. O kididi kya Ubhezelu kya mbanza ya Marily, mweji tena kubokona-mu 200 ja athu. Twexile we mu kisanzumuna phala kubhanga-mu o yonge ya ilunga.

Ku muvu wa 1993 kyoso o twana twetu kyakulu, eme ni mana Adel twamateka kukunda o ilunga mu ixi ya Filipinas. Ku muvu wa 2000, ngabhange o Xikola ya Akunji a Nzambi phala kulala mulongexi wa xikola yiyi. Ngakexile mubanza kwila kingafwamene kukala mulongexi wa xikola yiyi, maji mana Adel wangiswinisa kyavulu. Mwene wangilembalesa kwila Jihova weji kungibhana o kutena phala kukumbidila o kikalakalu kiki kya ubhe. (Fil. 4:13) Mana Adel wejidile kwila kiki kidi, mukonda mwene wexile mukumbidila o kikalakalu kyê né mwene ni uhaxi.

 Ku 2006 kyoso kingexile mulonga o Xikola ya Akunji a Nzambi, mana Adel wakwata o uhaxi wabhonzo. Twaluwalele kyavulu! Kyoso ki ngabhana o ndunge ya kuxisa o kikalakalu kyetu phala kumulanga, mana Adel wambe: “Ngakudyondo sota dotolo yanda ngikwatekesa mu uhaxi wami, ngejiya kwila Jihova wanda tukwatekesa mu kikalakalu kyetu.” Mu mivu isamanu ku pholo, mana Adel wasulukile mu sidivisu yê kwa Jihova, nuka wadikalanganzele. Kyoso mwene kyalembwa o kwenda, mu kuboka mwene wexile mu xikama mu kyalu kyê kya malola. Kuma kexile dingi muzwela kyambote, mu yonge mwene wexile ngo mutambwijila mu izwelu yofele. Jiphange javulu exile mutumikisa mikanda phala ku mutangela kwila mwene wexile phangu ya kukolokota. O jiphange abhange kiki katé mana Adel kyafu mu muvu wa 2013. Eme ngasidivila kumoxi ni muhatu wami mu 30 a mivu ndenge. Ngamuzolele kyavulu mukonda mwene wexile fiyele kwa Jihova ni kokwami. Kindala ngaluwala kyavulu, ngamudivwa dingi ubheka.

Mana Adel wamesenene kwila ngisuluka mu kikalakalu kyami, mu kiki kyene kingabhange. Ngasuluka mu kukalakala ni kuswina kwoso, kiki kyangikwatekesa phala kingiluwale kyavulu. Ku muvu wa 2014 ndu 2017, ngamateka kukunda o ilunga ya dimi dya Tagalu mu jixi o Jimbangi ja Jihova kala ni ufôlo wavulu. Ngexile mukunda o ilunga mu ixi ya Taiwan, Estados Unidos ni ku Canadá. Ku muvu wa 2019, ngexile ngi mulongexi wa Xikola ya Akunji a Utuminu mu dimi dya Kingileji, mu ixi ya Índia ni ku Tailândia. Ngisanguluka kyavulu kyoso kingibhanga o kikalakalu kya Nzambi.

Kwoso-kwoso kwangitumikisa, ngizola kyavulu o jiphange, kwene mu ngibhonza kyavulu kwaxisa. Mu ithangana yiyi ngadilongo kudyelela kwa Jihova. Jihova wene mungikwatekesa jinga, kiki kyene mungikwatekesa kuxikina kikalakalu kyoso-kyoso ni muxima woso. Kindala ngi muboki wa katunda mu ixi ya Filipinas. Ngasanguluka mu kilunga mu ngala, o jiphange ene mungilanga kyambote. Ngasanguluka mu kumona kwila manu Samuel ni mana Shirley ala fiyele kwa Jihova, mu kukayela o phangu ya many’â.—3 Nz. 4.

Ngabhiti mu ibhidi yavulu ku mwenyu, kibhidi kimoxi o kumona kazola kami kutala hadi mukonda dya uhaxi wabhonzo, katé kyafu. Maji mu ima yoso yiyi ngamono kwila Jihova “sé-ku muthu wa mukala dikanga.” (Ika. 17:27) O “lukwaku lwa Jihova ki lwa konana” phala kukwatekesa ni kuswinisa o jiselevende jê, katé mwene yó ala ku maxokololo. (Iza. 59:1) Ku mwenyu wami woso, ngene mumona Jihova, o Ditadi dyami, kungikwatekesa kyavulu. Mukonda dya kiki, ngene mu musakidila kyavulu mukonda nuka ngexile ubheka wami.